02-09-2012 08:57 AM

الكوز مالو زعلان

كمال كرار

أغلقت حكومة الجنوب آبار نفطها ولسان حالها يقول بلاش نقة وبلاش دشمان ، لكن الكوز مالو زعلان !!

لو كان في المؤتمر الوطني زول واحد ( عاقل ) مسك القلم والورقة يوم واحد يناير 2011 وقال للجماعة الطيبين تعالوا نجرد حساب الانفصال لما كانت هذه الهضربة مستمرة إلي يومنا هذا .

ولو ذكر ليهم بالأرقام أن الضرائب والجمارك وأي رسوم لا تزيد عن 8 مليار جنيه في السنة ، وأن شركات الحكومة وهيئاتها ( الفيها رقشة ) لا تزيد إيراداتها عن واحد مليار جنيه في السنة .

وأن شهادات شهامة وأي دين داخلي لا يعطي الخزينة العامة أكثر من 2 مليار جنيه سنوياً .

وأن جملة هذه المبالغ تساوي 11 مليار جنيه في السنة بينما الصرف الحكومي في حدود 25 مليار جنيه في السنة

لو قيلت هذه الحقائق قبل الاستفتاء علي مصير الجنوب واستقلاله فيما بعد لاستعدلت مركب نيفاشا في بحر السياسة ، ولكن السدنة والتنابلة أغرقوا نيفاشا دون أن تكون هنالك قوارب نجاة .

وفي أي بلد آخر كان هذا الوضع المأزوم سيطيح بالحكومة ، أو علي الأقل سيقيل الرئيس مستشاريه المواسير ولكنها هنا خربانة من كبارها .

يتخرب بيت الموازنة فلا ينخفض الانفاق الحكومي بل تحوم الوفود العالم بي باقي الميزانية عشان ( تشحد) القروض من دول الخليج اللي ما فاضية تسمع أي كلام والقنابل النووية في الشط المقابل .

ويسرق التنابلة المال العام ، ثم يقولون للمعارضة هاتي الدليل .

ويمكث المناصير دهراً في اعتصامهم دون أن يلوح أي أثر للخيار المحلي ، ولو قالوا دايرين كهرباء يقولوا ليهم استنوا سد الشريك بعد ما نغرق ناس الباوقة وبربر وأي كرسي وبنبر .

وتتأخر الأسمدة والمبيدات بمشروع الجزيرة ، وتعطش حواشات وتغرق نمر ( جمع نمرة ) ، ويقال للمزارعين ” الدفع ولا الحراسة ” .

ويتظاهر سكان نيالا ضد بطش المركز فيعتبرونهم طابور خامس ، وسوق المواسير من قبلهم ابتلع قروش ناس الفاشر .

ويعتصم أهالي شهداء البجا ( سلمياً ) فيقبض عليهم الكجر ، ثم الحراسة والسجن والذي منه .

وعلي كل مشترك في أي شركة اتصالات دفع واحد جنيه دمغة عشان سواد عيون المؤتمر الوطني والما عاجبو يحلق حاجبو .

إلي الذين هلَلوا بل سعوا لفصل الجنوب نقول ” أكلوا ناركم ” ، وعلي التنابلة الراجين قروض الأسياد أن يرجوا الهبباي في كاب الجداد .

قال المأفون القذافي ذات مرة زنقة زنقة ، وتفسيرها زنقة حرامي في بيت عزابة وزنقة المؤتمر الوطني وعلي بابا والعصابة

الميدان





تعليقات 6 | إهداء 0 | زيارات 2802

خدمات المحتوى


التعليقات
#292095 [ابو محمد]
0.00/5 (0 صوت)

02-09-2012 09:32 PM
اكثر شى يعجبنى كلمة التنابلة وهم اكثر من زالك .


#292069 [adel]
0.00/5 (0 صوت)

02-09-2012 08:25 PM
kamal all sudan are aselepping now wait fro sky give our free


#291993 [Mustafa ]
0.00/5 (0 صوت)

02-09-2012 05:48 PM
ياخب ديل فضحونا وكثروا عينا والله لو ما بنعرف الاسلام وبنفهموا كان كفرنا.وبقولو هي لله هي لله لاللسلطة ولاللجاه.سبانك يالرفعت السماء بلا عمد.


#291958 [واحد]
0.00/5 (0 صوت)

02-09-2012 04:14 PM
روعه


#291795 [حمدان بتاع الشاي]
0.00/5 (0 صوت)

02-09-2012 12:15 PM
يا خوي الشحدة بقت من نا الوليد بن طلال
عليكم الله في هوان اكتر من ده
الله يهدهم و يشتت شملهم


#291779 [كاكوم]
0.00/5 (0 صوت)

02-09-2012 11:54 AM


ما قايلك كتّاب كدى يا كمال كرار ، وما فاكرين نفسنا حمير تحمل الاسفار


الا بعد ان سمعنا بفساد الكبار ، منشور فى صحيفة التيار ،


نيفاشا ( نفشتنا ) وملتنا غبار ، واتعزز علينا الدولار ، وينك يا صلاح كرار ؟؟


........ واااا نارى المابقيت فنان اضرب المعلوم واغنى للاقطاااااااان



كمال كرار
كمال كرار

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة