دُق بيها الواطة، يمكن تفتح ..اا
10-05-2011 08:12 AM

إليكم

الطاهر ساتي
[email protected]

( دُق بيها الواطة، يمكن تفتح معاك ) ...!!

** طائرة الإيربص، التابعة لشركة الخطوط الجوية السودانية، والتي إحترقت بمطار الخرطوم في يونيو 2008، إحدى ماكيناتها كانت معطلة قبل الإقلاع..والطيار عبد القادر السعيد، قائد تلك الطائرة، في تلك الرحلة، كان على علم بعطل الماكينة .. نعم أي قائد يجب أن يكون على علم بكل تفاصيل طائرته قبل التوقيع على ورقة الإقلاع، وعليه : وقع الطيار عبد القادر السعيد على تلك الورقة وأقلع بالطائرة ذات الماكينة المعطلة.. ثم هبط بها على مدرج مطار الخرطوم، ثم إنحرفت الطائرة وإحترقت، وكان عدد ضحاياها (30 مواطنا) ومعهم المضيفة سهام التي إستبسلت في إنقاذ الركاب بفدائية رائعة قبل أن تستشهد..!!
** شكلت السلطات لجنة تحقيق لمعرفة أسباب الإنحراف والإحتراق، ولم تكشف اللجنة - إلى يومنا هذا - للرأي العام تلك الأسباب ولم تحدد أطراف المسؤولية، أي تكمت عليها ولاتزال، إلى أن (ماتت القضية)..ولكن شركة الإيربص شكلت لجنة تحقيقها ونشرت محتواها بكل شفافية، وبعض المحتوى يقول بالنص (عند الهبوط بقيت سرعة الماكينة رقم واحد على وضعها، لانها كانت معطلة قبل اقلاع الطائرة)، ثم التقرير ذاته نص فحواه: ( ظهر تحذير من تضاريس مرتفعة بالقرب من الطائرة ثم اضاءت لمبة باللون الاحمر المستمر الدالة على ضرورة سحب الطائرة الى اعلى )..أي، حسب تقرير ايربص، أقلع الطيار عبد القادر السعيد بطائرة إحدى ماكيناتها معطلة،ثم تم تحذيره من تضاريس مرتفعة بالقرب من الطائرة ليسحب الطائرة إلى أعلى..ما الذي جاء بالتضاريس المرتفعة في المدرج؟، ولماذا لم يتحسب لها الطيار عبد القادر السعيد ويسحب الطائرة إلى أعلى ..؟؟
** المهم، بعد الهبوط والإنحراف والإحتراق، كافأت الشركة كابتنها عبد القادر السعيد، بحيث ترقى وصار مديرا لإدارة السلامة والجودة بالشركة..وحين تجاوز سن المعاش، وقعت معه إدارة الشريف ود بدر والعبيد فضل المولى (عقد خاص)، لتبقيه مديرا للسلامة والجودة.. ولا يزال مديرا بتلك الإدارة، وليس في الأمر عجب، إذ كل من تحترق طائرته أو تسقط بنايته يترقى في السودان..علما بأن أخطر ما في تقرير إيربص هو خاتمته، حيث تقول الخاتمة بالنص : ( لاتملك شركة إيربص أي توصيات لمشغلي طائرات إيربص)، وهي خاتمة ذات لغة مهذبة، ولكنها تعني بالبلدي كدة ( ياجماعة طياراتنا ما فيها عوجة، العوجة فيكم إنتو)..وعليه تبقى الأسئلة التي سنؤرق بها مضاجع إدارة سودانير : ماذا حدث لهذا التقرير ؟، ثم أين تقرير لجنة التحقيق التي شكلها وزير النقل السابق؟، ومن المسؤول عن تلك الحادثة؟، ولماذا لم تتم محاسبة المسؤولين، بمن فيهم الشريف ود بدر والعبيد فضل المولى وكل سادة الفشل ؟..وهل بالله عليكم من المنطق والعقل أن يتولى أمر السلامة والجودة بالشركة طيارا إنحرفت طائرته وإحترقت بعد توقفها، حتى ولو لم يكن مسؤولا عما حدث؟..ثم السؤال المهم جدا، لماذا لم تتعامل الحكومة مع تقرير شركة الإيربص بمسؤولية تقتضي مساءلة ومحاسبة تلك الإدارة البائسة، أم أن قدر الشعب أن يصطلي بنار(فقه السترة)..؟؟
** على كل حال..الأحد الفائت،عندما عاد الكابتن ياسر الصفي بالطائرة فوكرز من ملكال إلى فضاء مطار الخرطوم - بعد إكتشاف عطل الإطار - ليعلن الطوارئ، أصدرت له إدارة السلامة والجودة بعض التوجيهات في إطار سيل التوجيهات التي صدرت من جهات عديدة تتقن التنظير.. وكما تعلمون أيها الأفاضل نحن شعب فينا من ينظرون حتى عند دفن الميت، بتنظيرات مزعجة من شاكلة (طلع التراب من ود الاحد.. ارفع الراس شوية ..اسحب التوب براحة.. ساوي الكردمة دى )، وهكذا حتى يتجمد دم المرحوم وتتصلب مفاصله من البرد إن كان الفصل شتاءا، أو يسود لونه إن كان الفصل صيفا ..المهم، من التوجيهات الساذجة التي تلقاها ياسر الصفي : ( إضربها شديد بالواطة، يمكن تفتح معاك)، أو هكذا كان توجيه مدير السلامة والجودة بسودانير، أي قائد الطائرة إيربص التي إنحرفت عن المدرج وإحترقت، عبد القادر السعيد..ولو لم يؤكده كابتن ياسر في برنامج (حتى تكتمل الصورة) لما إستوعب العقل بأن توجيها كهذا قد يصدر من أي مواطن، ناهيك عن تصدره إدارة مسماة بالجودة والسلامة.. !!
** ولكن الكابتن ياسر الصفي لم يعمل بذاك التوجيه، والحمد لله على ذلك، بل تجاوز التوجيه والموجه وهبط بسلاسة وسلام، وذلك بفضل الله ثم بحنكة الطاقم وجهد العاملين بإدارة السلامة بالطيران .. وبالمناسبة، مادة الفوم التي ساهمت في سلامة الطائرة لم تكن متوفرة بمطار الخرطوم عندما إحترقت الإيربص، بل حتى عربات المطافئ كانت كما فؤاد أم موسى، بلا ماء، ولذلك تواصل الحريق يوما وآخر، وأصيب الفريق يوسف ابراهيم - مدير مطار الخرطوم أنذاك - بشرارة وقطعة معدنية أثناء تفقده للطائرة في يوم الثاني من الحريق، وهذا يؤكد بأن مستوى السلامة الجوية بالطيران المدني عهدئذ كان يتكئ على ( البتقع من السماء بتحترق في الواطة )، ولذلك إحترقت تلك الطائرة بالإهمال واللامبالاة واللامسؤولية ..لقد تحسن آداء السلامة الجوية بالطيران المدني، ولكن آداء السلامة والجودة بسودانير لم - ولن - يبارح محطة ( التواكل، وليس التوكل)، ما لم يتدخل البرلمان بقوة ويحيل كل ملفات هذا الناقل الوطني إلى ( السلطة القضائية )..نعم، ملف بيع الناقل الوطني يضج بالمخالفات والمفسدين، وكذلك ملف بيع محطة هيثرو يضج بالمخالفات والمفسدين، ثم ملف الحوادث يضج بالمخطئين ..مطلوب تحقيق شامل ثم محاسبة شاملة لكل أطراف تلك الملفات ..هذا أو فليترقب الوطن والمواطن المزيد من الكوراث والتوجيهات الساذجة التي من شاكلة ( دُق بيها الواطة، يمكن تفتح معاك) ..!!
.............
نقلا عن السوداني

تعليقات 27 | إهداء 3 | زيارات 6524

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#221086 [جهاد الكترونى 1]
0.00/5 (0 صوت)

10-05-2011 08:19 PM
الطيار عبد القادر السعيد عارف تماماً شغله وعن تجربة دق بيها الواطة وقام جارى الشهيدة المضيفة سهام التي إستبسلت في إنقاذ الركاب بفدائية رائعة قبل أن تستشهد. طلعت ارجل منه .
عرف عالمى يدرس لكل القباطنة بحرين او جويين بان القبطان اخر من يغادر السفينة


#221068 [Zingar]
0.00/5 (0 صوت)

10-05-2011 07:45 PM
يا واحد طافش سلامات وليك وحشه.
ياخى ماتتعب نفسك مع واحد بزى ده
لاحظت ليهو كم يوم بستعمل ليهو فى كلمه قادينا بيها ما عارفوا لقطها من وين وهى جلد الذات...حشرها فى كم موضوع سابق حتى الكلمه نفسها إشتكت ليهو إنه ده ما محلى....وده إن دل إنما يدل إنه لافاهم بقول شنو ولا عارف إنه هو كان بيقرأ فى شنو....ذكرنى عادل إمام فى شاهد لما أنا بعرف واحد إسمه زكى عبدالمجيد وبنته إسمها ناديه خليل محمد.


#221058 [سوداني]
0.00/5 (0 صوت)

10-05-2011 07:33 PM
من قبل سقطت بنايتان لجامعة الرباط وكانت الشركة المنفذه هي شركة مقاولات مسجلة بأسم بنت الوزير عبد الرحيم محمد حسين فقدم استقالته من وزارة الداخلية وتم تكريمه من قيادات الداخليه في حفل حضره السيد الرئيس فقال الرئيس في ذلك الحفل ان استقالة عبد الرحيم هي استراحة محارب ؟؟؟؟؟؟؟؟
وبعدها بدلاً من تحويله الي مجلس تحقيق تمت ترقيته الي وزارة الدفاع وتعينه وزيراً بها !!!!!!!!!؟؟؟؟؟؟


#221026 [Zingar]
0.00/5 (0 صوت)

10-05-2011 06:25 PM
وكما تعلمون أيها الأفاضل نحن شعب فينا من ينظرون حتى عند دفن الميت.

الأخ الطاهر...دعنى أحكى هذه الحايه...وقتها كنت فى إجازه صادفت وفاة قريب لى...وعند وصول جثمانه من الخارج ذهبنا مباشرة للمقابر...وكما تعرف تصميم الصندوق يغنى عن السؤال فى أين الرأس وأين الأرجل...وزيادة للتوضيح من الجهات أللى وضعت الجثمان داخل الصندوق كتبت عبارة رأس لتوضيح مكان الرأس لأنها كانت على علم بأن الجثمان ذاهب للسودان بلد التنظير وموفتييى الحيض والنفاس والختان أمثال عبدالحى وصحبه.....المهم أحد المشيعين أصر على تغيير وضع الدفن لأن الرأس من الجهه الأخرى...فشلت فى إقناع هذا الرجل ومن الحماقه والزعل والورم نزلت القبر وكنت مصرا لفتح الصندوق وتم مسكى وأستغفرت الله وقلت للرجل لو أمكن ساعدنا بسكاتك.

تخريمه
ذكرت لك فى مقالك السابق عن بذل المجهود لدفع تعويضات الطائره المنكوبه للركاب على أن هذا الموضوع يجب أن لا يدخل فى خانة النسيان.
خلاص خلصنا من الترقيه والجوائز وكلمات الأعجاب ببطولة كابتن ياسر الخارقه...هل بعد كده ممكن نتحول للتحقيق فى ملابسات الحادث لتحديد من هو المسئول هل هو الكابتن نفسه أللى وقع على أل Technical Log وإذا كان وقع على بياض أم على فنى الصيانه....ولا نقول خلاص باركوها يا جماعه.


#221002 [بت ملوك النيل]
0.00/5 (0 صوت)

10-05-2011 05:31 PM
دي الكاميرا الخفية ؟؟؟ولأ الكلام ده جد؟؟؟


#220966 [R. Khojali]
0.00/5 (0 صوت)

10-05-2011 04:15 PM
مفروض نعمل حوض كبير جنب نادي الزوارق أي طائرة في طريقها إلى السقوط نقول للطيار أقع بيها البحر فينزل الطائرة في هذه المساحة ، مهمة نادي الزوارق تكون أنقاذ الركاب أعتقد هذه الخسائر في هذه الحالة حا تكون قليلة جداً... ومن ثم نسحب جسم الطائرة بالحبال من داخل البحر ويا دار ما دخلك شر .
من ضمن لغة الشباب زمان لو عاوزين يقولوا ليك تزوج بنت معينة يقولوا للشخص أقع بيها البحر ، ولكن دق بيها الواطة أكيد تعني طلقها وتوكل . يجب محاكمة الطيار عبد القادر السعيد بتهمة إرتكاب جرائم ضد الإنسانية .


#220960 [حبقون]
0.00/5 (0 صوت)

10-05-2011 04:11 PM
كل شئ فى السودان دقوا بيه الواطه
الجنيه السودانى دقو بيه الدلجه
مشروع الجزيرة دقوا بيه الواطه وما رفع راسو
السكة حديد دقوا بيها المحلب ( يا ود احمد دق المحلب )
سودانير دقوا بيها البلاط
الخدمة المدنيه غطسوها ولحقوها امات طه
الصحة والتعليم دلجه وواطه وبلاط
الانسان السودانى دا كمن عملو فيه العمائل ( اكلو التمساح بعد ما دقو بيه الواطه )
شليل وين راح


#220915 [محمد]
0.00/5 (0 صوت)

10-05-2011 02:50 PM
ادارة الامن و السلامة تعتبر من اهم الادارات في كل الشركات و الموؤسسات العالمية لما تعلبه من دور مهم في حفظ ارواح العاملين و ممتلكات الشركات، و تكون لها الكلمة الفصل في كثير من القرارات. و يتراسها اناس ذو مؤهلات و خبرات عالية.


و لكن و للاسف الشديد ففي السودان و كل دول العالم العربي و الافريقي لا تجد هذه الادارة الاهتمام و يعتبرها بعض المدراء لا داعي لها الا في أماكن قليلة كشركات البترول.


انا اعمل في هذه المجال في الامارات فمعظم الشركات هنا تنشئ هذه الادارة مجبرة لان النظم و القوانيين تفرض ذلك.


ففي السودان مثلاً فمعظم شركات البترول تجد المسئول عن هذه الادارة احد ضباط الامن السابقين ليس الا لان المسمي فيه كلمة آمن \"ادارة الامن و السلامة\" ظانيين انها مسئلة امنية، و السبب الاخر للمرتبات العالية التي يتحصلون عليها ففي السودان تعتبر بمثابة نهاية خدمة محترمة لرجالهم المخلصين.

و كان الله في عون البلاد و العباد,



#220906 [سوركتى]
0.00/5 (0 صوت)

10-05-2011 01:56 PM
ياجماعة اخونا عبدالقادر ده كلامو صاح. انتو مش سمعتوا انو المره لمن تلخبط بدقوها بى اختها وبعد داك بتستعدل وتمشى عديل. برضو الطيارة لمن يدقوها بى الواطة حاتتصلح وتانى عجلاتها بتمرق بسرعة البرق. يعنى نستفيد من تنظير اخونا عبدالقادر ونعمل بحث بعنوان ( الزوجة الثانية والطيارة الفانية، المعوقات والحلول).


#220904 [ابو احمد]
0.00/5 (0 صوت)

10-05-2011 01:55 PM
المقال ده مستند اتهام واضح للحادثة الماتو فيها الناس ديلك
انا لو عندي اي علاقة بواحد من الضحايا كنت بمشي بيه القضاء طوالي لانوا دي ارواح لازم الناس تتحاسب عليها
انا بتعجب ليه الناس بتخلي حقها يضيع ساكت وليه الناس بتكتفي بس بالنقد على الماشي وبعدين تنسى لازم يكون عندنا ثقافة قانونية في كيف نقلع حقنا مهما طالت بينا السكة
وانت برضوا يا الطاهر ليه تكتفي بالكتابة بس ليه ما تشجع على تحريك القضايا القانونية ضد الناس ديل ده بقى ما موضوع فساد ده بقى قتل ارواح بريئة


#220898 [Sudani]
0.00/5 (0 صوت)

10-05-2011 01:29 PM
يا جماعة الخير.. الطيار بتاع حادث 2008 دة مش هو نفسو الطلع روحو من الطيارة أول زول و هرب و تانى يوم عمل حفله بنجاته.. على الرغم من إنو مفروض الطيار هو آخر زول يطلع من الطيارة حتى بعد المضيفات... بالله بدل ما يتمرمط على العملو يترقى..

والله جد ياهو دة السودان..


#220896 [ابو ابراهيم]
0.00/5 (0 صوت)

10-05-2011 01:15 PM
يا ساتي ياخوي انتو قاعين تاذنوا في مالطا الناس ديل مافيهم امل البته


#220873 [كن تفتحابو سامي]
0.00/5 (0 صوت)

10-05-2011 11:26 AM
دق بيها الواطة امكن تفتح
قلت لي دق بيها الواطة امكن تفتح
اصلها بطيخة ولا شمامة ولا ايه هكذا هي حالة بلدنا
الرجل المناسب في المكان المناسب للغف واللحس نحنا نلحس كوعنا وهم يلحسوا يلحسوا يلحسوا .........يلحسوا ساااااااااااااااااااااااااااااااااااااااااااااااااااااااااااااااااااكت

يلحسكم القدر


#220870 [ابو جلمبو]
0.00/5 (0 صوت)

10-05-2011 11:23 AM

لماذا ترتبط كل المؤسسات التى بها كثير من الاخفاقات اقاويل الفساد بالسيد الشريف
بدر؟


#220868 [فارس بلا جواد]
0.00/5 (0 صوت)

10-05-2011 11:15 AM
دق بيها الواطه
طيب لو دق بيها الواطه داير شنو تاني تفتح ولا ما تفتح
جهل عجيب
هذا ما تعلمناه في زمن التخلف


#220867 [nasreldeen ]
0.00/5 (0 صوت)

10-05-2011 11:14 AM
الأخ المعلق عادل الريح

اين التناقض واين جلد الذات

أفهم الموضوع ولست ملزم بكتابة تعابير لم تفهمها

سودانير تدار بفقه السترة
والشريف ده معروف من زمن حديقة أم بارونة
وكيفما تكونوا يولى عليكم
لابد أننا قد صرنا من النوع اياه
حكامنا ناس ...........


#220866 [أنس الحاج]
0.00/5 (0 صوت)

10-05-2011 11:10 AM

عووووووووووووووووووووووووووك

عوووووووووووووووووووووووووووووك

ياجماعة نحن البارح مساهرين للصباح نوم مافى
والسبب إطلاق نار وذخيرة حية فى المدرعات بجبرة

والله كمية ذخيرة من الساعة 2 صباحا وحتى الصبح

كل أهالى منطقة جبرة وكل المنطقة جوار المدرعات كانوا فى لحظات عصيبة والله
نفس لحظات ركاب طائرة سودانير
ياناس حرااااااااام والله عساكر داخل الحلة يطلقوا فى النار وتبادل الذخيرة


أنا ماعارف الحاصل شنو؟؟؟

أفتونا يانس الانقاذ

خليناكم لله


#220858 [b-altinay]
0.00/5 (0 صوت)

10-05-2011 10:42 AM
توجيية مدير السلامة هو نتيجة طبيعية لمبدا الولاء قبل الكفاء, بعدين يا الطاهر انت بتهظر, منو يحاسب منو, المحاسبة بتكون لما يكون في طرف وسخان و طرف نظيف, ديل كلهم وسخانين, سمعت ب فضيحة مندور المهدي, الحرامية سرقو منو


#220838 [sudani--online]
0.00/5 (0 صوت)

10-05-2011 10:07 AM
وسوف يظل المدعو, عبدالقادر السعيد مديرا لادارة السلامة رغم أنف الحاقدين ويرقى بعدها مديرا للخطوط الجوية نفسها والما عاجبو يلحس كوعه ..........ياأمة ضحكت من جهلها الامم .........وسلم لى على عمر البشير


#220832 [ابو ريان]
0.00/5 (0 صوت)

10-05-2011 10:01 AM
دق بيها الواطة، يمكن تفتح معاك)

عمك ده قايلها حقة تمباك ولا شنو ؟؟؟؟؟؟؟؟؟


#220828 [Ahmednur]
0.00/5 (0 صوت)

10-05-2011 09:57 AM
بكون مفتكرها علبة صلصة مدير السجم والرماد داااا.......


#220827 [عبدالعظيم العباس]
0.00/5 (0 صوت)

10-05-2011 09:57 AM
الاستاذ ساتى لك التحية اضرب بيها الواطة دى خلاصة جهد الرجل واكثر مابلغ من علم الطيران ومن امن العقوبة اساء الادب نصيحة للسعيد خذ الفوكرزدى نفسها واطلع بيهاتيسته ودق بيها الواطة شديدجداقطع شك بتفتح معاك


#220819 [عادل الريح]
0.00/5 (0 صوت)

10-05-2011 09:46 AM
مزيد من جلد الذات

والاساءة للسودانيين يا ساتى

مقالك متناقض

لانه استخرجت شهادة بان طائرة الايربص ما فيها عيب وبشهادة شركة الايربص

والعيب فى الطيار
وتلك حقيقة

بالمناسبة سودانير فى حوجة لشباب فى عمر الكابتن ياسر صفى

من المدير الى اصغلر واحد


ردود على عادل الريح
France [واحد طافش] 10-05-2011 02:32 PM
يا جاهل .. يا غبي ... لو ما بتفهم ما بتعرف تقرأ؟؟؟ مكتوب ( لاتملك شركة إيربص أي توصيات لمشغلي طائرات إيربص) يعني المشكلة في الطيار اللي اقلع بالطائرة وهو عارف انو فيها خلل ... اقربها ليك .. لو في سواق رقشة عارف انو في لستك فيه مشكلة وطنش وتحرك بيها وفي الشارع اتقلبت ... يبقى العيب الشركة المصنعة ولا من السواق المهمل؟؟ والتوصيات من ايرباص بتكون لما يكون في خلل في التصنيع عشان يتفادوه او يعيدو كل الطائرات لتصحيح الخلل لأنو تحت مسؤوليتهم زي ما بيحصل في السيارات من اخطاء في نظام المكابح وغيرو ... فهمت يا غبي؟؟؟
وبعدين تعال ياعادل ولو انو الاسم ما لايق عليك .. انا ملاحظ ليك بتحاول تنتقد استاذ الطاهر بأي طريقة ... ياخي امشي انتقد اولياء نعمتك يا كوز ولا خايف يقطعو منك النقاطة يا بتاع الجهاد الاليكتروني ...
اللي زيك هم اللي مودين بلدنا في ستين داهية ... جهل ونفاق


#220809 [عبدالله عبدالله]
0.00/5 (0 صوت)

10-05-2011 09:28 AM
الاخ الطاهر ساتى
إذا صح ما تقوله ... نقول : لاحول ولا قوة إلا بالله والله المستعان .
عليك ياأخى ساتى مسئولية كبيرة أمام الله وأمام الوطن ،،،
ومن هذا المنبر ادعوك وأدعوا كل من يملك معلومة أو مستند ، أن يتقدم بها للقضاء السودانى لمحاسبة الجناة ،ولا تنسى ياأخ ساتى أن هنالك ارواح بريئة ازهقت ،والله المستعان


#220791 [وحيد]
0.00/5 (0 صوت)

10-05-2011 09:07 AM
محاسبة؟ انت بتحلم؟ السادة الاشراف البدريين اصحاب الايدي المتوضئة يرون انهم فوق القانون و فوق المساءلة و فوق المحاسبة و فوق البشر العنقالة الذين يسمون بالشعب السوداني! فقه السترة الذين رايناه و - كما ذكرت - يكاقئ المفسدين ، وزير داخلية تهدمت مبانيه قبل ان تكتمل و ازهقت نفسا مسلمة و ثبت ان المقاول يمت له بصلة و انه بنى له قصرا و ان المواصفات مغيبة، بدلا من ان ينتحر الوزير الاسلاموي الفاسد كما يفعل اليابانيون او ان يقام عليه الحد بواسطة رئيس الجمهورية ، او حتى ان يتوارى خجلا و يعتكف ليستغفر الله عن آثامه عسى ان يخفف عنه عذاب الآخرة، فاننا رايناه يكافأ بتعيينه وزيرا للدفاع حيث \" الميزانيات\" بلا حدود و \" المباني\" ليس لها اول و لا آخر ، و صفقات السلاح على مقدار ذمة السارق،!
لذلك ترى الشريف بدر و آخرين من لصوص الانقاذ الكبار و مسعوريها يسجلون شركة في الكويت للتمويه و تاتي الشركة فتستولي على سودانير بدعوى الخصخصة و تعيث فيها نهبا و فسادا و فشلا ثم يرجع جماعة الحكومة المسيطرين على الشركة الشركة نفسها الى الحكومة - بعد النهب المسلح او المصلح سيان- ثم تدفع الحكومة لجماعتها مبلغا كبيرا لارجاع سودانير من جماعة الحكومة الى الحكومة مع بقاء الجماعة على راس الشركة كمديري مجلس ادارة و مديرين عامين....
كيف بيعت و لماذا و بكم و لمن ؟ و لماذا ارجعت و كيف و بكم؟
اذا اجاب جماعة هي لله على هذه الاسئلة يمكننا ان نتساءل عن الحساب


#220768 [ابو العزائم الكردفاني]
0.00/5 (0 صوت)

10-05-2011 08:42 AM
هذه هي الواسطة دولة المحسوبية ..... ومن سرق فيهم القوي تركوه .... الله لا يكسبهم خير ابدا ... ابدا .... وبمناسبة الخطوط السودانية ... اذكر اننا عائدا من حدى الدول العربية ... فبعد ان اكتمل العدد ... وبعد تأخير ونفاذ الصبر ......تم قفل الباب بقوة.... غير عادية فانتبه الركاب الى حيث الباب... فإذا بالمضيفة تشد الباب الى الداخل...... والمضيف منهمك في لوي الحبل ...وربط الباب بحبل مرن عريض كحبال الشاحنات هذا كان في ... 1990 ولا ادري الان في ظل الوضع الحالي فيما اذا كانو يتأكدون الان من وجود الاطارات .... ام ان الرغوة اصبحت تفي بالغرض .... عالم طير ... لان الطير السوداني قدم احتجاج لدى مجلس الطيور العالمي ... ضد التسمية (سودان طير).


#220766 [الزول الكان سمح]
0.00/5 (0 صوت)

10-05-2011 08:39 AM

(دُ ق بيها الواطة..يمكن تفتح معاك.)...هههه

والله كابتن ياسر لو عمل بكلام المتخلف ده كان الناس دى إتشتت زى البطيخ

الله يذكر بالخير ..ناس لطفى أحمد خليل ..وعثمان الخير عثمان ..لما كانت سودانير


الطاهر ساتي
 الطاهر ساتي

مساحة اعلانية
تقييم
5.73/10 (71 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة