دجال الإنقاذ
01-25-2012 07:20 AM


دجال الإنقاذ

أسماء الجنيد
[email protected]


سلام يا الحبان في كل مكان ,,

آخر ما توصل ليه فطاحلة بنو جكة لبقائهم في السلطة ، هو الاستعانة بالدجل والشعوذة .
كل العملوه فى السنين الفاتت ما كفاهم , ولا شبعوا ولا قنعوا ، دايرين يحنطوهم في كراسيهم إلى ما شاء الله ،
قطع شك سمعتوا المدعو بلة الغائب الراجل عامل روحو عالم بالغيب حمانا الله وإياكم من المحن و البدع الظهرت في زمن بنو جكة ...!!!!
يا جماعة وصل بينا التدني والإنحطاط لهذا الدرك ؟؟؟
الناس دي رافعه شعار هي لله والله اكبر والشريعة الإسلامية ,, ويبرطعوا في القصور بحق الغلابة ويسمحوا لمثل هذا البلة الغائب يبرطع بإسم الدين يفكفك في كضبه ودجله على الملأ ، زول ساى يسأله مافي ، في حين إن الحكومة مضيقاها على المواطن البسيط في كل شيء شايلين سيطانهم ومجندين روحهم جلادين في حاجات هايفة , وعاملين رايحين من جنس ناس بلة الغائب , لأنهم مقتنعين ومؤمنين وفرحانين ومطمئنين لي كلامه البديهم نفحة أمل في البقاء في السلطة !!
غلبهم البعملوه , قبلوا على السفلي وسماع الخرافات من الدجالين والمشعوذين . بي هنا مكومين دقونهم يكبروا ويهللوا بي خبث وبي جاي باركين تحت رواكيب الدجالين وستات الودع وما بعيد الزار برضو !! خسوسا كبيرهم بدووووور الرقيص وبخاف من الكديس!!!
اتلقطوا جونا من وين الناس الما بتخاف الله وبتجاهر بالشينة نهارا جهارا !!!
الحاجه البتغيظ الراجل ده يحلف ويجزم ويقسم بإسم الله , ويدعي علم الغيب !!!!!
كيف يا رجل تقسم بالله وبي قوة عين وكمان الفين في المية إنه بشيرك حايحكم 31 سنة و25 يوم ؟؟؟ النبي فيك الخمسة وعشرين يوم دي مالك ما تميتها ليه شهر ؟؟ فد خمسة ايام مالك بخلت عليه بهين يا الغائب ؟؟
النبي فيك إت بي صحك ؟؟ بعدين السألك منو إنهم دافعين ليك قروش ولا بتكضب ملح ساي لي الله سيدك الداير تشاركو في علم الغيب , اعوذ بالله من نوعكم الحا يجيب لينا البلاء والفقر اكتر من الحاصل علينا ده ؟؟
بعدين حليفتك وقسمك المغلظ ده مفكفكو في السهلة كده ماك خايف من الله يا الموهوم ؟؟؟
هسي كان حصلت مصيبة لفحت الفي القصر كلهم من طرف وريحت العباد منهم , قبال يومك الحددتو بالساعة والدقيقة ده , إنت بتسوي شنو ؟
ولا كان ربنا شال وداعتو وبشيرك ده مات موت الله ساي انت بتودى وشك وين ؟ لكن باقى لى ما عندك وش زاتو لانو كلام زى دا ما بقولوا زول عندو وش بيختشى وبخاف الله
المغصة ما فيك إنت . المغصة في المصدقنك و موسعين ليك الدائرة وما بعيد بشاوروك يأكلوا شنو ويلبسوا شنو ؟ وينوموا كيف ! إعتقادا منهم فيك ,
غايتو نصيحة لوجه الله تعالى يا بلة الغائب اخير ليك لم كلامك ده عليك لا بنفعك رئيس ولا حكومة , احسن ليك قبال ما ينزل عليك غضب الله وتبقى عبرة لمن لا يعتبر
اريتو كان الغضب بنزل عليكم كلكم من طرف إنت ورفاقتك المصدقنك وفرحانين بي هذيانك وخرافاتك دي ,,,, وبرضو رافعين رآية الإسلام وهي لله هي لله !!!
الله يخمكم كلكم ويريحنا منكم ..
حسبي الله ونعم الوكيل عليكم جميعا
يمهل ولا يهمل

(الما سمع وما شاف بلة الغائب ومحنه يشوف الفيديو التحت دا عشان تسمعوا العجب العجيب البتعملوا حكومة قطع النصيب)

[flash=http://youtube.com/v/QripW4ro4xw]WIDTH=500 HEIGHT=400[/flash]

متاوقة
ـــــــــــــــ
حيرتونا عديـــل بي محنكم المتجدده كل يوم !!! من وين جبتوا لينا ناس زيكم في كل المواصفات ؟؟؟ نوعكم دا ناااااااادر يا البتشبهوا روحكم براااااااكم

تعليقات 9 | إهداء 3 | زيارات 4451

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#282145 [حتو]
0.00/5 (0 صوت)

01-26-2012 03:05 PM
احلنا الحلة بلة ;) :o


#281657 [ود الشيخ]
0.00/5 (0 صوت)

01-25-2012 09:03 PM
البلد بقت مستباحة يسرح فيها كل من هب ودب على هواه ، والمنابر منصوبة فقط لكل من يكيل بمكيال الولاء للنظام مامهم بقول فى شنو ولا بأى اسلوب يخطب ويخرف ،،، اسلوب شوارعية ، كلمات مبتذلة ، الفاظ وضيعة ، دجل وشعوزة أى شى ممكن يخطر على بال بشر ، اما من يقول كلمة حق فالويل والثبور له
والحقيقة الواحد بقى ما بستغرب لأى شى يحصل فى البلد لانو خلاص إتعدينا مرحلة الاندهاش ودخلنا مرحلة التسليم بما قدره الله علينا ووحده الذى يخرجنا من هذه الدوامة ، ولكن بيد من؟ هذا هو السؤال الذى ما نزال ننتظر الاجابة عليه ...


#281623 [wahied]
0.00/5 (0 صوت)

01-25-2012 08:18 PM
اقطع البحر دا وتعال بى جاى وقول مثل كلامك دا بارض الحرمين والله كان لحقت امات طه فى لحظات ايها الدجال الخبيث تتفاصح وكمان تدعى الغيب صراحة العيب من هؤلاء القوم الذين يصدقون امثالك فعلم الغيب هذا من صفات الخالق الواحد\\ الاحد فعلا انك بلة الغائب انت غائب من الدنيا والاخرة حليلك يابلـــه الدفنوك وخلوا كراعك بره
وين ناس ما يسمى بهيئة علماء السودان مالهم ساكتين عشان قال ان البشير سيحكم 31 سنة ؟؟؟؟؟؟؟؟؟؟؟؟


#281612 [مدحت عروة]
0.00/5 (0 صوت)

01-25-2012 07:57 PM
واحد زى ده مفروض الناس تتجاهله تماما ولا يكتبوا فيه مقال ولا يعلقوا على كلامه بس خلوه يهوهو ساكت!!!!


#281599 [الجنرال111]
0.00/5 (0 صوت)

01-25-2012 07:34 PM
عليك الله يابله ورينا عديتها كيف الواحد وثلاثين سنه ديل من البدايه ولا ثانى واحد وثلاثين لانه بالطريقه دى بيضنها بحرق ومع سليقتك دى نروح شمار فى مرقه
يحلنا الحله عبد الله او عوض الله - ياربى نقول من شنو منو لانه بله ده كترها يجازى محنك يابله


#281429 [رحال]
0.00/5 (0 صوت)

01-25-2012 02:22 PM
...وما المئآل إلّا من الحال. عندما تباع القيم ترخص النفوس وتذبل الهمم، تتقعّر الأمم وتهون عزائمها وتغرق في ( شبر حكم ) كالعهن المنفوش.


#281290 [الامام]
0.00/5 (0 صوت)

01-25-2012 10:49 AM
يا اختي اسماء زولك دا طعلنا كلنا معارضين للنظام سلقين بيض ساي شوفي جنس المحن دا دا قال عالم بالغيب كمان حسبي الله ونعم الوكيل عليه


ردود على الامام
Sudan [Barka] 01-25-2012 01:26 PM
بسم الله الرحمن الرحيم
إن ظهور السحرة والدجالين ومن يؤمنون بهم هي علامة من علامات آخر الزمان وهذا إن دل إنما يدل على مستوى الجهل المُدقع الذي يقع فيه الكثيرين وخاصة بأمور الدين والمسؤلية هنا تقع على عاتق علماء الدين وأئمة المساجد ومناهج التربية والتعليم وهنا لا بد من الإشارة إلى عملية التي يتم بها إفراغ الدين من معانية وخاصة عدم مسائلة هذا الدجال بعد أن بُث الفيديو مما يثير الإشمئزاز ( مسؤول إمام الله ) حتى لفظه لكثير من العبارات بطريقة خاطئة فمثلاً المسؤولية تكون (أَمَامْ ) وليست (إِمَام) كما ذكر هذا الدجال فهي بفتح الهمزة وليست بكسرها وأيضاً في معرض ذكره لجزء من نص الآية الكريمة ( ويضاعف الله لَمن يشاء ) من هنا أكبر إثبات أن المدعو الغائب ما هو إلا دجال قصد بهذه الطريقة الإسائه الصريحة إلى ذات الله فى تحريف قوله تعالى وإستخدامه لغرضه السيئ فقوله تعالى ( مَثَلُ الَّذِينَ يُنْفِقُونَ أَمْوَالَهُمْ فِي سَبِيلِ اللَّهِ كَمَثَلِ حَبَّةٍ أَنْبَتَتْ سَبْعَ سَنَابِلَ فِي كُلِّ سُنْبُلَةٍ مِائَةُ حَبَّةٍ وَاللَّهُ يُضَاعِفُ لِمَنْ يَشَاءُ وَاللَّهُ وَاسِعٌ عَلِيمٌ) (البقرة261)
ومن نص الآية الكريمة يتضح مدى الإسفاف الذي وصل إليه الحال في خطاب هذا الدجال .....العياذ بالله
ثم يأتي فيقول إنه مسؤول (إمام ) المولى عز وجل والشعب والدولة ويمشوا بفتحوا فيه (بُلاغ)
فأين هي الدولة التي تسمع مثل هذه الترهات وتصمت عنها في الوقت الذي يكممون فيه أفواه منتقديهم في قول الحق وأمر الشورى ؟؟؟؟
أين علماؤنا الذين لا حيلة لهم سوى ( سفر الريس ما بجوز ) وأشياء من هذا القبيل ؟؟ أليس في حديث هذا الدجال إدعاء لعلم الغيب مع سبق الإصرار ؟؟؟ أم أنهم فقد فلحاء لتجريم فتاوى الترابي والمهدي لأنهم أعداء سياسيين ؟؟؟؟
أليس في قول هذا الدجال إهانه للعقيدة وتلاعب بآيات القرآن الكريم .؟؟؟؟
إن القرآن محفوظ برغمه وبرغم سادته الذين ربما يستخدمونه في أمور إستخدام الجن والدجل وإلا ... فلم ل تتم مسائلته وإعتقاله كما يفعلون بالأخرين ...
حسبي الله ونعم الوكيل ولا حول لا قوة إلا بالله العظيم
التحية لك أستاذه أسماء والتحية لكل أحرار بلادي ممن يجهرون بقول الحق برغم الظروف ....


#281249 [صبري فخري]
0.00/5 (0 صوت)

01-25-2012 10:00 AM
هذا الكذاب ادعى ان سلفاكير سيهرب الى كينيا قبل استفتاء الجنوب والجماعة ناموا على كده واصبحنا لقينا سلفاكير قاعد خلوهم يصدقوا كلاموا وينوموا قفا


#281151 [محمد صالح العميد]
0.00/5 (0 صوت)

01-25-2012 08:13 AM
بلة الغائب بلانا بكضبه والله يريحنا منه ومن أكاذيبه ومن قبله المستأجرنه من أجل الدجل والشعوذة. ولا يعلم الغيب إلا الله سبحانه وتعالى.


أسماء الجنيد
أسماء الجنيد

مساحة اعلانية
تقييم
9.01/10 (134 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة