07-27-2011 11:12 AM

هل المرأة أشجع من الرجل في السودان؟

شريفة شرف الدين
[email protected]

أين النخوة في الرجل السوداني و صفية أُغتصبت و ذهبت أدمعها هدرا و صارت قضيتها هباء صفصفا؟ ماذا كان موقف الرجل و الفتاة السودانية تجلد من قبل الشرطة السودانية بشكل مذل مهين لا يُرضي لكلب؟ من الذي ناصر فاطمة غزالي و أمل هباني اللتان تصدتا لجبروت الأمن دفاعا عن صفية؟ و هناك في دارفور .. ترملت المرأة السودانية و نزحت و أغتصبت ثم تركت و بنيها الصغار لسبع سنوات و تزيد .. و عندما نهش بشير الشؤم في عرضنا نحن نساء دارفور بمقالته الخبيثة أن إغتصاب الجعلي للدارفورية شرف لها نقلا عن الترابي .. عندها كتبت المقال أدناه بالراكوبة قبل التهكير و تجاوب القراء عندها بالتعليقات و لكني لم أجد دعما عمليا إلا من فتاة سودانية ببريطانيا بالمساهمة ماديا لأتعاب المحامي و سوداني بسلطنة عمان وعد بدعم قانوني ليس إلا. حاولت جاهدة في المضي و لكن الأبواب كانت توصد أمامي حتى صار الأمر نسيا منسيا.. دونكم المقال ..
غرباوية دارفور تفتح بلاغا ضد الترابي و الدليل شريط الفيديو
مضى زمن و نحن نساء دارفور نتقلد وسام شرف الإغتصاب من الجعلي دون أن ينبري أحد من كل رجالات و نساء السودان للأخذ بحقنا. آن الأوان لنأخذ حقنا بالقانون. أنام ملء جفوني عن شواردها و يسهر الخلق جراها و يختصم
ثمة فرق ما بين قول المتنبي و قول عمر البشير المنقول عن الترابي عن \"قوال\" لم يذكر اسمه فيما يتعلق بالشرف الإغتصابي الممنوح من الجعلي للغرباوية
اسمحو لي ايها القراء أن اخاطبكم بالعربي البسيط
و الله يا ناس لو عارفين أنا محروقة قدر كيف من الزول الإسمو البشير بسبب الكلام الطعنا بيهو ده. أولا الموضوع حساس لدرجة إنو الواحدة فينا ما قادرة تفتحو مع ابوها و لا زوجها و لا حتى أخوها بس نقعد نتشاوف لا أكتر و لا أقل .. و لمن يقوموا ناس يتناولوا الموضوع بالكتابة في النت تلقى المعلقين اليقولو إنو المواضيع الزي دي حقو يسكتو عنها لأنها بتجيب الفتن
طيب ما نفس الشي ده حصل مع عائشة أم المؤمنين لحدي ما الله جاب ليها براءتها و نقالين الكلام أخدو البيستحقو من الجلد. ولو الكلام ده ما حصل هل كان ممكن عائشة تمشي رافعة راسها؟ ولا الرسول كان حيكون مرتاح؟ لكن شوفو بعدما الأمور اتحلت كيف أم المؤمنين ردت إعتبارها و استحقاها الرسول و هي بريئة و شريفة من كل الكلام الإتقال.
أنا و أخواتي الدارفوريات المعنيين بالكلام الطاعن ده لو سكتنا حقو إنتو ما تسكتو المفروض تجيبو لينا حقنا و اتمنيت لو لقيت كلمة مواساة أو إعتذار من كل البكتبو في الراكوبة. كتبتو عن البصل و الإنتخابات و عضعضة الكلاب لكن من الكتب في موضوعنا غير تلاتة موضوعات بس اتكتبت في الراكوبة هي
1. \"إلا أعراض نساء دارفور يا أيها اللا بشير\" مقال كتبه علي الكرار بتاريخ02-04-2010
2. \"صدق الرئيس البشير و لم يكذب الدكتور الترابي ..تباً للغرابي\" مقال كتبه الصادق ضرار بتاريخ 04-04-2010
3. “04-04-2010 بتاريخ دارفوري يرد علي البشير فيما قاله عن الغرباوية كتبه مقال” مصطفي كمال الدين
4. الحالي مقالي
منو الحيجيب لينا حقنا؟ ولا دايرننا نمشي ذليلات منكسرات نتوشح بالشرف اللي ادانا ليهو الجعلي؟ أبدا و الله .. الموت أهون
و إنت يا الجعلي مالك ساكت؟ راضي بالكلام ده؟ ياها دي الجعلنة بتاعتك؟ لا سمعنا ليك حس و لا خبر من يوم وزع لينا البشير وسام شرفك!! قول حاجة ياخي. على الأقل سمعنا إنو إنت ما بتشبه الكلام البيقولو البشير ده
وإنتو يا اللي في إتحاد المرأة ...دايرات تقولن إنو القصة ما خشت أضانكن ولا شنو؟ مهما تكون المعايير لتصنيف المرأة عندكن برضو بنندرج تحت لائحة المرأة السودانية و لينا كل الحقوق و إلا دايرين منكم ما يفيد عكس الكلام ده عشان نعرف موقعنا من الإعراب بالضبط ...بس بحذركن شديد إنو ما لينا أي دخل لو راجل واحدة فيكن متورط في الموضوع ده ...كل واحدة تشوف راجلها بدري بدري
بس أنا محروقة أكتر من أولادنا الدارفوريين على مستوى المثقفين و العاملين فيها حريصين علينا و على حقوقنا هو فيه حق قبل الشرف؟ ما سمعنا منكم بغم ...وين إنتو؟ راجين المناصب؟ الله يلعنها إذا كانت أهم من الشرف و رد الإعتبار...ما دايرين منكم تجرجروا الطعنو فينا من دقونهم عشان تردو حقنا بس دايرين مجرد إدانة و شجب ولا بقيتو زي الزعماء العرب اللي اتخلو حتى من الإدانة و الشجب؟ كنت إتمنيت الجعجعة العملتوها في الإنتحابات دي تكون في قضيتنا دي ..
و أنا دايرة أول شرط لأي إتفاقية مع حكومة البشير يكون رد إعتبار الغرباوية و بعد داك شوفو قضايا تقاسم السلطة و الثروة و قبل ما توجهو لينا أي كلام بخصوص دارفور دايرين نسمع منكم عملتو شنو في الموضوع ده أولا حتى بعد داك تقولو العندكم
و أقول ليك يا البشير الكلام المسيخ القلتو ده شوف منو البستحقو ...و كم ما قريت القران اسمع نقول ليك ربنا بيقول شنو ولا أقول ليك...احسن تسال مساعدينك و مستشارينك إنو الدين قال شنو لانهم أصلا ما عندهم شغلة

ياتو مرّة جيتنا في دارفور ما استقبلناك و فرّحناك؟ سكتنا سبعة سنوات على الجوع و الحرب و تش البيوت و حياة المعسكرات اللي الواحد ما يتمناها لعدوه.
صاح أنحنا ناس بسيطين ..بيوتنا قش و ملابسنا تعبانة و شكلنا شكلو ما عاجبك لكننا و الله أشرف الناس
أسرنا اتفككت و راسمالنا ضاع و أولادنا تعليمهم و علاجهم بقى مُلكلك و الخوف مالينا في كل ساعة و الغاشي و الماشي من الخواجات و الأفارقة يصوروا في حالتنا التعيسة دي و نمد يدينا عشان يدونا زيت و دقيق في أرض النيلين و إنت راعينا و حامينا و مُتقـلين بيك قلوبنا لمن نشوفك تتكلم
ده كلو ما كفاك عشان تجي و تزيد طينتنا بلة؟
غايتو انا ما حأسكت لو ما أديتنا حقنا...و الله حأكتب في كل المواقع و الجرايد و أبقى ليك عضمة حوت لحدي ما تدينا حقنا
و كأنو الموضوع ما بعنيك عامل أضانك طرشا و تخلينا نتعذب. ياخي و الله حرام عليك حرام عليك إنت ما عندك حريمك ديل .. بترضى فيهم كلام زي ده؟ و لو الكلام ده أصلو ما حصل و نقلو الكضابين طيب ما تنفيهو أو تقدم النقلو للقانون

و يا الترابي كان الحكاية غلبتك و عايز تفش غبينتك مع البشير فشها لكن بعيد مننا.. إنت قايل الكلام القلتو حيخلينا نتعاطف معاك؟ أبدا و الله و أنا حأقوم أشوف لي محامي و حأفتح بلاغ ضدك عشان ناخد حقنا بالقانون و دليلي المادي هو شريط الفيديو
آخر كلامي بوجهو لرجال السودان بوجه عام و لرجال دارفور بوجه خاص و للبشير بوجه اخص :
إنتو ما عارفين الحصل شنو لما الولية ديك قالت: \" وووووب علي يا المعتصم؟\" شريفة شرف الدين (إنتهي المقال).

ليس دفاعا عن بنات جنسي و لكن وداعا لعبارة (المرة كم فاس ما بتكسر الراس).. أترك لك أيها الرجل أن تصنف نفسك حيال ما يجري و أرجو أن تجد ما دون الفأس فذاك لك أنسبُ.





تعليقات 8 | إهداء 0 | زيارات 2218

خدمات المحتوى


التعليقات
#186232 [سومي العسل - الدمام]
0.00/5 (0 صوت)

07-27-2011 10:22 PM
مع احترامي ليك أخت شريفة
لكن انتي كمن يحرث في البحر ... حلك الوحيد لأخذ حقك هو أن يسقط النظام ويقدم للمحاكمة أما ما دام النظام باقياً فلن تأخذ بحقك ..


#186179 [بشير]
0.00/5 (0 صوت)

07-27-2011 07:54 PM
الاخت شريفة شرف الدين الشريفة...اولا احيي فيك شجاعتك وحرارة دمك وافتكر اي سوداني ماوجعو الكلام ده حقو يراجع رجولتو اولا وسودانيتو تانيا....
وحقو الناس تعرف انو المراة في دارفور عماد الاسرة وركيزتا الاساسية وهي شغالة زيها وزي الرجل واي كلام يمس شرفها يمس شرف اي رجل شريف...واهلنا بقولو مافي دخان بدون نار عشان كده نحن معاك قلبا وقالبا حندعمك بكل السبل حتي نعرف امصدر الكلام الفاحش ده ويمثل قائله امام القضاء لو كان البشير ولا غيرو...
اختنا شريفة حاسين حجم الوجع والالم والمغصة الجواك والكلام شين وقبيح ومابقولو راجل عندو حريم في بطن بيتو....الا وحاتك يا غاليه المرمط كرامتكم يمين يتمرمط ويسف التراب ويكفي نساء دارفور انهم فخرنا وشرفنا ومصدر اعزازنا.....


#186112 [حامدابوعبدالمجيد]
0.00/5 (0 صوت)

07-27-2011 05:01 PM
مساكم عافية اخوتي بالراكوبة
بامانة الواحد داخل عليك وخجلان ومعاك فى كل الكتبتيهو بس اعرفي حاجة واحده ماكل الجعلييين واقفين صف خلف البشير ولا كل الدارفوريين واقفين صف حولك اتي وقضيتك يعني زي مافى ناس معارضين للبشير من وسط الجعليين فى ناس مساندين البشير من الدارفوريين علشان القصة بتاعت العنصرية والجهوية ماتبقا سبب انو الكيمان تنفرز والدفاع يبقا للحفاظ على النفس البشرية والجغرافيا
مجهودي فى الموضوع ده اى واحد يمر علي زيارة او حتى لغرض عمل بشوفو الفيديو علشان اخد رايو وموقفو شنو وعلقتا على الموضوع ده فى الراكوبة بالرابط كتير جدا واظن احصائتك مادقيقة الموضوع ده بتذكر اتنشر كتير هنا فى الراكوبة بس الهكر اللعين يمكن ضيع الارشيف

من ناحية رفع قضية طبعا من حقك بس اعرفي انو مافي محكمة فى السودان ولا قاضي ووكيل نيابة ممكن يقبل رفع دعوى على الريس حتى ترفع عنو الحصانة
نظام الانقاذ لعب كثيرا على وتر القبيلة وكانت حاضرة فى كثير من اتفاقياتو وتوازناتو وهنا نعيب على زعماء القبائل الباعو ضميرم وشرف بناتم علشان القروش والامتيازات وفى موضوعك ده تحديدا وموضوع صفية كان حيكون عندهم دور كبير جدا فى تحقيق العدالة زي ماقتا ليك شراء ذمم وقالا ابو العفين عديل فى لندن وهنا قبل تهجمي على الجعليين والدارفوريين الفي الانقاذ ومساندنها شوفو الزعماء ديل وخلو قواعدكم تضغط عليم او تغيروم عديل والخائن اقتلوهو زي ماعملو الفور وزعمطو الجماعه بتاعين المحايات فى المعسكرات
تصبحوا علي وطن


#186057 [afra mohamed]
0.00/5 (0 صوت)

07-27-2011 03:06 PM
ازيك يا المناضلة

بحيك واقف معك .........و صبرنا على الظلم والقهر والفقر والحرب وصعب جدا نصبر على انتهاك العروض جهرا رقم انها موجودة لكن قولها لايرضى اى شخص له دين وعرض وحب لوطنه وقبيلته ..


#186000 [مغلوب على امره]
0.00/5 (0 صوت)

07-27-2011 01:39 PM
الرجالة طايرة ........ كلام عيب نقوله فى اخواتنا............والله يكضب الشينة................
فى انتظار الاعتذار من الطرفين.......


#185996 [ود المجانين]
0.00/5 (0 صوت)

07-27-2011 01:35 PM
لك التحية اختي شريفة وانتي ونساء دارفور اشرف من اي جعلي اكان مع البشير ولا ضدو لانو هؤلا القوم لا يمكنهم ان ينسيو التاريج .
ومنهم الجعلين حتي يفتخرو بان اغتصاب نساء دارفور من الجعلين شرف.
اسمعو الكلام دا انو الجعلين الموجودين الان ديل كلهم احفاد محمود ود احمد وحملة بعد استباحة المتمة بنفس الكلام القالو البشير الان انا بقول الجعلين يفتخروا لانهم من اتاج ............. محمود ود احمد


#185947 [أم سارة]
0.00/5 (0 صوت)

07-27-2011 12:45 PM
يا أخواتي و ينهم الرجال؟ بلا رجرجة ما شفنا حاجة .. بلدا غاب فيها الرجال يقطعها البشير و يوزع بقرها و يقدل كان واحد يقدر يديهو العين الحمرة ;( ;(


#185939 [بت النيل]
0.00/5 (0 صوت)

07-27-2011 12:40 PM
يا شريفة يا عفيفة يا نظيفة .. وين الرجال ؟ ياهم ديل الي بيخطفوا جوالاتنا ولا البدافرونا في المو صلات؟ إنتي ما شفتي الرجال هناك في تونس و ليبيباو سورياواليمن و مصر؟ يموتوا عشرين يجو عشرين .. نص سنة كاملة لا كلوا و لا ملوا مع إنو ظروف بلادهم تكون مليون أحسن مننا

إنفصال الجنوب ما صحاهم .. احتلال حلايب ما صحاهم .. بكاء صفية ما صحاهم .. و الله أنا قطعت عشمي تب في الراجل السوداني .. شاطرين في الهلال و المريخ و الفيلم الأجنبي و المصارعة ...كدي خلي يدونا فرصة في الكورة و المصارعة كما غلبناهم

الرجال ناس القرشي .. ناس علي عبداللطيف .. الأنصار الأوائل ...إنتي ماشفي رجال السودان بقوا ناعمين و بجضيماتم .. و الله ما حيقدروا للحارة عشان كده ناس البشير يعملوا العايزنو

أنا بسألك يا راجل يا سوداني ... عليك الله حسا إنت مقتنع إنك راجل بالصُح الصح؟ كان إجابتك نعم ها ورينا بالبيان أو فضوا لناس شريفة و فاطمة غزالي و صفية و لبنى الدرب


شريفة شرف الدين
مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة