سودانير..تاني جبتو لينا سيره الطياره الواحده دي؟

ممكن البرلمان يورينا كلام وزير النقل القالو قدامو الاسبوع الفات فيما يخص سودانير كان قاصد بيو شنو؟ مش ياهو نفس الكلام الاتقال قبل كده؟ مش المنتدي الاتعمل واللجنه الاتكونت ولجنه النقل بتاعه البرلمان ذاتو برئاسه مشار الزارت رئاسه سودانير كلهم قالو انو سودانير عندها طياره واحده ومحتاجين لي عشره مليون دولار عشان صيانه بقيه الطيارات؟ طيب الجديد شنو؟ انتو الناس دي بياخدو ماهيه عشان الكلام ولاكيف؟ ولا دي دردقه عشان يدوهم القروش؟
ياجماعه متضيعو زمنا ساكت لانو موضوع سودانير دا نحنا قنعنا منو زي ماقنعنا من ولايه الخرطوم ومصلحه الاراضي والسودان كلو كمان. الحكومه ماجاده, ونحنا كمان مادايرنها تكون جاده في اصلاح الشركه عشان كده جمدوها لغايه مايتغير الحال وسيبو الناس تركب اي طياره تانيه. ولعلم الجميع. البركبها ببقي ذنبو في رقبتو مايجي يشتكي ويقول لينا عفشي اتسرق ولا الطياره اتاخرت اسبوع او الموظف اداني كف.
قلنا قبل كده وسنظل نقول انو الناس المسئولين في سودانير ماعندهم الدرايه الكافيه لي تشغيلا لانهم مجموعه من الهمباته تركيزهم الاساسي في المصالح الشخصيه. لا في ضمير ولا خوف من وزير ولا من الله سبحانه وتعالي يخليهم يشتغلو كويس. عشان كده حتي الطياره الواحده دي بعد شويه حاتلقوها مافي ولا اتحرقت ولا شلعوها وباعوها اسبيرات زي غيرا. لمن كنا شغالين في سودانير كان في سفريتين للابيض وبورتسودان يوميا. تجي الناس دي تعمل ليها احتفال كبير عشان فتحو خط الابيض؟ الحكايه بقت ظاهره والهدف طبعا مش افتتاح الخط وانما الاحتفال بي افتتاح الخط. احتفالات ناس الحكومه اصبحت الماسوره البيها كيزان الحكومه بفرغو الخزائن. نسيتو بتاع بربر العمل احتفال لافتتاح علامه (قف)؟
المهم. نحنا راينا في الوقت الحالي تتقفل سودانير بالضبه والمفتاح ويتسرحو الناس الفيها لانو اي قروش تتصرف عليها بتكون مساعده علي الفساد. اذا دا ماحصل, تتوضع مسئوليه التشغل علي عاتق الاداره العليا واي خطا تشغيلي تسأل منو مباشره, ووزاره العدل ترفع الحصانه منها وتدي الركاب الحق في مقاضاتا بالقانون الدولي لانو الحمايه بتديهم الامان. ولو اصلا الاداره العليا بقي ماعندها دم ودايره تنشف الشركه وتعصرا لي اخر نقطه زيت, ياها دي الطياره الواحده عندهم خليهم يبيعوها اسبيرات.
صراحه نحنا تعبنا وكل اوجهه القصور القلناها قبل كده وكانت واضحه الحكومه ماشتغلت بيها. مدير المحطه الاتكلمنا عنو, الشركه بتصرف عليو مليون درهم سنويا ولازال موجود في مكانو بس عشان اختو مؤتمر وطني وشغاله في الشئون الاداريه وماسكه بلاوي علي الناس ماقادرين يرجعو الخرطوم. ولجنه ايجار الطائرات مستمره في نهب اموالنا بالكمشنات التحت التربيزه. اما العاملين المساكين ليهم الله. رافعين يديهم للسما عشان يقبضو مرتباتهم اخر الشهر.
افتحو لينا ملف الفساد بتاع سودانير زي ماحصل في الولايه ووزاره العدل والاقطان عشان نرش الجماعه ديل ونوريكم الشريف وعبدالله والناس الكانو لافين حولهم كيف باعو خط هيثرو وكيف بي كل براعه حولو شركه كانت بتمتلك كم وعشرين طياره لي شركه شغاله بي طياره واحده. خلونا ندخل دهاليزها عشان نكشف المستور قبل مانفقد الطياره الوحيده الفضلت وندخل موسوعه جينيس كاول شركه طيران فيها عدد لا يستهان به من ذوي الخبره في مجال الطيران, ولا توجد بها طائره واحده شغاله.
Follow me in twitter@elrazi_elrazi