الشعب يريد النفايات بالوزن
02-07-2016 09:47 PM


قبل سنوات قاربت على العشر كنت قد كتبت (سيناريو) بعنوان (النملة والتمساح) تتلخص قصته في أن متحصل النفايات في الغابة قد طالب النملة برسوم نفايات هي ذاتها التي يدفعها الفيل، وذلك بحجة أن الرسوم يتساوى فيها كل حيوانات الغابة مما جعل النملة ساخطة وغير مقتنعة وترى أن في ذلك ظلم عليها الشيء الذي جعلها ترفع أمرها إلى (التمساح) وهو المدير العام لهيئة نفايات الغابة والذي في نهاية المطاف وبعد أن شرحت له قضيتها العادلة، قام بأخذ علبة مبيد من درجه وقام برشها قائلاً:
- الحيوانات دي كووولها زول فتح خشمو مافي.. كمان عايزه تعملي لينا شغب !!
تذكرت وقائع هذا السيناريو وأنا أقرأ ذلك الخبر الذي يقول: (طالب مدير هيئة نظافة الخرطوم مصعب البرير المجلس التشريعي بضرورة الموافقة على قرار زيادة رسوم النفايات على أن تكون 200 جنيه شهري لكل منزل بحسب دراسات علمية وميدانية أجريت) !
سألت نفسي (مستغرشاً) حتى وإن أثبتت دراسات علمية وميدانية أن (200) جنيه هي متوسط ما يفترض أن يدفعه المواطن، فهل تتساوى كمية نفايات (النملة) مع (أفيال وتماسيح) هذه الغابة التي نسكن فيها؟ وإذا كانت معظم النفايات هي بقايا أكل وما يحمل فيه الأكل من أكياس وكراتين وخلافه فهل يأكل (النمل السوداني الفضل) نفس نوعية وكميات ما يأكله أفيال وتماسيح هذا العهد الزاهي الزاهر النضير؟.
الإجابة بالقطع هي لا.. بل لا توجد مقارنة (من أصلو) بل لا توجد في قاموس المواطن حاجة إسمها (أكل يمشي النفايات) لأنو ببساطة (الأكل هو ذاااتو مافي) لا توجد حاجة لديه تمشي (الكوشة) فكل ما يدخل إلى منزله (إذا دخل) مأكول.. مأكول.. مأكول.. كل ما يذهب إلى النفايات لا يخرج من (قشرة بصلة إتعملت بيها سخينة)، قشرة ليمونة عشان يعملوها شطة (ياكلو بيها السخينة دي ذاااتا)، (بواقي قرون بامية) أو ورق (ملوخية) ده إذا كانت الأحوال رخية، أما بقية ما يأكله المواطن فهو لا يترك نفايات، الطعمية لا توجد بها نفايات ولا يمكن لمواطن عاقل بالغ رشيد أن يرمي بقطعة طعمية في (الزبالة) فقطعة الطعمية بقت بالشيء الفلاني علاوة على أنه يمكنه إدخارها لليوم الأسود (أقصد اليوم التاني)، أما فول الحاجات والذي أصبح شبه وجبة فهو يؤكل دون أن يترك أي نفايات وكذلك الحال بالنسبة إلى العدس وشوربة الماجي والفول هذه الأكلات التي لا يخرج منها غذاء معظم الشعب السوداني الفضل وغني عن القول بأن (نفايات) الشعب السوداني الفضل لا توجد بها أي عظام
مشكلة المسؤولين لدينا في هذا العهد الوضيء أنهم يعتقدون بأن الشعب مثلهم، الأكل (ويحلي كمان) ويلبس ذات اللبس ويمتطي ذات الدواب رباعية الدفع وأن في استطاعة أي (زول) أن يتزوج بثلاث أو رباع !
في الجانب الآخر تمتلىء ثلاجات المسؤولين الرأسية والأفقية بما لذ وطاب من اللحوم البيضاء والحمراء والأجبنة وجميع مستخرجات الألبان والحلويات والفاكهة بأنواعها وعند الصباح يتم وضع ما تبقى من (المؤن البايتة) في أكياس (القمامة) ويتم استخدام التموين الطازة (الجديد)، فتمتلء نفايات المسؤولين بباغات الزيت الفارغه (5 لتر) وبعظام الخرفان (الطرية) وبقايا (الريش) العجالي (الكستليته) وهياكل الأسماك النيلية والبحرية وبقايا أحواض وقشور البيض (المختومة) وبقايا الخبز (الشامي) والمكرونات والأرز والبسكويتات والتورتات وقشور الليمون (اللحمة عاوزة شطة)، وكذلك كراتين الفاكهة الفارغة (ما بيشترو إلا بالكرتونة) وقشور الفاكهة من يوسفي وبرتقال وقريب ومنقة والعجب (قشر البطيخ) !
مما سبق فـ(حرام) أن يتم مساواة رسوم نفايات (المواطن النملة) مع (المسؤول الفيل) أو التمساح من أثرياء الغفلة عشان كده نحنا عاوزين رسوم النفايات تكون (بالوزن) !!

كسرة:
ثم إنو بعض المواطنين بياكلو بى أقل من 200 جنيه في الشهر معقول أكلهم ده تطلع منو نفايات بي 200 جنيه !!!

كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)+و+و.
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)+و+و.

[email protected]





تعليقات 24 | إهداء 0 | زيارات 5274

خدمات المحتوى


التعليقات
#1412593 [Jackssa]
0.00/5 (0 صوت)

02-09-2016 10:41 PM
... يا ولد جيب الحبوب ههههههههههها ...


#1412580 [amirshek]
0.00/5 (0 صوت)

02-09-2016 10:00 PM
مسؤلين شنو ولبس شنو يااستاذاسال مصعب دا زااااااااتو قول ليهو اخوانك ال في النهود انت بتتذكرهم عليك الله . اعوذ بالله


#1412060 [الكجم]
0.00/5 (0 صوت)

02-08-2016 10:41 PM
الله يجازي محنك يا الفاتح
والله انواع المأكولات القلتها تحت دي خلت مصاريني يتلون و جوعتني لمن بقيت ابلع في ريقي
دي الزينا الا اشوفها من علي البعد
وبعدين انت ناسي انو نفايات التماسيح دي النمل دا ما قاعد يتكفل بنقلها واعادة تدويرها يعني مافي نفايات من أصلو دا كلام ساي


#1411985 [على]
0.00/5 (0 صوت)

02-08-2016 06:48 PM
دايما يالفاتح بتجدد لينا الماسى من اولاد النظام وابهاتهم ربنا كريم وياريت تضيف للكسرة بتاعتك اخبار كلام الرئيس شنو عن سودانية حلايب


ردود على على
[محمدوردي محمدالامين] 02-09-2016 09:06 AM
الاخ علي اهنئك علي هذا الاقتراح الجيد الممتاز باضافة كسره جديده باسم او بعنوان (حلايب سودانيه) واثني عليه


#1411895 [ابونصر]
0.00/5 (0 صوت)

02-08-2016 02:54 PM
ههههههههه الغريبة تم زيادة الرسوم بعد دراسة علمية وميدانية والله شر البلية من يضحك . اللهم طولك ياروح


#1411889 [الشعلة]
0.00/5 (0 صوت)

02-08-2016 02:33 PM
ياعمك رسوم الكربون زادت..... رسوم النفايات ما تزيد لية؟؟


#1411859 [محمدوردي محمدالامين]
0.00/5 (0 صوت)

02-08-2016 01:20 PM
والله ضحكتنا حتي ابتلت ماقيناوشر البلية ما يضحك


#1411802 [الحلومر]
0.00/5 (0 صوت)

02-08-2016 11:14 AM
صاحبنا ساخر مشى دورات المياه العامة ليقضي حاجته ، طالبه الحارس بدفع جينه قال يا اخي حرام عليكم هي طعمية أكلتها بخمسين قرش اطلعها بجينه.... بقايا افرازات ما نأكله ندفع عليها رسوم بالعملة المحلية وفي نفس الوقت نستورد بقايا افرازات الشعب اليونان بالدولار( والله نحن شعب كريم كرم ندفع تمن خرانا وخري الشعب اليوناني وقالوا سماد قال .... افرازاتنا نحن الغبش ديل حتي سماد ما نافعه ليه ما نسمد مما نخري )


ردود على الحلومر
[ود الشريف] 02-08-2016 01:53 PM
عليك الله يا حلو وما مر بقايا إفرازاتك من نواتج الفول ممكن يصبح سماد (لإنبات )الفول !! عشان كده حكومتنا الرشيدة إستوردت (حق) ناس اليونان البياكلوا اللحمة والسجك وكبد الوز بزيت الزيتون اليخلي نباتاتنا تفرهد وتزيد في الانتاج والانتاجية ...


#1411784 [زول صابر]
3.00/5 (1 صوت)

02-08-2016 10:45 AM
انت مبدع وفنان العامل راتبه450جنيه يدفع منها200للنفايات ويعيش بالباقي حكمة والله وحكاية وفي ناس ما شغالين وال450دي ما عندهم اباطن والنجم ويجو دي الما برحموا ديل ولا بستحوا يقولوا ادفعة200للنفايات يا حليل الحكومات السابقة ما كانوا بدفعوا المواطن تعريفة والبلد نضيفة سبحان الله الله يحلنا من بني كوز حسبنا الله ونعم الوكيل المفروض الناس تمتنع من الدفع نهائيا النشوفم بيعلمواشنو ما كفاية الغاز والفقر العايشين فيه الناس


#1411771 [محمد]
5.00/5 (2 صوت)

02-08-2016 10:22 AM
يا أستاذ جبرة خليك واقعى وعملى وطالب لينا بوزن أنبوبة الغاز, فالغاز مسعّر بالكيلو ونحن عازين نستلم وندفع حسب الوزن بمعنى فرار يلزم موزع الغاز بوزن الأنبوبة أمام المشترى فنحن لا نثق فى عبوة الشركات ولا يجب ان نتحمل الفاقد.


#1411770 [الفطقي]
5.00/5 (1 صوت)

02-08-2016 10:22 AM
زغردوا يا بنات .. عربة النفايات جااااات أيوووووووووي يوووي يوووي
ربنا ينتقم منك يا عمر البشير إذا إبتليتنا بالعاهات والمرتزقة الذين يغتاتون دم الغلابة والفقراء .. تفووووو .. آآآآآآآخ يا قلبي


#1411767 [على على]
0.00/5 (0 صوت)

02-08-2016 10:20 AM
هو الح يحصل كالاتى
سيتم تثبيت ال200 لكل منزل باعتبارها اقل فئة (فئة النملة)
سيتم اعفاء ناس الحركة الاسلامية باعتبار انهم اما فيهم شهداء او خدموا الاسلام خدمة صاح هجرة الى ماليزيا وعواصم الجمال
هذا عدا ان نفاياتهم مفيدة فيها البلاستك والقصدير والالمنيوم والحديد وربما الذهب


#1411763 [ود ديم المشايخة]
5.00/5 (1 صوت)

02-08-2016 10:08 AM
الناس ديل يا جبرا كتلونا بالمغصة قبل الجوع ..... ياالله نشوف فيهم يوم قبل مانموت


#1411747 [ابوشوارب]
0.00/5 (0 صوت)

02-08-2016 09:32 AM
شر البلية ما يضحك

يحكمنا حرامية قساة ( لم يكتفوا من السرقة وزادت قسوتهم )

أنت مبدع استثنائى


#1411727 [سلطان]
5.00/5 (2 صوت)

02-08-2016 08:58 AM
وفات عليك ياوليد جبرة انو هناك ناس بتاكل من النفايات وبالتالي هم البيستاهلو يدوهم رسوم النفايات مش العكس ولا ادري من اين ياتي أمثال هؤلاء الناس ؟


#1411719 [ابو اشرف]
0.00/5 (0 صوت)

02-08-2016 08:47 AM
الاخ الفاتح الكسرة بتاعة خط هيثرو دي هي راس الجليد الذي بدا ولكني من ضحايا قاعدة الجبل وكثيرون مثلي ظلموا بواسطة بلطجية خط هيثرو فمن يرد لنا ظلامتنا ؟!!
نحن من كنا المسرح التجريبي للبلطجة فقد صادر والي القضارف الاسبق عدد 5 مشاريع نهرية على نهر الرهد وهي الان باسماء اشخاص نعرفهم !!! هل تستطيع ان تحدد الاتجاهات السياسية للملاك الجدد ؟؟ الاجابة الصحيحة تمنحك الحق في تلقي السؤال التالي


#1411716 [Ali Sankal]
0.00/5 (0 صوت)

02-08-2016 08:38 AM
الله يجازي محنك يا جبرا ، بالله دا كلام تحرم منو الشعب الفضل؟
نطالبكم بعدم التوقف. مع التيار أو فيضان الأنهار.


#1411712 [ود الكندى]
0.00/5 (0 صوت)

02-08-2016 08:29 AM
هذا العضو خارج الشبكة السودانية وربما يكون عايش خارج السودان ومن الذين تم تعيينهم في المجلس


#1411702 [سوداني حتى النخاع]
0.00/5 (0 صوت)

02-08-2016 08:10 AM
للك التحية أستاذنا الموقر/ الفاتح جبرا
ينطبق علينا المثل "يجمعها النمل، ويطأها الفيل".لقد أبدعت كعادتك دائماًز


#1411666 [Almak]
0.00/5 (0 صوت)

02-08-2016 05:45 AM
جبره الليله انت جيعان ساكت بوصفك ده٠


#1411652 [كاســترو عـبدالحـمـيـد]
5.00/5 (1 صوت)

02-08-2016 02:20 AM
أولا : يا سيد البرير خليك رحيم واذكرك بان الله يأمر بالرحمة للمخلوقات كلها بدون استثناء ( انسان , حيوان , الخ .... ) والعباد فى الآخرة يدخلون الجنة برحمة الله عليهم وليس باعمالهم ) ومن يشقق على الناس , فسوف يعاقبه الله بنفس اعماله . اليابان كانت رحيمة علينا وقدمت لنا هديه بقيمة عشرة مليون دولار عبارة عن عربات نظافة . تقوم انت تقسو على اهلك وتتجبر عليهم . يعنى اليابانيون الذين لا يدينون باى دين ارحم منك ؟ اتق الله وانصحك ولا اهددك بأن ترفق بالعباد والا فأن للعباد رب يرحمهم . وربنا يوفقك وينصرك ويقويك على عمل الخير واخيرا احذرك دعوة الناس المظلومين , فدعوة المظلوم ليس بينها وبين الله حجاب وقد اقسم الله على نفسه وقال : لقد حرمت الظلم على نفسى وعزتى وجلالى لآنصرن المظلوم ولو بعد حين . تذكر ان لك اسرة ولا يرضيك ان تصيبهم دعوة مظلوم وصدق الله العظيم .


#1411620 [الدرب الطويل]
0.00/5 (0 صوت)

02-07-2016 11:09 PM
وفي رواية أخرى أمر التمساح برميها في بيت (أم شبتو)..
وفي خطوة إستباقية صادق برطمان (الوطاويط والجقور) بتعديل قانون مكافحة الشغب حتى تحاكم كل نملة تحاول الإعتراض..
اما (جنى زرزور) فقد هدد كل النمل قائلاً: ما دايرين ايي مجمجة!!..

الغريبة في الغابة دي المسيطرين عليها هم المرافعين والتماسيح والكلاب والثعالب والضرابين.. في غياب تام للضراغم!!.. وبقية الجوارح بقت عاشبة.. قال الشاعر: تموت الأسود في الغابات جوعاً ولحم الضأن تأكله الكلاب!!..


#1411612 [عصمتووف]
0.00/5 (0 صوت)

02-07-2016 10:25 PM
مشكلة الاثرياء يريدون حل مشكلة البلاد وعلي حساب الفقراء ود البرير عاوز يكبر كوموا ليصبح مساعد رئيس ولا وزير خارجية المهم عينة ف كراسي القصر تشريعي شنو هو بتاع زبالة ب الله الناس ديل راس مالههم محل حلاوة جوار مكاتب السكن الشعبي كنت اشتري منهم دائما حلاويات ولحدي الان مقرهم الابيض موجود م عدا الدكان دنيا


#1411606 [الهلباوي]
5.00/5 (1 صوت)

02-07-2016 10:16 PM
في الجانب الآخر تمتلىء ثلاجات المسؤولين الرأسية والأفقية بما لذ وطاب من اللحوم البيضاء والحمراء والأجبنة وجميع مستخرجات الألبان والحلويات والفاكهة بأنواعها وعند الصباح يتم وضع ما تبقى من (المؤن البايتة) في أكياس (القمامة) ويتم استخدام التموين الطازة (الجديد)، فتمتلء نفايات المسؤولين بباغات الزيت الفارغه (5 لتر) وبعظام الخرفان (الطرية) وبقايا (الريش) العجالي (الكستليته) وهياكل الأسماك النيلية والبحرية وبقايا أحواض وقشور البيض (المختومة) وبقايا الخبز (الشامي) والمكرونات والأرز والبسكويتات والتورتات وقشور الليمون (اللحمة عاوزة شطة)، وكذلك كراتين الفاكهة الفارغة (ما بيشترو إلا بالكرتونة) وقشور الفاكهة من يوسفي وبرتقال وقريب ومنقة والعجب (قشر البطيخ)
ياخ انت مبدع وفنان يا استاذ ،، عندي صاحبي بقول لي الزول دا بجبي الشديد دا من وين ، قلت يمكن عندو دفعة من كافن دبي وهي اكبر مدن دارفور الموردة للاعشاب السحرية


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة