بالكربون
09-05-2011 12:35 PM

ساخر سبيل

بالكربون

الفاتح يوسف جبرا

تبدأ الحكاية كالعادة بالتساؤل المبكر .. رمضان شهر كم؟ (ثم) .. رمضان فضل ليهو كم شهر؟ تكون الإجابة : زي شهرين كده .. (ثم) زى إسبوعين كده .. تبدأ أسعار السلع الضرورية في الإرتفاع ويختفي (السكر) إذ يجد بعض التجار في هذا الشهر الفضيل فرصة لتنظيف جيوب المواطنين (الخالية) ! من أجل إكتناز الأموال (الحرام) ثم يصومون بعد ذلك رمضان إيماناً وإحتسابا تقرباً إلى الله الذى يعلم خائنة الأعين وما تخفي الصدور.
وبعد أن يستعد الجميع لمقابلة الشهر الكريم يبدأ السؤال : رمضان (ذاعوهو)؟ السعودية قالت بكرة أول يوم في رمضان ؟ لو السعودية قالت بكرة رمضان معناتو نحنا ح نصوم معاها .. بالفعل تعلن السعودية عن ثبوت رؤية هلال رمضان فتثبت الرؤية عندنا .. ويطلع بكرة رمضان فتفتح (موبايلك) لتجد أن هنالك (مليون) رسالة (جماعية) قد وصلتك من الأهل والمعارف والأصدقاء يهنئونك بحلول الشهر المبارك لتمسك بالموبايل بقية الشهر في محاولة للرد عليهم !
تتغير الساعة البايولوجية للمواطنين .. سهر بالليل .. نوم بالنهار .. يتعطل دولاب العمل .. تتكرر نغمة (تعال بعد العيد !) .. على صفحات الصحف تطالعك أخبار (الإفطارات الجماعية) .. وعلى الشوارع تطالعك ملصقات (الحفلات) التى يحييها الفنانون .. المطرب فلان الفلانى على مسرح نادى أيه مش عارف يوم (كدا رمضان) .. التذكرة (عشرة جنيهات) .. المطربة علانة العلانية .. ومعاها فرقة (مين كده) الكوميدية .. سعر التذكرة (عشرين جنيه) .. !
تبدأ القنوات التلفزيونية المحلية في بث ذات البرامج التى تبثها في كل رمضان .. بنفس المذيعين .. ونفس (الضيوف) .. لابد أن تستمع لذلك المستمع الذى يسأل (مولانا الشيخ) فى ذلك البرنامج الدينى (يا مولانا الحقنة بتفطر؟ ) أو ذلك الذى يسأل (الزول كان بلع ريقو بيفطر؟) !
ثم تستمع في أحد البرامج لإحدى المذيعات النوابغ تسأل ضيفها ذلك السؤال التأريخى عن الفرق بين رمضان زمان ورمضان هسه !
تبدأ بعض الأسر بالتحلق حول التلفاز لمشاهدة المسلسلات العربية (العارية) التى أعدت خصيصاً للشهر الفضيل بينما يجلس البعض الآخر متحلقاً حول التلفاز لمشاهدة مطربي برنامج أغاني واغاني وهم يجلسون (متفرجخين) بتلك الطريقة (البشعة) التى يبدو أن المخرج (متكيف منها) بينما (قدور) يمسك بعصاه ويقهقه ضاحكاً بطريقة أكثر (فرجخة) !
لا تلبث ان تستمع إلى من حولك يقولون (رمضان نصو إنقطع) .. (ثم) خلاص فضل ليهو أسبوعين (ثم) بكرة (الجمعة اليتيمة) .. تبدأ الإذاعة في بث أغنية (شهر الصيام ودعتنا) .. على الشوارع تطالعك ملصقات (حفلات العيد) التى يحييها الفنانون .. المطرب فلان الفلانى على مسرح نادى أيه مش عارف (أول أيام العيد) .. التذكرة (عشرة جنيهات) .. المطربة علانة العلانية .. ومعاها فرقة (مين كده) الكوميدية (ثاني أيام العيد).. سعر التذكرة (عشرين جنيه) .. !
(ثم) أها العيد قالوا بالخميس وللا الجمعة ؟ .. وعندما تأتي الأربعاء يتساءل الناس .. رمضان (ذاعوهو)؟ السعودية قالت بكرة العيد؟ لو السعودية عيدت معناتو نحنا ح نعيد .. بالفعل تعلن السعودية عن ثبوت رؤية هلال شوال فتثبت الرؤية عندنا .. ويطلع العيد يوم الخميس فتمتلئ الأسواق بالمواطنين (ما العيد جاء فجأتن وكده) كما تمتلئ بأكوام (نفايات) مخلفات البيع من أكياس وكراتين وخلافه والتى تعمل المحليات على الأبقاء عليها لتقف شاهداً على (عجزها) فى مجال تقديم الخدمات (وتألقها) فى (هبر) الجبايات !
وتبدأ ربات البيوت فى عمليات (النظافة) التى تستمر حتى وقت متأخر من الليل حتى ما إذا لاح صباح العيد السعيد كانت معظم الأسر تغط في نوم عميق !
تفتح المذياع فتأتيك أغنية .. (يا عيد تعود يا عيد) .. ثم تليها (العيد الجاب الناس لينا ما جااابك) .. ثم تستمع في أحد البرامج لإحدى المذيعات النوابغ تسأل ضيفها ذلك السؤال التأريخى عن الفرق بين (العيد زمان والعيد هسه)!
تطالع فى الصحف أخبار الحوادث المرورية التى حدثت أثناء العيد باص وحافلة .. حافلة وبوكس .. أمجاد وبص مع صور المصابين والضحايا وصور المركبات المهشمة التى لم يتم فحصها والتأكد من سلامتها لضمان سيرها على الشوارع (المهترئة) التى لا توجد بها لافتات إرشادية ولا حتى (إضاءة) !
وسط إنهماكك بالتفكير في الوضع المأساوى الذى تعيشه بعد أن (لحس العيد) كل (الميزانية) وأصبحت جيوبك خاوية والشهر (لسه ممدد) تقوم بفتح (موبايلك ) لتجد أن هنالك (مليون) رسالة (جماعية) قد وصلتك من الأهل والمعارف والأصدقاء يهنئونك بحلول العيد المبارك لتمسك بالموبايل (لحدت العيد الجاى) في محاولة للرد عليهم !
كسرة :
حياتنا كوووولها ذاااتا بقت (بالكربون) !


تعليقات 18 | إهداء 0 | زيارات 5785

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#204238 [القرفان]
0.00/5 (0 صوت)

09-06-2011 08:10 PM
اخى الكريم ابو فاطمه والله القرفه فعلا زايده حبتين وماف مجال الوحد يضحك والكربون بالمناسبه بقى من سته صور خمسه للانقاذ والسادسه قاعدين نموصها ونشرب مويتها من سنة 90...ارجو ان تجد لى العذر اخى ابو فاطمه


#204025 [بصبوص]
0.00/5 (0 صوت)

09-06-2011 11:05 AM
كل سنة وانت طيب ياجبرا والله مقالك خلاني اتفرجخ من الضحك


#203967 [حسن بصرى]
0.00/5 (0 صوت)

09-06-2011 09:20 AM
يا جبرا ما قلت حاجة عن الأسعار الخاصة بالعيد


#203964 [حسن بصرى]
0.00/5 (0 صوت)

09-06-2011 09:18 AM
يا جبرا ما قلت حاجة عن الأسعار الخاصة بالعيد


#203945 [سليمان قش]
0.00/5 (0 صوت)

09-06-2011 08:43 AM
ياجبرا انت رمضان زمان وعيد زمان دي قاصدين بيها متين او ياتو زمن ؟


#203884 [أبو فاطمة]
0.00/5 (0 صوت)

09-06-2011 12:16 AM
يا صاحب التعليق القرفان .. معقولة الأستاذ مقالو ده ما فيهو موضوع ؟ ياخى أقرا كويس الظاهر القرفه بتاعتك دى مؤثرة عليك


#203834 [ود حديد]
0.00/5 (0 صوت)

09-05-2011 09:53 PM
هو العيد انتهي ؟؟


#203831 [عبد الملك]
0.00/5 (0 صوت)

09-05-2011 09:48 PM
عيد مبارك وربنا يحقق الأمانى .. أنا مثلك تماماً مع زيادة نسبة الكربون شوية . بس ماننسى أنو الحياة متجددة من حولنا ففى كل عيد يكون هنالك عريس جديد ، عاشق جديد أو من يكتب رسالة تهنئة بجوال لأول مرة( يحس بعدها بسعادة أنه دخل العولمة ) أو طفل وليد يفرح بالعيد ولبسة العيد الجديدة أو مراهقين منهم من يستمع لهذه الأغنيات لأول مرة ويحس بأنها كتبت لتحكى عواطفه لوحده أخى العيد من حولنا ولكنا أحياناً لا نراه أو نحتاج لتمرين للكبار فقط عنوانه كيف تفرح بالعيد بعد سن الأربعين فما فوق .


#203821 [القرفان]
0.00/5 (0 صوت)

09-05-2011 09:22 PM
ماعندك موضوع المره دى ياجبره


#203819 [الكردفاني]
0.00/5 (0 صوت)

09-05-2011 09:20 PM
كربون شنو يا جبرة؟ قول كرابين إن صح الجمع. الكلام دا بيتكرر من سنة 1989 و حتى الآن و أتهداكم لو لقيتو شئ متغير رمضان الجاي و البعدو


#203813 [انا]
0.00/5 (0 صوت)

09-05-2011 09:06 PM
نحن (متخلفين) وراجعين لوراء ذى ب و ل الجمل ...!!


#203713 [Nagi ]
0.00/5 (0 صوت)

09-05-2011 05:12 PM
موبايلك نمرتو كم


#203710 [saper]
0.00/5 (0 صوت)

09-05-2011 05:09 PM
كدي اسه خليني الموتر بكم!!حضحي ولا زي السنه الفاتت!!!


#203668 [abeer]
0.00/5 (0 صوت)

09-05-2011 03:27 PM
عيد سعيد عليك والله يا جبرا حيرتنا بتقرأ دواخلنا عدييييل كدا دا الحاصل


#203642 [مغلوب]
0.00/5 (0 صوت)

09-05-2011 02:46 PM
ربنا يجيب العيد القادم والناس ديل جارج الحكومه بعدين السكر متوفر لانه ما في حراميه ولا مؤتمر وطني فقط ناس مسلمين على الفطرة


#203604 [عبداللطيف الفكى]
0.00/5 (0 صوت)

09-05-2011 01:37 PM
يعنى بالمختصر المفيد يا جبره نحن شعب( بيض ) وبايخيين بياخه ماعاديه وفاكنها فى روحنا
ودمنا تقيل وماقادرين رغم بياضنا ده نقو لللحكومه البيض دى نحن كرهناك ؟ صاح ؟؟؟


#203599 [جوكس]
0.00/5 (0 صوت)

09-05-2011 01:20 PM
اكتر حاجة ضحكتنى فرجخة ناس اغانى واغانى والسر قدور....اما الكربون بتاعى مختلف شوية خاصة بالنسبة للعيد....فزوجتى بتساهر للصباح فى النضافة وما شابه و بدون ما يجينا اى زول اقول لينا كل سنة وانتو طيبين ولذلك اقوم بالاستمتاع بالنوم المحرومين منو طيلة شهر رمضان.....والاغرب من كدا مشيت صلاة العيد وبعد نهاية الصلاة تلفت يمين شمال عشان الاقى سودانيين...بعد تعب لقيت لى واحد سلمنا على بعض وشوية ونسة وودعنا بعض ...والسرير جاك زول . يا حليل عيد السودان تسلم لحدى ما ايدك توجعك من السلام


ردود على جوكس
Sudan [سودانية] 09-05-2011 05:26 PM
تعليق علي تعليقك ،،، الفرجخة كوم والمذيعة بالتتراقص بالكرسي بتاعها اكوام
عاوزين لينا زي كام مليون سنة كده علشان نبقي زي
الناس اللي بتفهم في الاتكيت ،،،


#203584 [jilane]
0.00/5 (0 صوت)

09-05-2011 12:56 PM
والله انت العيد ذااااااااااااااااااااتو يا جبرة يافاتح


الفاتح يوسف جبرا
الفاتح يوسف جبرا

مساحة اعلانية
تقييم
7.98/10 (37 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة