02-13-2012 12:01 PM

ساخر سبيل

الفاتح جبرا

نشوف آخرتا؟

عدد كبير من القراء المتابعين والمعلقين في المنتديات الأسفيرية قاموا بالتعليق على مسالة (الكسرة الثابتة) التى أصبحت تحتل أسفل العمود والتى تقول متسائلة (أخبار الخط شنو؟) وطبعن نقصد (خط هثرو- الخرطوم) المباع وكده !
كثير من القراء قالوا بان هذه الكسرة (مضيعة للوقت) وما منها أى نتيجة حتى لو تمت كتابتها كل يوم (ناهيك عن 3 مرات في الأسبوع) هي عدد مرات نشر العمود وأضافوا بأن نهاية القصة معروفه زى ما حصل في قصص تانية كلجنة تقصى حقائق (التقاوى الفاسدة) وطريق الإنقاذ الغربي والكثير من لجان التقصى التى لم تظهر نتائجها على الرغم من مضى وقت كان من الممكن للمحقق (كونان) أن يتوصل فيها إلى الحقيقة !
ولعلي أتفق تماما مع هؤلاء القراء فتخانة جلد (أمنا الحكومة) ما عاوز ليهو دليل وتعاملها مع ملفات الفساد يتم للأسف الأسيف ببرود إنجيليزى لا يتناسب مطلقاًمع ما نراه ونسمعه من آيات وأحاديث ولكن العبدلله عندو رأى مخالف في حتة الكسرة الثابتة دى .. فكل أنواع الفساد التى تكونت لها لجان تقصى (كوم) ولجنة تقصى (الخط) دى كوم تاني .. أشرح ليكم .. خلونا نمسك مثلاً قصة التقاوى الفاسده فرغم ما صاحبها من تجاوزات مالية وفنية وقانونية إلا أن هنالك جوانب فنية مثل إصابتها بنوع من الفطريات يضعف الانتاجية مما يجعلنا نصطدم بمصطلحات وأقوال مثل .. التقاوى ما فاسدة لكن (نسبة الإنبات) فيها ضعيفة !! طيب ضعيفة قدر لشنو؟ والحد المسموح به للضعف هو كم؟ وكيف يمكننا قياس نسبة الإنبات هذه ؟ هذه كووولها أسئلة يمكنها (تمييع) القضية . لكن قضية الخط ليس فيها أى إختلاف وجهات نظر علمية أو (نسبة إنبات) أو (فطريات) أو أى شربكة أو لولوة .. القصة وما فيها (خط بتاعنا) فجأتن (بقى ما بتاعنا) وفي زول أو جماعة باعتو وقبضت قروشو !! (أها دى عاوزة ليها تقصي سنة وشوية؟) ! خطاب رسمى (وااااحد) من (حكومة السودان) للجهة المسئولة عن (مطار هيثرو) تطلب فيه صورة من المستند الذى تم فيه التنازل عن الخط ومن ثم تتعرف على من قام بالتوقيع عليه .. وبالطبع يفترض أن تكون هنالك صورة من هذا المستند الهام موجودة لدى إدارة سودانير (لكن ما ظنيت) !!
بعدين الفترة الزمنية التى تمت فيها (البيعة دى) معروفة .. والناس الكانوا على رأس (سودانير) معروفين .. يعنى ح يكون باعو (بتاع البوفيه) مثلاً ؟ طيب لماذا أخذت لجنة تقصى الحقائق كل هذا الوقت ولم تعلن عن نتائج تقصيها مع إنو القضية واااضحة وما فيها أى شربكة ؟ الإجابة على هذا السؤال ساااهلة وهى (كووولها شهرين تلاته أربعة والموضوع يتنسي) ما الشعب ذاكرتو ضعيفة وكده !
ولأن ذاكرة الشعب ضعيفة (بالفعل) فقد تفتق ذهن العبدلله أن تبقى هذه الكسرة (ثابتة) إنعاشاً للذاكرة وحتى (نشوف آخرتا) .. وسوف أقوم شخصياً بعد عام بإذن الله تعالى وبالتحديد في )4 فبرائر 2013) بالإحتفال بعيد ميلاد (الكسرة الثابتة) وسوف نقوم جميعاً بإطفاء الشمعة الأولي ونحن نتوشح بالسواد ونردد .. هابي بيرث داي تو يو .. هابي بيرث داي تو يو .. هابي بيث داي تو يو يا كسرة يا ثاااابتة ! ثم نقوم بقطع التورته التى كتب في منتصفها (نشوف آخرتا) ؟
ولو الله أدانا عمر فسوف نحتفل كذلك باليوبيل الفضى .. والذهبي ثم الماسي (للكسرة الثابتة) وذلك في إحتفالات حاشدة ندعو لحضورها (كضيوف شرف) من تبقي علي قيد الحياة من أعضاء لجنة تقصي الحقائق الموقرة !
كسرة :
في إتصال مع المحقق كونان صرح بأنه يمكنه تولي التحقيق ومعرفة من باع الخط في ظرف 24 ساعة إلا أنه إتصل لاحقاً ورجع في كلامو معتذراً عن تولي التحقيق ...يا ربي يكون مالو ؟

كسرة ثابتة :
أخبار الخط شنو؟

تعليقات 24 | إهداء 0 | زيارات 6984

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#295543 [راونا]
0.00/5 (0 صوت)

02-14-2012 11:59 PM
سلام عليكم
استاز جبرا
ياخى علييييك الله اكتب لينا عن نقابة معلمين جنوب الجزيره والله الجماعه ديل انتهو مننا ولك شكرى


#294991 [الصابري]
0.00/5 (0 صوت)

02-14-2012 10:18 AM
وألله يا الفاتح أخوي أنا ما مؤثرني الخط، الخط دا أصحابه ملايين وسكوتهم وسذاجتهم هي السبب لكن متأثر لحكاية الدكتور الرمى كل قروش الغربة في عربية برادو وجو اللصوص في الجمارك سرقوها، الشعب السوداني لما عرف القصة بس صفق يديه وسكت، لكن معذورين ما دام حقهم ضيعوهو يجوا يتأثروا لحق الناس، يا اخوانا الزول دا مسكين ما لقى زول يتحرك معاهو ويضغط على عصابة اللصوص ديل المسنودين من فوق. يا الفاتح أخوي لازم نأسس هيئة شعبية تقيف مع الزول دا وتكون برضو سنة نقيف مع كل مظلوم من عصابات السلطة.
الهيئة نسميها: (الهيئة الشعبية لاسترداد العربية) ونخليك انت رئيسها


#294985 [Wad Abotana]
0.00/5 (0 صوت)

02-14-2012 10:15 AM
كسرة ىاابو علي


#294884 [ابو عرب ]
0.00/5 (0 صوت)

02-14-2012 08:43 AM
خط ايه اللي انت جي تقول عليه........انت عارف قبله معني الخط ايه


#294856 [ابوسلطان]
0.00/5 (0 صوت)

02-14-2012 07:54 AM
امك بيع ارض جو ... ياخوانا البتتكلمو عن الفساد و.....و...و .. بطلوا الحركات دى ورونا بالله الما اتباع شنو والفضل للشعب شنو ؟ بس عشان نكون عارفين وما نتبجح ونقول عندنا وعندنا .. وفى الاخر نطلع بنتفشخر ساكت غى الفاضى ... والله انا خايف يكونوا باعو باقى السعب السودانى لبنقلادش البقت فاضية دى بس مواخرين التسليم.....


#294800 [مدحت عروة]
0.00/5 (0 صوت)

02-14-2012 12:32 AM
خط هيثرو الخرطوم انا عندى المعلومة الصحيحة عن الزول الباعه باعه الصادق المهدى عندما قال لناس الانقاذ بس بعد اذنكم ادونى الحكم كم يوم كده و برجعه ليكم تانى اها بعد ما استجابوا لطلبه و مسك الحكم قام باع هذا الخط و قبض القروش و طوالى رجع الحكم لناس الانقاذ!!! هسع لو قلت الكلام ده لاحد مؤيدى الانقاذ انا اؤكد ليكم ح يصدق الكلام الخيالى ده ما اصلوا مؤيدوا الانقاذ معظمهم من الغوغاء و الجهلة و الناس العندها زهايمر طبعا غير المستفيدين وظيفيا و ماديا!!!!!


#294761 [\\\\\\\\\\\\\\\'I hate Naf]
0.00/5 (0 صوت)

02-13-2012 10:36 PM
دايرين لينا خبير يعمل لينا مقترح الويب سايت ده

www.who-sold-the-line.com

او على رأي الاستاذ الفاتح

www.what\'s-the-news-of-the-line.com



#294735 [نوف محمد]
0.00/5 (0 صوت)

02-13-2012 09:43 PM
سلا م يا استاذ يا رائع روعة بلادي
تعرف يا استاذ عندنا محامي يهودي بريطاني صديق لخالي، عنده مكتب في مانشستر راجل محترم رغم انو انا كنته بقول لخالي انا اليهود ديل لمن اشوفهم بطني بطم عديل كده،تعرف المحامي ده كان ماسك قضية بتاعت خالي ضد بلدية مانشستر،المهم القضية كانت حاجة كبيرة،الراجل ده كسب القضية وجاب لخالي تعويض كبير جدا،المهم خالي قال ليهو هو عايز حقه بس،وباقي القروش قال ليهو اتصرف فيها،المهم المحامي شال القروش واتبرع بيها باسم الخال لجمعيات خيرية،شوف رغم اليهود ديل حرامية لكن لو عندك حق بيجيبوه ليك،تعرف الراجل ده اكبر الحكاية ده جدا لخالي وقال ليهو انتو السودانيين شعب ما شاف ناس زيهم قبل كده،وقال لخالي لو عندك اي شئ عايز تعملو في uk، بس كلمني، تعرف انا فكرته لو انت بتوافق وكلامك ده جد عايز تعرف اخبار خط هيثرو، صدقني الزول ده على ضمانتي بيجيب الموضوع كله بضبانته،بس اكتب في موضوعك الجاي واطلب وانت غالي علينا والطلب رخيص،وخلي ان شاء الله اولاد الكلب ديل يضبحو بعض، لا قرش لا نعريفة نحنا بندفع كل حاجة،بس لاذم تكتب لينا ولو خيط صغير واكيد انت بتكون عندك طراطيش كلام
مع مؤدتي


#294725 [ود الأبنوس ]
0.00/5 (0 صوت)

02-13-2012 09:05 PM
لك التحية يا أستاذ
أخبار الخط شنو
/
/
/
/
/
/
/
/
/
/
دايرين لينا كسرة لاخبار خط اقصد شركة الصمغ العربي مع الدباب حاج ماجد سوار :D :D :D


أنا ما قلت حاجة غير اديتك رأس خيط وهو بالله عليك يا العبد لله رجع من الشعبي للوطني كيف؟؟؟؟
مش بخط أقصد اموال الصمغ العربي


#294667 [القوس]
0.00/5 (0 صوت)

02-13-2012 07:14 PM
خليك من المحقق كونان - أنا حا أتوسط ليك عند الطيب ابوقناية يشوف ليك وظيفة معاه - منها تعرف حقيقة الخط تريحنا وترتاح - وثانيا تشرب من لبن السحارة - عشان تاني تبطل الفصاحة – ونحن مش مغفلين حا نستفيد من قلمك في النهضة الزراعية والجمهورية الثانية و...و...
من الآخر ، الوظيفة مش عشان (جبرا وأخواتها) نحن بنوظفك عشان تكون شريك ونمسك عليك (ملفات) - عشان ما تعمل فيها (كاشا تو )
....الله يستر ....ما يقوم الأبالسة يزكوك ....تروح فيها
كسرة
أكيد أهلك الحلفاويين حا يفتخروا بيك ويقولوا (رئيس مفوض فساد من إندنا)


#294646 [ايمن محمد]
0.00/5 (0 صوت)

02-13-2012 06:42 PM
الخط الابيض بظهر في اليوم الاسود


#294638 [ابوعبدا]
0.00/5 (0 صوت)

02-13-2012 06:26 PM
الحط لحق امات طه


#294620 [واحد لايوق]
0.00/5 (0 صوت)

02-13-2012 05:47 PM
أخبار الخط شنو


#294528 [mokhtar]
0.00/5 (0 صوت)

02-13-2012 03:14 PM
عمك جبرا شكلو عايز يسافر لندن جوا علشان كدا بيفتش في خط هيثرو الرايح ....
ما مشكلة امكن تمشى بالبحر!!!!!!!!!!!


#294522 [عمر الامين]
0.00/5 (0 صوت)

02-13-2012 03:07 PM
انشاء اللة تجي الانتفاضة قبل ان يحول حول ميلاد الكسرة الثابتة


#294490 [ود البلد]
0.00/5 (0 صوت)

02-13-2012 02:36 PM
الاخ جبرا لك التحيه يااخوى قصتك مع الخط ده شكلها كده بقت شخصيه وانت عارف الزول ده ومصر انك تكشف حالوا لانوا فى قضايا يعنى اهم واخطر من الخط الماكان بركبوا زول ده يعنى كسراتك نوعها لينا شويه عشان مانشعر نحن القراء بانها بقت بينك وبين الزول ده قصه مثلا: كسره

مشروع الجزيره اخباروا شنو
المدينه الرياضيه اخبارها شنو
وماخفى كان اعظم اخباروا شنو

ولك التحيه


#294480 [قلووز]
0.00/5 (0 صوت)

02-13-2012 02:30 PM
أوع يكون كونان دا العيل بتاع إسبستون ..؟
وقسماً يالفاتح رغم كل مآسي الإنقاذ ألجأ لمواضيعك عشان أضحك .
لكني لا أدري هل هو ضحك جد أم من المغسة ...؟


#294438 [المغتاظ]
0.00/5 (0 صوت)

02-13-2012 01:58 PM
اقترح ان يعمل الريس وب سايت علشان يسمع مننا شوية مانحن دايما غصبا عننا وعن الخلفونا بنستمع ليهو . بس يوصي جماعته ناس الجهاد الالكتروني ما يشفروا اويهكروا الموقع لانه من الواضح وحسب خطاباته الاخيرة انه عايش في غيبوبة تامة لايسمع لايرى بس بتكلم وابسط شاهد من خطابه الاخير حكاية خلفة الرجل عند الشغب دي. ماتقول لي الريس عنده موقع من زمان ماانت عارف واتا عارف. وعلى قول الشاعر أخبار الخط شنو؟


#294427 [ابشلوفة]
0.00/5 (0 صوت)

02-13-2012 01:50 PM
يا الفاتح ياخي ما تبقى لايوق وتندم الناس ديل على العملية دي
الموضوع كلو حتة خط عليك الله ما تبقى ليهم في رقبتهم خليهم ياخي، مش كويس الباعو خط بس، هي بقت على خط

دي شنو اللياقة دي، شعب لايوق بشكل!!!



#294419 [الطيب عثمان ]
0.00/5 (0 صوت)

02-13-2012 01:45 PM
اخبار الخط شنو ؟

اخبار الخط شنو؟

اخبار الخط شنو ؟

اخبار الخط ايش ؟ ببعض اللهجات الاخرى
اخبار الخط ايش ؟
اخبار الخط ايش ؟

اخبار الخط ايه يا بيه ؟ هو من البيه الباع الخط ؟ ممكن حد من سودانير ممكن حد سودانى ؟

اخبار الخط وين ؟ ممكن باعوا واحد قريب من الحيكومه ؟ ممكن يكون مسعول من المساعيل الباعوا قطن الجزيره للننقليز يعنى بقصد الخواجات العندهم مصانع فى مانشستر ولا بقولوا ليها شنو مابشتر ولا مانى عارفها ؟

اخبار الخط شنو ؟ ممكن ناس شركة القطن الفسدوا مشروع الجزيره وباعبوا خط سكة الطرماى البنقل القطن من المشروع للمحالج ما هوا نفسوا خط باعوا وكما اخباروا شنو ؟ واخبار المحالج والمساكن والمخازن والمطاحن والمناشير والبوابير والطوارى الملايد والسكاكين الفى حشا الحراميه فى حشا حكومة السجم حكومة الدجل والكجور والبخور والرقص والدستور اقصد المرأة المدستره والمهستره وين الخط وين الخطوط اللتسرقت ويا اولاد الهرمه ؟؟؟؟؟؟؟؟؟


#294411 [بت الخرطوم]
0.00/5 (0 صوت)

02-13-2012 01:33 PM
اقتراح يا استاذنا الكبير ان يحول ملف قضية اخط المبيوع من المحقق كونان الى مكتشف الفساد الكبير عثمان ميرغنى على الاقل نرتاح شوية من شركة الاقطان امكن يعرف لينا الزول منو طبعا عندو ناس تحت تحت بساعدوه وبقى ما بتلحق تحتفل بعيد الميلاد الاول لمعرفة سر الخط وانت تطبطل السؤال ونحن نرتاح من الكسرة دى ونشوف لينا كسرة جديدة طالما نظرية التكرار نجحت ولا رايك شنو


#294390 [عبدالمنعم ]
0.00/5 (0 صوت)

02-13-2012 12:59 PM
اكلو الدودو

الاكل شليل

التمساح القاعد في المقرن يلهط ساكت التقول البلد حقتو

اوعك تسيب الكسرة التانية ياجبرة

واقترح لزوم التذكير وكدة تعمل كسرات كتاااااااار للتقاوى الفاسدة والطيارات البتقع ومشروع الجزيرة والاقطان وصندوق المعاشات وديوان الزكاة وهيئة الحج والعمرة وطريق الانقاذ الغربي وسد مروى والمناصير ومياه بورتسودان ومشروع سندس المازراعي وسواقي كسلا ومزارعي القضارف والخريف الذي يأتي فجأتن !! ولجنة ابو قناية وبنك امدرمان واتحاد معتصم حعفر والفريق القومي واطفال المايقوما والايدز ومؤتمر تطوير التعليم العام والفقر الساكن فينا ومادي لسانو وووو وعيييييييييييييييييييييييييييييييييييييييييييييييييييييييك الي ما لا نهااااااااااية .

كسرة قبل المالانهاية : اخبار المتعافي شنو ؟؟؟؟


#294364 [ودامدرمان]
0.00/5 (0 صوت)

02-13-2012 12:41 PM
لك التحية والتجلة يامنعش الذاكره





تخريمة:
كونان بكون ادوهو قرصه ولا حمرو ليهو
يقول اخير اعتزر ولا اعمل رايح









قف:
نحن من خلفكم وونعلن كامل تضامننا

اخبار الخط شنو؟؟


ردود على ودامدرمان
Saudi Arabia [عمان ] 02-13-2012 02:16 PM
نبشرك الخط طار وملحق في الاجواء العالمية


#294354 [ابن الحاجة]
0.00/5 (0 صوت)

02-13-2012 12:29 PM
اقتباس \"خطاب رسمى (وااااحد) من (حكومة السودان) للجهة المسئولة عن (مطار هيثرو) تطلب فيه صورة من المستند الذى تم فيه التنازل عن الخط ومن ثم تتعرف على من قام بالتوقيع عليه \"

تعليق:لو طبقت هذه الطريقة على بقية الملفات لعرفنا الكثير من الفضائح أعني الجرائم التي ارتكبت بدم مثلج,بدا من البنزين و انتهاء بديوان الزكاة


ردود على ابن الحاجة
Saudi Arabia [عتبانى] 02-14-2012 11:16 AM
;) (؟) :o hkj انت يا جبرا صندوق المعاشات دة ماقاعد تهبشة مالك السجم والرماد كلة فية بالجد حوش بانقا كلة شغال فى المعاشات لهط ساى


الفاتح يوسف جبرا
الفاتح يوسف جبرا

مساحة اعلانية
تقييم
9.76/10 (42 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة