من ينزله منكم «منزله» الذي يستحقه : محمد الامين.. الدعوات تتجدد والأمل يتمدد..!!
هيثم كابو
{ إذا أردت تعريفاً شاملاً وكاملاً للموهبة فعليك أن تكتفي فقط بكتابة إسمه لأنها ستفضي مباشرة للتعريف الأمثل .. فموهبته كالبحر هبة لا تصنع و كالمطر منحة لا تستجلب ، لذا من الطبيعي أن يكون رمزاً للإبداع يعرف قدر قيمته وجليل قامته كل صاحب حس فني وذائقة رفيعة .. هو ملاذ عشاق الفن الأصيل في زمن تلوث فيه مناخ الغناء وأعتقد البعض أن الموهبة (قرص أسبرين) يبتلعه الواحد منهم فيصبح بين طرفة عين وإنتباهتها فناناً مضيئاً منتجاً يشار اليه ببنان الإبداع ..!!
{تظل غنائية الفنان الموسيقار محمد الأمين بمثابة (كفارة فنية) لكل تشوهات الغناء علي مر العصور والأزمنة .. فهو صاحب تجربة كاملة التميز والإختلاف .. أختار أروع القصائد وأجمل الأشعار وأميز الكلمات وألبسها أردية لحنية مدهشة وقدمها للناس في طبق من جمال عبر أداء بديع .. إختط لنفسه مساراً فنياً خاصاً .. أجتهد وتعب وأحترم الجمهور و (الذواقة والسميعة) تحديداً فبادله الناس إحتراماً بإحترام وألتفوا حوله حتي بات الناطق الرسمي بإسم أحاسيسهم والمعبر عن أشواقهم وحامل لواء آمالهم وأحلامهم ..!!
{في رمضان الماضي تشرفنا بالإفطار علي مائدة محمد الأمين بمنزله العامر ببحري بدعوة من أمانة الشباب بحزب المؤتمر الوطني التي تصحو حيناً وتنام في معظم الأحايين في إطار مشروع رمضاني للتواصل مع قادة ورموز المجتمع ، ولعمري أن الشباب لا خير فيه إن لم يزر محمد الأمين إجلالاً وتقديراً لدوره إن كان ذاك الشباب من المؤتمر الوطني أو الإتحادي أو الشعبي أو الأمة فالباشكاتب مبدع إستثنائي عنده (يتحد) كل أطياف (الشعب) ويتوحد الجميع لأنه فنان بقامة (وطن) وشموخ (أمة) ..!!
{كانت رمضان يحزم حقائب الرحيل يومها والأجواء عامرة والكلمات تتري تباعاً من هنا وهناك والأخ ياسر يوسف نائب أمين الإعلام بالمؤتمر الوطني يقدم كل متحدث بأغنية من درر محمد الأمين ويستشهد بروائعه (حديثاً) و (أمثالاً) و (ربطاً) وأستاذنا الإعلامي القامة والشاعر العلامة فضل الله محمد يختزل السيرة والمسيرة ببلاغة متناهية وهو يقول : (الغناء السوداني قبل محمد الأمين وبعده أختلف كثيراً) ..!!
{ محمد الأمين يا سادتي يمثل عبقرية فنية لا مثيل لها ، وكل من شاهد حلقات (زورق الألحان) التي وثقت له عبرها قناة الشروق خلال شهر رمضان الماضي يدرك أن الرجل يمثل بئر إبداع لا ينضب كلما نزلت الي أعماقه كشف لك عن أعماق أخري لا نهاية لها ، فموسيقار الأجيال يمثل فصلاً كاملاً من تاريخ الفن ، ويبقي الغناء السوداني الحديث واحداً منقوصاً لا يكتمل إلا به ..!!
{من قبل كرمت جامعة النيلين نفسها ومنسوبيها وهي تمنح الموسيقار محمد الأمين درجة الدكتوراة الفخرية ، وإن كانت هذه الدرجة الرفيعة التي تمثل سدرة منتهي التقييم من المؤسسات الأكاديمية تمنح لأناس قدموا إسهامات بارزة في ميادين العطاء المختلفة ممن كان لهم عظيم الأثر الإيجابي وبالغ التأثير .. فإننا كما قلنا من قبل لا نري من هو أحق من محمد الأمين بنيل درجة الدكتوراة الفخرية ? وبلا مبالغة ? فإن منح درجة الدكتوراة الفخرية لـ(وداللمين) يمثل (شرفاً) للدرجة الرفيعة و (فخراًَ) للدكتوراة ، فمن هم بحجم إبداعه تتشرف الدرجات العلمية بالإقتران بهم قبل أن يتشرفون بها..!!
{شكرنا آنذاك جامعة النيلين ومديرها البروفيسور عوض حاج علي هذه اللفتة الباذخة الجمال .. شكرنا النيلين التي أختارت مبدعاً بقامة (النيلين) ظل عطاؤه متدفقاً علي مر السنوات .. وبعثنا بتحايانا الخالصة للنيلين وهي بتكريمها لمحمد الأمين تكشف عن ذوقها الرفيع وتؤكد للجميع أنها بجانب التميز الأكاديمي منذ أن كانت (فرعاً) تمتلك ذائقة رفيعة و (متجذرة) في تقييم أهل الفن والإبداع والغناء وتحسن فقه الإختيار والإصطفاء ..!!
{عندما تحدث محمد الأمين شاكراً من زاروه وأفطروا بمنزله مر أمام عيني شريط نضال طويل لمبدع مغاير من الذين قهروا الصعاب وذللوا المستحيل ونسفوا جبال المتاريس الشاهقة.. لم يصل محمد الأمين لما وصل اليه بسهولة كما يحدث مع مغنواتية هذه الأيام من (فناني الغفلة).. واجه حروباً فنية ووضعت أمامه عوائق (غير فنية) ليتغلب علي كل الأوضاع .. صارع الإشكالات الحقيقية و (المصنوعة) وكانت له الغلبة .. تجاوز الضغوط النفسية التي يمكن أن تصل بالمبدع لدرجة أن يكفر بموهبته ويحطم (عوده) ويخاصم الغناء الي غير رجعة .. كان إيمانه بموهبته أكبر من حجم ما يحاك ضده من صعوبات ومتاريس .. إرادته الصلدة الفولاذية جعلته ينهض كلما حاول البعض (عرقلته) .. كان أكبر من الصغائر والدسائس وحسد الأنفس البشرية .. كان أقوي من المنافسة الفنية الشرسة في زمن إطلالته الأولي .. كان علي موعد مع التاريخ لذا فإنه ركل كل عثرة واجهته ومضي في طريقه لا يبالي لأنه بإختصار شديد رجل كامل الموهبة والإصرار والعزيمة والهمة فهنيئاً لنا بفنان عالي الهمة ومبدع بقامة وطن وشموخ أمة ..!!
{رحلة كفاح محمد الأمين منذ بداياته وحتي مقاومته للمرض في السنوات الأخيرة وتجاسره من أجل إمتاع جمهوره تذكرني بأبيات شعر خطها يراع الشاعرة الأدبية الكويتية سعاد الصباح عن الزعيم جمال عبدالناصر قالت فيها :
(كنا كباراً معه في كتب الزمان
كنا خيولاً تشعل الآفاق عنفوان
كان النسر الخرافي الذي يشيلنا
علي جناحيه الي شواطئ الأمان
كان كبيراً كالمسافات .. مضيئاً كالمنارات ..
جديداً كالنبوءات .. عميق الصوت كالكهان )
{ ختاماً : نجدد دعوتنا بأنه ينبغي للمؤسسات المختلفة والأحزاب (الأكتر من الهم في القلب) أن تتباري لتكريم الرجل وتتسابق لتنزله (منزله ) الذي يستحقه فلا يعقل أن يكون مبدعاً بقامته يسكن (منزلاً) بالإيجار وينتقل من حي بحراوي الي آخر بينما له في قلب كل سوداني (منزلاً) ومكانة .
{ .. بعض المبادرات والمناشدات يفسدها الشرح والإسهاب والتفسير .. فقط ننتظر فألاً وبشارة .
فنون
يا ناااااس الأهبل ده لسه بكتب ؟ أخخخخخخخ
يا كابو ما ليك شغلة بمحمد الامين ، أبعد بعيد أحسن ليك
خلاص قبلتا على ود الامين
يا استاذ انت ناقد فنى لكن كلامك دا مجرد
(انشاء) عايزين تحليل علمى وفنى عميق ومتخصص
حول تجربة ابو الامين صوت وموسيقى ولو ما عندك
حاجة اقعد ساى عليك اللة..
قال فطرت مع ود الامين قال ! انا استفدت شنو هسة؟
من يتكلم عن زول بموت الله يكفينا شرك ياخ كفاية لي اسي قلبنا واجعنا على محمود ربي يرحمو ويغفر ليه (الموت علينا حق وكلنا ماشين ليها ) بس عليك الله شوف ليك شغلة غير الفنانين دا شنو عدم الموضوع دا
الناس النضاف لا يتكالبون على الدنيا وقد فتحنا أعيننا وآذننا على ود الأمين ولم نسمعه يغني لا لدنيا قد عملنا اننا للدين فداء لذلك من الطبيعي أن يسكن رغم تاريخه الطويل في بيت ايجار وهذه مفخرة له وهو بذلك يضاهي الكبار الذين كانت السلطة في أيديهم وخرجوا منها كما خرج العقد الفريد من الصحابة الاوائل،، ونحن ننتظر لنرى ما هو الذي لم يخرج به الصحابة الجدد من الدنيا،، إن كان هناك ثمة عون يقدم لأبو الأمين يجب أن يكون من جماهيره لا من الحزب الذي يدجن الناس بما يعطيهم ويمن عليهم،،، راجع كلام نافع عن قيادات الاحزاب،،
الله يخليك لمطاعنات النسوان وإمور المشاطات بتاعتك دى
هيثم كابو إنسان سخيف , وسطحى ,, وبايخ كمان,,
خلاص قنعت من محمود داير تقبل
علي ود الامين الله يكفينا شرك
لكن نصيحة من اخ عزيز احسن
ليك شوف ناس ندي القلعة وشريف الفحيل
واحمد الصادق علي الاقل ديل باكلوك عيش
بعدين ود الامين ما حتاج ليك تكون الناطق بي اسموا
عشان يكرموه ولا ما يكرموه ………
أبقي عشرة علي اخبار فلانة طلقوها وفلانة جلدوا
في المحمكمة الفلانية والاخبار الصفراء البتشبهك….
قوم ياوهم شوف شغلة تانية ؟؟ اقول ليك ماجة امشي اشتغل في سوق الملجة في مدني او في السوق المركزي ودمدني بصل وتبش عجور واسود وبامبي ياوهم . قوم بلا كابو بلا عدس الفراسة ؟؟ طز طز .
ود اللمين ايضا يمتاز بالطرفة وسرعة البديهة .مرة في حفل جماهيري ساله احد الحاضرين ليه ماقاعد تجدد اغانيك كلها قديمة .رد عليه ابواللمين هو انت فهمت القديم عشان نعمل ليك جديد.
دى عايز يقول عندو علاقه مع كل مشاهير المجتمع نط نطه قويه وقال مره في التلفزيون انو الممثله المصريه(الكويتة الاصل) سمية الخشاب قالت ليهو شوف قالت ليهو ركز معاي قالت ليهو والله يا هيثم لمن جيت القاهرة من الاسكندريه وشفت صورى معلقه في دور السينما والاماكن العامه قربت اصيب بالجنون من الفرح !!!!!! هذا هو هيثم الكوكب الذى يريد ان يربط اسمه بكل المشاهير وياويل المابديهو وش ياوليو شتائم وملاغزه نسوان وطعين وصرة وحه وهاك من الحكاوي المفركه وتجنيد كل الساقطات والساقطين في مادة الصحافه من امثاله للمحاربه معه ولد وعلي ما اقول شهيد فاقد الدسم الرجولي
لانه اصلا ماعندو حاجة ينتمي لها غير اسم كابو صدقوني ماعندو اكثر من كده ولو في حاجه غير كده خليهو يقولها في رفاعه.
مرض …….كابو ده من الغضب الاصاب السودان هو الشرذمة بتاعت فنون ناس وضاح ومنو ومنو كفاية البرنامج الخيف العملتو مع المرحوم نادر خضر …….انت ذاتك لا بتعرف غنا ولا ليك علاقة بيهو انت ارزقى وبس
الود دا ابوه اسمو منو ولا كابو دا لقب ساي
إذا أردت تعريفاً شاملاً وكاملاً(للمشاطة) فعليك أن تكتفي فقط بكتابة إسمه هيثم كابو:ملآحظة مهمة جدآ (مع إحترامي للمشاطة)
صحافة فيها هيثم كابو و مبارك البلال و الهندى..دى ما صحافة ديل مشاطات عدييييييل
و فاتيات وقاعدين يبتزوا فى انصاف الفنانين والفنانات و السياسيين النص كم..
حليل زمن الرجال..غايتو الحكومة لمن تقع فى كنس شديد
ياخوانا والله الزول ده كتاب ولو ما كتب عن ود الامين كنا ح نلومو بأنه بهتم بالفنانين الهابطين – واصر على هابطين دى – بينما يتجاهل العمالقة ،، فالمقال ده من حسناته لكن السيء فى الموضوع انو الدعوة جات من امانة المؤتمر الوطنى ، ودى فى حد ذاتها لوثت الجلسة ودنستها برائحة المتاجرة والمزايدة وافرغتها من كل المعانى النبيلة التى جاءت فى مقاله ،، بس كان عليه ان يذكر ولو كلمة تفيد بوصول الدعوة اليه بأعتباره صحفى وليس لوجود علاقة بينه وبين امانة الشباب فى المؤتمر الوطنى ..
عليكم الله البتعرفوا الذول السجمان دي كلموهوا قولوا ليهو عندك موضعيين في الراكوبه والله الناس نازله فيك سلخ عليك الله اعقل شويه وسيب كلام النساوين وايقي راجل عشان الناس يمكن تحبك وخليك من الشلخوها والطهروها والاخبار المفبركه والله ضيعتوا سميه وسطكم وام وضاح ديك صارت سايكو رسمي يا وضاح كلم امك قول ليها ماتعرفي تقديم تلفزيوني وما يغشوك ناس هيثم كابو مبارك سجمان.
اقتراح ياكابو ياريت المقال الجاي يكون عن رسم الحنا ورقيص العروس والدلكه وكده ، ويكون كويس لو اجريت حوار في قعده جبنه مع حماده بت ، الله يستر . يمكن تحقق سبق صحفي
هذا الشخص تاجر واغتني علي حساب مرض وموت الفنان محمود عبد العزيز في مقالاته والصحف التي يكتب فيها , بل وتجرأ بالذهاب مع المرحوم محمود عبد العزيز إلي الأردن لأجل الإثارة والسبق الصحفي فقط. ومن ناحية أخري يريد أن يطفي علي نفسه هالة ونجومية كاذبة وذلك بقربه للمرحوم محمود عبد العزيز وبالكتابة عنه .
للاسف انتو ما عندكم اى موضوع تركتوا الموضوع ومسكتو فى هيثم كابو كاتب الموضوع
هذه هى الصحافة قذارة يا ساده لكن اذا كان هناك موضوع مكتوب انت انتقد الموضوع لا تنتقد كاتب الموضوع وتظل تتكلم فى كاتب الموضوع فقط هذا عدم فهم منكم صراحة
انتو يا جماعة الزول ده خلاص فك الحد, بكسر الحاء ولا شنو الحاصل