الحكومه الجديده..النهار في بيت نفيسه..والقلب مع المريسه

: حسن ود العمده……رغما انه العمده لاكتر من عشرين سنه لكن مافي زولا معترف بيهو كعمده…ولسه بيقولوا ود العمده..كانهم بيقولوا العموديه ماحقتوا لا اخلاق ولا معرفه انما بقى عمده قلع وختف عشان هو ود العمده الوحيده ومساندة أمه صفيه مرة العمده الصغيره المره الداهيه اللعبت بدقون رجال البلد كلها…..وخلتهم يتجاروا ورا حسن ودالعمده.
عبدالكريم عامل الوابور والكلاموا كله بس في الزيوت والمكنات…عمره ما ناداهوا بي ود العمده.. و مسميهوا مساعد الياي ويقول ودالعمده يوم ممكن يبقى عمده لكن مساعد الياي عمره ما ببقى ياي
.حسن ود العمده ما بيتذكر اسمه اسمه والا تلاحقه اللعنات والشتائم….نوع الله يجازيهو وياخد بي حقنا منو…..يورينا فيهو يوم….ومنهم المابيخفي اننيه بي الله ياخدوا ويريحنا من و….لكن ده ما نوع الكلام البتقال قدامو….ماهو كمان رئيس المجلس المحلي..ورئيس التعاون ..وقاضي المحكمه الاهليه..وما بيدسها المامعانا ماعنده حق عندنا…ولو شم فيك ريحة زهج او اعتراض على حاله المايل بكره تلقى كرت السكر رايح وماعندك صرفة جاز..ولا ولدك ما يقبلوه في المدرسه وقولوا ليك صغير جيبوا السنه الجايه…ويا ويلك لو لقى فيك فرصه .مويه قدام البيت او كيس وساخه في الشارع (حاجه التومه تحلف انه ودالعمده بيخت الحاجات بي نفسه)…بكره الصباح تلقى عليك غرامه من محكمة العمده يا غرامه ياسجن
خلى المدرس قبل ما يفك الخط….شرد خاف من العقاب لمن عرفوا انه سرق قلم الحبر بتاع الناظر…وأمه صفيه..أقنعت العمده
بلا مدارس ووجع دماغ…ولدك ما ودمدارس ومحتاج لي شهادتهم…ولا وظيفة الحكومه..مستقبله معروف العموديه راجياه…اااها قضى طفولتوا وشباب الاولاد والبنات يمشوا على المدارس….وحسن متابع جادين العوقه….و كمال ودابليس.البقى معروف بي مرسال ود العمده…والبينفذوا ليهو كل العاوزوا…
اها بدوا تعليمهم…وحياتهم بالسجاير والسعوط..واتعلموا درب الحله الفوق..وانداية نفيسه…
اااها بقوا يلقوا الحله فاضيه الرجال في الحواشات والشفع في المدارس….واستباحوا بيوت الناس ..وودابليس يسرقوا الجداد ويبيعوا في السوق..يضبحوا الغنم الحايم..ويبيعوهوا كيري..ويقضوا باقي نهارهم وليلهم في انداية نفيسه……ااها ناس الحله الكانت بيوتهم مفتوحه وقلوبهم مفتوحه..اتعلموا يقفلوا ابوابهم خايفين من ودابليس….يقولوا ليك اقفل الباب وراك مرسال ودالعمده يسرق الكحل من العين….
اااها لمن ابوهوا العمده اتوفى….حسن وقف وقعد في الديوان يستقبل المعزين و جادين..وودابليس شابكنوا اقعد ياعمده تعال ياعمده…ورجال الحله قاعدين وساااكتين فيهم الطامعين الخايفين..وفيهم الماسكاهم صفيه…والباقين الواحد في قلبوا يقول الخواف ربى عيالوا..
ااها ود العمده ما خيب ظن حاجه التومه القالت فيهو… المفعوص ده كان ما ورانا نجوم الضهر…..وصدقت وراهم نجوم الضهر وعلمهم الخوف..ومعاه اصحابه يبيعوا سكر التعاون…ويحلفوا انه من المديريه ما استلموا…يبيعوا جاز الوابور…وبنزين عربات المجلس…عملوا دمغة تصليح المدرسه..وتعمير الشفخانه…وصيانة البير…والمدرسه والشفخانه…حالهم ماشي لي وراء اتشلعت السقف طار والشفع يدرسوا في الواطه….وبيت العمده..كسروهوا وبنوها من الاول..وزايد..كل يوم بوهيه جديده وعفش جديد….
اااها يوم الناس متلمين في عزاء شيخ عبدالعزيز بعد مرض طويل خلاه ما متابع ادارة الحواشات..خلاها مامتابع لغف ود العمده واللهف بتاعه والوحيد الكان مأمول فيهوا يقيف قصاده..وخاصة كان مسئول في التعاون….اااها في الفراش ود العمده رمى ليهم الخبر المتوقع وقال ليهم باذن الله شيخ الحله ومسئول التعاون حيكون كمال ودابليس…..والرجال كل واحد ماسك خشموا وفي قلبوا يقول تمت الناقصه…وعايره يدوها سوط
بس ودالعمده طلع من العزاء والرجال بقوا يطنطنوا في المصيبه الجديده…وفضفضوا الكلام الما قالوهوا لي ود العمده في وشوا….وهم في كلامهم دخلت عليهم حاجه التومه وقفت في نص الصيوان وقالت ليهم(يارجال..اخجلوا …علي روحكم يعني مستغربين ..متوقعين شنو.من ود العمده…عاوزينوا يصلح المايل…ماهو ذاتوا سبب الخراب…وهو حيغير العلينا ليه…ربنا هداهوا..ولا..من فهموا ولا من قرايتوا …من راسو ولا من كراسو…..دايرينوا يجيب ليهوا مساعدين من وين..ما من العفن المعطون فيهو….شهاداتوا من بيت نفيسه…وعقلوا مع المريسه)…
والان ظهرت حكومة جديده للانقاذ
ويدور السؤال اها مستغربين على شنو..؟
كنتم متوقعين حكومه تصلح المايل زي ماقالت حاجه التومه….
لذا كم استغرب..كيف امتلات الاسافير بحكومة الانقاذ الجديده…وعن زيد وعبيد…والحديث عن من زور شهاداته..ومن باع الزيت الفاسد…ومن تطاول في البنيان…
وماذا كنتم تتوقعون؟؟؟
هل كنتم تتوقعون شرفاء نزيهين مؤهلين..ليبنوا دولة المواطنه والمؤسسات
ليرسموا خطة علميه للنهوض بالوطن…..ليرسموا دستورا يرسي السلام يحقق العداله ويحمي الحقوق….
ليحاكموا المفسدين!
ليلغوا فقه التحليل!!
ليرجعوا المفصولين !!!
ليحاكموا من عذب الشرفاء ومن اغتال علي فضل وصحبه؟؟
انها حكومة تتطابق اهدافها واشخاصها….ففيما تستغربون…؟؟؟
لقد أحسنوا الاختيار….
فمن اختيروا مؤهلين لما هو متوقع منهم…مزيدا من الافساد…وغض الطرف عن كل ماجرى….وتمهيد الطريق للمؤتمر الوطني لالتهام ما تبقى من وطن….
فقوموا لنضالكم يرحمكم الله
واتركوهم في حكوماتهم….وزي ماقالت حاجه التومه حيجيبوا ناس من وين..هم ما بيعرفوا سكة الشرف والنزاهه..وما بيعرفوا غير الوحل الغارقين فيه…وعقولهم الملوثه بالظلم والفساد..فهذا ماكتبوها على وزرائهم وفي عهد الانقاذ من كتبت عليه خطى مشاها…

مجدي أسحق
[email][email protected][/email]