الكاتب الصحفي الفاتح جبرا : الفنانين الشباب بسمع بيهم لكن ما بستمع ليهم..ومظهرهم العام ردئ!!
فنون:هبة صلاح
وصف الكاتب الصحفي الفاتح جبرا المظهر العام للفنانين الشباب بالردئ مبديا استياءه من أزياءهم التي يرتدونها في الحفلات وقال ( زمان الفنانين بيجو الحفلات والواحد لابس بدلة كاملة هسه أولادنا ديل الواحد يجيك لابس بنطلون (سيستم) و(تي شيرت) ، وأردف : (والله انا خايف يجي يوم الواحد يجي الحفلة لابس ليهو (فانلة حمالات)!!مؤكدا في السياق نفسه غياب اوجه المقارنة بينهم وبين الفنانين الكبار وعلق قائلا ( المقارنة معدومة تماماً خليك من اللحن والكلمات والأداء)!!وأوضح جبرا انه لا يستمع للأجيال الجديدة وقال ( أنا آخر فنان بستمع ليهو (مجذوب أونسة) أي زول جا بعد جيل ناس أونسة ديل أنا ما قاعد اسمعو ).
في سياق منفصل اوضح جبرا ان الدراما السودانية بدلاً من أن توفر له المتعة تعمل على تعذيبه -حد قوله- (بشاهد الدراما السودانية ماعشان استمتع..عشان أتعذب) واصفا النصوص الدرامية با(التعبانة) والمسطحة مردفا (معظم الممثلين عندنا قاعدين (يمثلو) ومعظم النصوص (تعبانه) ومسطحة)!
فنون
( بشاهد الدراما السودانية ما عشان استمتع .. عشان اتعذب ) ..
وكمان عليك سادي !!! الله يشفيك يا جبرا أخوي .. و يبعد عنك شرور مدعيي فنون آخر زمن ..
يا عمنا جبرة والله منتظرين خبر محكمة النفايات معاك
والله يا جبرا سيناريوهاتك دي لو اتحولت لي مسلسلات كوميدية بتكتسح الفضائيات كلها
كسرة:-
اخبار موضوع بلاغ النفايات العند القاضي، شنووووووووووووووو……وووووووووووووووو.؟؟؟
كل يوم نبحلق فى الراكوبة عشان نعرف الحصل لك شنو مع المحكمة فى موضوع النفايات وقلبنا فى يدن خوفا عليك أيها الساخر الطاعم الذى يتحفنا بخفة دم وكلام لاذع وناقد بسخرية محببة للقلب ونتتبع واواتك الممتدة.طمنا عليك.
الحمد للة انك ماانسجنتة نحن فى انتظار التفاصيل يااستاذ اللة اديك العافبة~ شكرا
الأستاذ الفاتح كل القراء في إنتظار مقال ما بعد الوقوف امام القضاء في البلاغ المرفوع ضدك من قبل جماعة النفايات ………………………… منتظرين يا أستاذ وما تنســـى
دا كلام يطمم البطن يا أستاذ جبرة,انتو دايرين تحتكروا الحياة والثقافة والفهم وكأن الدنيا دى وقفت فى جيلكم (جيلنا)ياأخى شجعوا الشباب ديل وارحموهم بالنقد الهادف البناء وأدعموهم بالتوجيه والأهتمام مش (وأوضح جبرا انه لا يستمع للأجيال الجديدة)!! بعدين شنو لبسهم دى (سيستم) و(تي شيرت)؟؟ تذكر مجذوب اونسة دا ذاتو لما ظهر مش كان نافش شعروا ولابس بنطلون تريفيرا اخدر شارلستون وقميص تريفيرا أحمر وكان راى الناس الكبار الكنا بنقول عليهم متخلفين انو دا لبس شاذ وبرضهم قالو نفس عباراتك دى ؟ الأجيال الجديدة دى ياها أمل السودان وعايشين فى ظروف قاسية وصعبة وبنحتوا فى الصخر عشان يعبروا عن زمنهم وظروفهم ويتعاملوا مع عصرهم.ساعدوهم إن شاء الله بالسكات ساكت بدل الدراب دا .
بالمناسبةانت من كتابى المفضلين لكن بعد كلامك العجيب دا ينظر ويفاد ههههههه
تحياتى