في رقبتكم
03-24-2012 12:23 PM

ساخر سبيل

في رقبتكم

الفاتح جبرا

قمت قبل أيام بالذهاب إلى أحد المستوصفات الخاصة في احد احياء امدرمان وذلك لإجراء كشف علي العيون وقد كانت زوجتي برفقتى واثناء إنتظار دورنا للدخول لمقابلة الطبيب لاحظت زوجتي وجود ام تحمل طفللاً في شهوره الأولى وهو يعاني من ضيق تنفس حاد ، فأخبرات الأم بأن هذا المستوصف لايحتوي علي اسعافات الحالات الطارئه وطفلك ده شكلو مضايق ، ردت الام : نحن جايبنو لطبيب الاطفال هنا ، قامت زوجتي علي سبيل المساعده بالذهاب إلى موظف الاستقبال في (عيادة الاطفال) وسالته هل عندكم اسعافات مستعجله في عياده الاطفال ولا بتعملو شنو في الحالة دي؟ رد عليها الموظف : اذا الطفل متضايق الاخصائي بحولو (مستشفي البلك للاطفال) طوالي, فذهبت زوجتي وأخبرت المرأة فارتبكت المرأة وقالت : لكن الطفل متضايق شديد وعندي طفلين ماتو بضيق التنفس ده .
جاءتني زوجتي وطلبت مني مساعدة هذه الأسرة وايصالهم الي مستشفي البلك بسرعه ، فوافقت على الفور وكانت حاله الطفل تتدهور ثانيه بعد أخري وعند وصولنا مستشفي البلك وجدنا الظلام يلف المستشفى وعندما سألنا عن السبب عرفنا أن الكهرباء قاطعة والمولد متعطل !
عند دخولنا إلى قسم الطوارئ صرخت الأم (طفلي متضايق حصلوهو ) وعندها حضرت ثلاثه طبيبات علي الفور وبعد الكشف السريع (بإستخدام أنوار الموبايلات) اتضح ان الطفل محتاج اسعافات سريعه تبدا بالاكسجين فقمن بحمله الي الغرفه الموجود بها الاكسجين وهنالك اتضح ان الاسطوانه فيها اكسجين لكن عند فتحها وجدوا ان هناك كسر في صمام اسطوانة الاكسجين مما يودي الي تسريب كل الاكسجين قبل ان يصل رئتى الطفل المسكين وحاول الاطباء حل الموضوع لكن استعصي عليهم وعندها طلب الأطباء من الام المسكينه ان تذهب به سريعا الي مستشفي امدرمان للاطفال وهنا بدات الام تنهار وكانت معها امها اي (جدة الطفل) فسلمت لها الطفل وقالت لها (انا ماقادره اشيلو بعد ده لانو حايطلع الروح قبل ما نصل) واسرعوا الي بوابة المستشفي لاستئجار امجاد للذهاب الي مستشفي امدرمان للاطفال وهنا قلنا لهم أنا وزوجتي بأننا سوف نقوم بتوصيلهم وبالفعل ركبوا معنا في العربة التى حاولت أن أقودها بسرعة من أجل إنقاذ حياة الطفل ولكن خيل لي لحظتها بأن الرحلة من مستشفى البلك إلى مستشفى أمدرمان كانت طويله كانها الي مستشفي سوبا وذلك لسببين السبب الاول بسبب زحمة الطريق (زحمه شارع الدومه) وصينيه ازهري وماادراك ماصينيه ازهري الذي قادنا الي الاستقلال فاصبحنا في ضيق امام منزله وشارع الحوادث ام درمان الذي لايخلو من الزحمه ليل نهار ,(هايسات ,حافلات وبكاسي ورقشات..) والسبب الثاني ان الطفل اصبح يتقيا دمآ واصبحت الام في انهيار تام تسلم الطفل الي امها ثم تقول لها (عليك الله يا امي كان طلع الروح اديني النحضنو شويه قبل مايدفن) والجده تقول ليها (اصبري يابتي لسه فيهو نفس)ثم لا تلبث الأم أن تخاطب والدتها (عليك الله يمه كان مات اديني النحضنو قبل مايشيلوه مني) !
واصبحت لقطه تراجيديه حتي ان العبرات قد شقت حلق الجميع وإنهمرت الدموع ، وعند وصلولنا مستشفي امدرمان لم نتمكن أنا وزوجتي من النزول من العربه لخوفنا من النهايه المحزنه وتركنا الام والجده تهرولان بالطفل الذي كان في حاله يرثي لها .
هذه القصة (المأساوية) وصلتني عبر رسالة إليكترونية من أحد القراء وهذا ما يستفاد منها:
1- مستوصفات خاصه لكنها لاتحتوي علي اسعافات اوليه او اسعاف لتحويل المريض الي اقرب طواري .(دي صدقوا ليها كيف؟ ) !
2- لا تتم صيانة (المولدات) والتحقق من جاهزيتها لتعمل متى ما قطعت الكهرباء
3- لايوجد اسعاف لتحويل المريض لمستشفي امدرمان للاطفال في حاله لم يتوفر العلاج في مستشفى البلك
4- لايوجد من يتمم علي عمل اسطوانات الاكسجين حتي ياتي المريض ويكتشف ان الصمام مكسور.
5- الشوارع التي تؤدي إلى اقسام الطواري في كل المستشفيات الكبري وليس اطفال امدرمان فقط (حوادث الخرطوم,حوادث بحري وغيرها) ضيقه بحيث يمكن ان يصبح المريض من شده الزحمه جثه متحلله قبل الوصول الي طبيب الحوادث.
6- بيئه العمل بالنسبة للطبيب بيئة سيئه ومحبطة .

كسرة :

لقد كان سلمان الفارسي يرفض الإمارة ويقول إن استطعت أن تأكل التراب ولا تكونن أميرا على اثنين فافعل .. وناسنا هنا يجرو عليها جري .. يلا خمو وصرو .. الأرواح دي كووولها في رقبتكم !
كسرة ثابتة :
أخبار خط هيثرو شنو؟

تعليقات 23 | إهداء 0 | زيارات 5466

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#315905 [بت ام الحسن]
0.00/5 (0 صوت)

03-25-2012 12:11 PM
وطبعا بشبش لو قرأ المقال ده ح يكون ردو الاعمار بيد الله ..زى مارد على مقدم البرنامج لما سأله ماهى الحلول التى تراهاللازمة الاقتصادية التى تمر بهاالان البلاد فقال(اى بشبش) الارزاق بيد الله


#315901 [كاره كتابات جبره]
0.00/5 (0 صوت)

03-25-2012 12:01 PM
اها يا جبره النبى كمل القصه كشفت على عيونك ؟ يكون كويس علشان تشوف العيب وين فى الحكومه ولا فى الاطباء


ردود على كاره كتابات جبره
Netherlands [ود البلد] 03-26-2012 11:21 PM
لاحوله ولاقوه الا بالله والله المستعان.والله ياجبره انا لى مده حالف مااشاهد قناتى الجزبره والعربيه من كثرت المااسى والقتل البشوفوا كلوا يوم فى بلادنا العربيه المسلمه ولاشك سوف اضيف كتابات الفاتح جبرا للقائمه عشان مااصيب باحباط وحاله نفسيه سيئه. والله المستعان.نسال الله ان يلطف بعباده .وذلك بلساننا وهذا اضعف الايمان. شكلها كتاباتك دى بقروها بس متصفحى جريده الراكوبه الاعزاء الكم وعشرين ديل وهاك ياتعليق طبعا نحن القشرانيين فالحين فى الحاجه دى.


#315855 [kamal]
0.00/5 (0 صوت)

03-25-2012 11:04 AM
اليوم اسرة المريض شعيب أمن الله له بالشفاء العاجل ختت الموضوع على البلاط عشان تعرف ياوزير الصحة وتانى كلنا حنعمل كده ياقتلة


#315730 [محمد خليل]
0.00/5 (0 صوت)

03-25-2012 08:45 AM
ابن وزير المالية يرسلوه الى أمريكا لعلاج أذنيه بمبلغ 30 ألف دولار تكلفة العلاج و غيرها من التكاليف على حساب الدولة و قد تكون حالته لا تستدعى ذلك و يمكن التعامل مع حالته فى الداخل أو فى احدي الدول المجاورة بتكلفة أقل كثيرا من هذا المبلغ و عامة الشعب (أو شعب البدون كما سماه الاستاذ/سيف الدولة حمدنا الله متعه الله بالصحة و العافية) مثل هذا الطفل المسكين لا يجد أكسجين فى المستشفى و شعب الانقاذ المرطب يذهب للعلاج فى أرقى المستشفيات فى الداخل و الخارج، ما هذا التدهور المريع فى كل شئ و الانهيار التام للخدمات فى عهد الانقاذ و انهيار تام للتعليم. ماذا أبقت الانقاذ؟


#315701 [ام الحسن]
0.00/5 (0 صوت)

03-25-2012 07:53 AM
م. البلك مستشفى متخصص فى الاطفال فقط مافيهو انبوبة واكسجين والله عجائب يا مامون حميدة...هو طورارئ الاطفال ما دايرة ليها غلبة كتيرة حاجاتها كلها رخيصة وبسيطة وغير مكلفة ومابتفوت ليها اسطوانة اوكسجين(شغالة) وجهاز nibulizer بتاع الربو وكانيولات وادوية اسعافية بسيطة ومضادات حيوية..والحاجات دى كووولها تكلفتها ما بتفوت المليون بالقديم...ولعلمكم الاطفال استجابتهم للعلاج اسرع من الكبار ...طوارئ الاطفال مازى طوارئ القلب وم. الشعب ياجنرالات المشروع الحضارى


#315624 [مولود في مستشفى العيون]
0.00/5 (0 صوت)

03-24-2012 11:43 PM
لاحول ولا قوة الا بالله ربنا يغفر لينا مشاركتنا للحكومه في البيحصل لانناساكتين عن الحق والساكت عن الحق شيطان اخرس الفقير يموت والغني يتعالج في ارقى مكان والمسؤول يسافر بي طياره خاصه لاتفه الاسبابلي امريكا وكمان علاجه من جيب محمداحمدالغلبان حقونراجع نفسنا ليه ربنا سلطهم علينا وليه دعواتنا مابقت تستجاب انو ربنا ياخدم ويورينا فيهم يوم لك الله ياسودان


#315603 [مريض]
0.00/5 (0 صوت)

03-24-2012 10:56 PM
ديل مش فاضين لحاجات زى دى .. كل همهم هو التنظير بالهيكلة وما سوف ياتى فى المستقبل من سراب للحاق الزمن بدل الضائع وبيع ما تبقى من السودان الفضل ومستشفى العيون الآن تحت التوضيب لزوم المآكلة والباقى فى الطريق .. اذ كل مرة نسمع جعجعة ولا نرى طحين ..


#315513 [Heron]
5.00/5 (1 صوت)

03-24-2012 07:35 PM
اااااااااااااااااه.لقد اثقلت قلوبنا بالجراح الغائرة .اما ان لهذا الشعب ان يرتاح؟ اليس في هؤلاءالمسؤلين من يتقي الله في ناس السودان الغلابة.ما عارف البشير وجماعتو ديل مسؤلين من شنو في البلد؟ اليس انسان هذه البلد من ضمن مسؤلياتهم؟لكن العاقل من دان نفسه وعمل لما بعد الموت.بس ديل ناس دنيا ساكت وربنا ابتلانا بيهم.بس حتقابلو ربنا كيف يوم تضمكم قبوركم ويوم تلاقو ربكم.انتم مغفلون لانكم تعتقدون انكم غير مسؤلون من كل مريض لا يستطع ان يتعالج ولا جائع لايستطيع ملا بطنه ولا طالب لا يستطيع حمل فطوره معه الى المدرسةولا شاب لا يجد وظيفة.حسبنا الله ونعم الوكيل


#315496 [ود العوض]
5.00/5 (1 صوت)

03-24-2012 06:46 PM
يا ود جبرا لا خير فيك وفينا ان لم نقلها ولا خير فيهم ان لم يسمعوها (ما فيش قانون في البلدي دي )كله فساد × فساد لذلك انسى حكاية أجهزة طبية في مستشفى وخدمات الطوارئ والإسعافات الأولية - عن أي شئ نتحدث ونكتب – ومين يقرا ومين يفهم !!!- حكومة الجن دي من زمان حولت الميزانية لجيوب مشايخهم (المدجنين) والى وليدات الأمن وشطبوا التعليم والعلاج من الميزانية وحطموا كبرياء المعلمين والأطباء وحولوهم الى جيش من الشحادين - بل وظيفة مدراء المستشفيات وكبار المستشارين والأخصائيين وما في حكمهم – في عهد الإنقاذ - ان يقفوا ويرحبوا ترحيب حارا بمسؤولين من رتبة (منسق ومعتمد ورئيس وحدة إدارية وما دون ذلك او أي واحد لابس كاكي )، ومن السهل – اذا غضب احدهم أن يسب الطبيب وامه أهله وقبيلته ويشطب الطبيب من سجلات العمل ويقفل المستشفى الى اجل غير مسمى - و لايأبه بأحد ولا يؤاخذه احد بل بالعكس تجد هذه البطولة ترحيب كبير من منافقي أجهزة الحزب وكالعادة يضعون الذنب على الضحية – ويكذبون ويصدقهم الناس
وحتى لا يتهم ود العوض بالمعارضة من اجل المعارضة إليكم هذا الواقعة التي حدثت الاسبوع الماضي وورد في صحيفة الصحافة
حمّل المدير التنفيذي لمعتمد محلية باسندا، عبدالاله حميده عبدالباقي، المدير الطبي لمستشفى «ام قراييت» مسؤولية اغلاق المستشفى بعد زيارة لمعتمد المحلية مجدي عباس.
وقال المدير التنفيذي في تصريح صحفي ان المعتمد لم يصدر قرارا بإغلاق المستشفى، ولكنه طالب المدير الطبي بتسليم عهدته بعد «استقبال فاتر» من الطبيب للمعتمد في زيارته المبرمجة بحجة متابعة حالة مرضية ومحاولته الدخول في مهاترات مع المعتمد.
وابلغ المعتمد، الطبيب بأن يبلغ وزارة الصحة بالولاية بعد تسليم المستشفى لمن يليه، ومن ثم اتصل المعتمد بوالي القضارف بالإنابة الضو محمد الماحي واخبره بالواقعة، وتم إرسال تقرير الي وزارة الصحة مرفق معها شجب وإدانة لسلوك الطبيب
اللهم لا تسلط علينا من لا يخافك ولا يرحمنا


#315481 [حسن]
0.00/5 (0 صوت)

03-24-2012 05:26 PM
الاستاذ الفاتح
انك اسمعت لو ناديت حيا ... ولكن لا حياة لمن تنادي
و... اخبار الخط شنو؟؟؟؟؟


#315469 [ابن السودان البار]
5.00/5 (1 صوت)

03-24-2012 04:23 PM
حكومة اللصوص هذه ليس من اهتماماتها صحة السوداني ؟؟؟ 5 مليون مصاب بالبلهارسيا وعدة ملايين أخري مصابة بالسل والأيدز والملاريا والكبد الوبائي الخ وسؤ التغذية يضرب حتي سكان العاصمة والطلاب الجامعيين وغيرهم يأكلون (البوش )اي موية الفول بالخبز الأبيض الملوث بالبوتاسيوم بورومايد ويوجد اعتقاد سائد خاطيء بأن موية الفول غنية بالبروتين والبيض والأجبان والأسماك والدجاج ما منها فايدة فقط مضيعة قروش ساكت والفواكه والخضروات لأولاد العز والأسياد ؟؟؟ وحتي الأغنياء لجهلهم بأصول التغذية الصحيحة انتفخت كروشهم واصيبوا بمرض النقرص وامراض القلب والكلي من كثرة أكل اللحوم الحمراء والدهون الحيوانية ورئيسنا ذاته ما قادر يمشي ؟؟ واطفال الملاجيء والأطفال المشردين الذين يقتاتون من المزابل والاف المعوقين نتيجةً للحروب والذين يتوقع زيادة عددهم من جراء الحروب القادمة لا قدر الله ؟؟؟ والمعوقين نتيجة للزواج بالأقارب وسؤ التغذية( انتبهو فأن أجيال السودان الجديدة تتغزم ) ؟؟؟ مستشفات خربة مهملة غير مؤهلة يديرها أناس منتفعين لا رحمة في قلوبهم واطباء مغلوبين علي أمرهم يعملون في ظروف غاية في السوء بمرتبات ضئيلة لا تتناسب مع مقدراتهم وجهدهم ؟؟ والسوق الذي يعمل بمبدأ الحشاش يملأ شبكته مليء بالأدوية المزيفة والمنتهية الصلاحية
والمضرة صحياً ككريمات التبييض وغيرهايحضرها تجار الدين الملتحين وغيرهم بالشنط قاتلهم الله ؟؟؟ وقصور في امكانات المستشفيات الحكومية والخاصة التي لا تخضع لأي رقابة تذكر من قبل الدولة لو اصلاً في دولة؟؟؟ تصور يا استاذ جبرة مندوبي مبيوعات شركات الأدوية الأردنية يقدموا اكراميات للأطباء مواد بناء سيخ وأسمنت ؟؟؟ كيف يمكن ان يكون مستشفي حكومي لا يوجد به غير جهاز قسطرة واحد ومتعطل ؟؟؟ اجهزة غسيل كلي متعطلة ؟؟؟ انابيب اوكسجين فارغة او متعطلة ؟؟؟ اصبح الأنسان السوداني في ظل هذه الحكومة الفاسدة المكونة من القتلة مغتصبي الرجال والنساء ارخص من الكلاب الضالة في امريكا حيث يجدون العناية الطبية والغذائة الفائقة من قبل فرق طبية تطاردهم وتجمعهم لتأويهم وتنظفهم وتعالجهم وتغذيهم بكفائة عالية( شاهد الفلم الخاص بذلك في ناشونال جيوغرافيك) كسرة:أخبار النبق شنو؟؟؟


#315465 [مغلوب علي امره]
3.00/5 (2 صوت)

03-24-2012 04:08 PM
عندما طالب الطبيب السوداني بتحسين بيئة العمل عشان جنس دة وما خفي اعظم, قالوا ديل ناس قليلي الادب وما عندهم انسانية


#315444 [راجل المرا]
5.00/5 (1 صوت)

03-24-2012 03:38 PM
ياهو دا السودان.......... القروش تمشى لجيوب الدستوريين العطالى الحيارى...
وبقية الشعب يموت فى المستشفيات بانعدام الاكسجين وانقطاع الكهرباء وعضة البعوض وضرب ناس الهدف واواب
كسرة منكسرة:::
اخبار مامون ود حميدة شنو؟؟ باع ولا لسا


#315439 [ودفارس]
5.00/5 (2 صوت)

03-24-2012 03:33 PM
انت عارف ياود جبرة خط هيثرو ده يكون سرقوه الاولاد البيبعو في الاستوب لانه الواحد ببيع ليك الحاجة ويبقى مارق وتاني مابتلم فيه


#315425 [الهميم]
5.00/5 (4 صوت)

03-24-2012 03:11 PM
للاسف الشديد فان ارخص بضاعة فى سودان اليوم هى روح ابن آدم الذى كرمه الله على بقية خلقه..
ولا حول ولا قوة الا بالله ..


#315386 [ود الجد]
0.00/5 (0 صوت)

03-24-2012 01:53 PM
دا شيء عادي في السودان الطيب لأنو الناس هناك طيبين لدرجة العبط
لو كنت املك السلطة لجلدت وزير الصحة والتابعين له وتابعين التابعين وحتي مدراء لمستشفيات في ميدان عام بل ولأمرت العامة برجمهمحتي الموت
قال وزير قال .....................................ز


#315384 [نادية]
0.00/5 (0 صوت)

03-24-2012 01:50 PM
كثر الله خيركم علي توصيلهم يا عم الفاتح يا عشا البايتات . بس كان تتموا جميلكم للاخر وتدخلوا معاهم المستشفي وتطمئنوا علي حياة الطفل .


#315366 [IRIS]
0.00/5 (0 صوت)

03-24-2012 01:30 PM
يا عمنا جبرة دي أصبحت معانا يوميه وكانها خصصت لتعذيب الشعب السوداني الغلبان
وهل سبق وان اتصلت باي مسؤل في الدولة وناقشت معه مثل هذه الاحداث التي ان شاهد عليها ؟

وحاليا النظام شغال بنظرية الشعب ينبح والنظام ماشيء


#315357 [ايمن عثمان]
0.00/5 (0 صوت)

03-24-2012 01:25 PM
اخى الفاتح ...
الخدمات والمرافق العامة شبه مشلولة انعدام الامكانبات السبب عدم توفر السيولة قيل فترة توقف مراكز الغسيل الكلوى فى الحقيقة نحن لا نعانى من شح الموارد والسيولة ولكن نعانى من سوء توزيع الموارد المشكلة فى تكلفة العلاج اذا توفراعرف مريض يعانى من مرض فى الاعصاب قرر له الطبيب حقن لمدة اسبوع يكلف 50000ج بالجديد قلت فى نفسى هل الانسان غالى بالدرجة دى المسكين اين سيجد هذا المبلغ لو خير بين العلاج وترك ما عنده لورثته بعد عمر طويل تفتكر ماذا سيختار؟


#315320 [الزول الكان سمِحْ]
2.50/5 (3 صوت)

03-24-2012 12:38 PM
يا أستاذ

بتحصل كل يوم وفى كل السودان...عادى

كسرة متحركة:

أخبار الدورية المصرية شنو؟؟؟


ردود على الزول الكان سمِحْ
Sudan [zahi] 03-24-2012 03:05 PM
والله ممكن تكون بتحصل كل يوم في السودان لكن يا سمح ...... ماااااااااااا عادي ........


الفاتح جبرا
الفاتح جبرا

مساحة اعلانية
تقييم
9.94/10 (7 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة