صيامكم …كيف ..؟
صيامكم كيف ..
يا العاصيين على التوصيف ..
وقط ما بتعرفو التحريف ..
وديتو الناس غريق الموج..
وقعدتو تعومو عند القيف..
صيامكم كيف ..
***
صيامكم كيف ..
يا الحارسين حدود الدين..
بى فقه السترة والتمكين..
يا اللي الدنيا ما عاملين..
ولا من أجلها مجاهدين..
ما دام للخلود قاصدين..
في الفردوس مع الخالدين..
وتظفرو بالحسان العين..
صيامكم كيف يا زاهدين ..
صيامكم كيف
***
صيامكم كيف ..
مع الصايمين..
القايمين تلوت الليل..
وسط العتمة من غير نور..
يكوسو الموية بالبرميل..
عشان ما عندهم موتور..
يرفع فوق لآخر دور..
زيك يا بروف غندور..
ولا شامين هواء التكييف..
ومتألفين جفاف وخريف..
مع قراص شتاء الديجور..
وإنتو هناك مساكم كيف ..
وكيفن عاد صيامكم كيف..
***
صيامكم كيف ..
وهل حاسين بى باقي القوم..
المابضوقو طعم النوم..
نهارهم كلو بره البيت..
عشان الويكة ولهّ الزيت..
عشان بس بصلة أو فص توم..
في سوق أم بدة والخرطوم..
وصيامكم كيف.
***
صيامكم كيف ..
و ناس الريف..
أهلنا الباقية في دارفور..
هناك حيث الضياع موفور..
والإنسانا .. حي مقبور..
مشرد في الشتات مجبور..
وفي كراكير الجبال محشور..
وجيشكم فوقو خاوي يدور..
يشبّع من هلاكو صقور ..
ضميركم كيف ..
***
صياكم كيف ..
يا البايعين جزيرة الخير ..
وهاجر فاتا حتى الطير ..
وما عاد في ترعنا خرير..
ولا في ضهر السراب تخدير ..
جنوب النيل جفافو كتير ..
وشرقنا كم شواهو هجير..
شمالنا الما وجد تبرير..
بيسأل في شقا و تحسير..
هل لى فصل الجنوب تفسير..
صيامكم كيف ..
***
صيامكم كيف ..
مرة سمعت يا مندور..؟
حكاية السرة بت النور..
بتغلي حصاها في التنور..
عشان الشافع الموجوع..
يجيهو النوم وينسى الجوع..
وبيتها الما غشاهو رغيف..
وإنتو هناك عشاكم كيف ..
سحوركم كيف ..
صيامكم كيف ..
وهل بتعرفو طعم الهم..
أو جربتو طفح الدم ..
مع اللمة الحياتها عدم..
أماني حياتها كيلو لحم..
وانتو الديب فريرز.. كم ..
مردم منو دوف وشحم..
صيامكم كيف ..
***
صيامكم كيف ..
وهل يا بكري قمت تطوف..
عشان تسمع براك وتشوف..
بشاعة المقنع المكشوف..
الجابراهو أقسي ظروف..
على بيع الشرف مكتوف..
عشان قارصاهو حمى الجوف..
وهو المن زمان موصوف..
وبى رفض العيوب معروف..
صياكم كيف ..
***
صيامكم كيف ..
يا ريس البلاد والناس..
هل يوم خامرك إحساس..
تجرد حسبة الكراس ..
ما بين الزمان الكان..
وبين ما أصابنا الأن..
الخلانا زي جرذان..
في حجور عصبة الطغيان ..
وإنت هناك هني وبطران..
سلمت اللحية للكيزان .
وشايف ثروة الأخوان..
وكل من جاكا بالبرهان..
قلت عمالة أمريكان..
صيامكم كيف ..
***
صيامكم كيف ..
يا نافع أقلو قليل ..
كان من بحر المعاني تشيل..
عبراً تبقى ليكا دليل..
وإنت القلت لينا قبيل..
حانسلمها عزائيل..
وشوف الليلة وضعك كيف..
صيامكم كيف..
***
ويا الشيخ الدخلت حبيس..
مع القايد الدفرتو ريس..
بعد حكماً ظلوم وتعيس..
جيت راجع تدق الميس..
تناطح تاني زي التيس..
على العلف الشحيح وبئيس..
صيامكم كيف ..
صيامكم كيف
صيامكم كيف ..
****
رمضان كريم وتصوم وتفطر على خير استاذنا برقاوى … قالوا الجماعة ديل زمان بياكلوا (((الحلو))) وباكلوا الشعب المسكين (((المر))) لكن فى رمضان بنتساوى معاهم كلنا فى شراب (((الحلو مر))) ههههههه الحمد لله لقينا لينا شيىء نتساوى معاهم فيهو … تقبل الله منا ومنكم الصيام والقيام … تحياتى …