جاتك رياح الصامتين

صامتين ندك عرش الطغاة
صابرين على كل البلاء
ظلم البغاة
سبتمبر اكتوبر نجاة
سنهوري عانق قرشي
ماشفت شي
ابريل سلام عرس الفداء
الخير وشي
الناس ترصرص في الصفوف
ماشفت شي
الناس تنقر في الدفوف
ما شفت شي
واقفين علي طرف النهار المحتشي
وجات البشاير تنتفض
مقيودة بي عزة شموخك تنتشي
ملت الشوارع بالهتاف
ابت الشوارع تتمشي
رقصت طرب
بلا وانجلا
ما قال بجي روح مشي
ياخي الخريف محق خلا بيوضة
والزمن الصعيب فات بي وشي
الهم رحل
ورفعنا رايات النصر
مشدودة بي حبل الصبر
مسنودة بي شعب المحل
يافرحة ما سمت
ولا لمت
ولا تمت
ولا عاش الامل
خاذوق نزل
ينقذنا قال
ينقزنا قول
وطعنا في القلب الهمل
سال دمو
جرحو الما اندمل
يا شعب لا ياخدك وجل
يا الماك جبان
ما عاش من بيك استهان
عرطملك الحجر الشقي
وخسر الرهان
زح يا حجر ما ليك مكان
ارحل.. كما القبلك رحل
اقنع …..حار بيك الدليل
انجع……عارفين البديل
الحق …والدرب العديل
اسمع….وسمعك مو تقيل
الموت …يحوم
ارحل …وجنبنا الدموم
غادر…بتكفينا الهموم
الغم واحزان السنيــن
ارحل متل ما سوى زين
ارحل وان لم تمتثل
جاياك رياح الصابرين
جاياك رياح الصامدين
جاياك رياح الصامتين
تكفي القدور
وتقلع خيام حكم الفجور
وتطلق عقال جملو وتثور
تفرنب الدجل الكجور
وترفرف فوقنا راياتك تدور
تندهنا تملا العتمة نور
نادوسك المقطوع يلم
خاتي النضم
قولة بغم
يظهر كما الفتح المبين
هبت رياح الصامتين
هبت رياح الصابرين
هبت رياح الصامدين
ونفكو دين
دين الوطن حاملنوا دين
واجب ننزلو من ضهر هم السنين
وينحل قيدك يا بلد فجرك يبين

عبدالمنعم العوض
[email][email protected][/email]