مسؤولين من الخير..!ا
11-03-2011 11:31 AM

حديث المدينة

مسؤولين من الخير..!!

عثمان ميرغني

مسؤولين من الخير.. أين ذهب مهرجان السياحة (أتانينا) هذا العام في ولاية البحر الأحمر؟ قبل أيام دشنت ولاية كسلا مهرجان السياحة.. في محاولة مستميتة لاستعادة المجد \"التاجوجي\" الذي (كانت!!) تتحلى به كسلا.. يوم أن كانت قبلة العرسان في شهر العسل.. وأدمت قوافي شاعرها إسحاق الحلنقي بـ(كسليات) لا تزال تمطر شجناً.. مثل (حبيت عشانك كسلا) التي تغنى بها التاج مكي وغيرها.. في العام السابق.. قلت للسيد الوزير المشرف على مهرجان السياحة في البحر الأحمر.. أن أول شروط نجاح مثل هذا المهرجان أن ترفع الحكومة يدها عنه.. الفكرة بسيطة وسهلة.. مثل هذه المهرجانات المستهدف بها المواطن.. لكن ظهور (الحكوميين) فيها يفسد مقاصدها ويحولها إلى عمل سياسي دعائي عديم الرجاء.. ألم تلاحظوا ذلك في مهرجان كسلا الأخير.. كانت صور السيد الوالي محمد يوسف آدم في إعلانات تدشين الموسم.. وكان الأجدر أن تكون تاجوج.. أو توفيق صالح جبريل أو إسحاق الحلنقي.. لأنه مهرجان سياحة لا سياسة.. ليت ولاية البحر الأحمر –هذا العام- تستفيد من الأفكار التي نهديها إليها.. أن (تخصخص) المهرجان كاملاً.. تدعو لافتتاحه وتدشينه فنان مثل وردي أو الكابلي أو محمد الأمين وتترك إدارة المهرجان من قمة لجنته العليا إلى أخمص قدميه لمواطني البحر الأحمر.. وليتفرغ السادة الوزراء إلى أعمالهم. وتدعو السيد رئيس الجمهورية ونائبيه الأول والثاني مع أسرهم الكريمة للاستمتاع بحضور المهرجان بشرط واحد مهم للغاية.. أن تكون زيارتهم للولاية (غير رسمية).. لا لقاءات جماهيرية ولا عطب ولا لافتات ترحيب ولا حتى مواتر وصافرات جياد.. بل والأجمل أن لا يستقبلهم الوالي.. بل رئيس لجنة المهرجان الذي نفترض أنه من عامة أهالي البحر الأحمر.. ثم بذكاء يلتقط الإعلام والصحافة صور الرئيس مع أسرته وهم يتمتعون في الشاطئ مع عامة الجمهور.. أو يتناولون وجبة سمك شهية.. أو يشاهدون حفلاً مسرحياً وغنائياً.. أو بين الحضور في ندوة كبرى يتحدث فيها العلامة الدكتور جعفر ميرغني عن تاريخ سواكن.. وتنقل ذلك الفضائيات لتكون هذه الصور (دعاية) للسياحة.. لا للسياسة.. إذا نجحت ولاية البحر الأحمر في لفت النظر (السياحي) للمواطن السوداني.. فإنها بكل تأكيد تضخ دماء (اقتصادية) في شرايينها.. تدفق الزائرين ينعش الحركة التجارية ويجذب الرواج. كلمة السر في مهرجان السياحة.. (لا سياسة.. في السياحة)..!! أقول هذا ويعتصرني الألم على هبوط فريق حي العرب (سوكرتا) في بورتسودان من الدوري الممتاز.. فهو واحد من أهم وجوه السياحة (الرياضية).. هو ليس مجرد فريق رياضي عادي.. بل مورد اقتصادي مهم للولاية.. لا أعرف لماذا فرط فيه أهالي البحر الأحمر بمثل هذه السهولة.. الفريق الذي تأسس منذ العام 1925.. حتى قبل أن تعرف العاصمة كرة القدم..

التيار





تعليقات 11 | إهداء 0 | زيارات 3207

خدمات المحتوى


التعليقات
#236076 [بت الخرطوم]
0.00/5 (0 صوت)

11-04-2011 02:43 PM
مسئول من الخير يا صاحب ود الخدر وكمان بقى معاه قوش اسألك الله ما قبضت حق الترويج والتسويق للمهرجان وكمان عايز قبضة من ميسورى حى العرب شايفاك تكسر فى الثلج انت حكايتك شنو عايز تنافس قطبى فى جمع المال كسسسسرة اقترح منحك الدكتوراة من الكانت جميلة ومستحيلة فى تكسير التلج


#236021 [Kalifa]
0.00/5 (0 صوت)

11-04-2011 12:10 PM
أنت يتنصح في كديسة أهدرت المليارات بل الترليونات في كلام وشو فارغ لم ولن يستفيد منه مواطني البحر الأحمر ولا الأصفر....... ؟؟؟؟


#235934 [ودالمهدي]
0.00/5 (0 صوت)

11-04-2011 07:40 AM
طيلة ايام المهرجان تصادف ان كنت بمدينة سنكات ساروي لك ياشيخ عثمان راي المواطن البسيط وهو اخونا في الله ادروب بسنكات وانا لست ادروبا مع احترامي الشديد لهم وذلك في نقاط وبايجاز شديد والله علي مااقول شهيد.اولا بعض المساجد تحدث الائمه فيها منتقدين للصرف البذخي المبالغ فيه وتزامن الغناء وبصوت مزعج مع اقامة الصلاه(المغرب والعشاء) ثانيا الفرق الاثيوبيه وغناءها وموسيقاها ورقيصها المعروف للجميع وتعارض ذلك مع ماتنادي به دولتكم دولة الرساله والتوجه والشريعه والجمهوريه الثانيه ....الخ حسب مسمياتكم .ثالثا الالعاب الناريه واصوات المفرقعات المصاحبه للمهرجان سببت ازعاجا وهلعا وخوفا شديدا لعدد كبير من المواطنيين. رابعا هنالك اخبار عن مجاعه بقطاع طوكر فمن باب اولي الاهتمام بالجوعي والمحتاجين في طوكر من الاخوه البني عامر والعرب والمواطنين بتمنوا ان يهتم السيد ايلا بهذه المناطق لان تهميشهاسيفسرتفسيرا انتم ادري به .خامساارجو ان تسال لماذا لم تصل الكهرباء والمويه لمدينة سنكات حتي الان مع ان الابراج قريبه شديد من المدينه والي متي يتم وعدهم بالكهرباء والمويه ولاحياة لمن تنادي.سادسا السيد الرئيس في زيارته الاخيره لهذه المدينه سال المواطنين في اللقاء الجماهيري (خليتوا سف الصعود وشراب الجبنه؟ماذا انتم فاعلون حتي تستطيعوا اقناع هؤلاء البسطاء بمشروعكم الحضاري وبترك الصعود والجبنه والقعاد طيلة اليوم في القهاوي يعني حيال ترقية وتنمية ورفعةهذا المجتمع البسيط.


#235898 [واحد تانى]
0.00/5 (0 صوت)

11-04-2011 01:46 AM
الناس جعانين ومرضانين وانت يا صحفى تتكلم عن مهرجان يحضره ( الرقاص )...!!


#235794 [زعلان من خرفان المصريين]
0.00/5 (0 صوت)

11-03-2011 07:14 PM
والله يا أستاذ عثمان ميرغنى لو كان كل الناس بتفكر زيك كان السودان ده بقى من أروع دول العالم , لكن الناس هنا غير الانتقاد وسياسة الهدم والنقد الضار ماعندهم شئ لكن الله غالب والله المستعان , وإن شاء الله كل من كتب شيئا سيئا فى حق الاستاذ عثمان ربنا ينتقم منه , لان هذا الرجل غفيد اليد واللسان , ولم يسى إلى أحد أبد ا فهو يتكلم فى صالح الوطن المغلوب على أمره ,, ولايضير إن كان فى السابق مع المؤتمر الوطنى أم لا , المهم إنه ينتقد كل السياسات الخاطئه للحكومه بكل جرأه معرضا نفسه للمسائلات ,, وأنتم يامن تستخبوب خلف المنتديات , كدى إنتقدوا الحكومه وأكتبوا بأسمائكم الحقيقيه,,شكرا للقامه الاستاذ عثمان ميرغنى رغم أنى لاأعرفه , فهو ذو قلم شجاع , فى زمن قلت فيه الشجاعه;)


ردود على زعلان من خرفان المصريين
Saudi Arabia [قرفان خالص] 11-03-2011 08:01 PM

وانت اسمك الحقيقي زعلان وابوك اسمو خرفان وجدك اسمو المصريين ؟؟!!

أخخخخخخخخخخخخ


#235747 [alitaha]
0.00/5 (0 صوت)

11-03-2011 04:41 PM
غثمان..اسف علي غيتمان باين عليهو ايله الوالي وقف اعلاناتو..فقلته كدي النديهو نخسه..
بقينا نفهمك...
قلته لي قوش قال ليك شنو
وديتو الراجل في حيص بيص
علي فكرة عندو قصر في الراقي - اول لفه بعد شارع الستين مع تقاطع شارع مدني- شايفو بدا في التشطيبات .. ما ترسل صحفي كدة يصور..
جاكم بلا يخمكم كلكم...


ردود على alitaha
Sudan [اشرف نورالدين ] 11-04-2011 01:31 PM
وانت اسمك قرفان وابوك خالص ابوك مصري ولا ايه ياعم ؟ لانو كلمت خالص لا يستعملها السودانيون مع الصفة بل يستعملون كلمة شديد قرفان شديد وزعلان شديد ومشتاق والخ اما كلمة خالص دي تستعمل من شاكلة سيد الدكان العربي تب في زيت لا والله خالص الدقيق خالص السكر خالص والحضر يقولو خلصان وبعدين بطل الحركات الهبلة دي اخخخخخخخخخخخخخخ والرجالة دي ما في النت ياعنتر الله يهدينا واياكم


#235684 [قرفان خالص]
0.00/5 (0 صوت)

11-03-2011 02:33 PM

يا زول لو ما عندك موضوع امسك خشمك عليك وانطم بدل ما تطمم بطنا ....

أخخخخخخخخخ


#235668 [gasim ali]
0.00/5 (0 صوت)

11-03-2011 02:00 PM
مسئول من الخير ياباشمنهدز وين الشخيت


#235646 [zahi]
0.00/5 (0 صوت)

11-03-2011 01:19 PM
ما تستعجل مهرجان السياحه جاييك نهاية هذا الشهر .......... ولكن يا شيخنا يجب يكون الحديث عن ما هي الفائده التي تجنيها الولايه من مثل هذا الصرف الملياري والذي يذهب جله لجيوب قله منتفعه ... اسالك سؤال كصحفي ارجو ان توجهه لمن تراه مناسبا من الحكومه : ماهي حقيقة الوضع الصحي والغذائي في مناطق جنوب طوكر ( مثلا ) وهل هذه المناطق هي الاولي بمثل ها الصرف ام مدينة بورسودان ؟؟؟؟ الاولويات كثيره جدا واخرها الصرف بسفه علي مثل هذه المهرجانات ............................... شنو اخبار شيخ علي بن عثمان بن محمد طه ؟؟؟ باقي طولللللت ما جبت سيرتو لعل المانع خير ...............


#235645 [popo]
0.00/5 (0 صوت)

11-03-2011 01:17 PM
قالوا واحد عبيط في الحلة نبذوا واحد من شباب الحلة جنب البير. اها قاموا اتشاكلو , العبيط رمي الراجل في البير. جابوهو المحكمة , القاضي بدأ يجرجر فيه شوية شوية دايره يعترف انو رمي الزول في البير.القاضي سألو اها الزول دا اساء ليك صاح, صاح اها قال ليك بالضبط شنو.. قال كده و كده. المهم جننو بالاسئلة. في النهاية سألو الرمي الزول دي في البير معاك منو؟ العبيط عاين ليه شديد و قال ليه رميته معاي انت يالفصييح. اها يا عثمان ميرغني اليبقوك انت يالفصييح رئيس لجنة المهرجان. و الله صحي الناس في شنو والحسانية شنو؟ قال مهرجان قال.يسوهو بشنو بقروش الخرفان ولا دولارات قطبي. الله يسجمكم يا حثالة .


#235620 [سودانى اصيل]
0.00/5 (0 صوت)

11-03-2011 12:42 PM
يا حليل البحر الاحمر هل يستطيع احد يفعل شئ بدون إيلا هذا مستحيل


عثمان ميرغني
عثمان ميرغني

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة