يا بوليس ارجع ثكناتك (قصيدة)

نحن مرقنا مرقنا مرقنا
ضد الناس السرقوا عرقنا
***
يا بوليس ارجع ثكناتك
وزيل الخجل الكسى وجناتك
ضاقوا الذل والجوع فلذاتك
لِمْ بُمْبَانك … لا تشرقنا
***
نحن مرقنا مرقنا مرقنا
ضد الناس السرقوا عرقنا
***
وينو أمامكم يا الأنصار ؟
وكنتو الشعلة التوقد نار
حليل تاريخكم بقى تذكار
وقوفكم تحت الضللة حرقنا
***
نحن مرقنا مرقنا مرقنا
ضد الناس السرقوا عرقنا
***
وحلم أبوي في حزب الأمّة
كان بيقول (إتْ) أمل الأمّة
مناهو الضاع فد يوم ما تمّ
وولدك وسط السرقوا عرقنا
***
نحن مرقنا مرقنا مرقنا
ضد الناس السرقوا عرقنا
***
أما الميرغني خرّف وودّر
لملم عفشه وشتت وبدّر
في بريطانيا هناك إتحّكر
ما همّاو .. والدم غرّقنا
***
نحن مرقنا مرقنا مرقنا
ضد الناس السرقوا عرقنا
***
مالي بشوف الشارع نائم
لا شابّات لا شباب لا بهائم
غير عربات الأمن الحائم
جايّة عواصف ورعد وبرِقنا
***
نحن مرقنا مرقنا مرقنا
ضد الناس السرقوا عرقنا
***
كيف بنوم والدم مازال
في شوارعنا يسيل هطّال
ليه نستسلم مع ها الحال
هيّا لننقذ نحن بلدنا
***
نحن مرقنا مرقنا مرقنا
ضد الناس السرقوا عرقنا
***
قول يا هاشم وصوتك صادع
ضد الظلم الشبّ موانع
كنا حشود واسود بتصارع
الاّ فترنا وزغنا لبدنا
***
نحن همدنا غمدنا لبدنا
وخفنا الهمج السرقوا بلدنا
***
بدينا خطانا مشينا الأولى
هبّوا لنمشي الخطوة التانية
اهدروا وارعدوا مافي تراجع
واقنعوا من الدنيا الفانية
فإما نصرٌ واما شهادة
لنسكن جنة قطوفها دانية
***
واهتفوا نحن مرقنا مرقنا
ضد الهمج السرقوا عرقنا

(أبو سارة)

[email][email protected][/email]