11-03-2015 01:25 AM


حليل رمضان
رمضان إنسان
زى كل الناس
فى أى زمان
وفى أى مكان
لو كان فى الناس
شعور وإحساس
ولو كان سودانا
سودانا تانى
مافى زمن
الأنجاس
رمضان
ماكان مات
بالشطة
وبالجزمة أنداس
* * *
خلينا نقول
رمضان راح يسرق
بس رمضان
ما سرق البسمة
وما حرم الناس
تحس با لنسمة
إمكن جيعان
أو خلى وراهو
فى البيت عيان
محتاج لى دواهو
* * *
رمضان
لا نازع فى سلطة
ولا طمعان فى ملك
رمضان لا سرق
الجمرك
ولا بعرف دربو
ولا كم فدان
رمضان ضربوه
رمضان جلدوه
رمضان سحلوه
رمضان كتلوه
يا ناس
فوق كم
ساقنو الدم
شن جابو
دياركم
غير الجوع
والضيق والهم
* * *
رمضان كتلوه
المقهورين
زى حالو تمام
كتلوه المخدوعين
بالدين
كتلو ضاحكين
وبدون إحساس
رمضان إنسان
زى كل الناس
كتلوه مجاهدين
الزيف
ديل القالو
بكرموا الضيف
* * *
كبروا هللوا
ودمو اتفرق بينهم
ياها شريعة دينهم
اكتل أكسح أمسح
ولما تخلص
كبر وصلى وأمدح
* * *
رمضان ما كتلوه
براهو
يمين
كتلونى معاهو
وذبحوا إحساسى
ودمو ينقط
ذبح الشاة
وحمامة
* * *
رمضان ما كتلوه
براهو
بل كتلوا معاهو
الرجولة الحبة
الفضلت فينا
وباقى شهامة
عن اى وهم
عن أى كرم
نتكلم
وبأى شرف
بنفاخر
وعن ياتو كرامة
* * *
وعن أى تسامح
نحكى
ورمضان بستعطف
وبترجى وبصرخ
وببكى
وبضربو فيهو
عشرين ، تلاتين
بنى آدم
فى زمننا واحد
ضربوه بالسوط
ضرب الموت
وسلخو
سلخ النملة
* * *
لا واحد
مسك أيدينهم
قال لإخوانو
با ركوها يا ناس
خلوهو خلاص
لا واحد حلف
يمين سامحوه
* * *
يا ناس
الغل ملأ
كل الأنفس
والحقد إتفشى
والكاتل
مقهور بتنفس
فى زول مسكين
عدمان الحبة
والطيبة الفينا
بقت أكذوبة
زى أى عمامة
لافيها منافق
وفاسد
وبكبر فيها
عشان تديهو
زعامة .. وهيبه
* * *
بالمجد الزائف
نتباهى ونقدل
وكل زول خائف
من ضلو
ولابد لى أخوهو
وقدامو بلاطف
نفاق با لجد
نفاق فايت الحد
* * *
وينو شموخنا
وعزة روحنا
وينها قيمنا
وطول القامة
العاليه وسامقة
أوهام وكلام
بنبيعو
بأبخس قيمة
وباقى وكتنا
نقضى نميمة
* * *
يا للعار
تاريخنا حقيقة
نصومزيف
وكله هزائم
ولما نلاقى
ضعيفا أعزل
ننهر فيهو وننتر
ونصبح
جيشا كاسر
مغول وتتر
ولما نواجه
خصما أقوى
نلبد نتضارى
ونرفع يدينا
يا الله سلامة
* * *
رمضان
شن سوه
يا أجبن بشر
فى الدنيا
ويا أحقر رجال
فى العالم
ما خليتو
مكان فى جسمو
الا وفيهو
جرح وعلامه
* * *
يا رمضان
شن بتقول
وكت تلقاهم
واقفين بجوارك
أمام المولى
يوم تجتمع
الناس فى قيامة
* * *
رمضان ضربوه
رمضان جلدوه
رمضان سحلوه
رمضان كتلوه
وخلو كبارهم
عايشين دنياهم
ديل اسماهم
براها تخوف
عمر وجمال
وصلاح واسامة
ديل الدنيا
بين ايدينهم
زى السبحة
وكل الناس
تركع قدامهم
ديل لو سرقوا
ورضوا بالوثبة
ديل لو نهبوا
وما خلوا الحبة
لا زول بتكلم
لا عقاب لا ملامة
* * *
رمضان ما نازع
يوم فى سلطة
و لاحتى
وظيفة عامل
و لا طمعان
فى ملك
لا سرق الجمرك
ولا بعرف دربو
رمضان إنسان
زى كل الناس
جابتو قسمه
وحظو العاثر
كان حلمو
يطلع بى
حتة هدمه
تسترعرضو
أو بس لقمة
أو خلى وراهو
فى البيت عيان
محتاج لى دواهو
* * *
رمضان
إنسان
زى كل الناس
فى اى زمان
وفى اى مكان
لو فى الناس
شعور وإحساس
ولو كان سودانا
سودانا تانى
ما فى زمن
الأنجاس
رمضان
ماكان مات
بالشطة
وبالجزمة إنداس
.................
تاج السر حسين
3/11/2015

تعليقات 6 | إهداء 0 | زيارات 1926

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1365348 [ابوشوك]
0.00/5 (0 صوت)

11-05-2015 10:49 AM
وحسع احرامي دا لو دخل بيتك وضربت زوجتك او واحد من اولادك لانهم اعترضوا طريقه. يا ترى موقفك كان حيكون نفس الموقف؟؟فيا ايها المتعاطف مع اللصوص فاما انك تشاركهم وتقتسم الغنيمة او ان هذا اللص بالذات قريبك,, ولصك دا كان يستاهل اكثر من كدا


#1365198 [دفع الله الشريف]
0.00/5 (0 صوت)

11-05-2015 08:18 AM
يا تجتوج ما تعمل لينا معلقة ذى دى فى ابوالقنفد !!!!


#1364906 [عبداللطيف]
5.00/5 (1 صوت)

11-04-2015 04:36 PM
قصيده دى يامرسى ؟ والله قايلا راب امريكى .. على العموم اى حرامى مفروض يتعاقب باقسى عقوبه ولو كان الشعب ده بياخد حقو من اى لص ماكان الكيزان اتفسحو كده لكن ربنا كتب علينا انو نشوف ذمن يتعاقبو صغار اللصوص ويتحللو التيران الكبار لكن لو اى واحد قطعو يدو ماكان بقت كده تفوووووو على دى بلد


#1364825 [كديس]
5.00/5 (1 صوت)

11-03-2015 02:40 PM
يا تجه.....اسي ده شعر .... يا زول خليك في كورتك أحسن ليك... داير تنط في اي حاجه، ده ما عندك ليهو رقبه خليك في كاردينالك أحسن ليك.


ردود على كديس
[عبود] 11-05-2015 11:18 AM
موضوع انسانى ؟ ياخ هو زول فهم حاجه فى خرمجتك دى ؟ عليك الله بس ابعد عن موضوع الراب ده على قول المعلق هههههه وخليك فى خرمجت كورتك دى ... بالمناسبه الكاردينال زاتو كتب قصيده .. انتو مشاترين الهلال ديل مالهم ؟ ياخ بالجد مفروض تمشو لمحمد موسى تطلعو شريط حلمنتيش ولا نكات مع بعض كلكم

[تاج السر حسين] 11-04-2015 06:57 PM
هذا موضوع إنسانى يدمى القلب كنت اتمنى أن ترتفع لمستوى الحدث وإما أن تتدلى فيه رأيا بوطنية أو أن تلتزم الصمت ايها الجداد الالكترونى!!


#1364765 [طارق]
0.00/5 (0 صوت)

11-03-2015 12:58 PM
الأخ تاج السر عايزك تتقصى لي عن الخبر الاتي:

مشكلة ظهرت على الاتحاد هي كيف يكون اسامة عطا المنان ومجدي شمس الدين اعضاء في الاتحاد وايضاً اعضاء في المؤتمر الوطني، وحسب ما علمت ان الهلال قدم شكوى للفيفا بذلك فقام اعضاء الاتحاد لمحاولة الهلاليين لترك الشكوى للفيفا مقابل حل لجنة الاستئناف ورفض قراراتها السابقة اساس المشكلة.


ردود على طارق
[تاج السر حسين] 11-04-2015 06:59 PM
أعتذر وأعتبر حديثك حديث شخص جاد لا يمزح لكنه لم يعرف متى واين يصوب سهمه.
وأكتفى بذلك.

[معاويه جعفر] 11-04-2015 04:47 PM
كذب ومافى كلام زى ده بطل تقراء طيش البلد او الاصفار دى


#1364753 [ابو سناء]
0.00/5 (0 صوت)

11-03-2015 12:31 PM
لقد اصبح الفرد السودانى منذ مايناهز العسرون عاما متردى الخلق وبذئ اللسان وسفيه وهذا واضح من كل ما تنشره الصحف اليومية من كثرة الفساد وانحطاط الاخلاق وتفشى الزنا والسرقة والقتل العمد والتعارك بين الاشخاص وتجارة الزنا المحرم التى تجاوزت حدود البلاد والمشكلة الكبرى ان هذه الجرائم فى ازدياد وانحطاط اخلاق السودانى فى ازدياد مما جعل السودانى حقيرا فى كل مكان وقد ساعد على ذلك خنوع الناس وانبطاحهم لسياسة الكيزان وكل ما يحدث من ردة فعل لايتعدى كون عدة سطور سرعان ما تنسى وهى بلا جدوى لان الضمائر والنخوة انعدمت عند السودانى الذى اصبح لايهتم غير بالفتات المتبقى من موائد المؤتمر والكيزان هنت ياوطن على اهلك وناسك المتوحشون


ردود على ابو سناء
[تاج السر حسين] 11-04-2015 07:00 PM
مشكور ابو سناء أصبت الحقيقة.


تاج السر حسين
تاج السر حسين

مساحة اعلانية
تقييم
9.57/10 (39 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة