الجمارك واللورد
07-16-2011 11:19 AM

ساخر سبيل
الجمارك واللورد

الفاتح يوسف جبرا

يقولون إذا عرف السبب بطل العجب .. ولأننا فى موضوع هذا المقال لا نعرف السبب فإننا سوف نظل فى حالة (عجب) حتى يفتح الله على القائمين على الأمر بتوضيح (المسألة) وما أكثر المسائل التى باتت تحتاج إلى توضيحات فى ظل هذا (الزمن الأغبر) .
لا يختلف إثنان بأن أكثر الأسواق فى العالم تشبعاً بالسلع والأجهزة غير المطابقة للمواصفات و(المزورة) هى أسواقنا .. الأدوات الإليكترونية ، الأجهزة الكهربائية ، المواد الغذائية ، الأدوية ، لعب الأطفال كل شئ تقريباً .. كل شئ .. !!
هل قامت الإدارة العامة للجمارك يوماً بنشر إعلان تحذيري تحذر فيه المواطنين من شراء أى من هذه السلع (المهربة) التى تغرق الأسواق وتؤثر على (الإقتصاد الوطني) ؟ مبلغ علمى أنها إن أرادت أن تفعل ذلك فأنها سوف تعدم المليم (تحذر من شنو .. وتخلى شنو؟) لذلك فإنها لم تفعل لذلك فقد إندهشت غاية الإندهاش وأنا أطالع إعلاناً تحذيرياً (نص صفحة وكمان ملون) من الإدارة العامة للجمارك على صفحة 13 من العدد رقم 4932 من صحيفة (الرأي العام) الصادر بتاريخ الثلاثاء الموافق 5 يوليو 2011م (وقد نشر فى عدة صحف أخرى) .. يقول نص الإعلان:
»جمهورية السودان ـ وزارة الداخلية الإدارة العامة للجمارك ـ إعلان تحذيري ـ تعتبر الإدارة العامة للجمارك خط الدفاع الأول لحماية الاقتصاد الوطني وقد استهدفت في خططها على الدوام مكافحة التهريب وإغراق الأسواق بالبضائع المهربة غير المطابقة للمواصفات كان آخرها ظهور نوع من السجائر المزوّرة مجهولة المنشأ ماركة «لورد» إن الإدارة العامة للجمارك قد آلت على نفسها التصدي بقوة لمحاربة هذا النشاط المدمِّر في أي موقع (المتاجر وأماكن البيع القطاعي وكل مواقع العرض والتخزين والترحيل) ولهذا نحذر جميع المتعاملين في تجارة السجائر المزوَّرة بكل أصنافها من مغبة النشاط الذي يضعهم تحت مخالفة القانون ويعرضهم للمحاكمة ومصادرة الأنواع المهربة ووسائل النقل وننشد تعاون المواطن الكرام للإبلاغ عن أي عرض أوتخزين أو حركة نقل لهذه السجائر«!
إنتهى الإعلان (الكارثة) والذى تم دفع قيمته المليونية من (قروش محمد أحمد الغلبان) .. تعالوا معى أعزائى القراء لنقوم (بتفكيك) هذا الإعلان لنرى مدى كارثيته والروائح النفاذة التى تخرج منه :
يقول الإعلان : (وقد استهدفت في خططها على الدوام مكافحة التهريب وإغراق الأسواق بالبضائع المهربة غير المطابقة للمواصفات كان آخرها ظهور نوع من السجائر المزورة)
ونقول : إذا كانت الجمارك تعترف بأن الأسواق (غرقانة) بالبضائع المهربة وأن هذا السجائر المزور كان آخرها فلماذا إختارت الجمارك هذه السجائر للتحذير منها وهنالك سلع أهم وأخطر على صحة وحياة المواطنين (كالدواء) المغشوش مثلاً لم تقم الجمارك بتحذير المواطنين منها ؟ وهل يعنى ذلك أنها سوف تقوم من الآن وصاعداً بتحذير المواطنين عن أى سلعة مزورة مستقبلاً ؟ (نشوف !!)
يقول الإعلان : (إن الإدارة العامة للجمارك قد آلت على نفسها التصدي بقوة لمحاربة هذا النشاط المدمِّر في أي موقع المتاجر وأماكن البيع القطاعي وكل مواقع العرض والتخزين والترحيل ولهذا نحذر جميع المتعاملين في تجارة السجائر المزوَّرة بكل أصنافها من مغبة النشاط الذي يضعهم تحت مخالفة القانون ويعرضهم للمحاكمة ومصادرة الأنواع المهربة ووسائل النقل)!
ونقول : ولماذا هذا (اللورد) بالذات من دون السلع التى تغرق الأسواق تقوم الإدارة العامة للجمارك بتتبعه سوق سوق .. مخزن مخزن .. بقالة بقالة .. زنقة زنقة ؟ وتتصدى لمن يتعامل معه بيعاً وعرضاً وتخزيناً وترحيلاً وتتوعده بالثبور وعظائم الأمور من محاكمات ومصادرات حتى لوسائل نقله ؟ وتناشد المواطنين الإبلاغ عن أى عرض أو تخزين أو حركة نقل لهذه (السجائر المزورة) والتى تم تصويرها في الإعلان من كل الزوايا (وجه العلبة وظهرها وجنباتها وغطائها المعدنى والكتابة الفوقا) لتوضيح الفوارق بينها وبين (السجائر الأصلي) !!
إنتهى تفكيك الإعلان والذى كان على المتضرر وهو المصنع الذى يقوم بصناعة سجائر (لورد) أن يقوم بنشره (أو إن شاء الله ناس حماية المستهلك) لحماية المواطنين و(الخوف على صحتهم) من (السجائر المزورة وكده) غير أن الجمارك لسبب لا نعرفه (حتى يزول العجب) رأت أن تقوم إنابه عن المصنع الذى ليست لديه بالطبع أى أدوات (تهديد ووعيد) بنشر هذا الإعلان من قروش (بيت مال المسلمين) !
وإذا إستمر هذا الإنتقاء (الما معروف سببو) فسوف نطالع للإدارة العامة للجمارك فى مقبل الأيام إعلانات من شاكلة :
تحذر الإدارة العامة من ظهور نوع مزور من (فنائل أبوفاس) الداخلية وتحذر جميع المتعاملين في تجارة (الفنائل) المزوَّرة بكل أنواعها من مغبة النشاط الذي يضعهم تحت مخالفة القانون ويعرضهم للمحاكمة ومصادرة الأنواع المهربة ووسائل النقل وننشد تعاون المواطن الكرام للإبلاغ عن أي عرض أوتخزين أو حركة نقل لهذه الفنائل!
كسرة :
الفنائل أقصد السجائر دى كدى خلوها .. عملتو لينا شنو فى (المودوع) بتاع عربات شهادة الوارد (المزورة) ؟.. وبالله أصلو لو إنتو بتحذروا المواطنين مش كان تحذروهم من شهادة الوارد (المزورة) وتعملو ليهم إعلان عشان ما يشتروا العربات دى ... وللا بس بتعرفوا تحذروا من (اللورد المزور) !!!


الراي العام





تعليقات 13 | إهداء 1 | زيارات 7466

خدمات المحتوى


التعليقات
#179740 [Mohamed]
0.00/5 (0 صوت)

07-17-2011 12:05 PM
The customs\' agent didn\'t get the PRIBE from the company that\'s why this ads for.


#179508 [SaifAlhag]
0.00/5 (0 صوت)

07-17-2011 07:01 AM
دي البضاعة الصينية وما ادراك ماهى--- اكتب لينا عنها


#179498 [omer]
0.00/5 (0 صوت)

07-17-2011 06:39 AM
ناس الجمارك اعلنو عن بضاعة مهربه ودا واجبا انت حارقك وين الا يكون عندك مصلحه في السجاير دي او تكون من المهربين


#179412 [Wad Osman]
0.00/5 (0 صوت)

07-16-2011 09:05 PM
يعني بدلا من دعوة الناس إلى الإقلاع عن التدخين تقوم الجمارك بترغيب الناس فيه والتأصيل له ,اتقوا الله يا ناس \"هي لله\"

هل رافق هذا الإعلان تحذير من خطورة التدخين على الصحة كما تقتضي القوانين حتى في الدول الإباحية أم التجاوز عن ما هو مفيد كالعادة؟

هذا الإعلان قدم أكبر خدمة لتجار السيجار المهرب حيث\"نبه\" المستهلك إلى وجود قنوات أحرى منافسة

أخيرا شكرا لكاتب هذا المقال صاحب الحس الإنساني و الوطني \"قلب الدفاع عن المواطن المسكين\"


#179286 [اسماعيل الجزولى]
0.00/5 (0 صوت)

07-16-2011 03:51 PM
يا جبرا ياخوى على الطلاق تدفع لناس الجمارك ديل زى ما بدفعوا ناس حجار والنيل الازرق للسجائر يطلعو ليك شجر النيم ما مطابق للموصفات


#179279 [ابو امين]
0.00/5 (0 صوت)

07-16-2011 03:30 PM
استاذى الجليل الحكاية واضحه ماعاوزة شرح سجاير اللورد الاصلى وكيلوا كوز كبير الجمارك عندها مصلحه معاهو اها يدفعوا حق الاعلان ولا......؟ دا فكرنى بالدفعوهو ناس ديوان الزكاة بتاع الشرق للوالى يعنى انتا قاصد شنو كل يوم موضوع يحرق دمنا ما فضل لينا دم اتقى الله فينا واعمل ذى باقى الجماعه ماشايف هسه صاحبت العربية كان دفعت تحت التربيزة كان استلمت عربيتها بعد الفضيحه العملتها ليها دى تانى كان تستلمها المؤتمر الوطنى يتنازل من حكم السودان


#179276 [عدلان]
0.00/5 (0 صوت)

07-16-2011 03:24 PM
يا زول اوعك تشكك في دولة الصحابة !!
والوجوه المتوضئة .


#179229 [عبداللطيف]
0.00/5 (0 صوت)

07-16-2011 01:46 PM
وبرضو تقولوا البلد ما ماشى نحو الانهيار . الجمارك شغالة اعلانات خاصة . قيسو علي اللورد وشوفو حجم الفساد بلاوي بتدخل البلد والجمارك ماسكة في اللورد بالله شوف؟!.


#179220 [محمود أزرق]
0.00/5 (0 صوت)

07-16-2011 01:35 PM
وإشمعني لورد السوق ما مليان لي أبو عينه بالسجاير الرويال المهرب ولا دا عشان ماعندو مصنع في السودان وبالتالي صاحب مصنع بيدفع للجمارك .. حقيقة الأختشوا ماتوا!!


#179217 [wedhamid]
0.00/5 (0 صوت)

07-16-2011 01:31 PM
الاستاذ الفاتح..........سلامات .........(طبعن ) السوق مليان بالسلع المستوردة الفاسدة و بالتاكيد مرّت عبر النوافذ الشرعية للبلاد و تفتشت و اندفع فيها الجمارك و توابعه !!!!!!! لكن سيجاير لورد لها حصانة خاصة !!!!!! تـــيـــب لــيـــه الــعــــجــب ؟؟؟؟؟

اديك واحده من ديل ......... مرة انعدم امواس الحلاقه ال.....ت توربو من السوق و قالو لانو فى زيادة فى الدولار .........و المستورد ما عايز يجيب بضاعه فى الوقت داك و بعدين ظهرت نفس الامواس و بذات التعبئه الخالق الناطق بس بتمن اقل بسيط جدا ( لاحظ مع ارتفاع الدولار) حتى انا نبهت سيد المحل انو يراجع السعر .......... افتكرتو غلطان !!!و لكنه اكد السعر الجديد و انا طبعا لانو كانت عندى بعض الموس لم استخدم الجديدة تلك الا بعد مده و اكتشفت انها نوع ردئ ما بحلق ابدا و لما رجعت للسوبر ماركت الكبير داك نكرو بضاعتهم دى بالمرة و قالوا هم ما بتعاملو مع جنس البضاعة دى !!!!! و غايتو تعوضت الله....... و بدلت المحل دا لمكان تانى و فى الونسه مع صاحب المحل حكيت ليهو القصة فضحك و قال دى عمليه عملها واحد مجرم من الجماعه اياهم مسئول فى ديوان ال.....ة برضو بتاع تحصيل !!!! مشى للهند فى مهمة (مشو لفو المصانع لاستيراد رقشات فيها ثلاجة عشان يدوها للاسر المنتجة يوزعوا بيها اللبن بدل الحمار )........ قام لقه مصنع بعمل الحاجات المضروبه و استورد الامواس دى منهم بطلبيه خاصة و بنفس المواصفات و اداهم النموذج و جابه و غرّق بيها السوق و انسل !!!!!


#179209 [أسامة عباس]
0.00/5 (0 صوت)

07-16-2011 01:22 PM
ياستاذ جبرا واصل فى الضرب فى التنك ... واصل فى الضرب فى التنك لحدى مايآآآآمنوا ويخلوا الخمج البيعملوا فيه ده ويتقوا الله فى عبادوا المافضل ليهم الا مناشدة الشديد القوى


#179160 [الساير]
0.00/5 (0 صوت)

07-16-2011 12:04 PM

يا جبرا الموضوع فيه إننننة !!!!!


قطع شك تضاربت المصلحة مع اهل المصلحة .

تكون إنت يا جبرا العملتها ؟؟؟؟؟؟!!!!!


#179148 [الزول الكان سمح]
0.00/5 (0 صوت)

07-16-2011 11:49 AM

يا أستاذ جبرا

بضائع مهربة بتاع إيه..؟ كدى أول حاجة أخطف رجلك لوزارة التجارة ودعبس مع المسجل التجارى( لو قدرت ) عن الأعداد الهائلة من المنتمين والمتمكنين من جميع شرائح الحزب الحاكم وأطلع على الرخص التجارية التى تم إستخراجها خلال العقدين الماضيين لإستجلاب البضائع الرخيصة الثمن الرديئة الصنع من دولة الصين الشقيقة .

موبيليا ...مكيفات تلفزيونات ..غسالات ...أفيش كهرباء...حنفيات.. أسلاك توصيل..لمبات الإضاءة..ساعات..نضاراتشمسية ...نضارات طبية...قطع غيار سيارات
قطع غيار موتورسايكلات...حلويات متنوعة...موبايلات...إلخ..إلخ

وبالمناسبة عشان يجيك كلامى وتعمل ملحق لمقالك ده...أمشى لف على كم محل بتاع تصليح الكتير من العينات الآنا أرفقتها ليك فى القائمة ..عشان تعرف مدى الضرر الذى لحق بالناس الغلابة الذين دفعوا وما زالوا..من لحمهم الحى لتقسيط الخردة دى.

المنتجات الإيطالية والأمريكية واليابانية بيستخدموها ناس الفلل والعمارات الفارهات وأولاد المصارين البيض ..داخلة سااااى قدام ناس الجمارك عينم تعاين لاقرش ولا تعريفة
ومصاريف القيمة المضافة يدفها المواطن البستعمل الصينى.

يا أستاذ ..الأخت صاحبة السيارة إن شاء الله إستلمتا!!!


الفاتح يوسف جبرا
الفاتح يوسف جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة