10-26-2011 07:42 AM


البشير في مواجهة جهاز كشف (الحقيقة)

شريفة شرف الدين
[email protected]


مقدم البرنامج:

أحييكم سيداتي آنساتي سادتي في هذه الأمسية و في لقاء استثنائي على الإطلاق منذ قيام ثورة الإنقاذ الوطني نبقى معكم على مدى ساعة كاملة مع فخامة الرئيس عمر البشير. نحن في تلفزيون الحقيقة لنا شرف تنظيم و ترتيب اللقاء أما إعداد الأسئلة التي سيقوم الرئيس بالإجابة عليها فهي مباشرة من ضيوف البرنامج من المواطنين الذين تم إختيارهم بشكل عشوائي. و للحقيقة ليست لدينا حتى هذه اللحظة أدنى فكرة عن ماهية الأسئلة و لكنها لن تخرج عن صياغ السلوك و اللفظ بما يحفظ لك إحترامك أيها المشاهد و لقناتنا مهنيتها.

تكمن استثنائية اللقاء في أن فخامة الرئيس سيجلس على كرسي جهاز كشف (الحقيقة) و كما تلاحظون فوق الكرسي لمبتان تضيئان وفق صحة أو خطأ ألإجابة. اللون الأخضر للإجابة الصحيحة بينما الأحمر للإجابة الخاطئة.
في البدء لابد أن نقدم الشكر الجزيل لفخامة الرئيس عمر البشير لقبوله إجراء مثل هذا اللقاء غير المسبوق على ساحة السياسية الدولية. فخامة الرئيس .. في البدء نتوجه بالسؤال إليكم .. لماذا وافقتكم على مثل هذا اللقاء في وقت يمر به السودان بأكثر من منعطف مصيري و تشير توقعاتنا إلى أن الأسئلة لن تكون تقليدية مثلما هو متعارف عليه في مثل هذه الظروف سيما أنك تجلس على كرسي غير إعتيادي و اللقاء منقول على الفضائية التي تمكن العالم كله من مشاهدته .. ألا ترى أن في الأمر مجازفة؟ تفضل بالإجابة فخامتكم.

البشير:

بسم الله و الحمد لله .. طبعا ده سؤال وجيه جدا إنو رئيس الجمهورية يخت نفسه في موقف زي ده .. الإجابة ببساطة شديدة جدا إنو أنحن يا جماعة ما عندنا حاجة بندسها و اللقاء ده إن شاء الله يكون رد عملي للمشككين في نزاهتنا و شفافيتنا في إدارة البلد .. أنا بصفتي رئيس للجمهورية واثق من نفسي تماما و إلا ما جيت. برضو عايز أنوه إنو في كلام كتير بدور في مسألة اللقاءات الإعلامية اللي عملناها .. الناس بتقول إنها مفبركة و الأسئلة مطبوخة جاهزة و اللي بيعمل اللقاء محسوب علينا و كلام من النوع ده. عشان نبين إنو ده كله كلام كضب .. جينا لإثباتو بشكل عملي و أحب أوجه كلامي للضيوف المعاي في البرنامج أنا بديكم ضمانتي الشخصية إنو طالما أنا رئيس للجمهورية ما حتكون في أي نوع من المضايقات و الملاحقات بالنسبة ليكم عشان كده عايزكم (تحكوها ) كتير و مافي أي مجاملة و أوعدكم حأجيب بدون لف أو دوران على أي سؤال.

مقدم البرنامج:

شكرا فخامتكم و نرجو أن تطال تلك الضمانات قناتنا قناة الحقيقة. (يومئ الرئيس بالإيجاب). نود أن ننوه الضيوف الكرام بعدم الإسهاب أو تكرار الأسئلة. لنبدأ بالسائل الأول.

السائل الأول:

سؤالي لو رجع الزمن لعام 1989 و إنت عارف مسبقا إنو الأحوال حتكون زي الحاصلة دي إنفصال الجنوب .. الغلاء .. الحروب .. الديون .. تدهور الإقتصاد.. هل كنت ترضى أن تكون رئيسا للجمهورية؟

البشير:

طبعا الأحوال قبل ما أنحـ ...

مقدم البرنامج:

عفوا فخامة الرئيس .. لعله خطأي أن فات علي تنبيهكم إلى أن جهاز كشف الحقيقة يحتم أن تكون الإجابة على السؤال بنعم أو لا و من ثم يمكنكم الإسهاب و التفصيل.. و عليه فإن إجابتكم على السؤال هو ..

البشير: نعم.

الضوء أخضر

البشير:

(يتململ على الكرسي فرحا) طبعا أنحنا قبل ما نجي كانت الدولة جنازة بحر .. كان في تردي في كل المجالات و بالذات الجيش و الإقتصاد لكن لما جينا قدرنا نحسم الفوضى الكانت حاصلة و بقى للسودان هيبتو.

السائل الثاني:

مستصحبا مآلات الوضع الراهن .. هل يود العميد عمر البشير إجراء أية تعديلات في البيان الأول الذي تليتموه في يوليو 1989؟

البشير: لا.

الضوء أخضر.

البشير:

(تنفرج أسارير وجهه فرحا) الحقيقة أنحنا عملنا طفرة كبيرة جدا في التعليم و أنشأنا أكثر من عشرين جامعة و قدرنا نبني كباري و طرق و مشاريع تنموية كثيرة إنعكست بشكل واضح على حياة المواطن .. و انا في نكته بحكيها على طول إنو أنحنا لمن جينا كان الشعب واقف صف للرغيف .. حسع الرغيف هو الواقف صف للشعب.

السائل الثالث:

في بداية عهدكم ذكرتم بأنكم أي القائمين بالإنقلاب مجموعة عسكرية وطنية و لا تنتمون لأيما حزب سياسي أو كيان ديني ثم كشفتم بعد ذلك أنكم تنتمون للحركة الإسلامية بزعامة الترابي و أن الإنقلاب كان بتنسيق كامل مع الحركة الإسلامية. سؤالي هو: أين الحقيقة؟ هل كنتم حقا ضباطا أحرارا؟

البشير:

(مد شفته السفلى ثم بدا عليه إنفعال فشل في كتمانه)

نعم.

الضوء أحمر.

البشير:

طبعا يا جماعة ما كل الأسئلة الإجابة عليها بتكون بنعم و لا .. في البداية أنحنا كنا فعلا ضباط أحرار لكن من ضمننا كان في ضباط منتمين للحركة الإسلامية و ديل كانو بعملوا بالتنسيق مع الترابي تحت تحت كده و لأنهم كانوا الغالبية .. الناس قالوا إنو أنحنا حركة إسلامية .. أما حكاية الترابي و مشاركته في السلطة كان إيفاء بالوعد الذي قطعناه على الشعب من توسيع قاعدة المشاركة .. يعني أي زول كان ممكن يكون في مكان الترابي لو أثبت جدارتو و وطنيتو.

السائل الرابع:

هل أحلتم للصالح العام كل من لا يبادلكم الولاء الحزبي؟

البشير: لا

الضوء أحمر

البشير:

مسألة الصالح العام دي كانت مسألة بتاعة غربلة في مؤسسات الدولة و عملناها بمعايير نزيهة و أمينة و لقينا إنو في فوضى .. يعني واحد تلقاهو ماسك إدارة مؤسسة كبيرة وعندو مخصصات مهولة و ما قاعد يقوم بواجبو على الوجه الأكمل .. زي ده لمن أنحنا نشيلو الناس تقول إنو الكلام ده تم عشان نجيب واحد من ناسنا و يسد محلو .. طيب ده البتقولو إنو من ناسنا ده أكثر كفاءة من داك .. حتشغل منو و حتطرد منو؟ ما هي كده .. و لا كيف يا جماعة؟

السائل الخامس:

سؤالي .. هل كنتم مجبرين على توقيع إتفاقية نيفاشا برغم بند حق تقرير المصير؟

البشير: لا

الضوء أحمر

البشير:

(بإنفعال زائد) لازم تعرفوا إنو مشكلة الجنوب دي ما مشكلة الإنقاذ و لا حاجة دي مشكلة استمرت لأكثر من خمسين سنة و بعدين الجنوب زاتو كان عبء على ميزانية الدولة كل يوم كنا بنصرف الملايين في حرب ضيعت الشباب و لا ليها بداية و لا نهاية .. الآن أنحنا ممكن نمشي في التنمية بدون عقبة الجنوب .. حقو الناس تعرف إنو في السياسة مافي ربح خالص و لا خسارة خالصة .. يعني كده و كده

السائل السادس:

بسبب إتهام المحكمة الدولية لسيادتكم بجرائم ضد الإنسانية و جرائم حرب في دارفور دخل السودان في شبه عزلة دولية و أصبحت تحركاتكم بمصالح الدولة محدودة للغاية .. ما ذنبنا نحن الشعب السوداني أن نؤخذ بجريرتك أنت كفرد؟ السؤال: هل ستسلم نفسك من أجل إنفتاح السودان و رخاءه؟

البشير:

(يخلع نضارته و يضعها على الطاولة بعنف) شوف (مشيرا بسبابته للسائل) أوكامبو ده واحد حاقـ..

مقدم البرنامج:

أرجو الإجابة بنعم أو لا سيادة الرئيس

البشير:

(مطنشا مقدم البرنامج) ده واحد حاقد عايز يلمع نفسو إعلاميا....

مقدم البرنامج:

معذرة سيادة الرئيس .. أرجو الإجابة على السؤال بنعم أو لا

البشير: السؤال كان شنو؟

السائل السادس:

هل ستسلم نفسك من أجل إنفتاح السودان و رخاءه؟

البشير: لا

الضوء أخضر

البشير:

بما إني ممثل للشعب فتسليمي لنفسي معناه تسليمي للشعب السوداني و بعدين ديل لا يعجبهم العجب و لا الصيام في رجب .. قالو لينا إذا إنفصل الجنوب حنرفع عنكم العقوبات و الحظر .. و ندعمكم ماليا و استثماريا .. أول ما انفصل الجنوب عملو مطنشين .. تاني نجي نصدقهم ليه؟

السؤال السابع:

تشهد البلاد طفرة واسعة في شتى الأصعدة و بناء سد مروي يقف أكبر دليل على أنكم لا تلتفتون للمغرضين و المحسوبين... و من هنا نقول لك سير سير يا البشير .. سير سير من أجل التعمير ..سير سيـ

مقدم البرنامج:

السؤال لو سمحت السؤال: بما إنو ليك تلاته و عشرين سنة رئيس للجمهورية و اكتسبت الخبرة .. ألا ترى أن ترشيحك للرئاسة مرة أخرى ضرورة؟

البشير:

يهدأ كثيرا من حالة الفوران التي إنتابته في الأسئلة السابقة و في هدوء تام يجيب .. لا

الضوء أحمر

البشير:

أنا من ذات نفسي ما عايز أترشح لكن الأخوان في المؤتمر الوطني مصرين جدا و أنا لمن جاوبت بلا .. كنت صادق فيها بس كنت بفكر في كلام الأخوان بالمؤتمر الوطني .. لكن إذا كانت مصلحة الدولة بتقتضي إنو إجي للرئاسة و قناعاتهم إني اترشح .. إيه المانع؟ ما أنا جندي و بلبي حاجة البلد.

السؤال الثامن:

في خطاب لك ببورتسودان ذكرت في الأستاد بأن حلايب سودانية و حترجع سودانية. مضى على ذلك أكثر من عامين الآن و لا جديد. ثم ذكرت بعد ذلك بأن حلايب إمتداد طبيعي لمصر كما أن أي مدينة مصرية إمتداد للسودان. هل سنيعد حلايب ضمن الحدود السودانية؟

البشير: نعم

الضوء أحمر

البشير:

طبعا قصة حلايب دي كانت في عهد الرئيس المخلوع حسني مبارك و الآن هناك المجلس العسكري الإنتقالي و ديل لسع برتبو في أمور البلاد و استباب الأمن و العمل على الترشيحات الرئاسية القادمة. يعني بعد ما تجي حكومة مصرية جديدة منتخبة نقدر نتفاهم معاهم عسى و لعل الأمور تكون بخير .. لكن مهما كانت النتيجة .. ستظل العلاقات المصرية السودانية علاقات متينة ذات عمق استراتيجي و لن نرضخ للأصوات التي تريد أن تثير الفتنة بين الأشقاء و في النهاية السودان و مصر بلد واحدة و شعب واحد.. و حاربنا في خندق واحد.

السؤال التاسع:

هل بالسودان الآن و أنت رئيس شريعة إسلامية مطبقة كما وعدتم في الإنتخابت الخيرة؟

البشير: نعم

الضوء أحمر

البشير:

الشريعة دي ذاتها كانت السبب في إنفصال الجنوب .. بمعنى الغالبية من الإخوة الجنوبيين كانو مسيحيين و بالتالي قصة إنو نطبق الشريعة و هم معانا دي كانت صعبة شوية لكن الآن بعد إنفصالهم أصبحنا عرب مسلمين ميه في الميه .. أنحنا الان بنعمل في إعداد الدستور الجديد و بإذن الله حنلبي تطلعات شعبنا الأبي الغيور على الإسلام .. مشروعنا الحضاري لن يتوقف .. مستعدين نمسك الجمر عشان الشريعة و إنتو براكم شايفين إنو العالم الغربي و أمريكا خايفين من النهضة الإسلامية القايمة في السودان و ده هو الببرر استهدافهم لينا (و لن ترضى عنك اليهود و لا النصارى حتى تتبع ملتهم) الشريعة جاية إن شاء الله .. الله أكبر.

السؤال العاشر:

هناك ما يعرف بحوش بانقا ....

تقطع الكهرباء

مقدم البرنامج(داخل الأستديو فقط):

بدخولنا الحوش ..أوجه إعتذاري لفخامة الرئيس البشير و لضيوفي الكرام عن إنقطاع الكهرباء بغير فعل فاعل و كنا نريد معرفة محصلة الاضواء الخضراء والحمراء ولكنها استحالت إلى سوداء حالكة و إلى لقاء آخر في حلقة جديدة من برناج كشف الحقيقة.

تعليقات 17 | إهداء 1 | زيارات 3295

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#232242 [أنس]
0.00/5 (0 صوت)

10-28-2011 01:33 PM
يا بت الشريف هناك هناك سؤال لا يحتمل الانتظار ولا التأجيل لازم تقومي بطرحة على الضيف القاعد في الكرسي عشان يزيد الحلقة سخونة وتشويق .
الضيف كان يسكن في بيت يتكون من غرفتين معكوستين من الجالوص و الراتب بالكاد يلحق على صينية الاكل يعني عايش في فقر مدقع أما اليوم يقوم ببناء جامع كوقف بأسم والدة من ثروة الشعب السوداني وهاك يا بيوت بموصفات فى اوربا ما شوفنها و البزنس بتاع العائلة في أنتظار رد الضيف وشكرآ.


#232012 [jalal hassan]
0.00/5 (0 صوت)

10-27-2011 08:48 PM
فولة وإتقسمت نصين ،،،،،،، إنت والرائع جبرا


#231961 [ملامح]
0.00/5 (0 صوت)

10-27-2011 05:39 PM

و الله يا شريفة حيرتيني عديل بكتاباتك الجميلة دي

بس اقطع دراعي ( لو ما بقيتي واحد من اثنين) :-

1- اما انك بقيتي تضربي حاجات ذي ( الفاتح جبره)

2- أو انك الفاتح جبره زااااااااااااااتوووو



يا اختي عاوزين نموت من الضحك ؛


شكرا لك كثييييييييييرا وربنا يحفظك


#231651 [abuafarouq]
0.00/5 (0 صوت)

10-27-2011 06:48 AM
ااااخ يا الاخت شريفة لحظة الحقيقة ما تمت منتظرين يرجعو الكهرباء عشان نشوف قصة حوش بانقا ومسجد التراث التركى منتظرين بفارق الصبر ما تكون زى المسلسل الامريكى ذهب مع الريح حتى الان ماعارفين ذهب وين مع الريح ..والله عندك مقالات مشوقة بجد الله يحفظك ويديك ألف عافية وصحة شرطى مصارينا من الضحك بكذب البشير والزوقان ولسع أسئلة الحلف المغلظ بخصوص القوات الاممية فى دار فور ما جات خلى اللقاء طويل شوية لكن الظاهر البشير يطبق مكر مع ناس الكهرباء إثناء اللقاء يا جماعة لو شفتو القاء سخن والاسئلة بقى على تقيل اقطعوها حتى أتخارج من الورطة الكبيرة زى سؤال عن حوش بانقا أو ثراء الزوجة المدللة وداد نرجوك يا الاخت شريفة كشف الحقائق إثناء غفوة مهندس الكهرباء الموكل بالقطع
يكون سريع وخاطف من الهرب والزوقان ؟


#231632 [ali]
0.00/5 (0 صوت)

10-27-2011 01:58 AM
والله حلاتك فى الخنساء ما شفتها


#231534 [منتصر]
0.00/5 (0 صوت)

10-26-2011 07:48 PM
اتمنى النشر لقد اراسلتكم كثيرا
حقيقة الموضوع في التنك
بس الحته بتاعت الآيه دي ماعجبتني ويديك العافيه


#231356 [الزول الكان سمح]
0.00/5 (0 صوت)

10-26-2011 12:42 PM

أستاذة شريفة

حاولت أرسل ليك موضوع مهم وأستلمت رسالة بأن عنوان بريدك المرفق خطأ أرجو التأكد

ولك الشكر


ردود على الزول الكان سمح
Saudi Arabia [شريفة شرف الدين] 10-26-2011 01:34 PM
[email protected]

لك شكري لإهتمامك


#231345 [الانصارى]
0.00/5 (0 صوت)

10-26-2011 12:33 PM
حتى الكرسى ماقدر يتحمل الكضب والدراب الكبار كبار
طق
ضرب فيوز
نم
الكهرباء قطعت


#231337 [اخو السمحات]
0.00/5 (0 صوت)

10-26-2011 12:26 PM
الله اكبر يا مبدعة انت من وين بابت انت عميقة عممممممممممممممممممممممممممميقة


#231302 [orass]
0.00/5 (0 صوت)

10-26-2011 11:19 AM
الحمد لله الكهرباء قطعت :

واحد مسطول جاب ليه جهاز كشف الكضب في البيت من النوع البدي كف لمن تكضب
قال اجربوا في ناس البيت ولدو جا راجع بليل متاخر شبكوا ليك كنت وين؟
قال ليه كنت بزاكر مع صحبي .....قام الجهاز طاخ اداهو كف الابو عاين لي ولدوا وقال ليه عيب عليك تكضب انا لمن كنت في عمرك ما كنت بكضب .....الجهاز طاخ ادي الابو كف
جات ام الولد طايره وقالت... لي راجله حرام عليك يا راجل في النهايه دا برضوا ولدك ..........طاخ الجهاز اداها كفين


ردود على orass
Malaysia [بكرى أبو صلاح] 10-26-2011 08:21 PM
الاستاذة شريفة المبدعة دائما , يديك العافية والصحة ومزيد من الابداع والمنهجية الصحفية المؤسسة.

اخونا [orass ياخى قطعت مصارينا بالضحك , تسلم


#231299 [مجودي]
0.00/5 (0 صوت)

10-26-2011 11:11 AM


الزول دا قريبك ولا شنو فاهماهو كدى ..؟

الكضب بتاعو .. والزوغان ... الحرب خدعة ..

ابدعت والله


#231258 [الساير]
0.00/5 (0 صوت)

10-26-2011 09:33 AM

شكيتك علي الله يا شريفة

تتجازي يابت شرف الدين


#231240 [المتيم بالسودان]
0.00/5 (0 صوت)

10-26-2011 09:10 AM
تجازي يابت الشريف غايتو انا خائف يوم تقتلينا من الضحك الفاضل لينا دا ويسلم قلمك وتسلم يدك من كل شر حتي نري ونقراء الكثير من حكاوي الانقاذييين ديل


#231239 [بت دارفور]
0.00/5 (0 صوت)

10-26-2011 09:09 AM
ينصر دينك يا المبدعة شريفة


#231236 [أسامة]
0.00/5 (0 صوت)

10-26-2011 09:06 AM
مرة خطبة جمعة مزلزلة و مرة جهاز كشف الحبقيقة إيه الإبداع ده كله يا بت الشريف

ما خليتي للبشير حاجة في الردود لدرجة إني حسيت ده هو بالفعل لن لأن الردود

بتشبهو شديد كلها زوغانات و كضب من العيار التقيل

يا ريت لو الكهربا ما انقطعت عشان نعرف عن الزول العوقة ده أكتر


#231228 [د . صبري فخري]
0.00/5 (0 صوت)

10-26-2011 08:58 AM
الكهرباء قطعت لان جهاز كشف الكذب لا يتحمل ده داير جهاز من نوع خاص .. مكتوب عليه صنع خصيصا للحكام العرب


#231214 [الزول الكان سمح]
0.00/5 (0 صوت)

10-26-2011 08:41 AM

رائعة...يا شريفة

كنت أتمنى فى لقاء رئيس تحرير إحدى كبريات الصحف السودانية برئيس الجمهورية ...ان تكون صياغة الأسئلة بهذه المهنية والإنتقائية.

لكن أتمنى أن يقرأ بعضهم هذا المقال ( المنهج ) ليتعلموا الصحافة التدريسية

شكراً شريفة ...وفقك الله ووقاك شر عيون الحاقدين


شريفة شرف الدين
 شريفة شرف الدين

مساحة اعلانية
تقييم
9.97/10 (14 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة