عندما !ا
12-31-2011 12:01 PM

ساخر سبيل

عندما !

الفاتح جبرا

■عندما يشرق صبح نترك النوم ونصحو (عشان نشوف اليوم ح نقضيهو كيف؟)
■عندما يتم إختيار مذيعة تبدأ التدريب (على نقش الحنة طبعن)!
■عندما يتم إختيار دستوري فأول ما يطلبه عربة رئاسية مظللة (عشان ما يشوف خلقة أبو أهلنا)
■عندما تخرج بعثاتنا الرياضية إلى الخارج فإنها تقوم بالتمثيل بنا خير تمثيل
■عندما تتم سرقة منزل مسئول فتأكد أن الغنيمة سمينة (الخير راقد وكدة)
■عندما تقوم بملء أورنيك الرقم الوطنى تأكد أنك قد قمت بملء خانة (قبيلتك شنو) بس ما تكون (قبطى) عندها ح تحتار !!
■عندما تستمع إلى تصريح مسئول بان المستقبل الزاهر ينتظرك لا تنسى أن تجيب عليه بما قاله (عادل إمام في مدرسة المشاغبين) : بعد تلاته وعشرين سنة ثانوية عامة بتقولى أيه هو المنطق !!
■عندما تحجز لإبنك العريس في أحدى صالات الأفراح فلا تنسى أن تضع إحتمال زيادة المدعويين بنسبة 10% (طيارات وكده) !
■عندما تدخل إلى السوق المركزى لشراء خضروات أو فاكهة لأطفالك لا تنسئ وضع الكمامة على أنفك وفمك إتقاء غاز النشادر النفاذ !
■عندما تستمع إلى جارك وهو يكثر ترديد كلمة (وبعدين) فأعلم أن الشهر قد إنتصف !
■عندما تري شابة في عمر الشباب وهى تمسك بمسبحة وهي تسير في الشارع العام فأعلم أنها غير متزوجة (كمين وكده) !
■عندما يقبض عليك شرطي المرور فتأكد إنك يا ح تدفع يا ح تدفع (تدفع الأولى ما زى تدفع التانية) !
■عندما يقوم الطبيب بتحديد (صيدلية) لك لشراء الدواء فأعلم أنه سمسار ضل طريقه إلى الطب !
■عندما تجلس أمام مكتب الموظفين الذين ذهبوا لتناول (الفطور) فتأكد إنو قعدتك ح تطول عشان بعد الفطور الشاى وبعد الشاى الصلاة وبعد الصلاة (يلملموا حاجاتهم) .... والبيت !
■عندما يصرح أحد المسئولين بأن (العارف ليهو فساد موثق يجيبو) نقول ليهو (كدي جيب لينا خط الخرطوم هيثرو ده أولاً بالتبادى ) !
■عندما تذهب إلى المستشفى الحكومى فتأكد أنك تحمل كسباً للوكت (وفد المقدمة) .. لفة قطن .. شاش .. حقن فاضية .. مطهر !
■عندما يصرح مسئول أمني بان 40% من الجرائم يرتكبها أجانب نقول ليهو (طيب دي مسئولية منو؟)
■عندما تدخل غرفة العمليات لاستئصال كليتك المريضة لا تنسي أن تعلم عليها بالحبر الشينى (عشان مرة وفي حادثة مشهورة قام الدكتور الجراح بمسك صورة الأشعة بالمقلوب وإستئصل السليمة) !
■عندما نشاهد الدراما السودانية نتأكد تماما بأن الممثل السوداني (قاعد يمثل) !
■عندما يطالب مساعدو الرئيس (الخمسة) بعربتين مرسيدس آخر موديل لكل واحد منهم واحده (للصباح) وواحده (لليل) فمعنى ذلك أنهم ح يورونا نجوم (الظهر) !
■عندما تكون أقصى امنيات المواطن أن يأكل .. يجب عليه أن يموت (مش بتشبه كلام المفكرين الكبار بالله؟)
■عندما يخرج أطفالك إلى المدارس في الشتاء والدنيا (ضلمة) تذكر أن الحكومة تشجع البكور وتنبذ الكسل والخمول (بالمناسبة أيه أخبار أسعار الفول؟)
■عندما تقرأ إستغاثات المواطنين المعدمين علي صفحات الجرائد .. أرملة عاوزين يطلعوها من البيت عشان الإيجار.. طالب يتيم عاوز أقساط الجامعة .. مقعد عاوز كرسي معاقين .. (وحاجات زى دى) طوااالي ح تسأل نفسك (طيب وين ديوان الزكاة؟) ! ودى فرصة نسال (الأمين العام الجديد) رجعتو لينا الخمسين الف دولار بتاعت قناة الضحى الإتبرع بيها (الأمين العام القديم) وللا لسه !
■عندما يصرح مسئول بأننا سوف نكون في عداد الدول المتقدمة بعد سنوات قليلة يجب أن يحال إلى الفحص الطبي (أكيد بيركب الفيل) !
■عندما تصبح الترضيات هي المؤهل للوظائف الدستورية فتأكد أن عربة الوطن تسير إلى الخلف !
■عندما تستمع إلي معظم أأئمة المساجد فى خطب الجمعة تبصم بالعشرة بانهم يعيشون في كوكب آخر (ما عندهم أي علاقة بقضايا المجتمع) .. يركزون كثيراً على إخوة يوسف .. والمسيح الدجال و ... (هو في دجل أكتر من الحاصل ده) ؟
■عندما تصرح وزارة الرعاية الإجتماعية في تقريرحديث قدمته لمجلس الوزراء فى اكتوبر نهاية العام الماضي بأن نسبة الفقر في السودان (4.3%) فهذا يعنى أن الوزارة تستخدم آلات حاسبة (صينية ) !
كسرة :

■عندما يصرح أحد مساعدي الرئيس قائلاً : لا أمثل والدي في موقعى الحالي نقول ليهو (يعنى بتمثلنا نحنا)؟





تعليقات 33 | إهداء 4 | زيارات 5373

خدمات المحتوى


التعليقات
#266734 [soso]
0.00/5 (0 صوت)

01-02-2012 07:23 AM
عندما تكثر عندك كلمة عندما في مفاهمتك وكلماتك تأكد بانك سوداني.. سوداني ؟؟؟;)


#266606 [النرجسي]
0.00/5 (0 صوت)

01-01-2012 09:09 PM
عندما تجد خور جبرة جامع بلال بتاع الموية بنظفو فيهو تاكد انو الجماعة مفلسييييييييييين .


#266597 [سوراوي]
0.00/5 (0 صوت)

01-01-2012 08:40 PM
عندما تكون فاضي ورائق وما عندك موضوع احسن تبقي موتمر وطني عشان ممكن تكون والي او كده . بس اهم حاجة تعرف تهلل وتكبر بسبب وبدون سبب وياسلام لو معاه لحية لزوم الوجاهة


#266412 [نادر محمد]
0.00/5 (0 صوت)

01-01-2012 02:04 PM
عندما نبنى جزيرة قلب العالم التى تحوى اعلى برج فى العالم واحدث مدينه للاعلام والتكنلوجيا وجزء من الشعب مش لاقى ياكل


#266372 [سوانية]
0.00/5 (0 صوت)

01-01-2012 01:05 PM
انا افكر ان اكل فقط...اذا انايجب ان اموت....الشعب يريد الاكل التمام


#266289 [الاقرع النزهى]
0.00/5 (0 صوت)

01-01-2012 11:12 AM
عندما اتنين يقولوا لك راسك مافوقك........اتبنو !!!!!!!


#266284 [Nagi]
0.00/5 (0 صوت)

01-01-2012 11:04 AM
عندما تستمع إلي معظم أأئمة المساجد فى خطب الجمعة تبصم بالعشرة بانهم يعيشون في كوكب آخر (ما عندهم أي علاقة بقضايا المجتمع) .. يركزون كثيراً على إخوة يوسف .. والمسيح الدجال و ... (هو في دجل أكتر من الحاصل ده


والله يا جبره دى اكتر حاجه مكرهانى البلد

وانا كنت قايل براى

عندنا امام مسمينو وعن عائشه

والخطبه كلها وعن عائشه الزمن اتجمد قبل 1500 سنه


#266186 [الزول الكان سمح]
0.00/5 (0 صوت)

01-01-2012 08:23 AM

عندما أذكر يا ( جبرا ) أيامنا الجميلة!!!!!!!


#266150 [ام ريل]
0.00/5 (0 صوت)

01-01-2012 07:24 AM
عندما ترى التردى فى الصحه اعلم ان وزيرها مأمون حميده


#266104 [mohamed hassan jabir- London]
0.00/5 (0 صوت)

01-01-2012 12:39 AM
Jabra , tell me where do you usually bring this euphoric drug from ? take care if you get nutty you won\'t find round about to jet out


#266069 [مهاب الفاتح]
0.00/5 (0 صوت)

12-31-2011 10:47 PM
مساء الخير ياجبرا وعام سعيد وعندما يصرح احد قياداة الانقاذ انوا نستحمل تانى ثلاثة سنوات لتنفرج الازمة يزكرنى اللعبة الشعبية وصلتوا الميس ونحن نرد فى براءة لسه لسه لسه لسه لسه لما طلعنا فى فرملة الشمس


#266056 [نيام]
0.00/5 (0 صوت)

12-31-2011 10:18 PM
عندما تسمع مكرفون المسعول قاشي حسبنة (احسب انهو) (احسب انهو) فاعلم انهو جديد لنج كرت كرتونة لانو بعد شوية حيقول ليكم (نستطيع ان نقول)...


#266035 [ام بنان]
0.00/5 (0 صوت)

12-31-2011 09:38 PM
عندما يحل اول العام يكون البوشى قد امضى اسبوعا يعانى وحيدا فى بيوت الاشباح وشبابنا يمرح ويلحس كوعه فاعلم بانه علينا الاستعانة ببعض الشباب التونسى والليبى لمساندته وفك اسره.. لك الله يا محمد مقنع الكاشفة وعشا البايتات...


#265996 [omer]
0.00/5 (0 صوت)

12-31-2011 08:00 PM
عندما ينفي جهاز الامن اعتقال المهندس يكون راح وين


#265979 [sun shine]
0.00/5 (0 صوت)

12-31-2011 07:16 PM
عندما ترى ضنبا كبيرا يهتز في حفلة صاخبة فاعلم انه ليس (دبيبا) بل انه رئيس الجمهورية


#265960 [عمرعبدالله]
0.00/5 (0 صوت)

12-31-2011 06:35 PM
انت ياجبرا عسل بنقط طق طق طق


#265923 [عبداللطيف]
0.00/5 (0 صوت)

12-31-2011 05:06 PM
بمناسبة الحاسبة الصينية يا جبرة لدينا دعوة قضائية في محكمة ودمدني بخصوص الحاصدات الصينية وارد البنك الزراعي وما ادراك ما البنك الزراعي وبعد ما اثبتنا الدعوى بالمستندات والاقرارات جاءنا القرار من فوق وانت عارف فوق يعني شنو وتم شطب الدعوى . ارجو الاتصال علي الرقم 0918551798 لمزيد من التفاصيل .عشان استقلال القضاء وكده .


#265908 [ممغوص]
0.00/5 (0 صوت)

12-31-2011 04:40 PM
عندما تريد أن تقابل الطبيب في طواري السلاح الطبي ألحس كوعك أولاًز


#265884 [Lol]
0.00/5 (0 صوت)

12-31-2011 03:54 PM
غايتو قطعتها عديل كده في المقطع ده : ---
عندما تصبح أقصى امنيات المواطن أن يأكل ..... فيجب عليه أن يموت
دي فعلا بتاعت كباااااار جدا ........ دي فائدة الانقاذ الوحيدة بتخلينا كباااار جدا من الالم


#265853 [\'I hate Nafi]
0.00/5 (0 صوت)

12-31-2011 03:15 PM
عندما تفكر من سيكون البديل معناها مافي ثورة حتقوم ونافع حيقعد بقية عمرو يقل ادبو علينا


#265851 [حازم]
0.00/5 (0 صوت)

12-31-2011 03:14 PM
لذلك ما في أي داعي نفرح ب 2012 دي
لأنو سلسلة \"عندما\" لسى ماشة وبتجدد كمان


#265845 [الاقرع النزهى]
0.00/5 (0 صوت)

12-31-2011 03:05 PM
عندما تثور جامعة الخرطوم..............تاكد ان الجماعة نهايتهم قربت


#265830 [أبو أواب]
0.00/5 (0 صوت)

12-31-2011 02:41 PM
عندما تكون مزارعا وتشترى القش لغنمايتك وفى نفس الوقت تشترى اللبن فاعلم أنك تحتاج لإعادة صياغة وفق المشروع الحضارى المنبثق من الدولة الرسالية


#265825 [صريح]
0.00/5 (0 صوت)

12-31-2011 02:32 PM
عندماتجد أن الكاتب الساخر لا يؤدي رسالته المنوطة به تجاه قرائه و مواطنيه اذا لم يكتب عن هموم المعيشة تعلم أن هناك خللا بل شرخا كبيرا في ادارة البلد


#265823 [ابو سامي]
0.00/5 (0 صوت)

12-31-2011 02:27 PM


عندما يكون القصاص باني على الطغاة والطغاة نفسهم يدركون أن هناك قصاص رباني تأكد أن الناطق في لوثةوحوسة ودوشة ونلسي انه سبحانه تعالى يمهل ولا يهمل


#265799 [ام الحسن]
0.00/5 (0 صوت)

12-31-2011 01:49 PM
برغم انى دخلت فى تحدى مع نفسى...وقلت والله اقرا مقالك ده كلو الليلة من غير ما اضحك ولا مرة.... وكنت ماشة كويس لحدى ماجات الفقرة قبل الاخيرة بتاعة الحاسبات (الصينية)... ماقدرت ومت من الضحك...حسى اصوم 3يوم واللا اسوى شنو


#265794 [ABOAHMED]
0.00/5 (0 صوت)

12-31-2011 01:44 PM
اخر سطر قمة فى الابداع


#265785 [أسامة عباس]
0.00/5 (0 صوت)

12-31-2011 01:32 PM
وعندما يتغير اللون الازرق لابيض نعرف بأنه أختراع مساعدالياى الجديد.
وعندما تضاف ذات ال 74 لموسوعة جنيس نعرف بأنها الحكومة السودانية الجديدة.
وعندما تضيق المعيشة فى السودان سيكون حتما بأنها ستضيق تانى .


#265784 [كورينا]
0.00/5 (0 صوت)

12-31-2011 01:29 PM
عندما يعتقل مهندس عاطل لانه تجرا وجهر بالمسكوت عنه من ظلم وفساد امام ذاك المسئول فهذا بعنى افلاس النظام الحاكم وضيق صدره لدنو عذابه والرعب من اقتراب ساعة القصاص الربانى لما كسبت ايديهم من اثام... :D


#265757 [ابوجديرى]
0.00/5 (0 صوت)

12-31-2011 12:48 PM
عندما يستشهد ثائر بقصف صاروخى مدبر ويفتى اولى الامر بان ذلك يعتبر قصاص ربانى فاعلم بان الله سبحانه وتعالى يمد لهم فى طغيانهم علهم يكونوا عبرة بتطبيق القصاص الربانى عليهم واحد تلو الاخر.. اذ يقول تعالى ;( انما نملى لهم ليزدادوا اثما ).. والله غالب على امره وهو اعلم بعباده


#265756 [geile88]
0.00/5 (0 صوت)

12-31-2011 12:48 PM
والله دى قوية من وين بالله ؟


#265738 [Anthrax]
0.00/5 (0 صوت)

12-31-2011 12:31 PM
عندما تشعر بانك انسان
تأكد انك خارج السودان


#265733 [ود ابوشوارب]
0.00/5 (0 صوت)

12-31-2011 12:16 PM



ردود على ود ابوشوارب
France [ISMAEL] 12-31-2011 03:37 PM
عندما وعندما


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة