خربشة في جدران الزمن الفلاني

يا زمن وين ديك ليالينا الهنيِّة
بعد ما اتعمقت فينا جروحا قهرت النفس الأبيَّة ..
يا ريت لوبنعرف ليه بتكره وتدوس كمان أعشابنا الصغيرة ؟؟
الكُلِ مناها تكبر لينا وتكون ظليلة ….

ليه تقول البينَّا روح .. وأصبح سراب شوف أماسينا الجميلة ؟؟
ياريت لو تسمعهم ..وتحقق لينا الأماني السندسية ..

ديل شباب عاوزين يحسُّوا بعزة بلدنا رغم أنف الأسيَّة
ديل عاوزيننا نكون زي باقي الأمم ..ونفارق العزلة الجاثمة فينا سنين طويلة……

يا زمن…ليه بتمشي سنين طويلة تحكي عن لحظات واقعنا المريرة ؟؟
يا زمن……تفتكر ديل بحسُّوا ولَّا عندهم مشاعر سويَّة؟؟؟
ديل عذاب ..وسرقوا كمان أفراحنا النديِّة.
وخلونا نلهث ورا لقمة العيش الهنيِّة ..
وراحت شهامتنا وأخلاقنا البهيِّة …
وأصبح الكل مهاجر …كايس ليه بلدا قصيَّة ..

ياريت لو بتمسح دمعة سالت من خدودهم…
وجبت ليهم فرحة تملا كل ساحاتنا الندية …
..
عشان تغسل أرصفة الزمن الفلاني ..وتمسح أحزان السنين وتقش كمان دمعتنا الحزينة .

ويفرحوا الناس الغلابة ويمسحوا عرقا طافح من جبينها..
بعد ما جانا الفجر يقدل ولاح شعاع الهنا الاتحرمنا منه سنين طويلة…
..
عشان يكشف لينا كمان سر لوحاتنا الدفينة ….
ويهتك لينا ظلمة ليالينا الطويلة….. …
يا زمن

[email][email protected][/email]