في


المقالات
المنوعات
من يوميات مغـترب مقهور
من يوميات مغـترب مقهور
02-11-2016 03:51 PM


مــأســـاة مــغــتــرب :-



ظواهر وعادت سالبة في مجتمعنا السوداني، وهي ظاهرة طلب موبايل جلاكسي من المغترب من إخوانه أو أبنائه او أصدقائه أو جيرانه أو الخ.....

أنا مغترب وراتبي الشهري 3500ريال ، أقوم بصرف 1000ريال مصاريفي الشهرية وتحويل 1000ريال لأسرتي في السودان ، ودفع الكشوفات والمناسبات الإجتماعية في الجمعيات في حدود 500ريال شهرياً ، الموبايل الذي إستخدمه سعره لا يتجاوز 700ريال ومن ثلاثة سنوات لم اقم بتغييره من نوع قراند الصيني أبوكلب يعلق مسافة عشان يفتح ،،تموت تخليه بس!! .

ده إذا مافي حالة طارئة تقوم تشيل راتبك كلو تحولو للسودان وتأخذ سلفية من أصحابك أو محل الشغل تمشي بيه مصاريفك اليومية ، طبعاً الكلام ده غير المصاريف الحكومية البيدفعا المغترب عشان يجدد إقامتو ويطلع الجواز الإلكتروني من السفارة بي530ريال ويدفع الضرائب والزكاة رغم إنو هو زاتو من مستحقي الزكاة.

عدد الطلبات الذي تم طلبه مني خلال العام2015 عدد 23 جوال من جلاكسي نوت وسوني والخ أقل واحد فيه سعرو 1200ريال....يعني إذا لبيت الطلبات دي كلها عايز لي حدود 30ألف ريال بنسبة71% من دخلي السنوي البالغ42ألف ريال،، ومستحيل أقدر انفذ نصف الطلبات المذكورة لو بقيت شغال مدير عام في شركة.

نصيحة للاخوة في السودان : إنتو بتفتكروا إنو المغترب ده بيشيل الموابايل من الأرض ويرسلوا ليك ولا شنو ؟؟ والله إذا بيلقاه مجدوع في الأرض ما يقدر ينفذ الطلبات دي كلها.

ثانياً : المغترب ده زيتو طالع ،، تارك بلدو واهلوا عشان يآكل عيش ،،وحكاية طلب الموبايلات دي حكاية غير ضرورية ،،وشينة في حقكم !! والديل على ذلك انا لي نفسي ما عندي إمكانية إشتري موبايل غالي من النوع الإنتو بتطلبوه ده.!!!

واصلاً لو كنت عندي إمكانية كنت جيت إجازة لي7سنوات ما قادر أنزل إجازة لأنه ميزانية ،،ولما المغترب ينزل إجازة يقنع من الموبايل بتاعوا لأنه ح يتقلع منو قلع !!

برضو نصيحة للمغتربين :

إذا جاتك مسكول من السودان أعمل نايم معانتو جياييك هوا !!!

إذا جاتك دردشة في الفيس بوك وقال ليك أنا ما عندي واتساب أعمل رايح معناتو عايز جلاكسي !!

إذا جاتك أي إتصال من رقم إنت ما بتعرفوا لا تردو !!!

التحية للاخوة المغتربين لما يقومون به من أعمال خيرية في مناطقهم رغم ظروفهم المأساوية من شبكات مياه ومدارس وكهرباء والخ....وهذا واجب عليهم .

طبعاً الكلام ده حاصل لكل المغتربين بس ما قادرين يعبروا،، وأنا نموذج بين ملايين المغتربين ، ومرات المغترب بيكون ما شغال وموقوف عن العمل ونايم في الجمعية ،،برضو يجيه مسكول أو رسالة في الفيس يطلبوا منو موبايل جلاكسي سعرو ألفين ريال .

والتحية للاخوة الحارسين العقَاب في البلد بس شوية أتقلوا ،، وخففو على إخوانكم وعارفنكم ما عارفين الحاصل في الغربة ، لكن حتى لو أبوك لا تكلفوا بما لا طاقة له وعشان يقدر يجيكم إجازات وما يخش في ديون ويتبهدل في بلاد الغربة. .



من يومــيــات مغـترب مـقهــور

bin_sameel@hotmail.com

تعليقات 3 | إهداء 1 | زيارات 5539

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1414611 [محمد حسن فرح]
0.00/5 (0 صوت)

02-14-2016 05:25 PM
{{ الموبايل الذي إستخدمه سعره لا يتجاوز 700ريال ومن ثلاثة سنوات لم اقم بتغييره من نوع قراند الصيني أبوكلب يعلق مسافة عشان يفتح ،،تموت تخليه بس!! }}
انت محظوظ وسعيد جدا لانك تحمل هذا الجوال الفاخر .. انا احمل جوال نوكيا اشتريته قبل 12 سنة .. مرة رحت لحراج الجوالات لأبيعه العامل البنغالي قال لي: هذا بلديه .. يعني روح ارميه في الكوشة .. رفض حتى ياخذه مجانا رغم ان جوالي ذا يعمل بكفاءة عالية


#1414011 [الوليد ابراهيم عبدالقادر]
5.00/5 (1 صوت)

02-13-2016 11:44 AM
ايها المقهور صدقني ما قلت الا الحق.. واهلنا قديما قالوا النصيحة بتخلع ما "بتكتل"..ايها الناس "الغربة مأساة يصنعها الانسان بنفسه ويصعب عليه التخلص منها" او كما قال الأفندي.. قال جلاكسي قال..ســـــــــــــلام..


#1413577 [ود ابوراس]
5.00/5 (1 صوت)

02-11-2016 10:28 PM
والله ما قلت الا الحقيقه


محمد صالح الحلفاوي
مساحة اعلانية
تقييم
7.95/10 (13 صوت)





الرئيسة |المقالات |الأخبار |الصور |الفيديو |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة