جبرا في لندن (1)
02-28-2016 07:13 PM


قالت لي إبنتي الصغيرة وهي تمسك بإحدى الصحف :
- صحي يا أبوي إنتا ماشي (لندن) !
- يا بت إنتي جنيتي والله مع الظروف دي الله أعلم أبوك تاني يركب ليهو طيارة
- أهو مكتوب هنا يا أبوي خد أقرأ (وسلمتني الصحيفة)
الخبر عنوانه يقول (قدمها عدد من القراءمن بينهم قراء الراكوبة)
وكاتبه هو الزميل بكري خليفة ، يقول الخبر :
(تفاعل عدد كبير من القراء على مواقع التواصل الاجتماعي وموقع الراكوبة الإلكتروني مع الكاتب الساخر الفاتح جبرا والذي ظل يذيل عموده المقروء ب(أخبار خط هيثرووو شنو وشنوووووو) وقال أحد السودانيين المقيمين ببريطانيا (والله يا جبرة أنت الإبداع ذات نفسه ونحن موجهين ليك دعوة لزيارة بريطانيا عشان تمشي هيثرو وتسأل أهل الخط بنفسك وتسمع بأضانك: منو الباع.. ومنو المشتري.. ومنو السمسار.. وكل واحد قبض كم.. عشان لمن ترجع الخرطوم تكون عرفت الحاصل وتحضر بياناتك معاك من لندن وكل المستندات)
ما أن قرأت الخبر حتى سرحت بخيالي والطائرة تحط عبر عدد من (الكونكشنات) في مطار هيثرو (حليل أيام الدايركت) ، بعد النزول من الطائرة والوصول إلى صالة القادمين ما أن جاء دوري لتقديم جوازي إلى ضابط الجوازات حتى تفرس فيه مليئاً ثم نظر لي قائلاً :
(بالإنجليزية طبعن) :
- إنتا ساخر سبيل .. خط هيثرو أخبارو شنوووووو ؟!!
- معقول يا خواجه تكون القصة دي وصلت ليكم هنا !
- قصة دي يا أستاذ وصلت كوول الدنيا !
وهو يضرب بالختم على الجواز قلت في نفسي والله فعلا الدنيا دي بقت قرية صغيرة خلاس .
بعد أن إستلمت حقيبتي ، وأمام مكان المنتظرين وجدت ثلة من السودانيين يلوحون لي بأياديهم وينادونني :
- يا أستاذ ... يا استاذ
وبعد السلام والأحضان والسؤال عن الأهل والخلان ، وبعد أن قدمت لهم الشكر والإمتنان نيابة عن الشعب السوداني (الفضل) لهذه الدعوة الكريمة للبحث عن الخط (الرايح) ليهم كم سنة ، ركبنا في عربة أحدهم ذات الدفع الرباعي :
- يا أستاذ نحنا حاجزين ليك في فندق وسط المدينة !
- فندق شنو ... ودوني (القسم) طواااالي
- (قسم) شنو يا أستاذ كدي روق وإستريح من ساعات السفر الطويلة دي !
- أروق شنو يا جماعة ما شفتو الواوات دي حصلت كم ؟ (ثم في إصرار) بالله لو سمحتو بس وصلوني أقرب قسم شرطه لي مطار هيثرو ده وبعدين الفندق والراحة ملحوقة !
تحت إصراري وإلحاحي قام السائق بتغيير مسارة بعد أن قام بإستخدام خرائط قوقل Google Maps بتحديد أقرب قسم شرطة ، وبعد دردشة عن إرتفاع سعر الغاز وغياب البرلمان وتصريح (الصابونة) والمداخلة الشهيرة والشنو ما عارف توقفت العربة :
- أهو ده يا أستاذ أقرب قسم شرطة
- طيب يا جماعة إنتو عارفين إنو الخواجات ديل ما بحبو الزحمة ، خلوني أمشي أفتح البلاغ براي إنتو أمشوا إستريحوا وبعد ساعة كده تعالو ليا ، وللا أقول ليكم عشان ما أتعبكم وروني إسم الفندق وعنوانو أنا بعد ما أخلص بمشي ليهو ، تعالو ليا المساء هناك .
على باب القسم إستوقفني شرطي مدجج بالسلاح وقال لي بإنجليزية رصينة :
- لو سمحت يا سيدي أين أنت ذاهب
- إلى قسم البلاغات
- هل تمت سرقتك !
- سرقتي أنا يا خواجة؟ دي سرقة شعب كااامل .. سرقة أمة (نيشن يا خواجة نيشن) !!
فغر الحارس (الخواجة) فاه (مستغرشاً) وهو يشير لي على مكان كاونتر البلاغات وكأنه كان يقول لنفسه (الزول ده مجنتر أكيد) !
عند كاونتر البلاغات كان هنالك صول ضخم الجثة متورد الجضوم يجلس على كرسي جلدي دوار ويضع أمامه دفتر البلاغات وقفت أمامه وألقيت عليه التحية :
- صباح الخير
- صباح النور ... هل من خدمة أؤديها لك !

كسرة :
في حلقة غداً نشوف الحصل شنوووووو ... أبقوا معنا ... الفاتح جبرا .. من داخل مبني القسم الأوسط ... شرطة لندن غرب ... العاصمة البريطانية)
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)+و+و

صحيفة أول النهار


bakreey2007@gmail.com







تعليقات 24 | إهداء 1 | زيارات 9309

خدمات المحتوى


التعليقات
#1422227 [الكلس يوسف عيسي المانيا]
0.00/5 (0 صوت)

03-01-2016 11:49 AM
كدي اخد ليك نومه اول حاجه من الهضربه دي.وكمان لو جيتنا بي جاي هنا في بون ...زولك بتاع طريق الإنقاذ الغربي قاعد سمين وامين ،وكمان عامل بزنس مشغل كل اهله..حتي الآولاد الجو المانيا عشان الدراسة..سابو الدراسة وشغالين معاهو. دا كلام واقعي وحقيقة هنا بون.


#1421968 [محمد عباس - أدنبره بريطانيا]
0.00/5 (0 صوت)

02-29-2016 07:51 PM
الاستاذ الفاتح جبرة ،، لك التحية .
أولاً الرجاء الاعتزار للشرطة البريطانية لانهم لا يحملون السلاح ،، وثانيا ما تنسي تجيب معاك كمية من التمباك قالوا معدوم اليومين دي والرطل ب 30£ ،،، يعني خط هيثرووووووووو ده مكسب كبيييير.


#1421933 [هميم]
0.00/5 (0 صوت)

02-29-2016 06:15 PM
هي سرقة أمة بلا شك لكني أخشى أن يكون الإنجليز نفسهم مشتركين في السرقة بتغاضيهم عن مهازل البشير وعصابته - المهازل التي شملت قتل المتظاهرين العزل


#1421914 [[جنو منو]
0.00/5 (0 صوت)

02-29-2016 05:09 PM
لكن يا أستاذ جبرة ما بالغت كان تسوق معاك ايمان لندن عشان تتم الناقصه..!!


#1421782 [khalid osman]
0.00/5 (0 صوت)

02-29-2016 12:28 PM
على باب القسم إستوقفني شرطي مدجج بالسلاح وقال لي بإنجليزية رصينة :
- لو سمحت يا سيدي أين أنت ذاهب

بس استاذنا جبرة عشرين سنة في لندن ماشفنا شرطي انجليزى مدجج بالسلاح .. الجندى الانجليزى هو الوحيد في العالم مابشيل سلاح....


#1421728 [sami almak]
5.00/5 (1 صوت)

02-29-2016 10:23 AM
تجى لندن وما نشوفك يا حبيب


#1421704 [breeze]
2.00/5 (3 صوت)

02-29-2016 09:43 AM
يا أستاذ جبره السلام عليكم ورحمة الله ////
نحنا المغتربين زعلانين جدا جدا جدا جدا منك ,,, يعني معقول ما مرت عليك حالة الإستغراش بتاعتنا والتي سببها شعار ماجد سوار ( أمي مريضة وأبوي مريض)؟ والزعل لأنك ما علقت عليها بمقال وبعدين مش زعلانين منك إنت وبس زعلانين كمان من جارك البقعد معاك كل يوم ويطق معاك الحنك والأخبار لأنه جارك ده مفروض ينبهك لشعار ( أمي مريضة وأبوي مريض)!!


#1421689 [سوداني مهموم]
5.00/5 (1 صوت)

02-29-2016 09:26 AM
سرحت بينا ي استاذ


#1421672 [صالة المغادرة]
5.00/5 (2 صوت)

02-29-2016 09:02 AM
يا جبرة الاوسط لندن فيهو تمساح معلق زى الاوسط امدرمان لكن حق لندن لابعضى لاببلع ما تخاف ادخل على طول مكتب الضابط المناوب واخلف رجل فى رجل وكان موضوع البلاغ اتعثر بفعل تدخل السفارة السودانية اسال الضابط قول ليهو جدودكم ديل ليه غادروا السودان سنة1956 والله كان خط هيثرو ده جابو خبر الرقدو بيهو فى دقايق وبينى وبينك ياجبرة ماكان زاتو الحرامية قربو من الخط لان الانجليز ما بعرفو الشغل بتاع ام غمتى وابلع واكسح وامسح وغيرها من طرق الانتهازية والبهلوانية التى شاهدناها فىعهد امير المؤمنين سيدى ود البشير الراقص الاكبر


#1421671 [khalid]
5.00/5 (1 صوت)

02-29-2016 09:00 AM
بانجليزية رصينة دي مبالغة عديل كه ههههههههه منتظرين باقي الحلقات


#1421614 [الشعلة]
5.00/5 (2 صوت)

02-29-2016 07:38 AM
دق لجوء سياسي يا عمك...راجع للسخانة والبلد الوسخانة دي شنو!!


#1421611 [راجى الفرج]
0.00/5 (0 صوت)

02-29-2016 07:33 AM
بالله يا يا الفاتح جيب معاك كتاب بيت العنكبوت وانت جاى من القاهرة وما تخاف بديك حقو ومساهمتى فى السفرية وربنا اوفقك واعمل حسابك اوعى اقول ليك من ناسر السفارة فيها واحد اسمو خالد المبارك والله ووالله راعى لى بقراتنا ما اشغلوا لكن قروشنا نخلصهايوم القيامه


#1421590 [Ali Sankal]
5.00/5 (2 صوت)

02-29-2016 06:43 AM
إبداع يا أستاذ الفاتح .
شيل معاك فكه عشان " رسوم فتح بلاغ".
منتظرين باقي الحلم.


#1421585 [ود يوسف]
5.00/5 (3 صوت)

02-29-2016 06:32 AM
بالمرة شوف لينا معاك أخبار بيت السودان في لندن وأملاك مشروع الجزيرة في لندن ولانكشير ....


#1421583 [ود الشريف]
5.00/5 (3 صوت)

02-29-2016 06:25 AM
بالله بعد ما تفضي من فتح البلاغ وكده امشي لناس البرلمان قول ليهم جيبو (بطاح ) شيلو طوب مستشفي الخرطوم البنيتوهو بالطوب السمح داك وبأمانتكم السمحة ديك عشان الجماعة مشمرين للهد


#1421577 [حاج علي]
5.00/5 (2 صوت)

02-29-2016 06:11 AM
ما تنسي بيت السودان الباعو الكيزان
وخالد المبارك ال اشتروالكيزان


#1421571 [الياس أبوورقة]
0.00/5 (0 صوت)

02-29-2016 05:57 AM
دي قوية بنقو إنجليزيه ياخي انت حرام تكون في السودان


ردود على الياس أبوورقة
[اندروس] 02-29-2016 05:59 PM
حاسب وتخير كلماتك يا ابوورقة فانت تكتب فى منبر عام


#1421551 [ود التوم]
5.00/5 (1 صوت)

02-29-2016 03:41 AM
ابداع والله يا حبيبنا جبرا ما تنسي تزور معاك قصر فكتوريا - تبكي علي الاطلال زمن السودان عزيز والخليفه عبد الله كان بيخاطب الملكه -- البشير حرامي باع السودان كلو خليك من هثرو بس


#1421516 [julgam]
5.00/5 (1 صوت)

02-28-2016 10:23 PM
والله يا ود جبرا هيثرو دا طلع ليك فى راسك. .وبعد شويه الله يستر عليك من طلوع الصينية. .
الخواجات بتاعين مطار هيثرو تفتيحه بشكل وخاصة بتاعين الجوازات ديل لو دكتور يسألون عن أطول عظمه فى جسم الإنسان. .ولو صحفى يسالوك عن التيار واخبار الإضراب عن الطعام..


#1421504 [الدرب الطويل]
5.00/5 (2 صوت)

02-28-2016 09:31 PM
اكيد (الصول ضخم الجثة متورم الجضوم) دا قدوقدو بتاع لندن!!..


#1421497 [QUICKLY]
5.00/5 (1 صوت)

02-28-2016 09:19 PM
أدينا رقم حسابك بس وما عليك ياجبرة عشان تمش انشالله لندن وتشوف خط هثرو أخبارو شنوووووو
في انتظار الحلقة الثانية من سرحتك هههههه


#1421486 [خريج الابتدائي]
5.00/5 (1 صوت)

02-28-2016 08:46 PM
وانت غرقان في هذا الحلم الظريف اوع تجي البت تصحيك من النوم(يابا قوم شوف لي حمار ولا حصان امشي بيه المدرسة لان البترول اتشفت ولحق الغاز) ياجبرا نحن في انوبة الغاز وخط هيثرو جند ليه الواوات بتاعتك دي الوصلت السما ووووووووووووووووووووووووووووووووووو


#1421476 [الداندورمي .]
5.00/5 (2 صوت)

02-28-2016 08:36 PM
هههههههههههههههههههه أنا راجيك بفارق الصبر يا،،،،جبره لندن إيمان لندن جات معاك؟


#1421455 [فيودور ميخاليوفتش]
5.00/5 (3 صوت)

02-28-2016 07:35 PM
هههههههههههههههههههههههه تصحي يااستاذ فجأة تلقي نفسك في خط بري اللاماب


ردود على فيودور ميخاليوفتش
[اندروس] 02-29-2016 06:02 PM
ياخى مالك تاعبو كده ما القماير اقرب ليهو .. ولا شنو يا اسناذ


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة