01-07-2012 11:23 AM

ساخر سبيل

.توقعات

الفاتح يوسف جبرا

يسألنى كثير من القراء عن توقعاتي للعام الجديد .. هاكم بعضها :
أن يتم العثور على خط (هيثرو – الخرطوم) ويوضع كمعروضات في القضية لحين إكتمال التحري (الما ح ينتهي)
أن يتم إرتفاع سعر النفط الذى نستورده وينخفض سعر النفط الذي نصدره
أن يتم إستعادة مبلغ الـ 50 ألف دولار الذي سبق أن تبرع به ديوان الزكاة لقناة فضائية وهمية قبل أربع سنوات (من صاحب القناة المزعومة) ويعود إلى خزائن بيت مال (المسلمين) مع إعتذار (سغيروني كده) من ناس الديوان !
أن تختفي من تقرير المراجع العام كل حالات التعدي على المال العام وذلك بسبب (الواعظ الدينى وكده) !
أن تشهد الدوحة مفاوضات سلام مع كل من (نسور الجو) و(أسود الصحراء) و(تماسيح النيل) !
أن تزداد عضوية الحزب الحاكم من 90% إلى 120%
أن تزداد نسبة البطالة في البلاد بحيث يصل متوسطها إلى 3 (أبطال) لكل أسرة !
أن تتم زيادة المرتبات بنسبة تصل إلى 0،002%
أن يتم ارتفاع معدل صادراتنا من طائرات (سافات 2) وسافات 3 وذلك يعد إشتداد الطلب (عالمياً) عليها .
أن تقوم الدولة بتوفير 24 فرصة عمل للخريجين !
أن ينتقل عدد مقدر من المواطنين إلى الرفيق الأعلي جراء تصريحات بعض المسؤولين (فقعان مرارة وكده) !
أن تنخفض أسعار السلع الغذائية .. (طبعن عشان مافي زول قادر يشتريها)
أن تنخفض حالات الإنتحار بعد أن يتم إصدار قرار بمنع إستيراد (الصبغة) !
أن يفوز المواطن السوداني (عبدو تفتيحة) ببطولة العالم للقفز بالزانة (من بتاع بوفيه إلى نائب مدير عام) !
أن يحدث تحسن في مياه الشرب حيث يتم القضاء على البكتريا و(تفضل الطحالب) بس !
أن تتفاقم حمى الأغنيات (الحربية) وتحطم أغنية (قطعنى بي سكينك وبيعني للجزار) الأرقام القياسية في المبيعات .
أن يتم إحتراف اللاعب الاسطورة (عوض كورنر) بنادى (برشتونا) .
أن ننال جائزة السعفة الذهبية في مهرجان (كان) عن فيلم أبي فوق الشجرة ( شانق نفسو طبعن) !
أن ندخل موسوعة جنيس للأرقام القياسية بإنتاجنا لأصغر عيشة في العالم (لا ترى بالعين المجردة) !
أن تنتشر المخدرات بين طلاب المدارس بحيث يتم تطبيق شعار : (دفتر) لكل تلميذ !
أن يكثر (الطيارون) في بيوت الأفراح حتى يلجأ اصحاب الفرح لدعوة المعازيم عن طريق (البصمة) !
أن تتمكن المحطات الفضائية السودانية وإذاعات الأف أم من تطبيق شعار (مذيع لكل مستمع) !
أن تتم سرقة (البنك الدولي) من داخل أحد منازل المسؤولين
أن يتم شراء لعيبة محترفين بما يعادل عدد 5000 ماكينة غسيل كلي
أن يتم إنشطار حزب الأمة إلى عدة أجنحة .. جناح التأصيل وجناح التفصيل وجناح التبرير وجناح أم جكو
أن تنحسر ظاهرة نسيان الأطباء للشاش داخل بطون المرضى بفعل تنامي ظاهرة نسيان الموبايلات !
أن تنحسر ظاهرة أطفال الشوارع بفضل حل الدولة لهذه الظاهرة نوووهائياً وذلك بتوسيع دار المايقوما ليستوعب ألاف الأطفال
أن تتحول البلاد إلى دولة متقدمة بفضل قيام برج المطيري أو كما قال سعادة المستشار !
أن تصبح الفراخ الوجبة الشعبية للشعب السوداني الفضل مما يقوى من بنياته الأساسية ويجعله (يتعافى) من كل الأمراض !
أن نحرز المركز الأول في الشفافية بعد أن يتم إرتفاع البث في قضايا الفساد إلى خمسة حالات من أصل ألف وخمسمية !
أن تتوقف الغارات الإسرائلية على شرق البلاد خوفاً من (حق الرد) !
أن تنخفض أسعار اللحوم بشكل ملحوظ بسبب منافسة بعض اللحوم (الأخري) لها !
أن يرتاح معظم المعاشيين بفضل رحمة الله وتبديله لهم بدار أحسن من دارهم ومعاش (أحسن من معاش الحكومة) !
أن تتناقص حالات جرائم الإغتصاب نسبة لتفهم الحكومة بأن (العطالة) وراء هذه الظاهرة (مش قامت بتوظيف الـ 24 الفوق ديلك) !
أن يتم إنشاء مفوضية (عليا) للفساد وذلك لمراقبة أداء المفوضية (العامة) للفساد والتى بدورها سوف تقوم بمراقبة المفوضية (القالوا ح يعملوها دى) !
كسرة :
أكبر توقعاتي لهذا العام الجديد أن تزداد نسبة المتسولين بحيث يكون هنالك شحاد مقابل كل مواطن (شحاد) !


تعليقات 39 | إهداء 1 | زيارات 6736

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#286189 [محمد]
0.00/5 (0 صوت)

02-01-2012 01:16 PM
اتوقع انوالسنة الجاية علينا دي انشاء الكريم تحول كل الشعب السوداني لمؤتمر وطني اها النشوفم بسو شنو يعني كان قتحو باب معاينات كل المقدمين تابعين للشجرة الاصلها ثابت في الارض لا بتعرف ربيع عربي ولا شتا افغانستاني الحبش يمتنعون


#273077 [ود البلد]
0.00/5 (0 صوت)

01-11-2012 04:17 PM
يااستاذنا جبرا فى انتظار كتاباتك دائما عن ماسينا التى لا تنتهى حتى نجد لها حلول لهذا الشعب المسكين انا عارف المواضيع ماتخلص لكن قبل قليل كنت استمع لازاعه عطبره وانا خارج السودان وهذنى كما فى باقى الازاعات السودانيه ان يلجا المواطنين لطلب المساعده من الناس البتصلوا بالبرنامج العندوا غدروف ماقادر يدفع حق العمليه والعندوا غسيل كلى والقائمه تطول اين دور ام الحكومه فى هؤلاء الضعفاء بالله عليك الله ياجبرا تكلم لينا الزول بتاع القريه السياحيه الحتكلف 11 مليار ونكون من الدول (المتقدمه) متخلفه اقصد ويعالج لينا الناس ديل وربنا حيجازيهوا خير وفير ولك التحيه.



بعد الناس مااصابه الياس من امنا الحيكومه صاروا يسالوا اهل الخير والحمدلله كتر فى السودان والله المستعان.


#271158 [ali Osman]
0.00/5 (0 صوت)

01-08-2012 10:24 PM
يا أخو شغبه وللا شنو ما عارف .. خليك مؤدب شنو أنا بقرأ للزول ده؟ ده إسمو الأستاذ (البروف) الفاتح جبرا .. قلة الأدب البتشوفا في المنتديات دى ماا ياااها كلامك ده .. وزى ما قالوا الأخوان ما كل زول مؤهل يقرأ للأستاذ يا شغبه قااال .. ياخى قوم شوف ليك شغبه تقيف عليها


#270814 [نادر محمد]
0.00/5 (0 صوت)

01-08-2012 12:59 PM
خليك انت يس محتفظ بحق الرد ده على طول وحصريا


#270611 [سمارة]
0.00/5 (0 صوت)

01-08-2012 08:49 AM
ستاذن جبرة الله يعافيك
بالجد بتريحنا


#270584 [شقى ومجنون]
0.00/5 (0 صوت)

01-08-2012 08:07 AM

يا أخوها لى شغبة

فحسبكـم هـذا التفـاوت بيننـا ***** وكل إناء بالـذي فيـه ينضـح

أنا قصدى الما بقدر يقرأ مابين السطور ..وما تخفيه الكلمات ..فلا يكلف نفسه عناء قراءة كتابات ( ساخر سبيل ) وأرجو منك أن تركز على كلمة (ساخر ) شديييييييد


#270543 [mohamed]
0.00/5 (0 صوت)

01-08-2012 02:35 AM
نصيحتي ليك اوع تمشي القضارف اليومين ديل


#270451 [سيبويه]
0.00/5 (0 صوت)

01-07-2012 09:32 PM
المعلق اخوك يا شغبة .. قولك : ( اراك تكرر كثيرا مسالة الواعظ الدينى هذه ).. ورحت تعذب نفسك مع المراجع و الروابط.. يا رجال ليه ما سالت نفسك لماذا يكرر المعلم جبرا فيها كل مرة .. ؟ كدى حاول القراءة مرة اخرى وثانية وثالثة وبتركيز عالى مع ضبط تردد تفكيرك مع موجة ساخر سبيل وحينها سترى الفرق بين الوازع و....... ( الواعظ )


#270433 [اخوك يا شغبة]
0.00/5 (0 صوت)

01-07-2012 08:57 PM
اخونا سيف الفالح واخونا الشقي ومجنون الفاهم ... نحنا اتعودنا طبعاً علي قلة الادب المنتشرة في المنابر والاستخفاف بالآخر .. وكل ينفق مما عنده .. لكن .. بجدية ... انا قريت اكتر من مقال لاخونا دا وبيكتب الواعظ الديني دي في محل الوازع الديني في نظري الكليل جداً مقابل ابصاركم وبصائركم المنورة .. فاتمني ان تشرحوا لينا اذا كان قاصد حاجة تاني .. وانا جاد في الطلب دا يا شباب واتمني تتعاملو معاهو بجدية


#270430 [ابراهيم محمد]
0.00/5 (0 صوت)

01-07-2012 08:45 PM
تسلم استاذنا جبرا

- السودان دا يا عمو الشيخ شى من الاشياء يتمحور بين اللاواقعية والخيالية المفرطة و بعدين كلو تناقضات باختصار تقدر تقول فيلم خيال علمى

نحنا بالنسبة للمجتمع الدولى سكن عشوائى على شاكلة المساكن العشوائية كراتين كرتون كسلا كرتون بارونا
وكمبوهات و راس شيطان العالم و ما عارف شنو

- السودان بقيادتو العميانة الفارغة الضالة الماعندها موضوع من زمن الاستعمار الى يومنا هذا بلا استثناء ناس والحمد لله ربنا سلطهم على هذه البلد لتدميرها فقط
وعلى هذا المواطن المسكين المغلوب على امره

منذ الاستقلال لم توسس دولة بمعنى دولة

- جون قرن اتمرد عشان يقول للناس انا ماعربى وما مسلم فى بلدى ما تفرضوا على الاسلام والعروبة
دكتور خليل مات عشان المواطن فى دار فور يلقى يتعالج و ياكل و يشرب موية وبلاد برضو
جا الصادق مرق جا البشير ح يطلع بثورة طبعا و نافع ح يموت زى موته القذافى
ح يجى اب زنقلة
طلع اب زنقلة يجى اب جاكومة

ولسة الشعب السودانى بفتش لى لقمة العيش
العالم من حولنا فات طار وانقشط و نحنا لسة كوارى الموية ما تديك الدرب
والمحلية تفرض ضرائب على الدرداقات

السعودية منذ تاسيس حكومة فيها ما فاتت اربعين سنة
الامارات مافاتت تلاتين سنة
شنو ما عارف ما فاتت سنتين سبقونا
بمنجنيق ما بنحصلهم تانى


الحل بدل تفتيت البلاد دى لدويلات حسب مزاجات الحسيب النسيب الطيب مصطفى الهاشمى القرشى
ونافع على نافع القحطانى
وعمر البشير ال جندب الدوسى


من المعطيات من زمن الاستقلال الى يومنا هذا الناس بتتخبط وفشلت تحكم البلاد و تريح العباد

نطلب من الامم المتحده مش دى حبوبتنا طالمنا الحكومة دى امنا انها تفرض الوصاية على السودان
الساسه السودانيين ديل السودان دا غلبهم عديييييييييل ما قادرين يديروهو

نخلى الامم المتحده تشتغل تعمل لينا بنية تحتية
تاسس لينا لخدمة مدنية
تبنى لينا مدن حضارية
لمده عشرة سنوات عشرين سنة حسب مقتضيات الحالة بتاعتنا المتاخرة دى

والا نقعد لى يوم القيامة
فى اتفاقات الدوحة مع اسود الصحراء
و حركة تماسيح النيل

ونمور كاجوكاجى

كسرة
عليك الله يا جبرا كلامى الاخير دا ما منطقى


#270423 [ود البلد]
0.00/5 (0 صوت)

01-07-2012 08:32 PM
انا مع الاخوه البقولوا انوا جبره يكون مستشار الرئيس لامور التنفيس وكده وجبره اخير من المسشارين ديل كلهم مانجر وكده على الاقل جبرا جاءه بختيارنا نحن





قال سافات قال بالله عيك الله ديل مابخجلوا


مجددا لك التحيه مرشحنا جبرا لمنصب المستشار


#270419 [ود البلد]
0.00/5 (0 صوت)

01-07-2012 08:20 PM
ياجبرا والله خطير يااخوى ماقلنا ليك شوف لينا مصحه نسجل فيها لانوا ده كلام لايصدف

وبعد ده مقعمزين معمزين الله يكون فى عون الشعب الفضل ياااارب


#270414 [saif]
0.00/5 (0 صوت)

01-07-2012 07:55 PM

اخوك يا شغبة
شكرا للمعلومات القيمة ، راكب من وين يا فالح ادوه حق التذكرة خلوه ينزل .


#270405 [حمدالنيل احمدحمدالنيل]
0.00/5 (0 صوت)

01-07-2012 07:38 PM
اتوقع ان يصبح الشعب كله مفسد وسارق للمال ولكن للاسف لايجدون مايشترون بهذا المال لقله الانتاج والحصول على المال بالفهلوة


#270346 [شقى ومجنون]
0.00/5 (0 صوت)

01-07-2012 05:36 PM

يا اخوها لى شغبة

الفاتح جبرا ...قاصد يكتب الواعظ....وأظنو بعد كده محتاج ليهو لى فهامة ..أو إبتكار قاموس عشان ترجمة ( فاتح سبيل )


#270338 [القوس]
0.00/5 (0 صوت)

01-07-2012 05:17 PM
أن يرتفع عدد الذين يحجون على حساب الدولة لتكملة النقص في عدد الحجيج نتيجة ارتفاع حالة الفقر في السودان إلى 99%
أتوقع زيادة عدد الوزراء في الحكومة الاتحادية إلى (777) بدلا من (77) الحالية – وأتوقع أن تضم التشكيلة الجديدة (الرشيقة ) عددا كبيرا من مواهب نجوم الغد – ومحللي الصحف الشباب غير المتزوجين
وأتوقع أن تتشظي الولايات إلى الرقم (51) بدلا من الرقم (15)
كسرة
أتوقع تبادل ادوار اللعبة بين الرئيس والحبيس


#270326 [khtmi]
0.00/5 (0 صوت)

01-07-2012 04:58 PM
توقعاتى ان تضم مصر دنقلا والحبشة كسلا ومشروع الجزيرة يتبع لبعض رجال الاعمال الخليجين وتسمن القطط وتتغى بالسيادة الوطنية


#270291 [هجو نصر]
0.00/5 (0 صوت)

01-07-2012 03:54 PM
يا زول ! ما غيرت اي حاجة في الخال الرئاسي ! معناه كل كلامك بيش


#270286 [sudani-online]
0.00/5 (0 صوت)

01-07-2012 03:50 PM
الى أخونا المعلق عمر ....الماركة المسجلة للطائرات هى(سافات ) وليس صافات وذلك من الفعل (سف).(.يسف ) فهو (سفاف) .....أما توقعاتى للعام الجديد هو اعادة تعيين السيد الفاتح جبرا مستشارا لشئون التنفيس لخبرته المتراكمة فى هذا المجال ولاسكات صوته شوية لأن صوته بقى يعمل ازعاج لسيا دتو نافع وكدة.........................


#270279 [صادميم]
0.00/5 (0 صوت)

01-07-2012 03:42 PM
كل توقعاتك ممكنه الحدوث ما عدا و قف استيراد الصبغة لان هذا شأن رئاسي و يعتبر عيباً في الذات الرئاسية يعني ترضى رئيسك يكون عجوز.
الخطأ بين صافات و سافات مقصود لان هذه الطائرات سفت القدامنا و الورانا وذلك من اجل النفخة في الفاضي


#270278 [sudani-online]
0.00/5 (0 صوت)

01-07-2012 03:40 PM
توقعاتى أن يتم اعادة تعيين السيد الفاتح جبرا مرة أخرى مستشارا لشئون التنفيس (الحمد لله ح يكون عندنا زول فى الحيكومة وكدا )


#270271 [اخوك يا شغبة]
0.00/5 (0 صوت)

01-07-2012 03:29 PM
يا استاذ - مع الاحترام لمقامك - اراك تكرر كثيراً مسألة (الواعظ الديني) هذه .. والصحيح علي حد علمي المتواضع باللغة العربية (الوازع الديني) .. فالوازع هو الزاجر الداخلي الذي يمنع من ارتكاب قبيح في عرف الاخلاق او الدين اما الواعظ من وعظ يعظ فهو واعظ وهو يشير الي الشخص الذي يذكّر الناس بالخير ويحضهم علي كريم الفعال والخلق فهو شخص من الخارج يذكر المستمع اما المعني الذي تنشده في ظني هو هذا الوازع الداخلي .. فالرجاء التصحيح ودونكم هذا الرابط :
http://www.almaany.com/home.php?language=arabic&lang_name=ط¹ط±ط¨ظٹ&word=ظˆط§ط²ط¹&type_word=0


#270259 [ali Osman]
0.00/5 (0 صوت)

01-07-2012 03:15 PM
ياomer صاحب التعليق بتاع صحح معلوماتك .. إنتا الظاهر ما قاعد تقرأ ما بين السطور للأستاذ .. الأستاذ صافات دى كاتب فيها مقال عديل وعارف إسمها صافات
وممكن ترجع للمقال لكن هنا يا سيد عمر الأستاذ سماها سافات من (السف) لأنها عاملنها للسف .. فهممممممممممتا إن شاء الله


#270255 [miesara]
0.00/5 (0 صوت)

01-07-2012 03:08 PM
صاحب التصحيح الاستاذ يقصد (سافات) انا شايف بدل التوظيف يعملوا صندق العاطل المنتج بلجنه رئاسيه للعاطليين المنتجيين


#270235 [أبو محمديحيى]
0.00/5 (0 صوت)

01-07-2012 02:36 PM
سافات 2 و سافات3 ؛؛؛ دي طائرات بتشتغل بالصعوط النووي و لا شنو ؟؟؟؟؟ و لا من كترة السف الذي اصبح شعار دولة المشروع الحضاري ؟؟؟؟؟


#270228 [النهاية]
0.00/5 (0 صوت)

01-07-2012 02:26 PM
ان يتم فتح مصنع عيدان للكيزان


#270227 [بت ام الحسن]
0.00/5 (0 صوت)

01-07-2012 02:26 PM
اهم حاجة والكل متوقعها مالك ما اتوقعتها لينا امكن ياخى يصادفها ملك فى راكوبتك ديك ويقول عليها آمييين...اظنك شفت الجماعة اليومين ضاربين الهستريا ونازلين فى الناس اعتقالات قلت تهدى اللعب شوية...غايتو انا من توقعاتى للسنة دى انك ح تروح فى كلبوش يعنى ح تروح فى كلبوش لانو شكلك كدى من العمة المحكرة دى مابتقدر تسكت كتييير


#270220 [ودالجزيره]
0.00/5 (0 صوت)

01-07-2012 02:18 PM
وانا كمان يا استاذ جبره عندى توقعات لعام 2012م..؟؟
اتوقع فى نهايه عام 2012م ان ينقسم السودان مثل الخليه الى اثنين ثم الى اربع دول وهى الاتى ؟؟
دولة دارفور الكبرى وعاصمتها الفاشر.ورئيسهاالتجانى السيسى
دولة جبال النوبه وعاصمتها كادقلى.ورئيسها الحلو
دوله جنوب النيل الزرق وعاصمتها الدمازين ورئيسها مالك عقار.
دوله شمال السودان وعاصمتها الخرطوم ورئيسها {.........}.


#270219 [زول من الشعب الفضل ]
0.00/5 (0 صوت)

01-07-2012 02:16 PM
الأخ المعلق omer:
أظنك ما فهمت الأستاذ قاصد شنو ب\" سافات \" ....................


والله يكيفينا شر السف والسفافين والسافات


#270215 [واحد تانى]
0.00/5 (0 صوت)

01-07-2012 02:10 PM
توقعاتى.......مجاعة ومرض وتشرد لان الشعب خائف من الكيزان


#270214 [ام الحسن]
0.00/5 (0 صوت)

01-07-2012 02:09 PM
الحمد الله المااتوقعتو لينا...الله يكفى المغتربين شر التحويل الاجبارى..اصلنا احنا المغتربين ديل فى الخير(ايام اللغف قبل الانفصال) منسيين..وفى الشر (ايام العصر بعد الانفصال ) مطريين....


#270200 [asabangi]
0.00/5 (0 صوت)

01-07-2012 01:52 PM
أنا أتمنى أن تختفى صورة نافع إلى الأبد وما نشوفو إلا يوم القيامة معلق من شلاليفو


#270194 [جينيس]
0.00/5 (0 صوت)

01-07-2012 01:42 PM
فات عليك منافسة د. نافع للفذافى فى الدخول لموسوعة جينيس لاكثر زعيم يسب ويشتم شعبه بالفاظ الشوارع...


#270188 [ابو همام]
0.00/5 (0 صوت)

01-07-2012 01:36 PM

اتوقع فى هذا العام ان يترك الاستاذ جبرا الصحافة ،ويتجه الى الفن \" ما تستعجلوا انا ما قاصد يبقى فنان \" اقصد يكتب سناريوهات افلام ومسرحيات وكده
كما اتوقع ايضا ظهور معارضة جديد ة معارضة للمعارضة القديمة !!


#270183 [مرتضي ]
0.00/5 (0 صوت)

01-07-2012 01:26 PM
الله يديك العافيه يا استاذنا...لكن في حاجه مهمه ماقلتها ...العام ده ح يكون نهاية الكيزان


#270164 [omer]
0.00/5 (0 صوت)

01-07-2012 12:59 PM
صحح معلوماتك الماركه المسجله للطائرات صافات 2 وصافات 3 لذا لزم التنويه


ردود على omer
Sudan [يا رب سترك] 01-08-2012 10:35 AM
سافات من سف يسف سفاً ............ فهو سفاف .... يعني نكون مستشاؤين في طرق سف البلاد ............. انشاء الله فهمت ياكوووووووووووووووز ؟

Sudan [Emesary] 01-07-2012 02:36 PM
يا مسيكين هذا الامر لا يفوت على الكاتب - ساخر سبيل - يعني ما تفهم الاّ لما يقول ليك ( سافات التراب ) عدييييييييييييل كدا ؟؟؟؟ امّــــا عالم عجيب و غريب وما عندها موضوع - انت ما شايف غير النوّهت عنه دا ما شابف التنوين مثلا بيتكتب كيف عنه ؟؟؟ قال صافات قال ، بلا صافات بلا لخمة معاك دي والله مشاريع تخرّج لطلاب دبلوم هندسة يكونوا قصّروا

Sudan [أبو سفة] 01-07-2012 01:53 PM
خلى خيالك واسع شوية.. دى زى الخاتى سفة و راسو دايش يقولوا له لف يمين يروح لافى شمال..


#270144 [sulima]
0.00/5 (0 صوت)

01-07-2012 12:41 PM
ابداااااااااااااااااااااااااااااااااااااااااااااااااااع وكفى .


#270130 [شقى ومجنون]
0.00/5 (0 صوت)

01-07-2012 12:29 PM

أما توقعاتى أنا:

أن يتم إعفاء جميع المغتربين العاوزين يجيبوا عربات من رسوم الجمارك!!!!! ( يعنى ملح ساكت)

أن نكون زى دولة ( سويزلاند ) لاجيش ولا كتايب ولا دفاع شعبى بلد متحضر وكل يسوس نفسه ويحميها

وأمنية أخيرة......

أن يرزق الله الرئيس عمر البشير بولد يورثه العرش بعد الولاية العاشرة وكدا


#270118 [الشريف محمد موسى ]
0.00/5 (0 صوت)

01-07-2012 12:11 PM
انت عارف يا استاذ انو كلامك دة واقعي جداً في الوضع الحالي دة


الفاتح يوسف جبرا
الفاتح يوسف جبرا

مساحة اعلانية
تقييم
9.88/10 (27 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة