رقراق الضحى
رقراق الضحى
أسماء الجنيد
[email protected]
000
وبقيت ممحنة فى الحلق
الطقطق الوجع السكات
صارى النضم حفنة وهم
جوة الحشا .. والباقى مات
كومين رماد مكشوحة
فى الدرب البساسق للممات
و فات الفوات,,
فات الفوات لى زول غرق نص النهار
كسر المرق لى جد ضرير
يتم بسيمات الصغار
شلهت بيوت فرشت بكاها للكبار
والعصافير النفير كيفن تطير
ركت تنقر فى الحجار
كتح عشيشاتها الغبار
دمدم شديراتها الدمار
والشكوى سارجة النيل مسار
نص النهار…
شال الصفار لون الخدار
حتحت صفيقات الجروف
والموجه تردح فى الخلا
مكسورة خاتر ومكسرا
النيل تعب ..شد الضهر
لليل شكا .. لامن بكا
واليوم طويل ..فاقد الدليل
وفضلت ابحلق فى الخلق
مشدوهه بى شيتا كتر
نضما كتر ..
والصف طويل ..
والزمن ممحوق قليل
لا ضل ضحى ونومة ضهر
لا كوم نجوم لاضى قمر
شليل وين راح ..ودع ختر
لا يوم طويل وتعب سفر
والجهال تحت الشدر
حتى الحراز فقد المطر
وفضلت ابحلق فى القريب
حتى البعيد .. مد البصر
الكل ملجم من طرف
الا من شيتا كتر
نضما كتر
نشف الكلام وسط الحلق
جف العرق
نشف جريدنا والورق
والجوف فتر
والجاى حار و طعمو مر
….
وبقيت اتاوق من بعيد
افتش الدرب العتيق
الكل مقبل من طريق
حتى الفريق
فرتق بيتو عرق .. عرق
اتشلع السقف المرق
…
يالمة فتشى فى الزحام
يا غيمة لمى المطر الغمام
وياامة لملمى سمح الكلام
يا عافية اغشيى الدغش
خشم البيوت..
قبال نفوت
ادى الصغار لمسة شفا
واتصبرى
ادى الكبار دفة حنان
و كملى المشوار عشا
لمينا بى نية الدفا
وغطينا ياعافية
الوفــــــــــا
يا مطر اهدى الدعاش
رشة صباح
واهدى الفريق
غيمة ضهر
تغرق مطاميرنا العصر
الموجة ترقص فى البحر
والفرحة تكبر فى الحكر
يا يمة جاى
يا خالة جاى
ويااااا مطر اهدينا
افراحنا البكر
اسماء الجنيد
تحية لبت الجنيد .. فقدك فى الايام الماضية إن شاء الله المانع خير ؟؟؟
يالمة فتشى فى الزحام
يا غيمة لمى المطر الغمام
وياامة لملمى سمح الكلام
والله كان كتبت في السياسة فظيعة وفي الكتابة حاجة بديعة وكمان في الشعر والله صورك راقية جميلة وكمان كنا نفتش ليك في زحام الكتّاب ومن زمان ما قرأنا سمح الكلام ان شاء الله الداعي خير .. أرجو أن لا يكون نشف الكلام وسط الحلق بل نريد
يا مطر اهدى الدعاش.
مرحى بالطلعة البهية الجديدة اتي وكت عندك …………..قدر ده كنتي رافعة القزاز ليه على العموم (مخاطبة لما دار بخاطر ي) كل شئ قسمة ونصيب
كتاباتك يا بت الجنيد دايما طويلة ومملة والناس البعلقو على مواضيعك بالايجاب كضابين ساكت ماقاعدين يقروها كلها وقصيدتك دي برضها بطول ليل امرؤ القيس امشي بيهاناس سجم القوافيهم مجبورين يسمعوها ليك (بالمناسبةاسم البرنامج سحر القوافي دي تجني وازدراء بالشعر المفروض يسموهو محاولات في ابجديات الشعر انا ماعارف اللجنة ده فات عليها كيف
ياسكر الجنيد يا الما ليكي بديل لو خلص الكلام طعمتك في الحلق ما ليها مثيل
الكاتبه دي انا بتنفسها زي الاكسجين
يا بت الجنيد نحن تعودنا على اسلوبك الشيق فى النقد السياسى 0 والان جابت ليها شعر خلينا فى الاستايل الاول احسن هذه رغبه عشاق عمودك 0 مبروك اللوك الجديد
روعة روعة يابت الجنيد قصيدة عبارة عن لوحة فنية بريشة فنان ماهر اسال الله الا ينشف الكلام في الحلق وتكون مطرتنا دائماً صابه وكابه ( تعليق الاخ ود العبيد بالتاكيد يرجع ليهو لكن مع احترامي له هذا الشخص لا يجيد القراءة مابين السطور
قصيدة من اجمل ماكتب من شعر نتمنى تواصلى فى هذا الاتجاة وترك السياسة لكثرة من يكتب عنها وقلة من يكتب جميل القصيد
ما أجملها ما زلت أكرر قرآءة قصيدتك أشتهرت عيشة الغبش وها أنت تتحفينا بأخرى في قامتك يا بنت الجنيد..من الواضح أن الم الغربة ترك بصماته فيك ودفعك للإبداع .جميلة روح التفاؤل في الخاتمة وإنشاء الله جاي.
..
اختنا اسماء ..
دائماً كتاباتك في « الجرح » ، كما في السياسة ، في الشعر ايضاً .
القصيدة (معبّره) و صورها (رائعة) .
لاتهتمي بسخافات البعض وسطحيتهم ، واصلي ابداعك .