09-10-2011 12:40 PM

ساخر سبيل

أوعا يكون سرطان

الفاتح يوسف جبرا

علي الرغم من أن حاج أبراهيم قد تجاوز السبعين من العمر إلا أنه كان يتمتع بقوام متماسك وصحة جيدة شأنه شأن كل أبناء قريته من جيله الذى تربى على السمن والتمر والعسل .
عند زيارة إبنه بابكر للقرية قادماً من العاصمة التى يعمل فيها مهندساً للبترول بإحدى الشركات إشتكى حاج إبراهيم لإبنه بابكر من ألم فى بطنه :
أها وعملتا ليهو شنو يا بوى
والله يا ولدى مافي حاجه قالوا ليا أعملا ما عملتها .. لمن خلاص معدتي دى إتهرت .. شئ محريب وشئ غرنجال وشئ نعناع .. شئ شراب وشئ سفوفة وشئ أتمسح بيهو
وده كولو يا بوى ما نفع ؟
والله كلو ما نفع وبطنى دى ذى البشرطو فيها بي سكاكين
طيب ما مشيت الدكتور ليه يا بوى
والقال ليك منو ما مشيت؟ قابلتا مساعد الحكيم الفى شفخانتنا دي وهو القال ليا سوى النعناع والغرنجال والمحريب الما نفعو ديل
خلاس يابوى أسوقك معاي العاصمة يعملو ليكا حاجه إسمها MRI يعنى صورة بالرنين المغناطيسي ودى ح تورينا الحاصل شنو فى بطنك !
والقلتو ده يطلع شنو؟
ده يا بوى كشف تقدر تقول ذى صورة الأشعة كده !
فى إستقبال المستوصف العاصمى ذو الطوابق المتعددة قام بابكر مصطحباً والده بدفع الرسوم وعمل الملف ثم ما لبثا أن دخلا لمقابلة الطبيب الذى أوضح له بابكر الحاصل فوافقه على عمل صورة للحاج بالرنين المغناطيسي .
- صحي يا دكتور كشفكم ده ما فيهو حقن وطعين ؟
+ صاح يا حاج والله هبشة ما نهبشك
- ما تهبشونى ؟ نان تكشفوا عليا كيفن؟
+ أصلو يا حاج ده جهاز جديد إنتا بس تقلع هدومك وتدخل جواهو وهو بيمشى بيك براهو لغاية ماتطلع من الجيهة التانية
- بدون أى ألم؟
+ ألم شنو يا حاج ما ح تحس بأى حاجة .. وكان للمبات البتكون فوق راسك دى أكان أزعجتك غمض عينيك لحدت ما تطلع
- بياخد قدر شنو الكلام ده؟
+ يعنى ما أكتر من دقيقتين يا حاج
- أها ومرضى ده بتعرفوهو طواااالى؟
+ كيفن يا حاج طوااالى الجهاز ح يطلع لينا النتيجة مكتوبة بالكمبيوتر
- خلاص يا دكتور يلا أعملوا لينا الكشف ده والله يستر من أمراض اليومين ديل !
طلب الطبيب من إحدى السسترات مرافقة حاج أبراهيم لغرفة (الرنين المغناطيسي) التى تقع فى أحد الطوابق العليا ، توقفت أمام أحد الأسانسيرات الذى ما أن فتح بابه حتى دخلت وطلبت من حاج أبراهيم الدخول ثم قامت بالضغط علي (الذر) الذى تقع فيه غرفة الجهاز.
وباب الأسانسير يبدأ في الإنغلاق تذكرت السستر أمراً هاماً جعلها تحصل باب الأسانسير قبل أن ينقفل وتنسل خارجة ، وجد حاج إبراهيم نفسه وحيداً .. نظر إلى اللمبات التى فى أعلي الأسانسير فقال مخاطباً نفسه :
بالله الدكتور ده مش بيبالغ .. هسه دى أنوار بتزعج ليها زول لحدت ما يغمض عينيهو ..
قام حاج أبراهيم بوضع (عمته) على أرضية الأسانسير ثم بدأ فى (قلع) الجلابية ثم (العراقي) ثم (الشنو ما بعرف) وقعد يا الله كما خلقتنى .
فتح الأسانسير فى الطابق الأخير حيث كان هنالك عدد من الممرضات والسيسترات ينتظرن الأسانسير
(في فزع) : ووووووووووب .. علينا ... ووووووووووب
هنا نظر إليهن حاج أبراهيم فى خوف قائلاً :
بس أوعكن تقولن ليا طلع ... سرطان !
كسرة :
هذه الحكاية وردت لي عبر الإيميل وقلنا نغير بيها شوية من (الغم والهم) ! والمستفاد منها أن (اللمبات) يمكن أن تستخدم فى أى مكان !

تعليقات 12 | إهداء 19 | زيارات 6776

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#207406 [أبومحمد]
0.00/5 (0 صوت)

09-12-2011 02:49 PM
و الله يا جبرة بالغت عديل كدا دي جاتك من وين بالله ؟؟


#206808 [saad]
0.00/5 (0 صوت)

09-11-2011 05:07 PM
والله ضحكنا لامن دمعنا


#206494 [تكتك]
0.00/5 (0 صوت)

09-11-2011 09:17 AM
الاستاذ الفاتح جبرا ... تحية طيبة
قصصك الساخرة جميلة وخيالاتك واسعة فقد كنت اتابع كتاباتك فى جريدة السوداني ولكن انقطع توزيعها فى السعودية .. أتمنى لك الصحة والعافية


#206409 [عتيق]
0.00/5 (0 صوت)

09-11-2011 02:36 AM
أديتها كورتين موية(ما كوزين) ال mriداير ليه ساعتين ما دقيقتين عشان بتاخد في sections ظبط النجرة عشان تظبط ولا كلم الرسلها ليك بالايميل ياحاج قبل النشر لزوم الخبرة والمتابعين القراء المفتحين ياحاج


#206407 [hussam]
0.00/5 (0 صوت)

09-11-2011 02:34 AM
دي بي كم كرت....اوع تقول تلاته


#206322 [نادية]
0.00/5 (0 صوت)

09-10-2011 07:55 PM
انت يا عم الفاتح بدور اسعلك سعال السوق الشعبي الليل امدرمان ده المسعول من نضافتو منو . خدار مفروش في واطات الله دي و خدار اغسلوه في طشاتا ( جمع طشت ) مصقرة وكلاب حايمة وروائح كريهة تذكم النخرين والشي البحيرني مكتب الصحة الفي السوق كان جيت ماشي جنبو بتحصل عمك ابراهيم ده . اوعك تجي بي غادي .


#206293 [جاكومه]
0.00/5 (0 صوت)

09-10-2011 06:36 PM
والله دا خره كديس اصلى ياجبره عينى بارده


#206282 [يحيى العمدة ]
0.00/5 (0 صوت)

09-10-2011 06:15 PM
الفاتح
لك التحية وانت تصنع البسمة فى زمن فارق الناس فيه البسمة من زمن بعيد ، وكيف يبسمون والفواتير واجبة السداد تنتظرهم وتعكر صفو حياتهم ،
ستظل كسراتك هى السلوى
حفظك الله وسدد خطاك وابعد عنك كابوس الفواتير يا كريم ، والله دعوة ذى دى لو دفعت لامام الجامع ما يديك ليها، اها انبسط جاتك مجان وبدون ما تدفع حاجة
يحيى العمدة


#206206 [عسيلاوي]
0.00/5 (0 صوت)

09-10-2011 03:20 PM
والله ياجبرا الليلة سيجارتك مصلحه شديد...وبالجد ضحكتنا لما المصارين اتقطعن..واكتب لينا كده ماتمغسنا ببلاوي الانقاذ اللي هرت مصارينا ورفعت الضغط وجابت السكري...


#206191 [ابو سامي]
0.00/5 (0 صوت)

09-10-2011 02:57 PM
حاج ابراهيم خايف من السرطان ونحن خايفين من سرطان دارفور ينتقل لي ج كردفان والنيل الازرق


#206147 [انا]
0.00/5 (0 صوت)

09-10-2011 01:40 PM
انت عسل......


#206142 [حاج عبد الله ]
0.00/5 (0 صوت)

09-10-2011 01:35 PM
الله يجازي محنك ... و الله ضحكت لمن بطني وجعتني ...


ردود على حاج عبد الله
Malaysia [mohamed Abdallah] 09-11-2011 11:19 AM
أمشي أدخل (المصعد) الأسانصير


الفاتح يوسف جبرا
الفاتح يوسف جبرا

مساحة اعلانية
تقييم
8.33/10 (120 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة