كيزان الصف الثاني

خلينا ناخدكم كلكم كده بي رد واحد
يأخي الكريم هل كل من عارض هذا النظام الفاشل كووز – ضروري يعني – مافي أي خيار آخر؟!
أوكي خلينا نمشي معاكم على قدر عقولكم ونجاري طفوليتكم وسذاجتكم افترض وهب إني كوز يأخي هب انه كل من وقف وعارض هذه الحكومة الفاشلة هو كوز وابن ستين كوز ياخي قول كل الشعب ده كيزان
هل انت شغلتك بس هي البحث عن الكيزان والهتاف ضدهم وتقعد تكورك وتحلقم !؟
ده عمارك يعني كحكومة ؟ ده شنو شغل الهتافيات الطفولية الساذجة ده ! ..
ياسادتي الأفاضل انتو الآن حاكمين بلد ودي حكومة على كاهلها أعباء وواجبات الواقع بيقول انها حتى تاريخه فشلت تماما فيها وأمامها شعب أجاعته وأذلته وجعلت منه مسخا مشوها ما قادر يعيش او يجد ما يسد به رمقه وخدمات متردية تكاد ان تكون صفرا كبيرا امامكم جيش من الجياع شبعوا هتافيات وكلام ونقة ووعود زائفة زي رغوة الصابون وخدمات متردية صارت أسوا من الأول بمليون مرة دي حقائق وواقع ماثل امامكم على أرض الواقع الرد على كل الكلام ده بيكون بأنك تطلع كحكومة وتوري الشعب الانت بتغش فيهو ده انت عملت ليهو شنو وحلك شنو لتردي الوضع المعيشي والخدمات مش تقعد تكورك وتحلقم كل ما تسمع ليك صوت بيعارض الحكومة كيزان كيزان كأنك اكتشفت الذرة انت قايل الكيزان ديل مافيشين يعني؟ هل هم انقرضوا ولا حيختفوا بي هتافك العبيط ده ؟
ولا باربي هم منتظرين انت تجي تكتشفهم ؟ولا هم خايفين من كوراكك كيزان كيزان ؟ دي شنو السذاجة والعبط والطفولية البتمارسوها دي الوضع الآن أقبح وأقذر وأسوا من زمن الكيزان فما تهرونا بي عبطكم ده الشعب مش ناقص عبط وهباله ولا منتظر هتافياتكم الساذجة دي – فعلا اليسار لا يصلح لحكم كشك ليمون فيهو خلاطين وجك و(كم كوز) وحفّاظة ناهيك عن حكم بلد بحجم السودان انتو حتى تاريخه ناس بتاعين حلقمة وكوراك وهتافيات ولا تصلحوا إلا للمعارضة والعمالة وبس حكومة حمدوك حكومة ضعيفة وهزيلة وفاشلة ولم تقدم أي شيء سوى الوعود الكاذبة والخطب والهتافيات هل بتقدروا تنكروا كلام زي ده ؟ ثم الكيزان انتوا كيسار حاكم وضعتم يدكم في يدهم والآن هم شركاءكم في الحكومة وقاعدين تتضاحكوا معاهم وواضعين يدكم في يدهم وبتداهنوهم وتمسحوا جوخهم فما تجوا تعايروا الناس بحكاية كيزان وما عارف أيه لأن الكيزان فضلة خيركم وشركاءكم كحكومة فاشلة

بعدين ارتقوا شوية وبطلوا حكاية النبز والشتائم لانه دي بتسيء للحكومة الانتم بتدافعوا عنها
الزول يا يرد بمنطق وفهم يا ينطم يسكت ويحشي ليهو قبضة تراب في خشمو