فرامل اليد..!!ا
03-29-2012 01:10 PM

حديث المدينة

فرامل اليد..!!

عثمان ميرغني

من تجليات والي الخرطوم د. عبد الرحمن الخضر.. أنه غير معني بـ(سري للغاية) التي تنتهجها الحكومة في كثير من أعمالها.. دعواته لا تنقطع لنا لمشاركته في كثير من الاجتماعات مع الجهات الأخرى.. أو الزيارات التفقدية.. وأمس كانت المرة الثالثة التي يدعونا فيها للمشاركة في جلسة مجلس وزراء حكومة ولاية الخرطوم. يبدو والي الخرطوم مهموماً كثيراً بقضية الفقر وشح فرص العمل.. وضخت الولاية مشروعات كثيرة لتشغيل الخريجين.. ولا تزال تنتظر أفكاراً جديدة لطرح مزيد من الحلول، وفي تقديري أن عزم والي الخرطوم والمشاريع التي يطرحها لو أصابت نجاحاً بنسبة خمسين في المائة.. فيكفي.. لأنها –وهو الأهم- تؤسس لتجربة وتبني فكرة ومنهجاً بالتأكيد سينضج مع الأيام.. وفي تقديري – وهذا ما قلته في اجتماع مجلس وزراء الخرطوم أمس– أن مجهودات فتح فرص العمل تصطدم بعقبة كوؤد.. وتصبح كمن يحاول الانطلاق بسيارته وقد نسي (فرامل اليد) مشدودة.. ما دامت بلادنا محكومة بـ(قانون العمل) الحالي.. فإن الانطلاق في توفير فرص العمل يظل مكبوحاُ.. فالقانون يفرض حالة زواج (كاثوليكي) بين صاحب العمل والعامل.. بصورة تغري العامل أن يتراخى بأكسل همة.. فتضمر روح المنافسة لديه.. ويتكئ على قانون العمل الذي يحكم له ظالماً أو مظلوماً.. وسوء قانون العمل الحالي لا يختلف عليه اثنان.. وسمعته في أكثر من مرة على لسان كبار المسؤولين.. لكن يبقى الحال على ماهو عليه لا يتجرأ أحد على المساس.. خوف شعار (النجمة أو الهجمة) الذي يرفعه الاتحاد العام للعمال.. رغم أن القانون يحرم مئات الآلاف من فرص كسب الرزق الحلال.. لأن أصحاب العمل من جانبهم يرفعون شعار (الباب البجيب الريح.. سدو واستريح) فأي فرصة عمل يفتحونها تفتح (باب الريح).. وكلما ضمر عدد العمالة ضمرت مشاكلهم.. فكل عامل جديد يعني مشكلة جديدة.. رغم ذلك.. قانون العمل الجديد اجتاز مراحله الأولى داخل مجلس الوزراء منذ حوالى عام ونصف .. وواجه خلافات بين اتحاد العمال وأصحاب العمل.. لكن غالب هذه الخلافات تمت تسويتها ولم يبق إلا خلاف طفيف للغاية في بند أو اثنين.. وينتظر أن يعرض على مجلس الوزراء قريباً –جداً- ليعبر إلى الضفة الأخرى من النيل.. المجلس الوطني.. الوقت ليس في مصلحتنا فكثير من المشروعات والمستثمرين ينتظرون هذا القانون ليتمكنوا من استعياب عمالتهم وفق الأوضاع الجدية.. وكلما تأخر.. تأخر سوق العمل أمام الجيش الجرار من العطالة الذين يقتلهم يأس الانتظار كل يوم.. وسبق لي أن طرحت فكرة أتمنى أن يستوعبها قانون العمل الجديد.. أن يمنح القانون وضعاً خاصاً لـ(وكالات العمل).. لتنشأ وكالات خاصة لتوفير العمالة في مختلف الدرجات والمجالات.. من الخبير بدرجة بروفيسور.. إلى الخفير.. مهمة هذه الوكالات أن تكون مسؤولة عن تدريب وتأهيل العمالة.. فيتعاقد صاحب العمل مع الوكالة وإذا تراخى العامل يرده في اليوم للوكالة ويستعيض عنه بآخر.. فالعقد بين صاحب العمل والوكالة وليس العامل.. بينما عقد العامل مع الوكالة.. مثل هذه الوكالات تضخ قدراً كبيراً من المنافسة والتجويد عند العامل والوكالة معاً.. لأن أصحاب العمل سيختارون المفيد ويلفظون متعطل الهمة والمواهب.

التيار

تعليقات 25 | إهداء 0 | زيارات 4757

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#319173 [ود الجزيره]
0.00/5 (0 صوت)

03-30-2012 02:43 PM
"" وسبق لي أن طرحت فكرة أتمنى أن يستوعبها قانون العمل الجديد.. أن يمنح القانون وضعاً خاصاً لـ(وكالات العمل).. لتنشأ وكالات خاصة لتوفير العمالة في مختلف الدرجات والمجالات.. من الخبير بدرجة بروفيسور.. إلى الخفير.. مهمة هذه الوكالات أن تكون مسؤولة عن تدريب وتأهيل العمالة.. فيتعاقد صاحب العمل مع الوكالة وإذا تراخى العامل يرده في اليوم للوكالة ويستعيض عنه بآخر.. فالعقد بين صاحب العمل والوكالة وليس العامل""

دى بالضبط فكره شركه جهاز الامن بترونيد قبحها الله .. ياخى العامل دا بهيمه؟؟ يشيلوهو واختوهو متى واين ما اصحاب العمل عايزيين؟!!ليه مايكون فى قانون زى الفى الدول الغربيه؟؟ والله دى كافره؟!!


#319107 [محمد العوض]
0.00/5 (0 صوت)

03-30-2012 12:30 PM
كلامط مظبوط مية فى المية


#318966 [almurhaf saeed]
0.00/5 (0 صوت)

03-30-2012 08:47 AM
في دي معاك حق ... فهم متطور جدا ... قانون العمل الحالي بدلع العامل وبشجع علي الكسل
وبقضي علي روح التنافس والابداع .... ولا يراعي مصلحة صاحب العمل بتاتا وهذا اما ان يؤدي به الي
الافلاس او قفل الشركه وتشريد العاملين ....


#318873 [النجمي]
0.00/5 (0 صوت)

03-30-2012 01:43 AM
يظهر يا مهندس عثمان وقوف التيار كم يوم قد فعلت بك الافاعيل .. ما هكذا عهدناك .. عد الي صوابك او تخسر الكثير


#318710 [ههههههههههههاي]
5.00/5 (1 صوت)

03-29-2012 07:35 PM
سخف والله اللهم دمر الكيزان

وانا حالف في زير بيتنا ما يكون في كوز

وكذلك السودان الزير الكبير

العمل رااااااااااااااااااقد

لكن الكيزان المعفنين ديل مابيدو الشباب فرصة

الرئيس عندو تلاتة نسوان لييييييييييييييييييييييييييييييييييييه؟

ومعظم الشباب مفلسين ليييييييييييييييييييييييييييييييييييييييييه؟

لمغترب يحول قروشو بالبنك ليييييييييييييييييييييييييييييييييييييه؟


#318701 [الزول الكان سَمِحْ]
0.00/5 (0 صوت)

03-29-2012 07:17 PM
ياعثمان

تااانى والى الخرطوم؟؟ إنتا فاكر نحنانسينا قصة الكُشك؟؟

ياود حامد ...شايف صاحبك ..بيقترح (وكالات للعمل) عشان يتم إحتكارها وتبقى تجارة بالبشر قانوناً

ياعثمان ميرغنى..إقترح على مجلس الصحافة ..يستوعب الخريجين الجدد فى مجال الصحافة لإحلالهم محل العقول الصدئة الذين ما فتئوا يقتلوننا بما يخطرفون..


#318686 [ابوعبدالرحيم]
0.00/5 (0 صوت)

03-29-2012 06:53 PM
المطفش المستثمرين هو :-
1/ العمولات والكمشنات التى يدفعها المستثمر الى الموظفين من المراسلة الى الوزير
2/ عدم وضوح القوانين والتشريعات فى كل المجالات .
3/ عدم استقرار سعر الصرف للدولار والعملات الاجنبية مقابل الجنيه
4/ الفوضى السياسية و عدم الاستقرار السياسى والامنى والحروب
والمهم . ماهى الاستثمارات التى دخلت السودان
1/ مطاعم و كفتريات
2/ مصانع طوب اسمنتى


ملاحظة مهمة جدا وقبل وقوع الفاس فى الراس :
طهروا البلد من الوجود المصرى اى كان مستوياته والفلسطينى . لن ياتى من وراهم خير . والفينا يكفينا

حادث صائغ الذهب بتاع عطبرة لم يجف حبره. بالامس صائغ من امدرمان
والجايات اكبر واخطر من الرايحات
بلا ابناء نيل بلا كلام فارغ
مصر محتلة حلايب ونحن نعطيهم الابقار مجانا . ونستورد منهم الشيش والجراك والمعسل وحلل الالمونيوم
والسعودية تدينا لحوم الاضاحى المبرده . ونحن ندى المصرين تيران حية ودعولة
حسبى الله ونعم الوكيل
حسبى الله ونعم الوكيل


#318669 [abdulrahmana]
0.00/5 (0 صوت)

03-29-2012 06:30 PM
لا فض فوك ياعثمان , فمكتب العمل يتعامل مع أصحاب العمل بأنهم مذنبين حتى تثبت براءتهم.


#318609 [جهاد الكترونى]
0.00/5 (0 صوت)

03-29-2012 04:37 PM
تانى رجعتناللذى لا يظلم عنده احد بعد ما نسينا حكايةبتاع الكشك الما انتحر واولاده طشو وما بعرف شنو داك.
قانون العمل شرع فى ظل حكومة اشتراكية اواخر الستينيات ليحافظ على حقوق العمال وظل يعمل بكفاءة حتى الان فى حماية العمال وحقوقهم وهو اخر حائط حماية لهم من الناس الحالا زين انت لا تعرفهم, حميدبعرفك بيهم :
ِلا كمان فى ناس فايتاك بى الصبُر
ساكنين بالإيجار .. لا طين .. لا تمُر
وواحدين بى الإيجار .. ما لاقين جُحُر
سِلعـتُمْ الضُراع .. والعرق اليخُر

عمال المدن
كلاّت الموانى
الغُبُش التعانى
بحّارة السُفُن
حشّاشة القصوب
لقاطّة القطن
الجالبة الحبال
الفِطن الفُفُن
الشغلانتو نار
والجو كيف سُخُن

فرقا شتى بين ناساً
عيشا دين مجرورة وتجر
تكدح بالأجر ومرة بلا أجر
عيشُنْ كمّهو .. وديشُن هان كدُر

ناساً حالا زين
مصنع .. مصنعين
طين فى طين .. ووين
ما مرابا مُر.. بارد همها
لا يعرق جبين .. لا وشاً يصُر
عين والله .. عين
كلها كمها .. وعزها هان قدُر

فى الجنة أم نعيم .. فى الجنة أم قُصُر
يا عبد الرحيم إلا ورا القبُر


#318608 [toto]
0.00/5 (0 صوت)

03-29-2012 04:36 PM
لا حول ولا قوة الا بالله يعني يا ود ميرغني آخر المخير دايرنا نبقي اجانب في بلدنا وكالات وكفالات والجماعة يختونا في جيبهم اكتر من كدا؟؟؟ روح منك لله انت والبتكسر ليهم في التلج الله ينتقم منكم ويورينا فيكم يوم


#318601 [aboiman]
0.00/5 (0 صوت)

03-29-2012 04:27 PM
بدأً أستاذ وأنت مفعم بالتغير سواء أن كان سلباً أو إيجاباً وبعدين وكالة شنو الظاهر التشريد البعنو منو العمال والموظفين عاجبك وإنت ذأأأأتك الدور راجيك مش اتا م}سس لمنبر السلام العادل؟؟؟؟ وعاجبك تشريد الصحفييين!!! وداير تعمل ليك وكالة ترتزق بعرق الغلابه أصلو البلد دي العمولات والكمشنات بقت أدب وإنت داير تتطبقو على أرض الواقع وباطرق لمن يبقى واقع وتعمل لينا كفلاء في بلدنا ياخي ماحرااام عليك ؟ وبعدين الوالي دا في شنو والناس في شنو وال داير يخدر الشباب بفرص العمل التي مابتعين إلا أولاد المسؤلين ولجنة الإختيار غير المحايدة ويسألوك لوكنت مقدم لوظيفة أستاذ مسيقى من القلقله !! ولمقدم لوظيقة هندسه ولا علوم يسألوك من فروض الوضو وعدد سجدات سجود السهو!!
بلاي يعثمان ميرغني لمن تسوق عربتك خلي بالك من فرملة يدك لانو حتوديك للمحاكمة في التدليس الصحفي وذر الرماد في العيون وما حتركز في (التييياااار)ياجنااابو عثماااان.


#318592 [Ahmed eder]
0.00/5 (0 صوت)

03-29-2012 04:19 PM
دا الزايد مصايب البلد زي القلم الماجور دا حرام عليك دا اكبر حرامى عووووووك


#318591 [عبدون عوض]
0.00/5 (0 صوت)

03-29-2012 04:17 PM
يا باشمهندس عثمان عذرا لم يحالفك الحظ في هذا المقال ولم تكن موفقا في الطرح من وجهة نظري الخاصة ، علما بإنني من اكثر الناس اعجابا بكتاباتك ومقالاتك


#318577 [بت الخرطوم]
0.00/5 (0 صوت)

03-29-2012 03:55 PM
حضرت جلسة مجلس وزراء الولاية بناء على دعوة صاحبك ود الخضر عرفناها لكن سمحوا ليك بابداء رايك دى شوية عايزة ليها فهامة جبرا باى صفة منحت فرصة التحدث تكون وزير الاعلام ونحن ما عارفين بلاهى خليك فى تجهيز الوكالة قال العقد يكون بين العامل والوكالة خلاص ياحاج نظرية مقترحك دا انشاءالله مجلس الوزراء اجازو ليك والله ياعلى قول عووضة الولد دا


#318547 [الريفى]
0.00/5 (0 صوت)

03-29-2012 03:30 PM
دعواته لا تنقطع لنا لمشاركته في كثير من الاجتماعات مع الجهات الأخرى.. أو الزيارات التفقدية.. وأمس كانت المرة الثالثة التي يدعونا فيها للمشاركة في جلسة مجلس وزراء حكومة ولاية الخرطوم. يبدو والي الخرطوم مهموماً كثيراً بقضية الفقر وشح فرص العمل.. وضخت الولاية مشروعات كثيرة لتشغيل الخريجين.. ولا تزال تنتظر أفكاراً جديدة لطرح مزيد من الحلول، وفي تقديري أن عزم والي الخرطوم والمشاريع التي يطرحها لو أصابت نجاحاً بنسبة خمسين في المائة.. فيكفي..
= لو ما قلت فيه الكلام ده تكون ظلمتوا ما الرجل ما قصر معاك يا باش وهو كل يوم بناديك(دعواته لا تنقطع)وأكيد مشكلك كلها محلولة معاهو كثر ثلج اكثر توصل اسرع ههههها=


#318536 [محمد عادل]
0.00/5 (0 صوت)

03-29-2012 03:15 PM
الاخ عثمان ميرغني،

تحية طيبة

والله لم تكتب الا الصواب.
ارجو ان يستمع إليك المعنين بهذا الشآًن


#318526 [أسامة]
0.00/5 (0 صوت)

03-29-2012 03:07 PM
وأنت يا عصمان من تجليات الانقاذ واستهبالاتها
قال تجليات والي الخرطوم قال
يوم الحساب قرب أركزو وماتبتبتوا تاني لمن تجيكم آيات الخلاص من نير زمانكم


#318525 [ودامدرمان]
0.00/5 (0 صوت)

03-29-2012 03:06 PM
عليك الله انت ما بتحتشئ من الكلام البتكتب فيهو دا
والله انا لو منك اعتزل الصحافه لانك وصمة عار في جبين الصحافه
ياخ اخجل اخجل اخجل من الكلام الفارغ البتكتب فيهو دا
لمتين حاتقعد تطبل مرا للرئيس ومرا لي نائب ومرا لي وزير



تخريمة:
بلدا" مافيها تمساح يقدل فيها الضب





تضامن جبرا:
اخبار خط هيثرو شنو ؟؟


#318523 [Naser]
0.00/5 (0 صوت)

03-29-2012 03:03 PM
الله لا كسبك....... كيف ما تكون حضوراً دائماً في اجتماعات مجلس وزراء الخرطوم ودي عينه كتابتك؟؟؟؟؟؟.
اولاً ياتوا نقابه الرفعت شعار النجمه او الهجمه نقابه غندور ولا نقابه قاسم امين.
ثانياً وكاله وكيل عن انسان راشد كرمه الله وكفل له حق الاخيار من اجل لقمه العيش يتنازل عن حقوقه كأنسان لصالح وكاله همها الاساسي الربح وشركه تسعى للربح ويضيع حقوق عامل يسعى لكي يعيش.
ثالثاً ما تروج له ليس اكثر من نظام السخره في القرون الوسطى ففي كل بقاء العالم وكالات التوظيف دورها ينتهي بتعاقد العامل ورب العمل اي شيطان اوحى لك بفكره مد الوصايه لتكون ابديه.
رابعاً هل اخضعت تجربه الشركات الامنيه المنتشره الان للتقييم؟؟؟؟ هل علمت معاناه هؤلاء الشباب مع هذه الشركات.
لعنه الله عليكم يا كيزان شنوا الما خربتوا.


#318506 [عبد الله]
0.00/5 (0 صوت)

03-29-2012 02:43 PM
لماذا يا أخى عثمان نلجأ للسمسرة لدفع الانتاج فنحن نعانى منها فى الخارج لأن تلك الوكالات سوف تغنى
وتقتات على عرق المستخدمين!!! دعك يا أخى من هذا ولنتبع هدى نبينا محمد صلى الله عليه وسلم بقوله
((من أحياأرضا ميتة فهى له)))كل الحلول للانتاج موجودة فى شرعناوسنتنا ولكنا صم بكم عمى عنها
اللهم نسألك الرحمة


#318493 [عمر جابر]
0.00/5 (0 صوت)

03-29-2012 02:28 PM
هذا هو الإتجار في البشر بصورة مختلفة ودونك شركة الهدف وأواب ومن يلف لفهما من شركات الأمن.
الشركات تدفع للهدف ما لا يقل عن ألف جنيه شهرياً واسال عامل الهدف كم تدفع له الشركة شهرياً؟ ما لا يتجاوز الثلث مع ساعات عمل أشبه أو أقرب إلى عمل السخرة. وفي حالة التأخير لأي سبب يخصم أجر كذا يوم من العامل المسكين ولا تخصم الشركة من الهدف مليماً.
الوكالات للعمالة الأجنبية مقبولة لكن لعمالة سودانية لشركات سودانية فهذا غير مقبول.
من سيمتلك الوكالات ؟ ستكون مثل وكالات الحج والعمرة محجوزة لناس بعينهم ولا منافسة حرة حيث تذهب وظائف الحكومة وشبه الحكومة والمقربين من الحكومة للوكالات التي يمتلكها فلان ويشاركه علان من ناس الحكومة الواصلين والباقين ليهم الله.
فكرتك مهببة يا عصمان وأنت خارج الشبكة في هذا المجال. خليك في الفساد. الله معاك


#318491 [ود نمرة 2]
0.00/5 (0 صوت)

03-29-2012 02:25 PM
قانون العمل الحالى هو من الاسباب الرئيسية لتطفيش المستثمرين السودانيين او الاجانب


ردود على ود نمرة 2
Sudan [جهاد الكترونى] 03-29-2012 04:40 PM
ود نمرة اتنين الناس الحالا زين, ربنا يذيدكم ويبارك لكن سيب قانون العمل ده حتى لا تكون من الذين لايحضون على طعام المسكين


#318446 [مؤمن]
0.00/5 (0 صوت)

03-29-2012 01:46 PM
ايه رايك تعمل ليهم كفيل بالمره !!! وكالات ايه ووهم ايه يعني حتى الواحد في بلدو ماقادر يشتغل ؟؟


#318444 [راجل المرا]
5.00/5 (1 صوت)

03-29-2012 01:45 PM
انشاء الله تكون اتناقشت مع صاحبك الوالى فى موضوع الكشك
وبعدين مع فرص العمل الجديدة دى لازم تشوف لولد صاحب الكشك وظيفة
لانو الكشك لوحده حتى بعد ما يرجعوا ود الخضرلصاحبه برضو ما بكفى المصاريف المتزايدة


#318438 [توفيق الصديق عمر]
0.00/5 (0 صوت)

03-29-2012 01:42 PM
يا سيد عثمان ميرغني تصائك للوالي لن تقدم ولن تؤخر مما هو حاصل في البلد
المحيرني هو عدم ردك علي زميلك في الراي العام فهذا قد وجه اليك اتهامات فيها
تورية واضحة جدا.
الواضح انكم ياسيد غثمان دافننو سوا وكل واحد فيكم عارف الثاني بيعمل في شنوز


#318436 [Alczeeky]
0.00/5 (0 صوت)

03-29-2012 01:41 PM
عثمان ميرغنى وادمان الغباء وكمان الدجل
على من تضحك ياعثمان ؟؟؟


عثمان ميرغني
عثمان ميرغني

مساحة اعلانية
تقييم
4.50/10 (2 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة