ما طار ناقلنا وأرتفع ..!ا
10-05-2011 11:23 AM

ساخر سبيل

ما طار ناقلنا وأرتفع !

الفاتح يوسف جبرا

نصح الأطباء حاج (سليمان) بالسفر إلى الخارج لإجراء بعض الفحوصات ذات العلاقة بتقدم العمر ، وبما أن حاج (سليمان) كان من شباب الحركة الوطنية فى خمسينات القرن الماضي فقد إختار (الناقل الوطنى) إذ أعتبر أن إختياره لأى (خطوط طيران ) أخرى يعد عملاً يفتقر إلى ادنى مستويات (الوطنيه) ، لم ينس حاج سليمان عند مغادرته منزله ووداعه لأبنائه أن يقوم بتسليم زوجته (قروش المعيشة) خلال فترة غيابه وأن يدس فى يدها بعض (القريشات) لزوم الإستعانة بهم عند إقامة (ليالى المأتم) ، توجه سليمان إلى مبانى الخطوط وقف أمام موظف الحجز الذى قام بتزيين مكتبه بصدر الحكمة التى تقول (ما طار طير وإرتفع) :
- والله يا ابنى عاوز ليا حجز (الليلة) ماشى الأردن إتعالج.
- والله يا حاج عندنا الليلة سفرية وااحدة (عمان).
- مطار أربعة .. إقلاع ستة .. (دفن) أقصد وصول تسعة!!
- طيب خلاص أقطع ليا ماشى وجاى !!
(شخص خلفه) : يا حاج ما تضيع قروشك ساااى أحسن تقطع زيى كده بس (ماشى) عشان (الورثة) يستفيدوا من تذكرة (الجاى دى ) !
- (وهو غير مكترث لما سمعه) : الأعمار بيد الله .. أقطع ليا يا إبنى ماشى وجاى !
- طيب يا حاج إنت عاوز مقعد إستواء ولا نص (إستواء)؟
- مش فاهم !
- لا يعنى أنا بقصد إنت عاوز مقعدك قريب من أبواب النجاة ولا بعيد منها؟
- أكيد عاوزو قريب منها.. ولو عندكم حاجة أحسن كمان ما بطال.
- والله إلا نحجز ليك (مقعد الكابتن).
بعد أن قام موظف الحجز بتسليم حاج (سليمان) التذاكر اشار عليه بالذهاب إلى (كاونتر) آخر مكتوب عليه(السلامة الشخصية) ، بعد أن قام الموظف بإستلام التذكرة قام بقراءة محتوياتها ثم نظر إلى حاج (سليمان) مخاطباً :
- شوف يا حاج كل مسافر على خطوطنا دى أنحنا لازم نتأكد من سلامتو.
- والله دى الخطوط وإلا بلاش.
- عشان كده لازم كل راكب يشيل (أنبوب الرغوة) بتاعتو معاهو
- ومالو يابنى نشيل0
- تشيل ساااكت ... إنتا عارف الأنبوبة بتاعت الرغوة دى بى كم؟
- يعنى هي ما مع التذكرة ؟
- أكيد بي قروش وما مع التذكرة .. يا حاج هو نحنا (سفرك) ما مسئولين منو .. ح نكون مسئولين من سلامتك؟
- كيف يعنى؟
- أفهمك يا حاج .. الطيارة دى مش ممكن تقع فى البحر؟
- ممكن
- أها يعنى نصرف لى كل راكب (قارب نجاة)؟
- طبعن لا.
- أها والطيارة دى مش ممكن تتعرض لى عمليه (قرصنة) أو إرهاب أو عصابه تختفا؟
- ممكن.
- أها يعنى نصرف لى كل راكب مسدس وسكين؟
- طبعن لا.
- والطيارة دى مش ممكن تنزل اضطرارى فى الإسكيمو؟
- ممكن.
- يعنى نصرف لى كل راكب بالطو وبطانية؟
- طبعن لا.
- والطيارة دى مش ممكن تتعرض فى الجو لى ضغط عالى والشباك بتاعا ينشق?
- ممكن.
- أها يعنى نصرف لى كل راكب (مكنة لحام)؟
- طبعن لا
- الحاجات دى يا حاج مش كلها ممكن تحصل ؟
- أها يا إبنى بإختصار كده عشان سلامتى أنا هسه أشترى منكم شنو ؟ إنبوبة رغوة ولا قارب نجاة ولا بالطو وبطانيه ولا مكنت لحام ولا مسدس وسكين ؟
- والله يا حاج لو عاوز تضمن وصولك سالما غانما تشترى (الباقة) دى كلها وح نعمل ليك عليها تخفيض و نديك ليها بى سعر معقول.
- أقول ليك حاجه يا بنى ؟ ما عندكم (باراشوتات) ؟
- الباراشوتات فى يا حاج لكن المشكلة طياراتنا دى ما بتديك فرصة.
أقتنع الحاج بكلام موظف مبيعات أدوات السلامة الشخصية حيث عدل عن (الباراشوت) وقام بإقتناء أنبوبة (رغوة ضد الحريق ) ، وبعد أن قام الحاج بحمل الأنبوبة أشار عليه الموظف بالمرور على كاونتر (وصايا المسافرين) حيث قابله الموظف مبتسما وهو يسأله :
- يا حاج وصيتك دى عاوز ناس البيت يستلموها بالسريع ولا عادى ولا بالنت ؟
- والفرق بيناتم شنو؟
- بالسريع يعنى ح يستلموها قبل ما تبقى (فحمة) يعنى قبل ناس المطافئ ما يطفو النار (بالمويه). .. وعادى يعنى عادى بعد ما تمشى المشرحة ويتم التعرف عليك والشغلانيه تطول.
- طيب ده كلو عرفناهو قصة (بالنت) دى شنو؟
- أيوااا بالنت دى يعنى إنت بس تدينا الوصية والإيميل بتاع ناس البيت ومع (الوقعة) طوااالى نرسلا ليهم بالإيميل.
- والله يا ولدى (تكنولوجيا الكوارث) ما عندكم !
- وبعدين يا حاج فى حاجه مهمة لازم توضحا فى الوصية بتاعتك دى؟
- اللى هيا أيه يا إبنى?
- اللى هيا يا حاج إنك لازم توضح فى الوصية بتاعتك منو الح (يستلم) التعويض من (أحفاد أحفادك) !
كسرة :
تنبيه : هذا المقال يتم نشره بعد كل كارثة طيران يتعرض لها ناقلنا (الكان) وطني .. حتى الآن تم نشره (تسعة) مرات!!

تعليقات 8 | إهداء 5 | زيارات 5600

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#221263 [مدثر]
0.00/5 (0 صوت)

10-06-2011 08:14 AM
إلى المشكلة سودانى :
هو فى السفريلت الداخلية بيقعدوا كل واحد فى رقم مقعده ؟ ياخى
Free Seats
يعنى ما محتاجين لبطارية يا أخى ؟؟


#221156 [المشكلة سوداني]
0.00/5 (0 صوت)

10-05-2011 11:29 PM
الله يجازي محنك يا جبرا ....

والله وبدون مبالغة لي صديق كان يقضي خدمة وطنية في مطار الخرطوم حكي لي ما رآه من مهازل
منها ان احدي الطائرات وهي الفوكرز يتم اسخدام الحبل في ربط بعض الاجزاء فيها
وطائرة اخري تستخدم في الرحلات الداخلية لاتوجد بها اضاءة داخلية وعند الصعود من السلم وبجانب الباب يوجد مضيف ماسك ليهو بطارية اااااي والله بطارية عديل كدا يقول ليك مقعدك كم ويقوم يأشر ليك بالبطارية عليهو عشان تقعد .
في زول نصييييييييييييييييييييييييييييح وعاقل يركب سودان طير بعد دا


#221130 [مشاهد]
0.00/5 (0 صوت)

10-05-2011 09:38 PM
هى سودانير دى لسة باقى فيها شىء يطير؟.


#220998 [بت ملوك النيل]
0.00/5 (0 صوت)

10-05-2011 05:23 PM
- مطار أربعة .. إقلاع ستة .. (دفن) أقصد وصول تسعة!!


استاذ جبرة ..اضحك الله سنك..رغم انو الواحد ماعندو مزاج يضحك..بس بصراحة سودان طير مسختا وزودتا..والقرف ببدأ من المطار ابو اوضة وبرندة وبدون مطبخ زي ماقالت هالة صدقي وبستمر معاااااااااك لحدي ماتنزل الجهة بتاعتك ده طبعا لو وصلت بالسلامة واتجاوزنا عن اوجاع الضهر والغضاريف .
كسرة: الحل في مقاطعة سودان طير قبل اللحمة


#220939 [Awaad M.Ahmed]
0.00/5 (0 صوت)

10-05-2011 03:26 PM
الاستاذ الفاتح اسعد الله اوقاتك وربنا يسهل ليك خطوط غير سودان (طبـــــــــــر) ده اذا لقيتلك فيها مقعد وتاكد حجزك على الرغم اته لاتدرى سيقودك الى الخرطوم او الى الرفيق الاعلى اذا جاءت ستهم فى مواعيدها بعد اربعه ايام من تاكيد الحجز و3 ايام من بعد الميزان - الحقيقه مشاكل الخطوط السودانيه بدات منذ زمن بعيد ‘ وبعد ان كانت يضرب بها المثل فى الانضباط وانتظام المواعيد صارت نكتةالخطوط المختلفه - وعلى الراكب بعد ان يتاكد من هبوطها بعد طول لنتظار وفرحة جيش العاملين فى مكاتبها وكوانتراتها احتفالا بوصولها واستعدادا لاقلاعها الذى تراغبه العيون وتتنهد له القلوب والمتابعه بكل وسائل الاتصال للاطمئنان على وصل احبائهم وهبوطهم سالمين على المدرج حتى وقوفها امام الصاله وليس داخل هنقر او خور هذا اذا لم يكن الهبوط على راس شجره كطائرة بورتسودان واخنصارا لكل الاجراءت على المسافر ان يؤمن تامينا شاملا وان يودع الوصيه مصدقه من السفاره بعد دفع رسوم التصديق وحفظها عند ام العيال ان كان راحلا فى رحله يعلم خالقه ان كان سيراهم مرة اخرى-
الخطوط السودانيه تحتاج الى غربله كامله من مديرها الى اصغر موظفيها فالكفاءه انعدمت واضحت المحسوبيه هى عنوانها - كما ان جيوش العاملين فى مكاتبها ومعظمهم منتدبون للعمل من السودان - مكاتب الخطوط السودانيه تجد على الكاونتر اكثر من اربعه موظفين على طائره واحده لا يتعدى عددركابها 85 راكبا مع جيش فى المطار للاهتمام بالاصدقاء والمعارف فى رحلات ليس لها ميعاد وصول او اقلاع-
الخطوط السعوديه على عدد رحلاتها اليوميه والمنتظمه لا تجد فيها موظفا منتدبا غير المدير - اليس من الاجدى ان تتسلم ادارة الخطوط السودانيه وكالات لتوفير المصروفات مع ضعف العائد من رحلاتها - ليكون هنالك توفيرا للمصروفات والائجارات والتى من المؤكد ان رحلاتها لا تغطى تكاليف مصرؤفاتها -


#220934 [Siafalhag]
0.00/5 (0 صوت)

10-05-2011 03:20 PM
يا استاذ جبرا خلى مقالك ده فى طرف الدرج --- طالما قصة عارف وما عارف ده ما اتنجضت-(؟)

- ونصيحة عشان ما تضيع وقتك كتير- شوف مقالاتك السابقة وطلع مقالات نموذجية-- فى كل مرة طلع واحدة حسب المناسبة لانو المحن متكررة;( ;(


#220911 [طشاش]
0.00/5 (0 صوت)

10-05-2011 02:30 PM
استاذ جبرة............الله يجبر بي خاطرك ويديك الصحة والعافية;) ;) ;) ;)


#220880 [الزول الكان سمح]
0.00/5 (0 صوت)

10-05-2011 11:44 AM

ماطار ناقلنا وأرتفع ...إلا دقَ واطة وانفقع...أوكما ..قال


ردود على الزول الكان سمح
Oman [mr x] 10-05-2011 02:16 PM
والله فضيحه واكتر من كدا كمان دى جريمه كبرى كون سودانير دى تكون لسه مستمره فى الشغل لحدى ما تنتهى مده باقى الطيارات ويقعو بالناس الفيها.......لا نو بلدنا دى مابتهتم بالانسان واصلا المواطن فيها عامل زى الجذمه القديمه


الفاتح يوسف جبرا
الفاتح يوسف جبرا

مساحة اعلانية
تقييم
3.94/10 (27 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة