12-21-2011 03:35 PM

إليكم

الطاهر ساتي
[email protected]

(اطلع برة، ماعندنا ليك علاج )

** هكذا الواقعة، وأعرضها - كماهي - بلا مقدمات..محمد الخاتم عوض، شاب سوداني في خواتيم العقد الثالث من العمر، مهندس باحدى الشركات الخاصة ويقطن احد أحياء أمدرمان..له أصدقاء بالخرطوم، وزارهم مساء الثلاثاء قبل الفائت ليستمتع بإحدى مباريات الدوري الإنجليزي والتي انتهت بعد منتصف الليل بقليل، ثم ودع أصدقاءه وغادرهم متوجها الي منزله بأمدرمان..قبل أن يصل إلى كبري أمدرمان، شعر بضيق في التنفس مع بعض الدوار والعرق الغزير..كان يقود سيارته ولم يكن معه أحد، ولذلك توجس ..ثم هدأ من سرعة السيارة وتحامل على نفسه وواصل القيادة ببطء وحذر الى أن تجاوز الكبري، ووصل حيث قسم الحوادث والطوارئ بمستشفى السلاح الطبي..!!
** دخل محمد الخاتم إلي قسم الحوداث والطوارئ ووجد الفريق العامل، عددهم أربعة، مابين طبيب ومساعد، وحياهم..سألته احدى طبيبات القسم : ( خير إن شاء الله، مالك؟)، فأجابها وهو في حالة الإرهاق وقليل من الوعي : ( والله حاسي بضيق في النفس ورأسي دايش شوية وجسمي عرقان )، فسألته ذات الطبيبة وهي ذات رتبة عسكرية : ( عندك تأمين عسكري؟)، فرد منهكا : ( لا، أنا ما عسكري، وما عندي تأمين، لكن معاي قروش وممكن أدفع، بس عالجوني )، فقالت له الطبيبة وهي تزيح بوجهها عنه : ( لا، آسفة والله، والله بنقدر نعمل ليك حاجة )، فأعاد محمد الخاتم حديثه الأخير بمظان أن الطبيبة لم تسمعه : ( آسفة شنو يا دكتورة؟، أنا عايز اتعالج بقروشي )، فوضحت له الطبيبة : ( حتى ولو بقروشك، ماعندنا ليك علاج هنا )..!!
** فسألها محمد الخاتم بدهشة : ( ليه؟، ده موش قسم طوارئ في مستشفى؟ وأنا موش إنسان ياجماعة؟)، فحسمته بنبرة عالية : ( يازول لو عندك تأمين عسكري بنعالجك، لو ماعندك شوف ليك محل تاني، نحن عندنا تعليمات ما نعالج إلا الناس العندهم تأمين عسكري)..ولأن حالته الصحية لم تكن مطمئنة، إسترجاها ( أوك، نحترم تعليماتكم، لكن يا دكتورة أنا ما قادر اتنفس وسائق براي، وأنا ياخ انسان وممكن تحصل لي أي حاجة في الطريق، ومعاى قروش بس محتاج أي دواء يهدئ نفسي ده شوية )، ويبدوا أن محمد الخاتم إسترسل في الرجاء والتوسل، ولذلك تدخل طبيب أخرى، وزجره قائلا بالنص : ( يازول ما تكتر الكلام، كلامنا ليك واضح، ما بنعالجك، ولو سمحت اطلع برة)، وهنا شعر محمد الخاتم بضيق زاد عليه ضيق تنفسه ، فسأل الطبيب : ( كدي خلونا من الرحمة والإنسانية، تصرفكم ده ما بخالف القانون ؟)، فرد الطبيب : ( اطلع من هنا واتعالج في اى مستشفى، وبعد ده امشي اشتكينا زي ما انت عايز) ..فسأله حائرا ( طيب لو أنا طلعت من باب القسم ده ووقعت مت، تتحملوا مسؤوليتي؟)، فلم يجد غير التجاهل ردا..فغادرهم بذات الضيق والعرق والدوار، واستعان بأحد المارة ليقود له سيارته حتى وصل به إلى مستشفى آخر، فتداوى فيه بفضل الله ثم بجهد فريقه الطبي ..!!
** تلك هي قصة الإنسان محمد الخاتم عوض مع قسم الحوادث والطوارئ بمستشفى السلاح الطبي، مساء الثلاثاء قبل الفائت..وكان يجب نشر القصة قبل أيام من يومنا هذا، ولكن واجب التقصي من سلامة وقائعها أخرها الي يومنا هذا، وللأسف كل تفاصيلها ( حقائق)..نعم، طرد فريق العمل بقسم حوادث وطوارئ بالسلاح الطبي مواطنا سودانيا قصده - بعد منتصف الليل- بحثا عن الكشف والعلاج وفي هو حالة مرضية طارئة وحرجة، ولم يطروده لعجزه عن دفع رسوم الكشف والعلاج، بل بحجة ( عندنا تعليمات ما نعالج إلا زول معاه تأمين عسكري)، هذا ماحدث..وعليه، فليضع مدير السلاح الطبي نفسه في موضع وموقف المواطن محمد الخاتم، وكذلك الفريق العامل بقسم الحوادث والطوارئ ذاك المساء، أو فليضعوا أي فرد من آل بيتهم وأهلهم - حفظهم الله - في ذاك الموقف الحرج الذي تعرض له محمد الخاتم، قبل الرد على أسئلة مشروعة من شاكلة : فلندع كل قوانين الأرض ولوائحها وتعليماتها وأوامرها، عسكرية كانت أو مدنية، فهل يجوز شرعا وأخلاقا - حين تحتكم العقول والضمائر الي قيم السماء ومكارم الإنسانية - رفض انقاذ حياة مواطن من التدهور الصحي أو الموت وطرده من مرفق علاجي ؟..من أي دستور؟، ومن أي قانون؟، بل من أي دين إستلهمت تعليماتكم تلك أهدافها وغاياتها يا سادة السلاح الطبي؟..وبأمانة كدة : كم عدد الحالات الطارئة التي تطردها تعليماتكم - يوميا وأسبوعيا وشهريا وسنويا - من قسم الحوادث والطوارئ، ولاتجد قصصها طريقا الى الرأي العام ؟..وهل أنتم على يقين بأن بعض الحالات لم ينتقل أصحابها الي رحمة مولاهم، وهم يبحثون عن مكان أخر بعد أن طردتهم تعليماتكم من قسم حوادثكم وطوارئكم ...؟؟
.............

السوداني

تعليقات 43 | إهداء 0 | زيارات 5685

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#261297 [زهجانه]
0.00/5 (0 صوت)

12-23-2011 11:47 AM
والله تستاااااااااااااااااااااااااااااااااااهلوا اكتر من كده واي طبيب يقطعه ناشف مع المريض عفيت منو لمن الاطباء ديل طلعوا يدافعوا هن حقوقكم وعن القوانين الما في مصلحة المؤيض الزي دي منو الوقف معاهم ما قعدتو تنبزوا فيهم والله جمييييييييييييييييييل برافو والي مزيد من الركل والطرد


#261156 [ساجد]
0.00/5 (0 صوت)

12-23-2011 01:27 AM
مع انو تعيمات كبير العسكر بان يتم علاج جميع الحالات الطارئه في كل المشافي مجانا حتي عند مامون حميده(؟؟؟!!!) كما يفعل كل العالم وكما كنا نفعل عندما ناخذ زوجاتنا من الخليج للوضوع في امريكا مجانا بحجة اننا جئنا للزيارة !!!أ تري نستغل انسانيتهم في الهرب حتي من ابنا ليس جنسنا ولكن ديننا!! ورغبة منا في حصول الابناء علي جنسيتهم!!تحسبا لورطة كالتي نعيشها!! في بلاد نعلم ان مستقبلها في علم الغيب مع واقعها المريرة المستمر!! تري من يحكم ومن ينفذ الاوامر!! اذا كان بيد الجميع مخالفة قانون كبيرهم او حتي قانون الصحه وقسم الطب بخدمه الانسان حتي في زمن الحروب!!!!
و هذه ليست الاولي فيكفيك زيارة للمشافي الحكوميه!! لتري العجب!!مرضي يحولون في
حاجة للعناية المركزه او للعمليات لانهم ليسوا بعسكريين او شرطيين!!! كانما لايكفيهم دافع الضرائب والجباية والعتب والرسوم والضرائب ودمغة الشهيد! من مال المساكين!! الذين يتحملون ظلم ابنائهم عندما يعتلون المناصب او يلتحفون البزات العسكريه!!ويطالبون بثمن لخدمة اختاروها طاعين ولم نبخل عليهم صاغرين!!!
ومن اين جيئ باطباء مثل هؤلاء صاغرين مطيعين مهينين لقسمهم ولشرفهم ولانسانهم!! انها ياسيدي الحوجه ووزارة الصحه البائسة التي رمت بالاطباء في كل البحور ليتسولوا حقوقهم ولينصاعوا لزبانيتهم فلاغرو ان تجد مثل هؤلاء واولئك الذين يتنصلون عن تقديم الخدمة لمن يحتاجها!!هل هذا هو الطب الذي نعرفه بقسمه واخلاقياته والتزاماته!!!! ام ان المجلس الاخر او الطبي لم يعد يقدم غير رسوم وامتحانات لاتعلم ولاتضبت سلوكا!!وانتظر لتسمع منه تعليق!!!واظن العسعس فوق كل المجالس الطبيه وفوق الوزارة !!ولاابالغ ان قلت فوق رئيسهم الذي يصدر الفرمانات ولا يطيعها احد!!
ياودساتي الله يعينك علي بلواك!!!فهذه البلد اصبحت بلوه فكيف ستصلح وعلي من ستصرخ!! والي متي !! ومن سيسمع!! عسي كما قلت يوما ان يتذكر الناس انك قلت واشرت لمكمن الداء عسي ينفع الدواء بعد زلزال يعيد لم الامور لبعض سابقها ولنا الله!!


#260886 [بيبو]
5.00/5 (1 صوت)

12-22-2011 02:18 PM
الاخ/ الطاهر ساتي

ليست القضية في الاطباء وحدهم فالمشكلة اصبحت في الانسان السوداني .
عند دخوللك لاي مؤسسة تحس بانك عدو لاي شخص موظف تتعامل معه فتعامل معاملة سيئة وتسمع ما لا ترضاه وانت مرغم لان لك مصلحة ترجو ان تقضي .
نحن في حاجة للتربية علي السلوك الراقي واحترام الغير فللاسف اصبحنا شعب يحب التسلط واذدراء الاخرين.
كل واحد فينا في عمله عامل فيها مدير وينهر في المواطنين وكأن هذا ليس بواجبه .
انهارت القيم والاخلاق .


#260793 [وليد السر]
0.00/5 (0 صوت)

12-22-2011 11:48 AM
المدعو(nagi) والله انت واحد مسكين يعني بفهمك المتواضع ده مفترض الطاهر ساتي ما يسترسل في التفاصيل حتى ينأي بنفسه عن التهمة المبطنة التي ترميه بها بانه (غواصة) مثلا.يعني بفمهك البسيط كل من يصدع بالحق في هذه البلد وهم كثر متهم بانه عميل للحكومة،اتمنى انك تسأل عن المحاضر والبلاغات التي فتحت في الطاهر ساتي حتى يخرس قلمه ولسانه عن الحق وقوله،اتمني انك تسأل عم ساتي-والد الطاهر- عن الذي تعرض له بسبب كتابات ابنه،الواحد حقو مايدخل في مهاترات مع امثالك ،وعودة للموضوع هذا المستشفى البغيض من انشأءه غير هذا الشعب البسيط ابتداء بدمغة الشهيد مرورا بدمغة الجريج اتنهاء بدمغة صندوق دعم القوات المسلحة.يعني ياكيزان الهنا انتم ترفلون وتتمرقون وتتعالجون مباشرة بقروش الشعب الطالع من جيبو مباشرة مش من الانتو لقفتوهو من خيرات البلد..لك الله يابلد...لك الله يابلد.....واتقوا يوما ترجعون فيه الى الله


#260791 [khalaf]
0.00/5 (0 صوت)

12-22-2011 11:44 AM
I was in the US when a hospital refused to treat someone who came in an emergency situation. The Govt closed the hospital and withdrew the license. This is how the kufar behave !


#260714 [ابواواب]
5.00/5 (1 صوت)

12-22-2011 09:42 AM
سبحان الله قبل اسبوع وفى احدى الدول الخليجيه التى اقيم فيها استدعى الامر ان احمل ابنى الى احدى اقسام الطوارى لمستشفى عسكرى والله على ما اقول شهيد فى منتصف الليل لارتفاع فى درجة الحراره حقيقه شى لايوصف من الاهتمام والسرعه فى التعامل مع الحاله مع المراجعه يومين للاطمينان عليه لم احس ابدا انى اجنبى تستقبل بابتسامه وتودع مع الدعوات انشاء الله ماتشوفو شر.....ماذا حصل لسوداننا فى السنوات الاخيره اين الرحمه ولماذا التعامل بهذه القسوه وخاصه ان مهنة الطب انسانيه فى المقام الاول ووصف العاملين فيها بملائكة الرحمه ليس من فراغ..الدعوات بصلاح الحال للبلاد والعباد.


#260676 [أبوكمال]
0.00/5 (0 صوت)

12-22-2011 08:52 AM
لا أعترض علي عدم علاج غير العسكريين ولكن الاسلوب غير مقبول من الناحية المهنية. علي الدكتورة معانية المريض و اجراء الاسعافات الاولية و من ثم تحويله الي مستشفي اخر,


#260671 [الامين]
0.00/5 (0 صوت)

12-22-2011 08:50 AM
نفس الوقائع حصلت لاحد معارفي بدولة خليجية واتجه لقسم الطوارئ في اقرب مستشفى وكان المستشفى العسكرى بتلك الدولة
استقبله الاطباء والممرضات الامريكان من الباب وقبل ان يتفوه بكلمة وضعوه على النقالة وركضوا به ركضا يسابقون الريح لغرفة الفحص وانكب عليه الاطباء المعالجون باجهزتهم المعقدة وفحوصاتهم المفصله وتم تنويمه لعدة ايام بالمستشفى حتى استكمل علاجه ولم يساله احدهم عن تامين او بطيخ *


#260636 [ناصر الشاعر]
0.00/5 (0 صوت)

12-22-2011 07:31 AM
أنا طبيب ملكي و عملت فترة في المستشفي العسكري بأمدرمان أؤكد بأن
حوادث السلاح الطبي تستقبل الحالات الطارئة و تاعلجها لـ 24 ساعة مجانا بدون أي رسوم للكشف أو الفحص أو الأدوية المنقذة للحياة .
تقدير الحالة متروك للطبيب المناوب لانه يمكن في لحظات يستقبل عدد كبير جدا من الجرحي من مناطق العمليات وطبعا لهم الأولوية لأن السلاح الطبي هو خيارهم الوحيد





#260588 [فكرى المحسى ]
0.00/5 (0 صوت)

12-22-2011 12:28 AM
سبحان الله ... يمكن المستشفى ده للكيزان بس والكتايب تبعم


#260586 [فطومة الامارات]
0.00/5 (0 صوت)

12-22-2011 12:21 AM
دي بلدنا القولنا راجعين لاهلها الطيبين خو فتونا منها وين قسم الضمير وين قسم المهنه يادكاتره ووووووووووووب عايكم من الحساب يو م القيا مه


#260541 [ضهبان]
0.00/5 (0 صوت)

12-21-2011 10:28 PM
دى ما غلطتهم يا جماعة والجيش تعليمات.. غلطة كبارهم ناس عبد الرحيم العملوا الشغلة بزنس وعمارات.. والانسانية و مراعاة مرضى البشر ابحثوا عنها فى اسرائيل والفاتيكان


#260539 [ali]
0.00/5 (0 صوت)

12-21-2011 10:25 PM
تحيه الى اوامر مدير المستشفى وهل ما زال مديرا عليها بعد موقعة رسل الانسانية


#260492 [sudani-online]
0.00/5 (0 صوت)

12-21-2011 08:27 PM
أنا ضابط بالمعاش ولدى تأمين عسكرى....قبل فترة بدأت أعانى من مشاكل بالقلب وكتب لى طبيبى المعالج روشتة علاجية مدى الحياة ومنها بد أت معاناتى مع السلاح الطبى .....وبالرغم من أن التأمين العسكرى للضباط الذين أفنوا زهرة شبابهم فى خدمة الوطن ليس علاجا مجانيا ومطلوب أن أدفع من معاشى المتواضع 25% من قيمة الادوية وقد قبلت ذلك ......فهذه هى التعليمات ولكن الأمر وأدهى أن الادوية الغالية الثمن لايشملها التأمين بتاتا ...وهناك أدوية أخرى تم استيراد أدوية أخرى بديلة رخيصة الثمن وأغلبها هندية (لناس التأمين ) أما الأدوية والتى لابديل لها ويعتبرونها غالية فهى ممنوع صرفها........هذه ياأخى الطاهر ساتى معاملة السلاح الطبى لمنسوبى القوات المسلحة والذين تم فصلهم تعسفيا (وهذا موضوع اخر ) فما ذاتتوقع أن تكون االمعاملة لغير العسكريين .........{اخر روشتة صرفتها كانت حبوب اسبيرين ثمنها 2جنيهمن ضمن6أنواع من الادوية قالو أنها غالية الثمن }ويتم التصديق للعلاج بالخارج لمن هم أكثر منا وطنية وأكثر اخلاصا للوطن الذى كان يوما وطن..............


#260482 [العجب]
0.00/5 (0 صوت)

12-21-2011 08:00 PM
لمستشفى كوستي ( التعليمي ) وصل حادث مروري كان ضحيته اموات وجرحى - اذكر هذا الحادث كان ما بين 94-1995م - لا اتذكر التاريخ بالتحديد - والحادث وقع بين قرية جديد وتندلتي بالتحديد - المهم في الأمر ان ادارة المستشفى وخاصة قسم الطوارئ رفض استقبال الجرحى بحجة خطاب موجه من وزير الصحة الولائي بعدم التعامل مع اي حالة للمرضى الا بعد تسديد الرسوم - ولما كانت حالات الجرحى تستدعي الاسعاف السريع - حول الأمر للسيد / محافظ محافظة كوستي - والذي اتصل بدوره على رئيس مجلس بلدية كوستي - ووقتها كان شخصي الضعيف - وذلك لتداول الأمر والخروج من المأزق الذي فيه السيد / مدير المستشفى - كل هذه الاجراءات تدور والجرحى ينزف دمائهم - جاء احد الفضوليون واقترح على مدير المستشفى بأن ( فتشوا جيوب الناس العنده قروش عالجوه ) - يعني من دقنه افتل له - هذا موقف لن انساه - وما كان امامي الا ان التزم بسداد كل نفقات الاسعاف للجرحى من خزينة المجلس لاحقا بعد علاجهم - وتم توقيعي على ذلك لادارة المستشفى - هذه حال مستشفياتنا قبل خمسة عشر عام فكيف حالها اليوم يا ترى ؟؟؟ - ولنا تواصل !!!


#260481 [Nagi]
0.00/5 (0 صوت)

12-21-2011 08:00 PM
عند محمد مشكله حقيقيه

لكن يا الطاهر اجدك دائما تحاول ان تشغلنا بالتفاصيل

مين كان السبب لكل ما يحدث فى البلد

والذين تربطك بهم علاقات وثيقه

ولولا رضاهم عنك ما كنت استمريت تكتب الى الان

لان من اشارو الى كبد الحقيقه من الصحفين هم فى المنفى الان

وانت تحاول جاهدا ان توحى لنا بان هناك

بعض العيوب هنا وهناك


#260479 [طبيب بالمهجر-زعلان جدا ومحبط]
0.00/5 (0 صوت)

12-21-2011 07:50 PM
اذا كان ماقيل قد وقع فعلا--فلقد حنث هؤلاء --الاطباء-!!!!!!!!!!!!!!!!!قال تعليمات قال--تعليمات السجم والرماد--!!!!!!!!!!!!!!!!!!!!!!!!!!!!!!!

يا اخوان احترموا ادمية المرضى البجوكم--ديل-!!!وكمان مستشفى حكومي كمان--طيب لو كان خاص كان خليتوا يموت قدامكم فضحتونا--

الله اترنا فوق الارض وتحت الارض ويوم العرض00


#260477 [محمد]
0.00/5 (0 صوت)

12-21-2011 07:47 PM
المحيرني انو ناس السلاح الطبي ديل مزانيتهم من وين ؟ مش من الضرائب البشيلوه مننا؟؟؟؟شيئ عجيب


#260476 [ودالشريف]
5.00/5 (1 صوت)

12-21-2011 07:44 PM


لاحول ولاقوة الابالله ...... والله ادمعت عينى وانا اقراء هذا الموضوع معقولة بس يكون ده فى السودان بلد المروءة والنخوة بلد الكرم والجود بالله ده شي يصدقو عقل بالله ياناس الانقاذ عايزين تعملو شنو اكتر من كده وبعدين بالله سؤال مستشفي السلاح الطبي اتبنى وتااسس من وين ورواتب الدكاترة وكل الكادر الطبي بتجى من وين ما من مال الشعب السودانى وها اذا ذهب عسكرى لمستشفى مدنى بيقولو ليهو ما بنعالجك لاحول ولاقوة الابالله ده امر خطير جدا ولايجب السكوت عليه ولايترك ليمر مرور الكرام لابد من محاسبة من كانو يومها ومن اعطاهم التعليمات واقل محاسبة طردهم من هذه المهنة لانهم لايستحقون ان يكون اطباء لان مهنة الطب انسانية قبل كل شي ولابد من متابعة الامر بجدية حتى لاتكون ارواح الشعب فى ايدى من لايعرفون الله ولايعرفون معانى الانسانية


#260466 [هاشم]
0.00/5 (0 صوت)

12-21-2011 07:33 PM
ده موضوع بسيط ياجماعة وبيحصل في كل الولايات \"عدا الولايات المتحدة الامريكية الكافرة\"
المهم يكون عندهم اوامر بحماية البلد من الأعداء حسب الوصف الوظيفي للجيش
.....أنا يادوب عرفت سبب القصف الاسرائيلي علي طريق بورتسودان........ماكان عندهم اوامر
اقتراح
نجيب جيش من الصين رخيص و........بعالج


#260465 [ابو النصر]
0.00/5 (0 صوت)

12-21-2011 07:24 PM
في كل دول العلم كل المستشفيات الخاصة او العامة تقبل الحالات الطارية ماعدا البلد الحاكمها ضار على ضار حسبنا الله ونعم الوكيل زي ما قال المهندس / محمد حسن عالم لنافع بلد حاكمنها انتو كيف حاتكون محترمة .


#260457 [A. Rahman Medani]
0.00/5 (0 صوت)

12-21-2011 07:18 PM
ديل الحارسين مالنا و دمنا؟


#260455 [ام در]
0.00/5 (0 صوت)

12-21-2011 07:13 PM
يا كافى البلاء التعليمات العسكرية فوق الأنسانية وقسم المهنة وكمان فوق الدين؟؟
بس سؤال برىء.. كل العساكر واسرهم بتعالجوا فى السلاح الطبى بس؟؟ واللا من حقهم العلاج فى المستشفيات التانية ؟؟ ..
اتخيلوا لو نفس الموقف حصل مع عسكرى رتبته كبيرة فى مستشفى مدنى .. اها كان الحيحصل للدكتور شنو؟؟ .. الله غالب ..فهو القاهر فوق عباده.


#260452 [hajabbakar]
0.00/5 (0 صوت)

12-21-2011 07:04 PM
فى كل مشافى الدول الكبرى وخاصة دول الاستكبار الحالة الطارئة تعالج مجانا وحتى الحيوانات لها حق العلاج
صديق اخد زوجته الى التى دنا عدابها وولدت بعملية قيصرية وكانت التكلفة ثمانية الف دولار وبالطبع لم يدفع وطلب منه عنوانه فقط وارسلت له خطابات بالدفع والمبلغ فوق طاقته وبعد مدة قامت مؤسسة نلسون راكفلر الخيرية(ديوان الزكاة)بدفع كل التكاليف وارسل له خطاب شكر وتم اخطاره بان لايدفع لان المؤسسة المذكورة قامت بذلك مع العلم بان العملية ليست طارئة كحالة المذكور اعلاه
فى اسرائيل ينتظر المواطن الفلسطينى دوره فى زراعة الاعضاء ان كانت كلى اوكبد اوقلب واحيانا يعطى الاولوية على المواطن الاسرائيلى وليست زراعة الاعضاء بالحالات الطارئة
اما فى الدولة الرسالية والتى لايوجد فى قاموسها شئ اسمه الرحمة وما ارخص الانسان يطرد ملائكة الرحمة المريض الضعيف الفقير فحياته لاتسوى شيئا ولا احد يحاسب احد
فهؤلاء هم الذين اتوا لانقاذ المواطن السودانى


#260449 [زعلان زعل]
0.00/5 (0 صوت)

12-21-2011 07:00 PM
هوي يا ناس اقروا وافهموا وعلقو بس جارين علي الحيطه القصيره الاسمها الطبيب التقول هو الجوعكم وخلاكم مكشوفين حال بعدين ما تتكلمو ساكت الطبيب رفض علاج الشخص لانو جاياهو تعليمات انو المستشفي للعساكربس ولو ما نفذ حتجي علي راسو طبعا حتقولو لي دي مهنه انسانيه ومفروض ينقذ حياتو حتي لو فيها قطع رقبتو بس قبل ما تقول اتزكر كم منكر شفتو قدامك في عملك كان موظف ولا غيرو وما حركتا ساكن وسكتا لانو لو قلتا ده حرام وعيب حيقطعو عيشك ولبدتا وبرضو ما تقول لي ده ضرر اخف من ضرر شن دراك انو اخف من ضرر ايي واحد مننا بيسكت علي حاجات كتيره احتمال هو نفسو مشارك فيها وساكت من باب الحفاظ علي لقمة العيش وطالما ده مبدأ معظم الناس ما تنكروهو علي الطبيب وتحللوهو علي الناس التانين وحاسب نفسك قبل ما تحاسب الناس وتنصب نفسك قاضي وتطلق علي الاطباء الالقاب وترغو تزبدوهنا في ضل الراكوبه دي ويخربكم كان تقدرو تمرقو الشارع وتجاهروا بي صوت الحق والضمير العاملين فيهو اسيادو هنا وانتو شايفين مالكم بتسرق قدامكم ودافنين راسكم هنا في الراكوبه ..... اها نبزوا الاطباء لي بكره النشوف كان سعر رطل السكر يرجع 500 جنيه


#260447 [طبيب وزول نصيحة]
0.00/5 (0 صوت)

12-21-2011 06:59 PM
ياخوانا ماتندفعوا ساي ، نحن اطباء واشتغلنا في المستشفيات وانا هسي لو جاني الزول ده وانا في مؤسسة زي دي مابقبلوا ، ماعنجهية ولا كده لكن دي حاجات فنية واسمحوا لي انو بعرفوها بس الاطباء الفي الطوارئ ، وانا متاكد تماما انو حالتو بتسمح انو يصل لمستشفى ام درمان التعليمي وهناك بستقبلوهو ، شاب كان في امان الله جايي من كورة سايق العربية بنفسو بتفاصح وبناقش في الاطباء=حالتو مستقرة والحمد لله ... يصل مستشفى امدرمان او طالما عندو قروش مستشفى اسيا احسن .... هو البلد فيها بنزين عشان تسوق عربيتك وماشي لكورة كمان ؟ جنس افتراء !!! اكيد ده انصح من الدكاترة المشى ليهم يعالجوهو ...


ردود على طبيب وزول نصيحة
Saudi Arabia [shah] 12-23-2011 08:59 AM
لو إنت كطبيب تقدر تشخص مرض أو عدم مرض من دون أن ترى المريض أو تكشف عليه كما فعلت فى تعليقك هذا فإنت لازم تكون نبى.
يموت جالينوس فى طبه كميتة راعى الضأن فى جهله.

Sudan [banda] 12-22-2011 08:04 PM
انا اشك فى انك تكون طبيب ناهيك عن كونك زول نصيحة... وكمان تقول انك متاكد بان حالته تسمح له بالذهاب لمستشفى امدرمان.. يعنى كنت معه..؟ باين عليك دخلت الطب بالخطا.. وما عندك فلوس ولا حتى عربية.. لما ينضح به قلمك الردئ تجاه ذاك المريض الممكون.. عالم حاقدة

Sudan [انا سودانى انا] 12-22-2011 07:45 PM
اخشى ان يكون فى البلد من يشاركك الراى من الاطباء.. ياخينا المرض ياهو المرض لو جاى من كورة او من الانعاش.. وهي قبل ان تكون مهنة لجمع الفلوس... فهى لرفع المعاناة و مداواة ابن ادم الذى كرمه الله على بقية خلقه... عشنا و شفنا دكاترة عصر المشروع الحضارى.. ده لو كديس صغير وبطنه وجعته فى بلاد النصارى.. الدنيا تقوم وتقعد لعلاجه.. ما لكم كيف تحكمون.. ولا حول ولاقوة الا بالله...


#260446 [حمدالنيل]
0.00/5 (0 صوت)

12-21-2011 06:59 PM
مالكم كيف تحكمون!؟
استاذنا الطاهر ساتي رعاك الله،
ولتعلم أنت وأمثالك من العلقين والمستغربين والمستنكرين ..و ..وكل واحد مش عاجبه هذا الذي حدث لأخينا المواطن محمد الخاتم. ما هو الغريب في تصرف اطباء السلاح الطبي المخلصين لمؤتمرهم .
لا شيء غريب فيما بدر منهم من تصرف سواء كانوا اطباء او موظفين في هذا السلاح، لأن الاطباء الوطنين واولاد الناس والمخلصين لوطنهم ويشعرون بمعاناة شعبهم وواجبهم المهني لا يمكن توظيفهم في السلاح الطبي ولا يمكنهم دخوله إلا للزيارة فقط لكن التعيين ممنوع لغير منتزمي حزب القراد او الجراد والقمل. فهذا وكرهم ومجمع سواءاتهم. ولو مات الشعب السوداني كله امام انظارهم فلن يحرك فيهم ساكناً.. هؤلاء هم المؤتمر الوطني يا ناس افهموووووووا .. وثوبوا إلى رشدكم اثابكم الله,


#260425 [الرشيد عبد الرحمن]
0.00/5 (0 صوت)

12-21-2011 06:22 PM
دا السودان يا هو دا السودان


ردود على الرشيد عبد الرحمن
United Arab Emirates [فطومة] 12-22-2011 12:04 AM
دا بلدنا القولنا راجعين لااهلها الطيبين بالجد خوفتونا منها لاي بلد نرجع
ووووووووووووووووووووا اسفاي


#260414 [وحيد]
0.00/5 (0 صوت)

12-21-2011 06:09 PM
كل اقسام الطوارئ في اي مكان في العالم تستقبل الحالات الطارئة حتى نسنقر ثم بعدها يسالون عن التامين او حق العلاج .... هذا مبدأ انساني ... اما تعليمات السلاح الطبي - اذا صدق دكاترة حوادثه ذوي الرتب - فهو يخالف الدين و الاخلاق و الانسانية ..... و قسم الطبيب - اي طبيب سواء سلاح طبي او شرطة شعبية - هو نفس القسم الذي يحتم عليه واجب انقاذ حياة المرضى في اي مكان و تحت اي ظروف....
بعد تسييس الجيش و سلاحه الطبي و تحويله لرافد من روافد تنظيم الاسلامويين، صارت شريعة حكم ابتكو هي التي تسير العمل فيه بكل القرارات الخائبة و الفاشلة التي لا تصدر سوى عن نفوس مريضة مثل نفوس اسلامويي السودان!
كل مواطن سوداني يدفع ما يسمى دمغة الجريح عشرات المرات يوميا فهي في كل فاتورة مفروضة و في كل اتصال يجريه اي مواطن من اي جهاز تلفون فالمواطن المغلوب على امره يدفع جباية الجريح تلك و التي يصب جزء يسير منها في الخدمات الطبية للسلاح الطبي .. اما اين يذهب معظمها فلا اجابة لدي و لكن يمكن ان تسالوا الجنرال عبد الله البشير اخو مشيركم الذي يرقص خشية لله


#260398 [شقى ومجنون]
0.00/5 (0 صوت)

12-21-2011 05:45 PM

إن شاء الله ..يشقوا ..ويجنوا ..زيي أنا..ناس السلاح الطبي.وجميع حاملى الأسلحة


#260397 [alrian]
0.00/5 (0 صوت)

12-21-2011 05:44 PM
هههههههههه
وتانى
ههههههههههههههههههههههه

شر البليه مايضحك
كدى خلونا نتاكد الزول ده امكن مشى لى سوبر ماركت
او ورشة مكنيكه من النوع الفاخر البعمل ديكور للسيارات الفارهه وبحسب عياه افتكر انو فى مستشفى وكملن حوادث لانو معروف فى كل الدنيا انو الطبيب عندو قسم يعنى لو جاك عدوك وانتا طبيب فا اخلاقيا انت ملزم تعالجه بس انا قلتليكم زمان انو المكنيكيه والكماسرى بقو مهنيا واخلاقيا افضل من الدكاتره مع احترامنا ليهم ولكل فئات المجتمع
هزا زمنك يامهازل والتقول هم دكاتره والله الاطباء فى بلادى لاينقصهم الا ان يمثلو فى افلام الرعب وستكون اكثر واقعيه لم يفكر فيها اصحاب اقوى افلام الرعب فى هوليوود ياجزارررررين

اقسم بالله العظيم

ان اراقب الله في مهنتي
وان اصون حياة الانسان في كافة ادوارها . في كل الظروف والاحوال .بازلا وسعي في استنقاذها من الهلاك والمرض والالم والقلق
وان احفظ للناس كرامتهم . واستر عوراتهم . اكتم سرهم
وان اكون على الدوام من وسائل رحمة الله . باذلا رعايتي الطبية للقريب والبعيد للصالح والخاطيء.والصديق والعدو
وان اثابر على طلب العلم اسخره لنفع الانسان ... لا لأذاه
وان اوقر من علّمني ..واعلم من يصغرني ..واكون اخا لكل زميل في المهنة الطبية متعاونين على البر والتقوى
وان تكون حياتي مصداق ايماني في سري وعلانيتي .. نقية مما يشينها تجاه الله ورسوله والمؤمنين


والله على ما اقول شهيد


#260395 [ذول ساكت]
5.00/5 (1 صوت)

12-21-2011 05:40 PM
لاتوجد انسانيه فى اطبائنا هولا مجرد حيوانات غابه لااحاسيس لا مهنة الطب انسانيه ولا يحزنون ناس فى عياداتم الخاصة شغالين جباية من المواطنين وفى المستشفيات العامة بزوغوا بليل الى منازلهم وبشهادة وزير الصحة زاتو اما المستشفيات العسكريه فهولاء مجرد حفظة للتعليمات وكأنهم لو عالجوا الناس بشيلو الرتبه منهم ويخصموا مرتباتم لكن الذنب ماعليهم على الرئيس البشير الذى اذا فطس حمار ناهيك عن كلب فى شارع الشريان لكان مسؤول عنه امام الله فمابالك عن بشر بلحم وامانه وتكليف هم قايلنها سايبه اى شى اى زول تقرصو حشرة مسؤول منها عمر البشير امام الله والقبر قريب اما بخصوص التامين الطبى عمرى كلو ماشفته تامين ولا كرت تامين بالرغم انو عندى رقم وطنى وجنسية وكل الاوراق البتثبت انو انا مواطن سودانى وعندى حق فى العلاج اى مرض بكمدو بحلبه ولا بى اى مصيبه واقوم ادافر رزقنا والشكيه لغير الله مزلة وديل زلونا الله يزلهم بى اطبائهم واى زول مسؤول من مواطن وقصر معاهو الله يقصر عمرو


ردود على ذول ساكت
Sudan [الحكيم] 12-21-2011 09:10 PM

يا زول ساكت...........

أو لا.... انا أشجب و غاضب جدا لذلك السلوك غير المهنى و لا الإنسانى من أولائك الأطباء فى طوارئ السلاح الطبى .... ومثل هذا السلوك الشائن كان فى الزمن السابق لمجئ الإنقاذ يضع مثل هؤلاء أمام المساءلة فى المجلس الطبى السودانى دون هوادة أو رحمة و لكن نحن الآن فى زمن ما لدينا غير أن نقول ...لا حول و لا قوة إلا بالله.....
ثانيا...ليه كده تصف الأطباء و بإجماعهم بهذه الأوصاف غير الكريمه يا صديق ؟؟؟ أنا طبيب وملتزم مهما قست الأحوال المعيشية أو السياسية تجاه مهنتى........وقابض و الغالبية العظمى من الزملاء على القيم و أخلاقيات المهنة و الإنسانية ......رغم أنى أيضا مستاء للأوضاع فى البلد مثلك تماما وقد أكون مقهورا أكثرمنك فلماذا تصفنا بالحيوانات؟؟؟؟
و الجباية ( رسوم العلاج الخاص) التى ذكرتها قد تكون محقا فيها ولكن أرجو أن تعرف إننا مضطرون لذلك فهل تدرى كم ندفع لإجرة العيادة ( غرفتين وبرندة كانت معروضه ب 750 جنيه لما عرفوا ان غرض التأجير لعياده طالبوا بـ 1.5 مليون!!!!!) وكم ندفع مرتبات ؟؟ و الكهرباء فاتورتها تجارية !!!! و المياه وبعدين سيل من الجبايات الحقيقية ....مثل ضريبة دخل شخصى زكاة صرف صحى إصحاح البيئة نفايات دعم تطوير المحلية دعم الولاية ترخيص سنوى بخلاف الكم الهائل من المحتاجين يوميا ........لو كنت فى مكاننا كنت حتتصرف كيف؟؟فى النهاية أنا إعتزلت هذه المهنة و إتجهت للعمل التجارى و لازال مرضاى يلاحقونى فى المنزل طلبا لمساعداتى رغم ذلك....


#260359 [فاضل الفاضل]
0.00/5 (0 صوت)

12-21-2011 04:30 PM
ماقالوا ليكم عندنا اوامر يا الطاهر امشى شوف الطلع الاوامر ديه منو -ديل ممكن يفقدوا وظائفهم لو عصوا الاوامر - وان كان انا لو كنت مجلهم بعالجو ا وبعد داك خليهم يسوا اليسوا -لكن يا الطاهر خليك ساكى عب الرحيم الراس الكبير-


#260345 [toto]
0.00/5 (0 صوت)

12-21-2011 04:07 PM
لا حول ولا قوة الا بالله ديل اطبا ادوا القسم بان ينجدوا كل من يحتاج لعناية طبية ولا اقسموا علي شنو لما اتخرجوا؟؟؟ لكن في زمن العجايب كل شي جايز وتعيش كتير تشوف كتير متعكم الله بالصحة والعافية


#260344 [omer al]
0.00/5 (0 صوت)

12-21-2011 04:04 PM
بعد ده الكلام دخل الحوش\" اكتبوا اسماء الطبيب والممرضة وكل من ساهم في هذه الحادثة الدخيلة علي المجتمع السوداني وبعد كده سوف ننتقم بايادينا لكل دخيل حتي يكون عبرة للاخرين الكلام يااخوانا خلاص دخل الحوش


#260343 [علي عيسى دبلوب ]
0.00/5 (0 صوت)

12-21-2011 04:03 PM
طبعا ما ده مستشفى أبوهم ومن مال أبوهم وليس من مال السعب السوداني المسكين يدفع دم قلبه وجائع وما لاقي أي خدمات لكن تنابلة الجيش والسلطان وعوائلهم لاقين كل الإحترام وعلاج . صحيح الأستحوا ماتوا . حسبنا الله ونعم الوكيل


#260341 [zoal]
0.00/5 (0 صوت)

12-21-2011 03:56 PM
بالاضافة لما ساقة الكاتب ميزانية السلاح الطبي بما فيها مرتبات الاطباء تأتي من الخزانة العامة ومن اهم موارد الخزانة الضرائب بما فيها من ضرائب دخل شخصي فلنحسب ما يقوم بدفعة الاخ المهندس فنكتشف انة يقوم بدفع مرتبات العاملين بالسلاح الطبي وغيره من مرافق الدولة الغير منتجة فتأمل ؟


#260335 [البعشوم]
5.00/5 (1 صوت)

12-21-2011 03:53 PM
افتح بلاغ يا محمد الخاتم بشروعهم فى قتلك وتعريضك للخطر واذا رفض البلاغ اعمل عريضة للقاضى واذا رفض وكل محامى وستجد مليون شخص معاك ....


#260334 [ديك الجن]
0.00/5 (0 صوت)

12-21-2011 03:49 PM

دي ما تربية الكيزان قاتلهم الله أنى يؤفكون

فعقوا مرارتنا الله يفقع مرارتهم..

الله في


الطاهر ساتي
 الطاهر ساتي

مساحة اعلانية
تقييم
7.04/10 (137 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة