02-10-2016 08:52 PM


في آخر مقالتين متتاليتين (يمكن الرجوع إليهما) كنت قد وجهت سهام النقد (للإسعاف المركزي) فيما يختص بذلك الإعلان المسجل عند استقبال (الكول سنتر) لمحادثات المواطنين والذي يخص شركة سوداتل للاتصالات والتي قامت بتشييد (الكول سنتر) وجعل الخدمة مجانية، وقد كان استهجاننا لهذا الأمر هو (إنو المسألة ما بتسمح لأنو دي أرواح مواطنين وكده)، كما كان انتقادنا (للإسعاف المركزي) هو بطء الخدمة إذ لا يمكن أن تصل سيارة الإسعاف لطالبها في زمن يقارب الساعة وكذلك عدم جاهزية العربة بتوافر الأدوية والأجهزة المنقذة للحياة وكذلك الطاقم الطبي..
في صباح الأمس تلقيت مهاتفة (راقية) من ابننا (خالد) بالإسعاف المركزي (333) يدعوني فيها لزيارتهم ومقابلة السيد المدير وطاقمه الذي يشرف على هذه الخدمة المهمة والوقوف ميدانيا على كل ما يخص هذه المؤسسة.
على الرغم من انشغالي التام غير أنني أكدت للابن خالد بأنني سوف أسجل لهم زيارة في نهاية اليوم في مبانيهم بمستشفى أحمد قاسم ببحري، وقد كان، حيث وجدت الابن (خالد) في انتظاري وفي معيته الابن الدكتور/ حسام (مدير الإسعاف المركزي لولاية الخرطوم).
جلسنا على مكتب المدير.. وكانت الأسئلة والإجابات:
س: كدي يا دكتور عرفنا بأنواع الإسعافات الفي البلد دي؟
ج : في خمسة أنواع من الإسعاف:
1- الإسعاف المركزي وهو يتبع لوزارة الصحة بولاية الخرطوم.
2- إسعاف يتبع المنظمات (كالهلال الأحمر مثلا).
3- إسعاف يتبع المستشفيات الحكومية.
4- إسعاف يتبع المستشفيات الخاصة.
5- إسعاف يتبع مواطنين !
س : كم عدد العربات عندكم في الإسعاف المركزي؟
ج : لدينا 45 عربة موزعة على 32 مركزا وهي مجهزة تجهيزاً كاملاً بكل الأجهزة والأدوية المنقذة للحياة وإذا كان المريض حالتو حرجة بيطلع مع الإسعاف طبيب وممرض أما إذا كانت حالة باردة (أي مستقرة) فيرافق الإسعاف كادر طبي مدرب ممرض أو تقني تمريض..
س: أجهزة زي شنو؟
ج: فيها 3 أنواع من النقالات لتناسب الحالات المختلفة، جبائرالكسور، أسطوانتين أوكسجين، ميزان ضغط وجهاز قياس السكر، جهاز الأزمة الرذاذ، وكل أدوية الطوارئ أما العربات فائقة العناية فيوجد بها علاوة على ما ذكرت جهاز مونتر دقات القلب وجهاز الصدمات الكهربائية للقلب وجهاز تنفس صناعي.
س: بتشيلو رسوم من المواطنين؟
ج : الخدمة مجانية تمااماً في كل الحالات ما عدا الحالات الباردة ذي مثلاً مريض عندو مقابلة مع دكتور وعاوز يمشي من بيتو للعيادة.. وحتى هذه الحالات لدينا تعميم إذا كان المريض ما عندو قروش تقدم له الخدمة مجانية.
س : ما هو متوسط عدد حالات الإسعاف التي تتم في الشهر؟
ج : حوالى 2000 حالة في الشهر.
س: نجي لحكاية الإعلان الموجود عند الاتصال ده هل تتفق معي في إنو الحاجة دي ما بتجي كولو كولو؟
ج : (يصمت برهة): والله يا أستاذ (الكول سنتر) ده إتبرعت بيهو لينا سوداتل ومن شروطهم طلبو إنو يشيروا لاسمهم.. وهو ما بيستغرق أكثر من ثواني.
س: لكن إنتا طبيب وبتعرف إنو جزء من الثانية ممكن ينقذ روح مريض.
ج : ح نتكلم مع المسؤولين في سوداتل ونحاول نعالج المسألة دي.
س : بطء الخدمة ناتج عن شنو يا دكتور؟ جارنا الذي توفي ونحنا في أم درمان رسلتو لينا عربية من بحري والمسألة إستغرقت قرابة الساعة توفي بعدها المريض في ظرف ساعة.
ج : كما ذكرت لك يا أستاذ بتكون في عربيتين إلى ثلاث عربات في أم درمان في المراكز القريبة في حالتكم دي وبيكونو طلعو مهمات إسعافية فبنشوف أقرب حته للمريض.
س : طيب وإنشغال الخط عند الاتصال؟
ج : يا أستاذ إنتا ما ح تصدق لو قلتا ليك إنو بنستقبل مئات المهاتفات يومياً من مواطنين ما متصلين على الإسعاف.. لو ممكن تعال معاي (الكول سنتر) عشان تسمع بي نفسك.. (والبفعل مشينا الكول سنتر.. معظم المحادثات بيفتكرو إنو 333 هي شركة زين.. والبعض التاني عاوز يشاغل – أيوة يشاغل عديييل كده ما الرقم مجاني) !
س: ح تعملو شنو للناس البتتصل ساي وتشغل الخط دي؟
ج : والله يا أستاذ نحنا محتارين نعمل شنووو لكن ح نتوصل في المشكلة دي لي حل.
س: آخر سؤال: شنو قصة مواطنين عندهم عربات إسعاف دي؟
ج : ديل مواطنين عندهم حافلات بيفرغوها من الكراسي بتاعتا ويختو فيها نقالة ويعملو ليهم إعلاانات فيها أرقامهم في المستشفيات ويقيفوا قداما.. وطبعا هم ما مرخص ليهم العمل كإسعاف وهنالك خطورة جداً من مسلكهم ده لإنو الإسعاف عندو شروط معينة بموجبها بيعطي ترخيص .
عزيزي القارئ .. لقد تعرض هذا اللقاء لكثير من الموضوعات ولكن مساحة الزاوية لا تسمح بنشره كاملا .. التحية للابن الدكتور/ حسام مدير الإسعاف المركزي بولاية الخرطوم، وأركان حربه لتقبلهم نقدنا لهم بصدر رحب شاكرين لهم حسن الاستضافة.
كسرة :
ناس الإسعاف (الكيري) ديل شوفو ليهم طريقة يا ناس المرور !!
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)+و+و.
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)+و+و.







تعليقات 14 | إهداء 0 | زيارات 6864

خدمات المحتوى


التعليقات
#1413683 [Babiker Shakkak]
5.00/5 (1 صوت)

02-12-2016 09:04 AM
ياستاذ الفاتح كما يقولون أنت تنفخ فى قربة مقدودة. ليس هنالك مسؤل جاد و لا إهتمام له غير مصالحه الشخصية أما المواطن فعليه التمسك بثقته فى الله و يصرف النظر نهائيا عن رجائه من خير يأتى من هؤلاء المسؤلين الذين تبوأوا هذه المناصب بحكم إنتمائهم السياسى و ليس على أساس المؤهلات و الخبرة.


#1413547 [الصادق]
5.00/5 (1 صوت)

02-11-2016 08:10 PM
اولا مفروض على الحكومة انشاء جهاز اسعاف مركزى وتوفير لكل ما يلزم لتغطية كل المدن وتوابها
عبلى كل من يحناج لخدمة الاسعاف ان يتصل على رقم الطوءارى 999 ومن ثن يتم تحويل المكالمة لخدمة الاسعاف وذلك للتعرف على جدية المكالمة والتعامل السريع مع الحالة الطارئة
من صميم واجبات الحكومة توفير سيارات اسعاف وكادر مؤهل ومجهز بكل المعدات. هنا تتجلى قيمة الانسان
ارجز ان يتم التنفيذ فورا من اجل صحة المواطن المغلوب على امره


#1413268 [ابوشوارب]
5.00/5 (1 صوت)

02-11-2016 09:00 AM
أنا ذاتى داير الناس تعرف حقيقتك لأنو ما فى صحفى بيكتب زى كتابتك دى والكيزان بيخلوهو حايم خارج معتقلاتهم

خدمة الاسعاف ليست مجانية تماما ومافى بلد فى الدنيا بيأخد عليها رسوم أو غيرو غير حكومة الكيزان
المشكلة ما هى الاسعاف وبس : انت ممكن تملأ قفتك مشاكل قبل ما تقوم من طرف عنقريبك

يا أخينا الناس ديل جونا عشان يوقفوا تدهور الجنيه لأكثر من 12 جنيه وهو الآن ب 12000 يعنى ( تدهور ) الف مرة 1000 مرة
وبرغم الحقيقة البائنة فيهم ورأينا الواضح فيهم شايفهم مصرين يستمروا فى الحكم أها يعنى عاوزين يوصلونا وين !!!!!!!!!!!!!


#1413254 [Khalid Osman]
5.00/5 (2 صوت)

02-11-2016 08:42 AM
Since we have 'kiri' government, what could possibly stop us from having 'kiri' ambulance!! Amazing


#1413230 [الشايقي]
5.00/5 (1 صوت)

02-11-2016 07:59 AM
الزول بيضرب 333 دا وبيشاغل هل بيعمل الحركه دي مع 999 ؟

طبعا لا .
الحل هو فتح بلاغ تحت الماده 77 من القانون الجنائي : الإزعاج العام
77ـ
(1) يعد مرتكباً جريمة الإزعاج العام من يقع منه فعل يحتمل أن يسبب ضرراً عاماً أو خطراً أو مضايقة للجمهور أو لمن يسكنون أو يشغلون مكاناً مجاوراً أو لمن يباشرون حقاً من الحقوق العامة .
(2) يجوز للمحكمة إصدار أمر للجاني بإيقاف الإزعاج وعدم تكراره ، إذا رأت ذلك مناسباً ، كما يجوز لها معاقبته بالسجن مدة لا تجاوز ثلاثة أشهر أو بالغرامـة أو بالعقوبتين معاً .


#1413229 [الناير]
0.00/5 (0 صوت)

02-11-2016 07:58 AM
بلفوك خموك كلامى ده ولا فى أنقلاند مافى
وكمان تصدقهم شنو ناس بتشاغل هو الفاضى منو


#1413195 [مريود]
5.00/5 (1 صوت)

02-11-2016 07:13 AM
علقت على مقالك أمس .

أقول : في هذه البلد اللي تحترم مواطنيها أكثر من عشرمية جدا جدا ممنوع بالقانون على ( أي إنسان ) يلمس مصاب في حادث ويعتبر فعله جريمة يتحمل تبعاتها.

فقط يفسح المجال لرجال الإسعاف. ولا يعطل حركة المرور ولو أصر بالوقوف سوف يخالفه الشرطي.

وعندنا إسعاف ( كيري ) يعني ممكن (أي واحد ) عندو ( أي عربية ) يصبح مسعف!!

كسرة : لكن ممكن نستفيد منهم في حمل الموتى للمقابر والمغسلة. بس يصبرو شوية بعد الجنازة تبرد.



قالت المحاضرة : الأولاد لقو البنية في حادث جاتهم الهاشمية شالوها قطعوا حبلها الشوكي سببوا لها شلل رباعي. والعهدة على المحاضرة .

الحمد لله . وكان الله في عون الجميع.


#1413191 [ودالخضر]
0.00/5 (0 صوت)

02-11-2016 07:06 AM
يا جبرة شنو الراجل دا رشاك ولا شنو الاسعافات الكيري دى الحالة المشكلة وخاضة الجثمان البرحل من الخرطوم للولايات ظاهر عيلك سكرته


#1413186 [عبدالواحد المستغرب اشد الإستغراب!!]
5.00/5 (1 صوت)

02-11-2016 06:43 AM
غشانى يا عمده وقال لى بعرسِك وبعدين جا قال ما بعرسك (تفتكروا الحصل للبت دى شنو بالضبط ؟!!) الفهم يشرح للحج جبرا انا قصدت شنو يا عالم يا هوووو!!


#1413169 [aboha]
0.00/5 (0 صوت)

02-11-2016 05:20 AM
ايه رأيك انو قبل سنوات تعرضت والدتى وهى فى مستشفى خاص لجلطة رئوية وطلبوا مننا عمل اشعة مقطعية مستعجلة للصدر فإتصلت على الاسعاف المركزى القاعد تحيى فيهو دا لنقلها لعمل الصورة قالوا لى الليلة عرباتنا كلها استعداد فى المطار عشان جثمان محمود عبد العزيز جاى !!!!! اخ يا بلد.


#1413156 [متمني يعرف الناس حقيقتك]
4.00/5 (4 صوت)

02-11-2016 02:14 AM
حاولت يا جبره امسك نفسي من المغص الجبته لي بمقالك دا.في كل يوم تزداد قناعتي بأنك واحد من أسباب بقاء هذه المنظومه لأن لك دور واضح الا وهو تنفيس الناس من شحنات الكبت وأبلغ دليل ع كلامي انك ماتزال تكتب إلى الآن. ومازلت خارج الحبس وامثالك ينكل بهم في كل مكان من الصحفين


ردود على متمني يعرف الناس حقيقتك
European Union [emad] 02-12-2016 05:21 PM
سيق أن قلت مثل هذا الراي منذ فترة ...وربما الاستاذ الفاتح نفسه لا يعرف ما يقوم به من خدمة... الكتابة بغرض التنفيس وإضحاك الناس وتوفير حالة من المتعة والكوميديا السطحية ...السخرية أهم عنصر في التنفيس عن الناس... وعندما تم الاتصال بالاستاذ من قبل إدارة الاسعاف ...اصبحت لغة الاستاذ الفاتح أكثر رسمية ورصانة ولم تعد ممتعة بل مملة...وهكذا تتواصل الرسائل وتتحقق الاهداف ربما بدون علم الاستاذ الفاتح . الحل؟ ضرورة تغيير اسلوبك يا استاذ جبرة ...النقد المباشر وكشف الممارسات غير القانونية من فساد وغيره ....حينئذ تصبح خطرا على المفسدين وربما لن تجد الفرصة للكتابة بعد ذلك


#1413136 [Truth]
0.00/5 (0 صوت)

02-10-2016 11:36 PM
اكلوك حنك يا جبرا اولا مافى اسعاف مركزى بتحرك من غير رسوم الا بتاع المستشفيات و لى مريض المستشفى لما يكون ماشى لعمل تشخيص خارج المستشفى ثانيا ديل الكيرى بتاعين منظمة حسن الخاتمة و منظمة شنو و بت البلد عشان كدا زول حيسألم مافى بعدين مان يخليك تدخل الاسعاف عشان تشوف المونيتر و الصادم الكهربائي و حتلقى مافى اى شئ الاسعاف هى خدمة رعاية اولية من اعلى مستوى بس السودان لو خلوك فى الاسعاف و لا ودوك المستشفى مقروض مقروض


#1413126 [الهلباوي]
0.00/5 (0 صوت)

02-10-2016 11:03 PM
هههههههههههزهااااي ،، الكسرة جاتك تقيلة يا استاذ


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة