09-07-2011 09:51 PM

إن كان سلام .. لا بُد / و إن كان دواس فدواس

طلال دفع الله
[email protected]

داك الطريق باين
يا ليس في الإمكان
أسوأ من الكاين
في الكاين الرَّبَّـاط
إنفجري كالبركان
يا بلدي يا كلك
يا شِعبة التـَّكَلان ..
أم در و يا الخرطوم

و البعمل الإحباط ؛
الكاين النطاط
من كوم ينط لى كوم ؛
و الكاين المطاط
ما عندو راياً يدوم ؛
و الكاين الغطاط
شلاّهو كُتر النوم.

يا أمنا الثوره
يا جايه ميعادك
الليله أو في الغد
صحِّي الجميع و الخيل
دقي النحاس أجراس
خلي الرهيف ينقد

إن كان سلام .. لابد
في الأول التسليم :
بعدين محاكم الشعب
حكمة عدالة الرب
الروح قصاد الروح
العين قصاد العين
و السن قصاد السن
و جروح قصاصها جروح
و حساب جنيه بجنيه
مليم ورا مليم
كل الحساب معلوم.
ما بننسى أرباحها
و بى حق رِباها نشيد
ليها الأبالسه سجون
سُحت و ربا و تدليس
دا حسابو عن(د) قيوم.

إن كان سلام .. لابد
في الأول التسليم ؛
و إن كان دواس فدواس
يا خيلنا و الفراس
يا هجوم يعقبو هجوم
شان تبقى حره جديد
(جبيرة الأعراس)
يجرن بحورها دموم.

يا أرضنا الحره
حا يبدو بالأسوأ
أسوأ من الحاصل
أشباح مشاه و طيران
بمنبان سموم إيران
بمنبان .. جحيم نيران
و ما ليس في الحسبان
إتزايدي في الغليان
أصليهم النيران
ما يهدا ليك بركان
شان يمه في الآخر
من البكاتلوا فيك
و بعضآ من الخانوك
و العاش زمن مغشوش
خدعوهو بإسم الدين
مشروع حضاري فشوش
عاداك شوف مطشوش
قَلَبْ المِجَنَّه عليك
حا يبتدوا الصَّحَيان
ليك المدد ببقوا
لى شعبك الأعوان
يكبر و يزيد الكوم.

يا بلادي يا حره
ما بتسلم الجَرَّه
لو ما جموعنا تقوم
من قاع سدى الهامش
لى عن(د) علية القوم
يبقى الكلام واحد
و يبقى الهدف معلوم.
تاريخنا يوت شاهد
قدر الشعوب مفهوم.

و إن ما قدرنا .. خلاص
نستاهل الذله
و تحت النعال ننداس
و الحق يظل مهضوم.

يا سيدي يا شعبي
يا : دنيا زي الناس
يا : ميته زي الناس
زايله ام بناياً قش
و العمر ما بيدوم.
قول للبهابوا الموت
اليوم قدَر محتوم.

يا شعبي يا باسل
قوماك كفانا النوم
شن نفلو متكاسل
راجنوا غيرنا يقوم
خدر السكات طوَّل
هدَّ الكلام الصوم .

يا وطني يا مقسوم
يا شعبي يا مضيوم
درب الخلاص أهو داك
إن قلت يمشيه سواك
إن شاالله ما عشنا
لا لينا قايمه تقوم.

لا صحه لا تعليم
الجوع أبو الكفار
منو الشراره أساس
و منو بتولع نار
و منو القيامه تقوم.
النار علي للأشرار
لعصابة التجار
اللعبوا بيهو الدين
أحصوهم الأنفاس
خلوا الكلام مزموم.

تعليقات 2 | إهداء 28 | زيارات 4360

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#205384 [Gwarior]
5.00/5 (6 صوت)

09-08-2011 06:41 PM
يا اخوة ياجسار
الموت مصير واقدار
فلنقتل الفجار
الدين سوى تجار
لو ما اخدنا التار
نلبس حلق وسوار


طلال دفع الله
مساحة اعلانية
تقييم
9.11/10 (23 صوت)


الاكثر تفاعلاً/ق/ش

الاكثر مشاهدةً/ق/ش




الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة