تعليقات على عناوين صحف الثلاثاء 13يونيو 2017م
على مسؤوليتي
تعليقات على عناوين صحف الثلاثاء 13يونيو 2017م
🔹 فلنواصل الضغط من اجل :
* اعتراف النظام بوباء الكوليرا
* الغاء قرار تصدير اناث الماشية
📰 الجريدة
🔹 ضبط شهادات مزورة لمزاولة مهنة الطب بحوزة أجانب
قالو مادام وزير العدل بزور نحن كمان نزور ولا شنو 😂😂
📰 الجريدة
🔹 رئيس الوزراء : ايقاف الصحفيين اغراض شخصية لاعلاقة للحكومة بها
ودا منو صاحب الغرض الحكومة مابتقدر تقول ليهو تلت التلاتة كم 😳😳
📰 الجريدة
🔹 تردي الاوضاع بمستشفي الشعب والمرضي يقطعون العلاج لارتفاع التكاليف
طالما الاغنياء الفاسدين يتعالجون برويال كير وخارج السودان لن تتسحن مستشفيات الشعب باجمعها 😡😡
📰 الجريدة
🔹 برلماني : استمرار مجلس الولايات بالصورة الحالية إهدار للمال العام
يعني يحللو قروشهم زيكم بالصفقة والتكبير والتهليل 😅😅
📰 الجريدة
🔹 الاتصالات : صرف 21 مليون دولار علي الحكومة الإلكترونية
ماتكون دي القالت تهاني عبد الله غرقت في البدروم بتاع الإتصالات 😬😬
📰 أخبار اليوم
🔹 رئيس الوزراء : تحسن الاقتصاد مرهون برفع الدعم عن السلع
كدي يا بكري ورينا السلعة القاعدين تدعموها وماخاتين عليها ضرائب اكتر من سعرها 🤔🤔
📰 أخبار اليوم
🔹 وزيرة التعليم توجه بسرعة إجازة اللوائح والقوانين التعليمية
عينو معاكم سباكين في الوزراة لانو تسريبكم كتير طلاب وامتحانات 😝😝
📰 أخبار اليوم
🔹 خبير إفريقي : السودان أبدى براعة استثنائية في هزيمة المتمردين
السودان دا والله براعتو الشهدوا بيها الناس في الزوغانات في الجو بس 🤣🤣
📰 المستقلة
🔹 لجنة للتحقيق مع رئيس مجلس تشريعي جنوب دارفور
ورئيس المنصر الغرق البلد دا ماعندكم ليهو لجنة تحقيق 😡😡
📰 المستقلة
🔹 بكري : “الصحف الرياضية قاعد تقول كلام مافي محلو”
يعني خلاص كلام المسؤولين زي وزير الصحة في محلو ولا الهوت دوق في محلو 😂😂
📰 الوطن
🔹 اسقاط عضوية مهدي إبراهيم من البرلمان وتعيين عبد الماجد هارون مستشاراً للمجلس
وعبد الماجد دا عندو عصاية بتروح ولا سكين لابسها في صفحتو ساي 😅😅
📰 الوطن
🔹 وزارة العدل تشكو سبدرات لإتهامه لها بالتزوير
بالله الوزارة ذاتها شهاداتها مضروبة يا سبدرات 😳😳
📰 سودان فيشن
🔹 مساعد رئيس الجمهورية : السودان ضد التصعيد ويسعي لحل ازمة الخليج
والله السودان في ازمة الخليج دي زي كلب الخواجة يهز في ضنبو ويهمهم ماعارف بجيهو عضم ولا مابجيهو 😝😝
📰 آخر لحظة
🔹 بكري : الحكومة لا تتاجر في السوق وماضون في سياسة التحرير
ياخ انتو درداقات الشفع في الاسواق وكراسي ستات الشاي بتتاجروا فيها 😬😬
📰 المجهر السياسي
🔹 وفد الفيفا بقيادة النيجيري فيرون يصل الخرطوم ويلتقي الوزير اليوم
ماتودوهو للمندهش يقول ليهو نحن عندنا محترفيين نيجيرين بنطردهم ليكم 🤣🤣
📰 المجهر السياسي
🔹 المؤتمر الشعبي يعرض على قطر مبادرة لحل أزمة الخليج
انتو فاكرين دا خليج الخنازير يا السنوسي 🤔🤔
📰 الرأى العام
🔹 الرئيس أمام قمة إيقاد : الجنوب يدعم حركات دارفور
والجنوبين ماقالوا اي حاجة عن دعم رياك مشار 😳😳
📰 الراي العام
🔹 إدارة فيسبوك تغلق صفحة مزورة باسم البشير
التزوير هنا مابعمل مشكلة والمزورين وزراء ودكاترة ومدراء كبار 😅😅
📰 السوداني
🔹 رئيس الوزراء : صفرنا العداد وسنبسط الحريات
العداد دا صفرو الرئيس وقال صفرجت الا تكون وديتنا تحت الصفر جمدتنا قبال الفيفا 😂😂
📰 الصيحة
🔹 بكري : رفع الدعم عن السلع يساعد في تحسين الاقتصاد
رفع الدعم دا او بالاحري الزيادات يا سعادتك بساعد في تحسين ظروفكم انتو كاسر مسؤولين وكيزان 😬😬
📰 التيار
🔹 القائم بالأعمال الأمريكي للتيار : لا تزال هناك قضيتان عالقتان تحت نظرنا قبل القرار
بس مايكون مفتاحهن عند مدير المكاتب القالوا ببح دا 😝😝
📰 التيار
🔹 رئيس مجلس الوزراء : مشاورات لتعيين مفوض لمكافحة الفساد
ماتعينو واحد زي المرة الفاتت موقع علي اكتر من 60% من ملفات الفساد 😅😅
📰 الانتباهة
🔹 النائب الأول : “الفيفا قادرين عليها والاتحادين القديم والجديد حقاتنا”
الفيفا دي يا سعادتك والله مابتقدروا عليها لموا الجنرال لحدي مايمشو 🤣🤣
😝 بشير اربجي 😝
😝 Basheer Arbagi
تلعيقات خفيفة ومعبرة يا اربجي ، تشكر…
اضافة تعليق لتصريح النائب الاول :- رفع الدعم عن السلع يساعد فى تحسين الاقتصاد
كم مرة رفعتوا الدعم منذ اعلان سياسة التحرير الاقتصادى ولماذا لم يتحسن الاقتصاد حتى تعيدوا الدعم مرة أخرى ؟ وما قيمة تحسن الاقتصاد ما لم ينعكس على أحوال الناس المعيشية ؟
تلعيقات خفيفة ومعبرة يا اربجي ، تشكر…
اضافة تعليق لتصريح النائب الاول :- رفع الدعم عن السلع يساعد فى تحسين الاقتصاد
كم مرة رفعتوا الدعم منذ اعلان سياسة التحرير الاقتصادى ولماذا لم يتحسن الاقتصاد حتى تعيدوا الدعم مرة أخرى ؟ وما قيمة تحسن الاقتصاد ما لم ينعكس على أحوال الناس المعيشية ؟