نصائح لحفظ ودائع ولاة الأمر..!!ا
11-02-2011 02:53 PM


إليكم ............

نصائح لحفظ ودائع ولاة الأمر..!!


الطاهر ساتي
[email protected]


** زميل شفيف وقلم أنيق، ومن الزملاء الذين حين تلتقيهم يسعدونك بالأنس اللطيف، فالحياة عنده لحظة يجب أن تعشها بصدق وسعادة، ثم له قلب طيب يساوي بين الناس في المحبة والتقدير، ولكن إبتلاه الله بأم الكبائر.. زارنا ذات يوم بألوان، وكان مانشيتها الرئيسي يومئذ خبرا فحواه : وفاة خمسة مواطنين بسبب تناولهم خمور سامة ..حدق زميلنا هذا في المانشيت مليا، وتحوقل ثم قال بارتياح ( غايتو الله يخلي لينا حاجة السعدة، لو ما هي كنا لحقنا الناس ديل زماااان)، فضحكت وسألته مداعبا ( يعني حاجة السعدة دي عرقيها ما بيشق ؟)، فرد سريعا : ( لا لا، مستحيل .. دي زولة نضيفة ياخ، وكمان ما بتغش الزبائن ابدا )، ثم إستطرد في ذكر محاسن السعدة - ست العرقي - قائلا بمنتهى البراءة : ( تصدق يا ساتي الزولة دي حجت تلاتة مرات..أها، معقولة زولة زي دي تعمل لينا عرقي يشق البطن ؟)..ضحكت بدلا عن الرد، ثم ودعته بعد أن سألت الله له - وللسعدة - بالهداية والعمل الصالح ..!!
** تذكرت زميلي هذا وحديثه عن السعدة - والتلاتة حجات - يوم الأحد الفائت، حيث كان موعد إحدى جلسات محاكمة المتهمين بسرقة منزل قطبي المهدي، رئيس القطاع السياسي بالحزب الحاكم.. لقد نهبوه ، علما بأنه من الذين تقع عليهم مسؤولية حماية البلد من النهب، ولذا نتساءل : كيف يحمي البلد من يعجز عن حماية منزله ؟.. المهم في تلك الجلسة، جاء الشاكي قطبي وأدلى بأقواله، وكذلك (8) متهمين، وغاب تاسعهم، وسبب غياب المتهم التاسع - كما تقول الوقائع - هو آداء مناسك الحج .. نعم المتهم برئ حتى تثبت المحكمة إدانته، وبتلك البراءة سافر المتهم التاسع ليؤدي مناسك الحج، ولكن ثمة أسئلة تأبى إلا أن تطل أمام هذا الغياب، وهي من شاكلة : هل هذا المتهم كان معتقلا مع الآخرين ثم إستأذن الشرطة وخرج من المعتقل وغادر البلاد ليؤدي مناسك الحج، أم لم يكن معتقلا ؟..إن كان معتقلا لحين تقديمه الي المحاكمة، هل القانون يمنح لأي متهم معتقل حق مغادرة الحبس والبلاد إلى الأراضي المقدسة، ليؤدي مناسك الحج أو العمرة ؟.. يعني بالبلدي كدة : هل ممكن أي زول متهم في قضية سرقة يقدر يغادر البلد، زي الزول ده ؟..هكذا السؤال، هذا إن كان هذا المتهم - المشى الحج ده - معتقلا كما ال (8) الآخرين، أما لو لم يكن معتقلا مثلهم ف(ده موضوع تاني)، ويطرح أسئلة من شاكلة : ليه ما كان معتقل؟، ولو ما رجع من الحج ح تعملو شنو؟، والمسؤول منو؟..على كل حال، تلك الجزئية ( غياب متهم بعلم السلطات التي تختم تأشيرات الخروج، ومحاكمة آخرين شركاء معه في ذات القضية )، بغض النظر عن القضية وشخوصها وأطرافها، بحاجة إلى ( وقفة تأمل ) ..!!
** ثم ملاحظة أخرى في وقائع هذه القضية، وهي كثافة وغزارة العملات الأجنبية التي تعرضت للسرقة ( حوالي 300 مليون جنيها، بسعر السوق الأسود) ..وتلكما كثافة وغزارة أوحتا لي وكأن الشاكي قطبي من هواة جمع العملات..وتلك هواية كانت رائجة وسط صبيان أيام زمان، وكنا نمارسها بتحريض وتحفيز من مجلة ماجد، ولازلت أذكر صفحة تعارف الأصدقاء بتلك المجلة الرائعة، ثم السؤال التقليدي في قائمة أسئلة التعارف ( الهواية؟)، إذ كثيرون هم الذين كانوا يملأون فراغ الإجابة ب ( جمع العملات)، و كانت إدارة تحرير ماجد تطلب من أصدقائها بين الحين والآخر إرسال عملاتهم الفائضة عن حاجتهم، ثم تخصص جوائز مالية لمن يرسلون أكبر عدد من العملات الأجنبية، وكنا نجتهد - في سبيل تلك الجوائز - في جمع العملات، وكنا نجمعها بجد وإجتهاد، لكن ( كمان ما زي قطبي ده )..!!
** ورحم الله مجدي محجوب ورفاقه، حيث تم إعدامهم - في عهد قطبي هذا - في (حفنة دولارت) ضعف ضعفها لايساوي نصف (هذا المال المسروق)..المهم، هناك ثمة دروس مستفادة في هذه القضية، ونقدمها- مجانا - في شكل نصائح للسادة ولاة أمر هذا البلد المنكوب، وهي عدم تخزين العملات الأجنبية في خزائن المنازل، فالافضل تخزينها في أرصدة مصرفية، بالداخل أو بالخارج..أنا شخصيا افضل تخزينها بأرصدة مصارفنا الوطنية، فالبلاد وإقتصادها بحاجة إلى (عملة حرة )، وليس من العدل أن تتكدس خزائن ولي أمر في قامة قطبي المهدي بالدولارات وشقيقاتها، بيد أن الشرطة تطارد بعض العامة في (برندات برج البركة)، فالعدل يقتضي المساواة بين ولاة الأمر والرعية في (منع تخزين العملات الأجنبية خارج الأرصدة المصرفية)، ولا كيف؟.. وبالمناسبة، للمصارف السويسرية سمعة طيبة في مجال حفظ ودائع ولاة الأمر، ولذلك انصح كل ولي أمر بتلك المصارف، فتلك مصارف بجانب أنها مؤمنة ضد السرقة، ذات عائد ربحي مقدر أيضا..ثم ليست بالضرورة أن تكون العملات من كل بلاد الدنيا والعالمين، كما حال رئيس القطاع السياسي بالحزب الحاكم (شئ دولار / شئ فرنك / شئ يورو/ شئ ليرة / شئ ريال / شئ استرليني / وغيره )، بل الأفضل دمج كل هذه العملات وتحويلها إلى دولار أو يورو، ثم بعد ذلك ( إفتح كم حساب كدة برة البلد)، وهكذا يا دار ولي الأمر ( ما دخلك شر ولا حرامي )...!!
...............
نقلا عن السوداني

تعليقات 20 | إهداء 0 | زيارات 3262

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#236012 [abd elmuhsin hassan ali]
0.00/5 (0 صوت)

11-04-2011 12:30 PM
سؤال واحد لا اعرف مدى براءته لما حرمة الزول دا سافرت بطائرة مستأجراها كان بعلم راجلها وعلمه بسبب سفرها ولا خرتا ايدا ومشت رجالة كده ؟؟؟؟؟؟؟؟؟!!!!!!!!!!!!!!!!!


#235781 [أبوأمين]
0.00/5 (0 صوت)

11-03-2011 07:04 PM
داير تساعدو إذن إنت شريكه يكون صحبك؟بدل ماتنهاو عن السرقة تنصحو تقول ليو دسها كويس.حسي إنت زول بتخاف الله.والله الزمن ده أبتلينا بشلة من المجرمين والفاسدين والماعندهم ذمة ولا ضمير شي حكام شي مسؤولين شي صحفيين.نسأل الله حسن الخاتمة.


#235567 [بت الخرطوم]
0.00/5 (0 صوت)

11-03-2011 12:23 PM
الاخ ساتى عهدناك شجاع وصريح وبتقول الحقيقة بدون خوف او رجفة لكن الليلة مالك بقيت جبل الرجاف ذكرت صاحبك وحاجة السعد بائعة العرقى وحجات التلاتة وامتهم التاسع وذهابه للحج ونسيت الحرامى الاكبر عند السرقة كان وينو فى لندن ابدا لا طيبفى ماليزيا ابدا لا طيب فى البلد اتذكر ارحامو ابدا لا طيب كان وين ياالطاهر فى الاراضى المقدسة لاداء العمرة موش نفس الملامح والشبة فرقو شنو من السعدة وحجات التلاتة والمتهم بالسرقة وحجته قول الحقيقة ماتبقى زى ناس تانين


#235541 [wedhamid]
0.00/5 (0 صوت)

11-03-2011 11:59 AM

الاخ الطاهر .........تحية........

لدى سؤال بسيط......لو المبالغ التى سرقت من منزل هذا القطبى هى بس دى ....طيب لمّا مشى لاداء العمرة و معه الاسره كلها كان شايلين معاهو كم ؟؟؟؟؟

لكى لا تتعب فى التفكير ممكن اذكرك بقصة الشقيقة الصغرى لمدامة الرئيس الثانية الست وداد لما مشت لمعاودة مدامة الرئيس الاولى لما كانت طريحة المستشفى فى الرياض بالسعوديه قبل شهرين فى رمضان الماضى و اثناء التسوق نسيت شنطة اليد خاصتها فى إحدى متاجر الذهب و المجوهرات الملكية فى السوق و فيها حسب إفادة صاحب المتجر مبالغ عديدة ذكر منها 240.000 دولار و 480.000 ريال سعودى !!!!!!! دى بس القروش الكانت شايلاها للتسوق !!!! فكم يا ترى ما تركته فى مكان السكن و كم ما تركته فى السودان فى الدولاب ؟؟؟؟؟

و عندى جار ( متنفذ و مسؤول كبير فى الدوله ) حج العام الماضى....ذكر إنو اتنشل فى جده اثناء العوده و فى المحفظة المنشولة مبالغ بعملات ....دولارات ..يورو....ريال سعودى....دراهم إماراتيه .......وتبلغ حوالى 250 مليون جنيه ( بسعر دولار ذلك الوقت) و دا بعدما كمّل الحج و شرع فى العوده !!! و إنو أخوانو ( جزاهم الله بكل خير) أسعفوهو بارسال بعض المال !!!!!!
و ما ننسى رحلة السيدة الاولى بطائرة شارتر حاصة لــلندن بصحبة مرافق لايداع مبالغ و مغتنيات ثمينة فى أحد البنوك اللندنية .......

و ما خفى أعظم !!!

و بعدين تقولوا فى انهيار إقتصادى فى البلد لانو الجنوب انفصل؟؟؟؟


#235467 [Ayyoub]
0.00/5 (0 صوت)

11-03-2011 09:57 AM
حبيبنا الطاهر .... أقواسك أبهجتني هذا اليوم ... فطفقت أضحك وانعدل مزاجي هذا الصباح .. ضعف ضعفها لايساوي نصف (هذا المال المسروق).. كم مرة تمت سرقة هذا المال وأي السرقتين تستوجب ما يأفكون


#235435 [ود الحاج]
0.00/5 (0 صوت)

11-03-2011 08:52 AM
على ذكر ام الخبائث قيل لست العرقي مره العرقي دا ذتيه موية قالت سجمي كان أوكل اولادي الحرام ...... عشان كدا ولاة امورنا ديل مابختو قوشهم في بنوك سويسرا عشان ما اوكلوا اولادهم حرام ؟؟؟؟؟؟؟ حلوة مش كدة .......... اللهم ارحم هذا الشعب المغلوب على امره آمييييييين


#235400 [somer]
0.00/5 (0 صوت)

11-03-2011 07:06 AM
أقول ليك حاجة أنت لا تعرفها ولا يعرفها الكثيرون وهي أن هناك في الخرطوم الإنت عايش فيها دي حاويات مليانة بالدولارات تابعة لولاة الأمر في هذا البلد والما مصدق يسأل...................................................... أقول هناك حاويات مليانة بالدولارات وهي موجودة أمام المنازل وفي بعض الأحيان في مناطق لا يمكن لأي انسان أن يتخيل أن بداخلها ليس أثاث أو أغراض إنما دولارات.


#235341 [ibrahim]
0.00/5 (0 صوت)

11-03-2011 12:43 AM
اخونا الطاهر حبابك عشره
انت ماشي بعيد ليه الصرافه الاسمها الحياه دي الفي السوق العربي في صينييه القندول دي ماحقت قطبي المهدي وبعدين الصرافات الشغاله دي كلها حقت الانقاذيين امسك من اليمامه والهجره ودينار وارقين دي كلها شغالة تحاويل للخليج باسعار السوق الموازي وبموافقه بنك السودان قالو الستره والفضيحه متباريات الزول ده شقي بس ما مصدق


#235340 [abu alsurra]
0.00/5 (0 صوت)

11-03-2011 12:34 AM
إنت عارف يا الطاهر الحكومة بدل تمشي تشهد ياناس قطر والسعودية بل حتي الوليد بن طلال... أحسن الريس يدق صدرو وينادي أخوانو ومرتو والسادة الكرام كرتي وبتاع الدولارات المسروقه ده والبقية الباقيه ويختو في بنك السودان شوية قريشات كده زي تلاتة ولا اربعه مليارات من الدولارات ويكفون شر الشحده .... ما قالو البلد ده حقهم والبقرب منو بدوه علقه .... ولا هم دايرين يدقسوا الوليد وغيرو... زي ما دقسو بتاع الخمسه مليون .... عجائب


#235328 [د.سيد قنات]
0.00/5 (0 صوت)

11-02-2011 11:30 PM
سلام أستاذ الطاهر ،
صاحبنا قال لحظتها لو ما نحنا جينا كان الدولار بقي 20 جنيه،
وفي لقاء صحفي قبل يومين قال : لا أستبعد أن يصل سعر الدولار إلي 10 ألف جنيه،
هل تتخيلوا ذلك؟؟؟
هو جزء من تنفيذ الإعدام في الشهيد مجدي وبطرس وآخرين
والآن عندما سئل من أين لك هذا المنزل المتعدد الطوابق
قال كان مغترب وسفير

شفنا مغتربين وسفرا ومهنيين كتار جدا جدا ولكنهم ساكنين في بيوت متواضعة جدا جدا

قبل الحفظ لابد من معرفة المصدر
يديكم دوام الصحة وتمام العافية


#235248 [الزول الكان سمح]
0.00/5 (0 صوت)

11-02-2011 07:39 PM

غايتو أنا مامتأكد لكن يخيل لى...الحكومة الجاية ..تستفيد من قدرات ومهارات الطاهر ساتى..فى التحرى والتحليلات الجنائية لو تم إبتعاثه لتنمية تلك الموارد

يديك العافية يا ود ساتى


#235234 [hajabbakar]
0.00/5 (0 صوت)

11-02-2011 07:08 PM
الزول المشى السعودية عندو ضهر وعليك بالبحث عنه واسال بتاعين الجوازات اوجهاز الامن او قريب قطبى اوزوجته او استعن بصديق
التماسيح دول مابودو قروشن سويسرا بخافو من التجميد بتاع الارصدة
بعدين الجماعة ديل حرامية وسرقو ليهن حرامى زيهن


#235207 [أبوعــــــــــلاء]
0.00/5 (0 صوت)

11-02-2011 06:13 PM
يا الطاهــــــــر

شنو اللف والدوران ماتقول الزول تاجــر عمله عدييييييييييل

حتى فى بنك السودان بتكون العمله من نوعين او تلاته حسب حزمة الصرف والصناديق
يستحيل تتجمع اكثر من عملتين او تلاته الا عند تاجر عمله


#235187 [فضولى]
0.00/5 (0 صوت)

11-02-2011 05:24 PM
كل اكيزان من هواة جمع العملات وانت خليك كده اقعد ابحث عن فضولى لما يوم نصحى نجد موز استولت على الجمل بماحمل والشاويش فهمان خليه يرقص ويرمى فى درابه بارك الله فيك زكرتنا ايام كان الجنيه يجيب ماجد والشرق الاوسط ومجلة المجلة وصباح الخير والكلام ده قبل انقلاب القشران ده بشهور


#235174 [بوطارق]
0.00/5 (0 صوت)

11-02-2011 04:35 PM
انا غايتو حسب ما سمعت انها من عرق جبينه ........والله اعلم


#235152 [احمد الطيب]
0.00/5 (0 صوت)

11-02-2011 03:56 PM
دي نصيحة شنو يا الطاهر ياخ ؟


#235146 [ود ابوشوارب]
0.00/5 (0 صوت)

11-02-2011 03:41 PM
أها ما قلت لى يا الطاهر
هى القوانين القتلت مجدى لغوها ولا شنو؟؟؟
وأكان لغوها حق المرحوم ده ناخدوا من منو؟؟؟
وأكان ما لغوها ذى الحصل ل : رئيس القطاع السياسي بالحزب الحاكم.. ده ما بستوجب المساءلة ؟؟؟ يعنى الحكومة الرسلت عسسها وشغلت قاضيها ونيابتها بالموضوع ده اصلها ما سألت الزول ده من وين جبت العملات دى وليه ما وديتا البنك ووووووووووو
غايتو الناس ديل


الطاهر ساتي
الطاهر ساتي

مساحة اعلانية
تقييم
9.93/10 (16 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة