في



آكلي لحوم البشر
09-22-2011 08:23 AM


آكلي لحوم البشر

أسماء الجنيد
somy_moon@hotmail.com


سلام يا الحبان في كل مكان

العالم كلها قايمة وقاعدة في إضراب اللحمة ,,
المشكلة مافي اللحمه يا جماعة الخير ولا الإضراب ولا المظاهرات.
المشكلة في اللحمة المضربين منها ..هي وينها زاتها اللحمه البياكلوها لامن يضربوا و يخلوها ؟؟ المواطن الغلبان نسى اللحمة زمااااااااااااان وقنع من خيرا فيها , الناس شكل اللحمه وريحتها زاتو نسوه , زمان على الأقل كان جار جارين ما اكلوا لحمه في غيرهم في طرف الشارع بجيبها . وبالتالي بشموا الريحة باقي الجيران . لكن ده كان قبال كم ونيف سنة ,,
الناس ديل دائما تفكيرهم ختـــــــــــــير قدر مصائبهم .. حكاية الإضراب عن اللحمة دي خطة جهنمية يضربوا بيها كم عصفور بي فد نبلة .
اولا بالتبادي اللحمة لحمتهم وبضبحوها لي رقبتهم ومتنافسين فيها وفي تجارتهم , اها دايرين ينزلوا سعرها لتكبير كومهم في الربح , لما قدر القلة القليلة دي من الناس تضرب واللحمة ترخص اكيد التصدير بقى ليهم فيه هبرة ماكنة خلاس .
تانيا يضيقوا على خلق الله رزقهم البياكلوه كل يوم .. دي ما ياها شغلتهم من يوم ما إتقلقلوا قبال 22 خريف ,,
البوش يا ناس ,, البوش صحن الفول كامل الدسم والوجبة الغذائية البتجبر كسر وترم عضم الغلابة والمهمشين , ده ما ياهو الشيء الفضل للغلابة ديل , لازم يصادروه برضو زي باقي الحاجات الإتصادرت وسكت عليها الشعب وما زالت الحياة مستمرة بدونه,,
اها يكون واحد فكر تفكير خطير يكوش على كل قدر الفول الحايمة في السوق . لاحظ على العددية المهولة من البشر المحاوطة اصحاب الفول زي الميس . يقول والله فكرة ,, دي تجارة ربحها مضمون فول زايد العدس غذاء الفقراء ده ياهو الفضل للمطحونين ديل ’ يصادروا منهم باقي رزقهم الفضل ومافي داعي الناس دي زاتها تعيش ما ياها ساكتة ورضيانة وقبلانة وعينها طالعة ..
بعدين يا شعبنا الفضل , الناس ديل ما قصروا معاكم ضمة
ما ياهم إتضامنوا معاكم وبطلوا اكل اللحمة الفي السوق , هم ما عندهم لحمة غير لحمتكم الفي السوق دي ,,,
هم ما بيأكلوا في لحمكم إنتو الحي كل يوم , آكلي لحم البشر , ديل ما ياهم زاتهم ,
يعني إلا يسلخوا ليكم زول في السلخانة ؟ ماهم سالخنكم وشادين جلدكم يوماتي في كل شبر في الواطة دي . وعافصنكم بي مراكيبهم ,
ومتروجلين عليكم عيانا بيانا , ومهددنكم ومطلعين عينيكم وما داسين منكم سواتهم وعمايلهم , بالعكس متفاخرين بيها ومارقين ليها ضرعاتهم وكروشهم في سهلة المولد ,,
ما ضيقوها عليكم وسقوكم الموية بي دودها , آي نعم بي دودها ووسخ عتودها , ما قصروا معاكم كلو كلو
قسموا البلد كيمان وباقي الفضل ولعوا فيه النيران , كتلوكم وماشين يوماتي في جنائزكم
تاني يسوا ليكم شنوا ؟ يتقطعوا يعني ولا يعني يتمعطوا ,, العملوا ليكم ده كلو مافي زول ولا في حكومة عملتوا ليكم من قبلهم ,,كلو ما عجبكم برضوا خاتين ايديكم في إضنيكم وضاربنها طناش .. يعني يعملوا ليكم شنو تاني ؟؟؟ غايتو بعد ده
ما باقي إلا يولعوا الحطب تحت البحر ويغلوكم , آي يغلكوم كلكم من طرف عشان يعرفوكم ساكتين مالكم ,
عشان يطلعوا الفساد المسكتكم كلكم من طرف بي احزابكم , هم فسادهم كمل زاتو وبقيتوا محيرنهم يعملوا ليكم شنو !!!؟
عذبتوهم عذاب وحيرتوهم في امرهم وشليتوا تفكيرهم في الخطوة الجاية تكون شنو ؟ بقيتوا مشيلنهم هم اكبر من مصائبهم
يسوا ليكم شنو بعد ده !!!!!!
ارحموا الحكومة يا شعبنا الصامت يرحمكم الله

متاوقة
اتوقع تكون في مسابقة من حكومة البلاد لفكرة جديدة تعذب الشعب ده لامن
يفك حنكو ويكورك

ودعتكم الله
اسماء الجنيد





تعليقات 7 | إهداء 1 | زيارات 1410

خدمات المحتوى


التعليقات
#213597 [osman]
0.00/5 (0 صوت)

09-23-2011 08:54 AM
والله يالمعلق(ناصر) اظنك تعرض خارج الزفة. الاخت الكريمة تكلمت عن الجوع والجوع فقط ولم تتكلم عن السياسة ولا الاحزاب . وقد لمست كبد الحقيق. فعلا هناك ماساة وجوع وفاقة وفقر ومرض .وقد تحمل الناس فوق مايطيقون جراء جشع هؤلاء المجرمين.انها مجاعة حقيقية يتعرض لها الشعب السودانى باكمله. هؤلاء الملتحون مصاصى دماء المساكين لابد من فضحهم اعلاميا امام العالم . وعلماؤهم المجرمين من امثال الكارورى وعبد الحى وعصام احمد البشير الذين يطبلون لهذه العصابة الحاكمة ندعو الله ان ينتقم منهم عاجلا غير اجل


#213381 [lمصدومه في بلدي]
0.00/5 (0 صوت)

09-22-2011 06:28 PM
\'طريقتك في الحديث تهبل استاذ العربي جد انت صح الصح بس نعمل شنو؟ ما انت ما فاهمه الشعب السوداني ديل كل يوم الصباح بعرضوا المخدات للشمش لتجف من الدموع يعني حتي البكاء داااسنه يمكن لو الواحد دميعاته جرت في العلن يغطس ما يعرف اهله دربه وين؟


#213181 [عبدالله محمد عبدالله]
0.00/5 (0 صوت)

09-22-2011 12:53 PM
والله يابت الجنيد....تب ماقصرتي.


#213081 [ناصر ]
0.00/5 (0 صوت)

09-22-2011 11:11 AM
الاخت اسماء
السلام عليكم
ارجو ان يكون تركيزك منصبا على ان يكمل ابنائك دراستهم( وان شاء الله يجونا سالمين وغانمين) ..اما السياسة فصراحة انتى ما بتشبهيها ولا بتشبهك.....ركزى فى الشعر احسن.وللاخت محسية اقول فعلا واحدة من اكبر مصائبنا ان النساء فى السودان اصبح صوتهن اعلى من الرجال.


ردود على ناصر
Saudi Arabia [شمالي] 09-23-2011 01:34 AM
يا ناصر ما تدي روحك أكتر من حجمها
شنو هو البتشبهيها ولا بتشبهك
هسي يعني البشبهوا السياسة بيكونوا شكلهم كيف كدا حسب فهمك؟؟
هههه
أنا شخصياً في غاية الاستمتاع بمقال أختنا أسماء الجنيد وفي غاية الإنبساط كونها دخلت على المقالات السياسية وأدتها بعد إضافي بملكتها الشعرية
لمن يكون موقع الراكوبة يا ناصر موجه لشخصك حصرياً عشان تقراهو براااااك، بعدين تعال حدد منو اليكتب في شنو ومنو اللي ما يكتب
لكن طالما الموقع موجه لجميع السودانيين حقو تحتفظ بآرائك الشخصية دي لنفسك
وبعدين ما ظنيت إنو الاستاذة اسماء الجنيد منتظرة منك تزكير بواجباتها الاسرية


#213073 [ابو يوسف]
0.00/5 (0 صوت)

09-22-2011 11:05 AM
تسلمى يا بت الجنيد و الله ما قصرتى قصرنا نحن الرجال و انبطحنا عديل و فعلا حيرنا الحكومه


#212971 [محسيه]
0.00/5 (0 صوت)

09-22-2011 09:08 AM
عافيه منك لكن الرجال واينم

الفي البلد دي نحن النسوان بنمشي السوق بنتكلم نمشي البقاله بنتكلم والله العظيم ما قابلني راجل بيتكلم علي الوضع الحاصل

والموالم لمن يلقاك مره واقفه تتكلم يكون بعاين ليك ما بتعرفي لي معجب بي شجاعتك ولا _______

وصنف تاني لو رده عليك يورمك يقوليك ياختي احسن ليك ما تتكلمي في السياسه

عشان كده خليهم يطلعوا عينا اكتر من كده لو الكيزان الو ____ بقوا ارجل من رجالنا


#212959 [محمد صالح العميد]
0.00/5 (0 صوت)

09-22-2011 08:47 AM
تسلمي يا بت الرجال الحرة كلامك ما فيه مدسة ولا دغمسة بالمرة دايمين تدخلي في نفوسنا الأمل والبسمة والمسرة والله كلامك يخلي الناس تطلع اليوم قبل باكر برة.
دا الكلام البخلي الجماعة يخرخروا ويزبدوا ويتمرجلوا على الفاضي.
والراكوبة بدونك لا طعم ولا رائحة لها وربنا يحفظك ويسترك من الحاقدين الذين لا يتعظون وربنا يورينا فيهم يوم لا ينعموا ولا يحسوا براحة ولا طعم النوم.


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة