كوع .. الشجرة..!ا
07-25-2011 01:29 PM

حديث المدينة
كوع .. الشجرة..!!


عثمان ميرغني

أمس نقلت الصحف عن الدكتور نافع علي نافع قوله: (الداير يقلع النظام.. يلحس كوعو).. وهي عبارة تكررت كثيراً خلال السنوات الماضية.. ولم تعد ترفع حاجب الدهشة لدى غالبية قراء الصحف.. المثير فيها هذه المرة أنها تأتي في مفتتح (الجمهورية الثانية).. وكأني بها تقول للجميع (الثانية.. كالأولى).. ولا جديد. حكاية (لحس الكوع) ليست مشكلتها في كونها عبارة شعبية لا تصلح للمنابر العليا فحسب، بل لكونها تعني أن الوضع السياسي في البلاد لا زال في مربع حكومة تتربص معارضة.. ومعارضة تتصيد حكومة لتوقع بها.. رغم أن انتخابات عامة ورئاسية جرت العام الماضي شاركت فيها كل الأحزاب.. لترسم خطاً فاصلاً بين شرعية الحكم بـ(لحس الكوع).. والشرعية الدستورية التي تعني استقرار سياسي وتداول سلمي للسلطة عبر صندوق الانتخابات. مثل هذه التصريحات ليست مجرد مؤشر سياسي على خلل.. بل هي مؤشر اقتصادي أيضاً.. ويضرب في عمق الاستقرار النفسي والمالي والمعيشي للمواطن بصورة مباشرة.. لأن الدولة التي تعيش في ظل المواجهة (لا المنافسة) السياسية.. دولة طاردة للاستثمار ومجففة للموارد.. الفترة التي مضت منذ خروج المستعمر من بلادنا وحتى اليوم.. تماثل الفترة التي قضاها المستعمر حاكماً ومسيطراً على بلادنا.. ومن المؤسف جداً أن نظل حتى الآن في مرحلة (البحث عن دستور دائم).. لكن مع هذا الأجدر ألاّ ننظر إلى الماضي.. بل نسدد النظر للمستقبل.. والمستقبل يتطلب الرشد من الجميع.. من المعارضة لتدرك أن تغيير الحكم باستخدام القانون والدستور والشرعية (مهما كان مختلفاً عليها) أفضل وأحكم من الحديث المستمر عن المواجهة والتهديد بالحرب ما ظهر منها وما بطن.. رئيس الجمهورية المشير عمر البشير أكد أن الأحزاب ستشارك في وضع الدستور.. وأنها تستطيع الانخراط في حكومة برنامج وطني.. لكن كل هذا يطيح به مانشيت صحيفة واحدة يتحدث عن (لحس الكوع).. د. نافع تعرض لتجربة مريرة حينما اتفاق أديس أبابا مع الفريق مالك عقار.. ثم وجد لجرأة والشجاعة أن يعتذر ويقول (أخطأت) بعدما اعترض المكتب القيادي على الاتفاقية.. فهل ننتظر نفس الممارسة أن يلفت المكتب القيادي نظره لمثل هذه التصريحات ويوضح له إلى أي مدى تدخل البلاد في أزمة بلا مبرر.. فيكرر د. نافع الاعتذار.. ويقبل أن يمسح من قاموسه السياسي مثل هذه العبارات التي تعكر (مثل عكورة مياه الخرطوم) مياه الوطن كله.. ولماذا نذهب بعيداً؟ القرآن نفسه يقول: (ضرب الله مثلاً كلمة طيبة كشجرة طيبة.. أصلها ثابت وفرعها في السماء..) لماذا يأخذ المؤتمر الوطني من هذه الآية رسم شعارها في الانتخابات (الشجرة) ولا يأخذ المعنى الإنساني الراقي الذي تدعو إليه..

التيار

تعليقات 26 | إهداء 0 | زيارات 5017

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#185784 [عمارة]
0.00/5 (0 صوت)

07-27-2011 10:49 AM
امثال هذا الضار لاتنفع معهم إلا لغتهم لكن فصاحتو دي إلا داخل البلد لأنه عندما قال هذا الغثاء في لندن جاءه كرسي مع السلامة ولولا البلطجية الذين حموه للحسوهو كوعو


#185138 [عبدالواحد المستغرب جدا!!]
0.00/5 (0 صوت)

07-26-2011 12:35 PM
يا أخوانا صاحبكم عثمان ميرغنى إتضح إنه (بلف رضاخ) والبلف الرضاخ بلغة السباكين هو ذلك الاداء الذى يجرى المياه الى إتجاه واحد !! وهذا ما يقوم به الهندسة محاولة إقناعنا بأن العيب فينا لاننا لم نفهم نظام الانقاذ فهما جيدا وإذا كان هناك عيب فهو فى بعض رجال الانقاذ والذى من الممكن (إصلاحههم فى ورشة المؤتمر الوطنى!!) وأما المعارضة فكلها والعياذ بالله عيوب ويتعذر إصلاحهها او هى بكلام الفرنجة (توتل لوس!!) 000 شوفتوا يأأخوانا الفتاكة دى؟!!ولا حول ولا قوة إلا بالله من جنس البنى آدم ده!!0


#185082 [wedhamid]
0.00/5 (0 صوت)

07-26-2011 11:32 AM
يا عثمان افندى ..........

و الله انت زول جرنالجى ما عندك حاسة شم جرنالجيه و ماك شاطر لانك ضيّعت فرصة العمر يوم الجمعه القضيتا مع صاحبك الوالى ود الخدر .......الما بنظلم عندو احد..... والما رجع للزول الما انتحر ........كشكو... و.... اولادو............ الطشو..... يعنى تكلمت معاهو فى شنو ؟؟ و ليه ما سالتو حيعمل مع الراجل المدير بتاع البلوفه شنو ؟؟اهو فى مقالتك دى جبت سيرة عكورة المويه عرضا ساكت !!! مش كان احسن تفتح النيران على زولكم بتاع البلوفه الجابو خبر تفنيشو الليله!!!! و كان حنقول عثمان افندى صحفى تمام اهو ارّ (قر ) زى ما بقولوا اهلنا المصريين فى الراجل و جاب قرارو .......... بدل تضيع وقتك ووقتنا فى موضوع الما نافع دا .......... دا كل الناس عارفنو انو زول اى كلام بذئ و فاتية المؤتمر الوطنى و لسانو اقذر جزء فى بدنو زى ما قال شيخ الترابى و ملطشة البشير وبلّاع كلامو ........ سيبك من كوع و ما كوع و ورينا رايك فى العقد الخاص بود الجاز ده.... و بالمرة بلغ ليهو... شكرنا لصاحبك الوالى ود الخدر .......الما بنظلم عندو احد..... والما رجع للزول الما انتحر ........كشكو... و.... اولادو............ الطشو..... وقول ليهو اوعى يخاف من الناس الورا بتاع البلوفه دا مهما كانو ..... و لو اى واحد لكلك معاهو يديهو بابو لكاميه طوّالى يالوالى ...


#185059 [عبدو]
0.00/5 (0 صوت)

07-26-2011 11:01 AM
بالمناسبة لحس الكوع أسهل حاجة .. زول ما كوعو من بوعو ... قال كوع قال


#185053 [isam]
0.00/5 (0 صوت)

07-26-2011 10:56 AM
انت يا سيدى تريد ان توجه رسالة للموتمر الوطنى----بانه طالما جاء الى السلطة
عبر انتخابات (حرة ونزيهة)----لا داعى لكلام الجمهورية الاولى
وتكون العبارة الجديدة العايز يقلعنا دونه صناديق الاقتراع
الرسالة الثانية العايز توصلها(مع حسن النية) موجهة للسيد نافع(ليعقل شوية وما يعكر الجو)
هذا تحليلى للموضوع بدون تعليق او راى


#184929 [Mohammed]
0.00/5 (0 صوت)

07-26-2011 08:40 AM
لانهم يهتمون بالقشور لا بالاصول لانهم يهتمون بالمتشابهه من القول ويتركون المحكم لانهم يقولون مالا يفعلون لانهم من سلالة ابن سلول ومسيلمه ةخلفاء فرعون فانى يفقهون


#184864 [ebtisam]
0.00/5 (0 صوت)

07-26-2011 02:42 AM
لان كل اناء بما فيه ينضح


#184842 [مدحت عروة]
0.00/5 (0 صوت)

07-26-2011 01:20 AM
السودان ده ربنا غضبان عليه لانه لو ربنا كان راضى عليه كان خارجه من الاسمهم اسلاميين زى ما خارجه من الشيوعيين!! لكن نقول شنو ده ربنا و دى حكمته!!! و المصيبة انه الناس كانوا قايلين انه الاسلاميين احسن من الشيوعيين و البعثيين لكن انا فى نظرى كلهم التلاتة ملة واحدة و السودان اذا حكمه اى واحد منهم ما ح يشم عافية!!! السودانيين المسلمين الوسطيين العاديين احسن منهم و مافى مقارنة لانهم ناس اسوياء و غير مريضين زى الجماعة اياهم!!! الشيوعية و البعثية و افكار الاخوان المسلمين كلها افكار غير سودانية و بالتالى غير وطنية و بذور خبيثة لا تصلح فى ارض السودان الطاهرة و الذى خبث لا يخرج الا نكدا!!! انا اطالب بالسوداناوية الاسلام و اخلاقه عندنا الكرم عندنا الرجالة عندنا عزة النفس عندنا التكافل عندنا و فى المناسبات ما بتعرف الغنى من الفقير و الضيف من المضيوف و لا المسلم من المسيحى ولا الادينى و انحنا ما محتاجين لشيوعيين او بعثيين عروبيين او اسلامويين تجار دين عشان يورونا كيف نعيش او ندير حيتنا بل نحن الذين نعلمهم!!! و الما عاجبه الكلام ده يشرب من البحر المالح!!يلا بلا قرف!!!


#184786 [سليمان قش]
0.00/5 (0 صوت)

07-25-2011 10:18 PM
والله ياعثمان مرغني مقالاتك دي اخير منها لحس الكوع !!!!!!وبرضو ما جبت سيرة الكشك والاولاد الطشو


#184742 [المندهش شديييييييد]
0.00/5 (0 صوت)

07-25-2011 08:40 PM
ياشيخ عصمان انت تعليق القراء بتاعنك مابتقرأهو ولا شنو وقادينا كل مره الوااااالى الوااااالى ود الخدر المابنظلم عنده احد ولسه قصة الكشك مامعروفه ولا الكاميرا ولا المزرعه ياخى نجض مواضيعك ماتبقى كدى


#184731 [وحيد]
0.00/5 (0 صوت)

07-25-2011 08:20 PM
سيدي الفاضل... هؤلاء القوم يزدادون جهلا كلما كبرت اعمارهم و هم قوم استزلهم الشيطان و اغوتهم السلطة و اعمت ابصارهم و بصائرهم لذلك تعرفهم من لحن القول و من ركاكة الالفاظ و سوء التعبير و العزة بالاثم، و ينسون ان الله يعطي الملك من يشاء و ينزعه ممن يشاء و لكنه الجهل و سكرة السلطان .... اسال الله ان يفيقوا منها عاجلا بطامة تذهب بهم الى مقابر الطغاة و تلحقهم بفرعون و هامان و جنودهما و تخلص البلاد و العباد من شرهم و فسادهم و سوء اخلاقهم ... نسوا الله فانساهم انفسهم و اعتدوا بالسلطة و ما نهبوه من مال اليتامي و الجوعى فاصبحوا لا يميزون .. و لكن الله بمهل و لا يهمل و مصيرهم الى زوال و الى حساب و عقاب و الى قبور ضيقة مظلمة لا فيها سلطة و لا مال و لا امن وطني و لن يجدوا بها الا العمل الصالح و القلب السليم و و القول المعروف .ز و فيما نرى فليس لهم نصيب من هذا


#184730 [wahied]
0.00/5 (0 صوت)

07-25-2011 08:19 PM
كذب الترابى ولو صدق قال الشيخ من عجائب الانقاذ ان نافع اصبح سياسيا انت كذاب يا شيخ هو يحاول ان يكون سياسيا لكن الطبع يغلب على التطبع وكل اناء بما فيه ينضح قال الشاعر :- لســــــــان الفتى نصف ونصف فؤاده فلم يبق الا صورة اللحم والدم وقــال ايضا :- إن سفاه الشيخ لا حلــم بعـــــــــــده وأن الفتى بعد السفاهة يحلــم المـــــدعو نافع الما نافع دا لا يصلح سياسيا ولا حتى تربالا إنه رجل لئيم ومتغطرس ولا اخلاق له لا يعرف كيف يتكلم ومتى يتكلم ومتى يسكت أفسدتــــــــه السلطة عفوا زادته فسادا لكن السبب منك انت يا شيخنا زرعت هـــذه البلاوى والحمدلله حصدت ثمار زراعتك وهذه الالغام التى زرعتها لنا ســـــوف يسألك الله عنها يوم الوقفة العظيم اذيت العباد باسوء العباد زرعـوا الظلـــم وتاجروا بالدين واكلوا اموال الناس بالباطل .


#184698 [ابو عــــــــــــــــلاء]
0.00/5 (0 صوت)

07-25-2011 07:09 PM
الكوز مهما كان ان خارج اللعبه او داخلها لابد ان يزور الحقائق ويدس السم فى العسل وبما ان عثمان من الغارفين من ماعون الانقاذ الاول لابد ان يستتر خلف كلام هلامى ويزوغ من الفيل

تزوير الحقائق

1- معارضه وتتربص ؟؟؟

وكان النظام يسمح بالمعارضة ولها مساحة للنقد والتحقيق

2- الشرعية الدستوريه ؟؟؟

وينسى او يضع انقلاب الانقاذ على الديمقراطية فى الخلف وكان الانقاذ اتت بعد الانتخابات

3- نزاهة الانتخابات ؟؟

وهذا قمة التزوير بان يحاول ان يفهم القارئ ان الانتخابات كانت نزيه وعادلة برغم انه لفظ فيها وتباكا ساعتها من هيمنه الدوله على الناخب لكن اكل العيش ينسى الفات

4- مشاركة الاحزاب ؟؟؟

وام الاثافى يقول ان المعارضة شاركت فى الانتخابات يعنى بالعربى الانقاذ كانت

خيار الشعب

امثال عثمان ميرغنى سرطان انهم اخطر من نافع لان نافع واضح وكم من مره صرح بان نحنا اخدناها بالبندقية ومن اراد تغييرنا ان يحمل بندقية ونحن كتلناهم ولو اخدو الحكومة الليكتلونا



#184663 [مندي]
0.00/5 (0 صوت)

07-25-2011 05:56 PM
في ظل الجمهورية الاولي الزول بتاع الكشك لحس كوعو وهو يحاول استعادة الكشك من صاحبك الوالي وفي ظل الجمهورية السودان ما زال يلهث لاستعادة اولادو الطشو لذا فالامر سيان...... يا باشمهندس اذا استمر صاحبك ود الخضر وجماعتو في الحكم فنحن موعودون بجمهورية تالتة ورابعة لان نفس الابله الذي طالبنا بلحس الكوع في الجمهورية الاولي ما زال يمد لنا لسانه ساخرا في ظل جمهوريتكم التانية وما زال يطالبنا بلحس الكوع وصدقني حنلحس كوعنا ان شاء الله لانو خلاص فاض بينا يا عثمان


#184652 [واحد]
0.00/5 (0 صوت)

07-25-2011 05:39 PM
عصمان

انت مصدق قضية شرعية الحيكومه بعد الانتخابات ؟ انت ما شفت ادروب عمل شنو ؟ كدي ادخل فيديو الراكوبه وشوف الخج بعدين يا عصمان انت وعلى عثمان الموسادى عاوزين تكتلو نافع ولا شنو يعتذر كيف يعني وبعدين يعني عاوزه يطش زي اولاد صاحب الكشك المارجعو والما انتحر وود الخدر صاحبك ما يعبره
;( ;( ;( ;(


#184640 [(العوجات)]
0.00/5 (0 صوت)

07-25-2011 05:19 PM
نافع ، سوار، كمال ، كرتى ، الخضر وهارون \" ماذا يقول هؤلاء فى حق هذا الشعب الأبى ؟! ؟؟؟
فقد درجت حكومة شذاذ الافاق هؤلاء على الالفاظ الساقطة والهابطة و الذين لم يتركوا مفردة من مفردات الانحطاط الا واستعملوها فمن قائل (يموصوه ويشربوا مويته) و (تحت الجزمة بتاعتي)(البعاين بنقد ليهو عينو والبمد اصبعو بنقطعا ).... (صناديق الذخيرة بدل صناديق التصويت ونقلع الجلاليب والعمم ونلبس الكاكي) ... (ونحن استولينا على الحكم بالبندقية ولن ينتزعه منا الا من هو \"ارجل\" منا ) ...!!
اوذاك الذي يتلفظ بكلام من نوع (يلحس كوعو)( جبناها بالقوة والعايزها ..) والتي كلفته مؤخرا كرسي طائر على يافوخه ثم ذاك المأفون والشافع المدلل وزير بتاع ايه كده \"من الوزارات المختلقة\" عشان سيادتو ما يزعل !! قال فض الله فاه من الاسنان (العايز رجالة يطالعنا ....) وذاك صبي من غلمان الاسلام السياسي لم يبلغ الحلم بعد..حاج ماجد \"اي واحد يرفع راسو بندقوا ليهو \" مخاطبا فرسان النوبة ومهددا وكلنا يعرف هؤلاء الفرسان ودورهم في حماية السودان على مر التاريخ !!! الى غير ذلك تخيل ان هؤلاء هم الذين يحكموننا والذين كما ترى ومن المؤكد لم يتم تربيتهم تربية تامة ولا زال السؤال قائما :من أين أتى هؤلاء؟؟؟ ومن اين يأتي هؤلاء بهذه الالفاظ؟؟ فقديما قيل : \"كل اناء بما فيه ينضح !!!!


#184627 [Awad Sidahmd]
0.00/5 (0 صوت)

07-25-2011 04:50 PM


(........... ولماذا نذهب بعيداً؟ القرآن نفسه يقول: ( ضرب الله مثلاً كلمة طيبة كشجرة طيبة.. أصلها ثابت وفرعها في السماء..) لماذا يأخذ المؤتمر الوطني من هذه الآية رسم شعارها في الانتخابات (الشجرة) ولا يأخذ المعنى الإنساني الراقي الذي تدعو إليه.. )

تعليق : الأخ / عثمان ميرغنى , ........... أنت تعلم تمام العلم أن هذه ليست بغريبة , فالغريب ألاّ يحدث من الذى عنيته بالاسم : ( نافع ولحس الكوع ).... أو غيره من ناس \" الانقاذ \"..... لأن هذه هى شيمة : \" الطغاة \" أهل \" الاستبداد \" ... فى الأرض ,........ أنت تعلم أننا أمام نظام أتخد من الشمولية البغيضة المدمرة , وسيلة لحكمة وسيطرته الكاملة على مقدارات الأمة بكاملها وهذا مما يجعلهم يتطاولون وينظرون للناس كل الناس بازدراء واحتقار شديد , وهذا ما جنيناه وسنظل نجنيه من هذا : \" الاستبداد السياسى الغا شم \" و \" الطغيان الأعمى \"........ يحدثنا فى ذلك العلامة الشيخ المرحوم \" الكواكبى \" يقول معرفا الاستبداد :
الاستبداد : \" لغة هو غرور المرء برأيه و الأنفة عن قبول النصيحة أو الاستقلال في الرأي و الحقوق المشتركة . ....... و في اصطلاح السياسيين هو : \" تصرف فرد أو جمع في حقوق قوم بالمشيئة و بلا خوف تبعة \"
ولكن يا أخى كما تعلم أن المصيبة الكبرى والبلية الأعظم أن كل هذا يمارس باسم الدين والرسالة الخاتمة والتى جاءت أصلا لاسعاد البشرية جمعاء , .......... فنجدها هنا وللأسف الشديد تعرض وفى القرن (21) بهذه الصورة المغائرة والمجافية تماما لتعاليمه وموجهاته , ...... ألا ترى يا أخى أننا بعملنا هذا نقدم أكبر اساءة لديننا الحنيف ومن ثم نهدى لأعداء : \" الحق والدين \" .... أعظم وأجلّ هدية لم يكونوا ليحلموا بها ؟؟؟؟؟؟؟؟؟


#184620 [اسامه]
0.00/5 (0 صوت)

07-25-2011 04:30 PM
والله ياعثمان ......داير البتاع وخايف من البتاع .....ما تكمل الايه .....ها ها ها


#184591 [ابوالنصر]
0.00/5 (0 صوت)

07-25-2011 03:49 PM
خلينا في المهم الراجل الماانتحر عملتو في موضوعو شنو نرجو الافادة


#184548 [TIGER SHARK]
0.00/5 (0 صوت)

07-25-2011 02:59 PM



. ومعارضة تتصيد حكومة لتوقع بها.. رغم أن انتخابات عامة ورئاسية جرت العام الماضي شاركت فيها كل الأحزاب

Do you think that we are bunch of IDIOTS..!! or what...you are a disgrace writer\"..shame on you\"


#184512 [عكاشة]
0.00/5 (0 صوت)

07-25-2011 02:25 PM
وكللمة خبيثة كشجرة خبيثة اجتثت من فوق الارض ما لها من قرار. صدق الله العظيم ودي خفت منهم ولا ايه!


#184501 [nasreldeen ]
0.00/5 (0 صوت)

07-25-2011 02:16 PM
انا يخيل لى ان المسألة مرتبطة بموضوع الكشك بتاع الراجل الما انتحر ومازالنا نجرب فى لحس الكوع مع ارجاع الأولاد الطشو


#184491 [سوداني ]
0.00/5 (0 صوت)

07-25-2011 02:11 PM
ياعثمان انت مصدق انو الانتخابات الماضيه كانت شرعيه ونزيهه وحره ولم تكن مزوره ؟؟؟
نافع عارف الحقيقه عشان كدا بتكلم بهذه اللغه المنحطه .


#184476 [zahi]
0.00/5 (0 صوت)

07-25-2011 01:58 PM
كيف يكون تغيير النظام باستخدام القانون والدستور وانت تقول باننا لازلنا في مرحلة البحث عن دستور دائم ؟؟؟؟ و هل لازلت تثق في تصريحات علي شاكلة ( اشراك الاحزاب في وضع الدستور الدائم او في حكومه برنامج وطني ؟؟؟ ) لان اي طفل في السودان يعرف تماما بان المؤتملر الوطني و بالتجربه لن يشرك اي حزب لا يبصم علي برنامجه الموضوع سلفا يعني ديكور او تمومة جرتق . ......


#184472 [soodani]
0.00/5 (0 صوت)

07-25-2011 01:52 PM
المؤتمر الوطنى يلجا فقط للمعارضة عند الزنقات والغريب ان بعض رموز المعارضة يثقون فى دعوات المؤتمر الوطنى للحوار الانتخابات التى تنقل وتداول السلطة سلميا هى الانتخابات الغير مزورة وبعدين ورينى حزب فى الدنيا كلها فاز فى انتخابات وسجل انجازه بائس وصفر والاسوا مافى اى حاجة يؤمل عليها الا الامل فى الله


#184466 [لسانك حصانك ]
0.00/5 (0 صوت)

07-25-2011 01:44 PM
نقول لي نافع لسانك حصانك ان صنته صانك وان تركته اهانك


يا نافع ما تعمل فيها راجل وتحتمي بي الامن وبالسلطة باكر تلقى نفسك خارج الدائرة والمؤتمر الوطني وتجيب ليك كرسي وتقعد تحت شجره نيمه وتقراء الاخبار زيك وي الناس كمواطن عادي

ده اذا الغضب المترقب ما فكاك بي كرسي تاني او اقتيالات القادة
شخص بشخص والبادئ اظلم


عثمان ميرغني
عثمان ميرغني

مساحة اعلانية
تقييم
4.16/10 (11 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة