07-18-2011 12:17 PM

هو الكلام بي قروش ؟!

كمال كرار

بعد انفصال الجنوب ولزوم ” شكة ” كوتشينة سياسية جديدة فإن كل زول داير يصرح عن إنجازات ولو كانت وهمية أو فول وطعمية .

قال وزير المعادن أن هنالك شواهد ماس في بقعة نائية من سوداننا ” المشروم ” ، ولا يدري كائن من كان – إلا الوزير المعني – ماهية هذه الشواهد ، وهل هي كشواهد النفط والغاز أم كالنخل في صحاري الحجاز .

وهل ” لقط ” القمر الصناعي السوداني لمعاناً وبريقاً فوق عتمور أب حمد أو رمال أبو زبد ؟

وقالت وزارة الزراعة أنها تتوقع موسماً زراعياً ناجحاً وتعني به القطن الذي كان يسمي يوماً الذهب الأبيض ، ولكن القطن عاوز ” موية ” ، والموية عاوزة ترع ، والترع عاوزة ” نضافة ” والحواشات فيها آفة ، ويضرب المزارع أخماسه في أسداسه فيكتشف أن الزراعة بالخسارة وأن عرقه وجهده في بنوك العيش ، وأن ولده طلع ” الطيش ” ، وعلي ذلك فالتصريحات مضروبة والزراعة واقعة كان قلبت الهوبة .

أما صناعة الأسمنت ” المفتري عليها ” فقد ترنحت تحت ضربات الفيرنس المعدوم ، كما ترنحت غابة الفيل تحت ضربات الفاس والقدوم .

ومن غرائب الأخبار أن فلان بن فلان دشن بالأمس أول شحنة صادر دقيق للسعودية ، وغرابة الخبر أن الدقيق الذي تم تصديره مصنوع من قمح مستورد تحصل الشركة التي تطحنه علي ميزات عديدة لقاء استيراده ، علي ذلك فإن الدقيق الذي سافر للسعودية لزوم اللقيمات قطع تذكرة ترانزيت ، فما هي الفائدة الاقتصادية من ذلك ؟

وصاحب منصب دستوري قال لأهله في الشمالية ” أرقدوا قفا ” فصادرات السودان بعد الإنفصال حتكون الحديد الخردة . قالوا ثم ماذا قال البلح البركاوي ، قالوا له تعيش إنت فالسدود هلكت تمر الجدود .

ولو سكتت وزارة البترول عن التصريحات المملة حول الاكتشافات الجديدة في النيل الأبيض وجنوب كردفان لانتبه الناس للصمغ والكركدي ، ولكن الكلام بجيب كلام .

ولو راجع بنك السودان ووزارة المالية شهادات شهامة ، وألقوا نظرة علي تقرير المراجع العام سيكتشفون الخسائر الفادحة في المال الرنان وربما دخل بعضهم ” الليمان ” .

ولو قال السدنة أي معلومة عن الفوائد التي حققتها الخزينة العامة من سوق الأوراق المالية ربما وجد الناس تبريراً لماهية مديرها وحوافزه التي تفتح دكان في غرب امدرمان .

جاء في الأنباء أن أحدهم قال أن صادرات الذهب سترتفع من 30 طن إلي 47 طن ، بينما المسجل في التقارير الحكومية عن صادر الذهب أقل من خمسة طن . مطلوب تنوير حكومي عن 25 طن ذهب مفقود من خزينة جمهورية العتود .

25 طن في 1000 كيلو في 1000 جرام في 150 جنيه أحسب كم نهب السدنة !!!

الميدان

تعليقات 4 | إهداء 0 | زيارات 1778

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#180597 [الجعلى البعدى يومو خنق]
0.00/5 (0 صوت)

07-18-2011 07:54 PM
أنت يا كمال لسه ما قنعت من الجماعه ديل .. أقنع منهم ذى ما قنعت أنا من ناس (زعيط ومعيط ) أنت بتجادل من تتوقع منو خير فى يوم من الايام .. ديل مافيهم خير تب . دحين أقنع منهم تب . ديل وصلوا لمرحلة الافلاس التام . نفذ مخزون البلطجه وشغل العصبجيه بتاعهم وهسا هم بيوزعوا الاتهامات على الافرقاء والفرقاء من صعاليك المؤتمر (النتنى) دارت عليهم الدوائر وسيوجهون سهامهم لبعضهم البعض وسبحان مغير الاحوال ومبدل القلوب ... أسمع كلامى أكتب لينا فى الادب فى الثقافه فى الكوره بس الجماعه ديل خليهم ديل نحنا (أقمنا عليهم مأتماً وعويلا ) أكتب عن برنامج نجوم العد ونجوم الغش وصناعة الوهم ونجوم الورق. قال السمؤال (خلف الله) قال .. يا خلف الله ماا عذبتناا ... الدندر القويس الراق زولا وكريم وحليم انسانا


#180581 [شمالي]
0.00/5 (0 صوت)

07-18-2011 07:13 PM
يااااا عمي
ما هم شغالين يوعدوا فينا من 1989م بالرخاء والنعمة
حصلنا منها شنو؟
والغريبة كل ما يوعدونا بي شيء نلقى حالنا رجع للأسوء
لحدي ما الواحد وصل مرحلة بقى يقول فيها يا ساتر أستر ياريت المسئول إنطم
ويكتفي برفع السبابة ويغور


#180548 [أبو الرجال ]
0.00/5 (0 صوت)

07-18-2011 06:26 PM
يا أبو كمال : ديل يجيدو الكضوبات و اللبعات و اللغفات و نكاح الصغويرات مثنى و ثلاث و رباع ... لكن الحكاية قربت فلم يبق لهم غير الحلم و البطش .


#180474 [abuamin]
0.00/5 (0 صوت)

07-18-2011 04:09 PM

يا ابو كمال ........تحيه .............

كلامك دا ولا شى لما وعد به الاخ مستسار ( من فضلك مررا و اقراها مستسار )رئيس الجمهورية التفل المعجزة دكتور السنان ( فى خبر للراكوبة الليله ) و عد اهل وطنو الصغير قرية شنو كده فى الشمالية( رومى البكرى) بانهم حيستوردوا فحول ( رجاااله ذكور ) من الخارج لاكثار النسل عندهم لانو عدد السكان فى قريتو قليل ............الكثافه السكانيه قليله !!!! شفت العظمه دى ؟؟؟؟


اقتطف جزئية من حديث المستشار
((واشتكى مستشار رئيس الجمهورية لدى مخاطبته أهالي قريته (زومي البكري) بمحلية القولد بالولاية الشمالية، من عزوف شباب الولاية عن الزواج، ما يهدد نسل المنطقة بالانقراض، والمح مهدداُ أنه لا سبيل لأعمار الولاية بغير استجلاب الأجانب (من بلاد بره)، طالما عزف الشباب عن زيادة نسلها مستعصمين بالبور والفرجة، في ولاية تعتبر الأقل سكاناً بين ولايات السودان.))


كمال كرار
كمال كرار

مساحة اعلانية
تقييم
6.75/10 (9 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة