في


مش فكرة؟
04-02-2012 11:31 AM

ساخر سبيل

مش فكرة؟

الفاتح جبرا

أخيراً وبعد أن (باظت أعصابنا) قطعت وزارة السياحة والآثار الطريق أمام بيع مستشفى العيون المركزي الذي تم طرحه فعلياً لعطاءات بعد أن صرح بذلك السيد وكيل وزارة السياحة علي محجوب عطا المنان في حوار للزميلة (ألوان) إذ قال إنه وحسب القانون لا يجو...ز بيع أثر تاريخي تجاوز عمره قرناً من الزمان كاشفاً عن اجتماع عقدته الوزارة مع مصلحة الآثار، وأن الأخيرة رفضت بيع المستشفى بإعتبار أن المستشفى يقع في دائرة المبنى التاريخي الذي يمثل قيمة تاريخية في حياة السودانيين، وارتبط في الأذهان بشخصية عبدالفضيل ألماظ.

ساق المسئولون تبريرات كثيرة من أجل بيع هذا المستشفي قال أحدهم بأن المباني (منتهية) وأن تكلفة صيانتها (باهظة) ومن ثم احسن (نبيعا) ونعمل بي قروشا مستشفي حديث آخر وكمان القروش (البتفضل) ممكن نعمل بيها مستشفيات في الأقاليم !

كلام زى العسل ولكن (دقيقة نمسح الريالة) .. ولكن ألم يكن نفس الوعد عندما تم بيع حديقة الحيوان (وقالو لينا) (نبيعا) ونعمل بي قروشا حديقة (حديثة) في منطقة الغابة وبمواصفات عالمية؟ وإتباعت الحديقة التى كانت جزءاً من ذاكرة الأمة ومتنفساً للمواطنين يتعرفون فيها على حيوانات وطنهم المترامي الاطراف بأقاليمه المختلفة ويقضون فيها أجمل الأوقات !

(طبعن) إتباعت الحديقة (ليه ما تعرف) وأنشئ في مكانها (برج الفاتح) وطلعنا إحنا (العاوزين لينا حديقة)!

طيب أيه لزوم الكلام ده كووولو ؟ اقول ليكم .. بما إنو مباني المستشفى تحتاج لاموال طائلة للصيانة وانها بشكلها الحالي لا تصلح كمستشفي كما صرح بذلك بعض المسئولين .. وبما انو مساحتها تزيد عن 20000 متر مربع .. وبما إنو موقعها موقع سياحى وجميل فالعبد لله يقترح
أن يتم تحويل المستشفي إلى حديقة حيوانات مع الابقاء على المبانى بعد صيانتها كمكاتب للإدارة .

علما بان هذه الفكرة قد ألهمنى أياها تصريح صرح به أحد الأطباء الذين يصرون على بيع المستشفي إذ قال (لصحيفة الراى العام) أن غرفة العمليات يوجد بها (ثعابين) ... وعلى كده وحسب تصريح هذا الطبيب المسئول (عن البيع طبعن) تكون هذه الثعابين هى النواة الأولى من لهذه الحديقة !

طبعا ح (تنطوا ليا في حلقى) وتقولوا ليا طيب الحكومة دى تجيب من وين قروش عشان تبنى بيها مستشفي عيون تااانى؟ .. واقول ليكم والله إنتو ناس طيبين شديد .. القروش الباعت بيها (أمنا الحكومة) الحديقة (الزماااان) تقوم تبنى بيها المستشفى .. والقروش الباعت بيها (الحيوانات) الزمااان تقوم تشتري لينا بيها (حيوانات لى حديقتنا الجديدة) ! أيه رأيكم مش فكرة !


كسرة :
أموت واعرف حيوانات (جنينة الحيوانات) مشت وين؟ شفتو ليكم إعلانات في الصحف عن بيع (أفيال واسود) ؟

كسرة ثابتة :
أخبار خط هيثرو شنو؟

تعليقات 46 | إهداء 0 | زيارات 6201

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#322780 [عبدالماجد قنديل]
0.00/5 (0 صوت)

04-03-2012 02:58 PM
دي كمان كسرة ثانية ( أخبار حيوانات حديقة الحيوان اللي أتباعت مشت وين؟؟؟؟؟؟


#322482 [ولي]
0.00/5 (0 صوت)

04-03-2012 10:32 AM
الفاتح جبرة عشت وامد الله في ايامك ومسح ريارتك


#322454 [خالد محمود]
0.00/5 (0 صوت)

04-03-2012 10:11 AM
البترول ذاتو مما سمعنا انو الحكومة بدت تصدره ما عرفنا عائداته راحت وين ؟؟؟؟ ولا الأراضي التي بيعت ولا الشركات التي بيعت الفساد للركب


#322420 [ود الجد]
0.00/5 (0 صوت)

04-03-2012 09:41 AM
انت ماعارف انو الحيوانات دي هاجرت برة السودان لانه لم تعايش مع اسود وثعالب وذئاب وافيال وزرافات ونمور المؤتمر الوطني وعلي حسب ماسمعت تقدموا بطلب لرئيس الجمهورية وقالو ليهو يا نحن يالجماعة ديل ..وطبعا الاجابة معروفة ..
وكان مامصدقني اسالوا الأفيال الموجودة في كينيا


ردود على ود الجد
Saudi Arabia [Sudannow] 04-03-2012 04:25 PM
تعرف يا ود الجد، وتصديقاً لكلامك قالوا واحد من بعض (أسودنا المغضوب عليها)هاجر إلى السعودية. ودخل حديقة الحيوانات وشبكوه موز في كل الوجبات. فما وجد مفر إلا يسأل الحارس ويقول ليه ياخي انت شايفني شنو؟ قال ليه شايفك أسد. وطيب لما انت شانفني أسد ما تجيب لي لحم. قال ليه لكين انت دخلت المملكة بتأشيرة قرد.


#322415 [Heron]
1.00/5 (1 صوت)

04-03-2012 09:40 AM
سرقة سرقة تعددت الاساليب واللحس وااااااااااااحد.


#322403 [Heron]
1.00/5 (1 صوت)

04-03-2012 09:35 AM
التحية لك استاذ جبرا. احسن نرجع الاموال الزمااااااااااااااااان لحسوها ونقوم نبني بيها السودان من اول جديد. بالله لو رجعت مش ممكن تحدث فرق . اسهل حاجة سرقة المال العام(حق الناس) بس الحساب عند الله اصعب .فلا يظن اللاحسون انهم ناجون.


#322379 [جنى فيل]
5.00/5 (2 صوت)

04-03-2012 09:19 AM
انت يا جبرا يا دوب جاى تسال عن حيوانات الحديقة ؟
القرود ومشت تحارب مع المجاهدين فى الميل 40 ..
الافيال والزراف ماتت بالحسرة فى حديقة القرشى ..
التماسيح مبسوطة فى فلل كافورى ..
الثعالب والخفافيش تمرح بالقصر الجمهورى ..
بينما الاسود دجنت بعد نزح مخالبها واسنانها واهو لافة صينية..


ردود على جنى فيل
Qatar [كوكو] 04-03-2012 11:28 AM
يا زول كلامك ده كلام زول راكب فيل....الله اديك العافية


#322296 [mohd]
0.00/5 (0 صوت)

04-03-2012 07:51 AM
أموت واعرف حيوانات (جنينة الحيوانات) مشت وين؟ شفتو ليكم إعلانات في الصحف عن بيع (أفيال واسود)



اكيد ذبحوها واكلوها يكونوا دايرين يجربوا لحوم الضواري عشان يخوفوا الناس


#322284 [Koze Kaddab]
0.00/5 (0 صوت)

04-03-2012 07:31 AM
بعد ان ماتت الكثير من الحيوانات جوعآ قام الجماعة بتوزيع البقية
على مناطق بالخرطوم وكان نصيب الأسد احدى الصوانى بمنطقة
المقرن . عند سماع أزير الاسد ساعة مغيب الشمس قام الجماعة
بالتكبير والتهليل وكتبوا فى صحفهم ان الاسد يرفع الاذان
عند المغرب ليذكر الصائمين بحلول مواعيد الافطار.
يا جماعة هل يعرف احدكم اين كان حضرة الامام (التمساح) يصلى
بالناس؟


#322268 [ابشلاليف موبايل الشيطان]
0.00/5 (0 صوت)

04-03-2012 07:07 AM
انت لو عارف الخط ده الباعو منو بالله جيب اخرك وورينا ليهو وما تشحتفنا ساكت


#322192 [حسن]
0.00/5 (0 صوت)

04-02-2012 11:05 PM
الاستاذ جبرا

نحن لسع سؤال الخط ما وجدنا له اجابة
جيت تسأل عن الحيوانات!!!!!
الحيوانات بتقول ليك: ليه بتسأل عني تاني ؟؟؟؟؟


#322186 [الزول الكان سَمِحْ]
0.00/5 (0 صوت)

04-02-2012 10:57 PM
رجعنالك

والله يا أستاذ بالجد إنتا أثرت نقطة مهمة..الحديقة يعد ماباعوها ..صحى حيواناتا راحت ويين؟؟

دى مسألة عايزة تترفع للبرلمان من ضمن ملفات الفساد..


#322182 [Tarig]
0.00/5 (0 صوت)

04-02-2012 10:49 PM
والله يا الفاتح كان ما بعرفك كان قلت إنت ذانك راكب فيل


#322098 [ك]
0.00/5 (0 صوت)

04-02-2012 08:47 PM
انت الخط ده ماتفجرة وتنتهى منها بدل تقعد تمسكنا بيهل


#322062 [الزول الكان سَمِحْ]
0.00/5 (0 صوت)

04-02-2012 07:55 PM
يا أستاذ

ههههههههها.....هههههههههااااااييي

أنا برضو أموت عشان أعرف الحيوانات دى مشت وين؟؟

تعرف أنا برضو عندى إقتراح....يجيبو قروش الشعب المدكنة فى ماليزياوالمشكلة تتحلا...وللا أقول ليك..

خليها نجيبا نحنا زى ما المجلس الوطنى الليبى قاعد يسوى مع أسرة القذافى


#322052 [خضر الطيب]
0.00/5 (0 صوت)

04-02-2012 07:34 PM
بالله عليك يا جبرا سويها كسرة تالتة: ( أموت وأعرف حيوانات الحديقة مشت وين )


#322046 [ابوالشوش]
0.00/5 (0 صوت)

04-02-2012 07:25 PM
ياجبرا الحيوانات اللي إتباعت عاوزه ليها كسره في عمودك ده زي كسره خط هيثرو ... لكن بالطريقة دي لو تابعت ناس الحكومة ديل عمودك حيكون كلو كسرات ، شي هيثرو وشي المدينة الرياضية وشي حيوانات جنينة الحيوان وشي ماعارف شنو داك يلا حريقة تحرق الحكومة والناس المعاها ؟


#322010 [ود عويضة]
0.00/5 (0 صوت)

04-02-2012 06:29 PM
انا سمعت ان القرود ذهبت تجاهد في الجنوب - وتخصصت في تفجير الالغام - وبقية الحيوانات صارت (حور عين) في كرنفالات عرس الشهيد -
عموما يا ود جبرا انا(اموت واعرف ) المات في الجنوب شهيد ام فطيسة -
السؤال دا بمناسبة استعداد (الابالسة) لتجهيز ألوية الردع المتجهة قريبا لابادة مواطني جنوب كردفان والنيل الازرق - في كل زمان يوجد مغفلبن نافعين وبعضهم سجلوا اسمائهم للجهاد وهم موعودون من علماء السلطان بدخول الجنة ولكن بشرط قتل تية واخته عوضية - ليس لانهما يهود او كفرة بل لانهم متهمون بانهم(حركة شعبية) حسب تصنيف علماء السؤ ومنبر السلام العادل وهذا يبيح هدر دمهم
كسرة
هذه الافكار (الشيطانية ) ليست لشياطين الجن (فكيد الشيطان ضعيف ) وانما لشياطين الانس الذي يتحكمون فينا ظاهرا وباطنا


#322007 [kalifa]
0.00/5 (0 صوت)

04-02-2012 06:25 PM
مقتبس من المقال (أموت واعرف حيوانات (جنينة الحيوانات) مشت وين؟) أنا غايتو عارف ليك في بغل رمادي مرات بلبس كاكي ومرات بقوم سداري أأأ موجود لحد يوم أمبارح في القصر الأسمو جمهوري ....!!!!!


#321992 [اوطان]
0.00/5 (0 صوت)

04-02-2012 06:08 PM
ياجبرا حجز المربعات فى الازهرى للمدينه الرياضيه ده شنو كمان


#321991 [محمدزين]
5.00/5 (3 صوت)

04-02-2012 06:08 PM
قالوا في مسئول كبير ابوه كان غفير للأسد في الجنينة دي ودا الجاب الهواء الطرد حيوانات الجنينة عشان مايزكره بماضي ابوه مع ماضي مشرف مامن سرقة مال عام


#321981 [الصابري]
5.00/5 (3 صوت)

04-02-2012 05:54 PM
حديقة الحيوانات التي تمثل ذكرى جميلة لنا في طفولتنا يقال انها تمثل ذكرى سيئة جداً لطفولة شخص واحد ولكن لأنه أصبح متنفذاً جداً جداً فقد انفذ فيها ارادته ومسحها من على ظهر الأرض ومعها الذكريات الحلوة للملايين والمتعة المستقبلية لملايين أكثر منهم.
يقول مثل سوداني: أقوى منك يعرس أمك


#321978 [انور]
5.00/5 (1 صوت)

04-02-2012 05:51 PM
والله حكاية الحيوانات الراحت دى فاتت علينا


#321972 [حامد عابدين]
5.00/5 (2 صوت)

04-02-2012 05:45 PM
قوانين اليونسكو تمنع بيع المباني التي عمرها اكثر من مائة عام وتعتبرها ضمن المناطق والمقتنيات الاثرية ولذلك فان وزارة السياحة والفنادق لولا خوفها من اليونسكو لما اعترضت قرار البيع ، ولذلك لا نتوقع ان يتم البيع وعلى الحكومة ان تقوم بتاهيل المستشفى بدلا عن التفكير في بيعة لمصالح بعض الطفيليين.


#321884 [بت ام الحسن]
5.00/5 (2 صوت)

04-02-2012 04:06 PM
خواطر فيل

انا ويين باعويينى وكمان سرقونى اولاد الحرام

وفى الباخرة دييك كمان رفعونى
ولبلاد بعيدة كمان ودونى
يايمة ويين القى الهنا ماخلاص باعونى


#321873 [ashraf adlan]
0.00/5 (0 صوت)

04-02-2012 04:01 PM
والله بالغت عديييييييييييل كده مع الحكومة دي اعمل حسابك!!!


#321862 [ام الحسن]
5.00/5 (3 صوت)

04-02-2012 03:53 PM
كل ما امشى حديقة الحيوانات فى الرياض(ست الاسم)واشوف الفيل اقيف قدامو واقول ليهو انا شفتك وييين 000انا شفتك وين000لكن بعد ما قريت كلامك ده عرفت انا شفتو وين قبل ده


#321861 [ود موقة]
5.00/5 (2 صوت)

04-02-2012 03:51 PM
الجمعة الفاتت شايف عبدالرحيم كان لابس (مركوب جلد ككو)..
يكون جابو من وييييين؟!!!


#321852 [سيد الاسم]
5.00/5 (3 صوت)

04-02-2012 03:40 PM
اتباعت حديقة الحيوان لكي لا يتذكر نايب الريس انة كان ابن غفيرهذه الحديقة ومن نسى قديمو تاه وفعلا نحنا الذين دايرين حديقة لان من يحكمونا يستعرون من اعمال ابائهم التي علموهم بها وبكزه جاي الدور علينا ويستعرو منا ولاكن التاريخ شاهد


#321836 [ابو كلوة]
5.00/5 (2 صوت)

04-02-2012 03:25 PM
والله ياخ سؤالك في محلو...صحي الحيوانات دي مشت وين!!


#321821 [jac]
5.00/5 (1 صوت)

04-02-2012 03:12 PM
كسرة مرتدة ( زي كورة مرتدة وكده ) اخبار الخطوط الجوية السودانية شنو ؟؟؟


#321812 [برلومة]
5.00/5 (2 صوت)

04-02-2012 03:00 PM
ياه.. وانت ما عارف الحيوانات مشت وين .. شى ودوه القصر مع اشباله..وشى مات فى حديقة القرشى من الغم..والقرود بتاكل اللب والموز وتخطف عصير البيبو من البرلومات فى جامعة الخرطوم ..
علشان كده والينا الهمام حا يبيع كل اراضى شارع النيل و يترك حديقة حيوان الجامعة ..


#321809 [عبدون عوض]
5.00/5 (2 صوت)

04-02-2012 02:57 PM
يا استاذ الفاتح الحاجة المتاكد منها انه القرود والحمير زابوا في وسط المجتمع مع الناس لكن باقي الحيوانات لا اعرف ؟


#321757 [أطلع برة ويى]
5.00/5 (1 صوت)

04-02-2012 02:17 PM
ياجبرا... بالله دى فاتت عليك كيف...وأنا دايما أقول جبرا ده تفتيحة...أبدا ليك بالكسرة...انت قلت أموت وأعرف (حيوانات )جنينة النزهة مشت وين؟؟؟ بالله ده سؤال تسألو...كيف مشت وين...أمال الحكومة ذات القاعدة العريضة دى فى الخرطوم والولايات بدستورييها جابو ليها ناس من وين!!!!!!!!!!!
وبعدين ياجبرا يعنى معقول الوالى مايكون عارف قانون اللآثار عشان تجى انت تقول وكيل الوزارة قال؟؟بالله خليك من الوالى..نايب الريس الحاج آدم مش قال ح يكسر البركس بتاع جامعة الخرطوم لأنو من عهد الاستعمار والطلبة بدل يشوفو قرايتم ح يتفرجو على البركس ويخلو القراية...كمان عايز تقول نايب الريس ما عارف قانون الآثار...الواحد فيكم براهو يودى نفسو فى داهية...يعنى لسة ماخلصنا من موضوع الصحفى أبوذر وطلعناهو...كمان عايزنا تانى نبدا نقول (أطلقو سراح جبرا!!!!!!!!!!!!!!!


#321751 [ابو الهول]
5.00/5 (5 صوت)

04-02-2012 02:12 PM
...عايز تعرف الحيوانات مشت وين ؟؟انت ما تسأل عن الناس بتمشي وين ؟وليه ؟ ..ماتت يا ابو جبرة ماتت وشبعت موت ...احكي ليك قصة الفيل ..ودوهو حديقة القرشي ..اخد و مدة وتاني كانو في الحزام الاخضر ..ماتو بالجوع ..بالجوع والله ..منو القادر يأكل فيل ..وأسد في الزمن الصعيب دا ؟؟ماتو بالاهمال ..ماتو بالمغص ...طبعا سمعت بالحديث "عذبت امرأة في هرة"...هرة يا ابو جبرة..كديسة والله مش فيل ؟؟؟ديل حيروحوا وين من عذاب يوم داك؟؟


#321741 [Ibrahim Adam]
5.00/5 (2 صوت)

04-02-2012 02:03 PM
القرود ، قالوا إستنفروها و ودوها العمليات عشان تطلع الألغام; لو ما مصدقنى أسأل إسحق أبو وشاً متل التملة داك.
أما تيس الخلا، فشوف عينى ، قاااعد فى أفخم مكتب فى القصر الجمهورى!! وفى عصمتو غنمايتين، واحدة منهن واقعة فى حواشة البلد نجر من طرف!! ما شفت التيس فى عرس سخلتها كان بنكس كيف؟؟
يا أستاذ، صحيح طلعنا حيوانات نحن!!


#321736 [Hamed]
5.00/5 (2 صوت)

04-02-2012 01:53 PM
والله يا استاذ الفاتح ضحكت ضحك غرائب الابل وقعدت اتخيل شكل الاعلان
اسد للبيع. مفيد لحراسة البيت من اللصوص، خاصة حرامية الزمن العجيب دة البيسرقوا بلد كاملة ما ظنيت يخافو ليهم من كلب! لكن تاني تذكرت ان الزول المسكين الحيشتري الاسد حينطو ليه ناس الضرائب في حلقو ويقولو ليه تدفع لينا قصاد اي زول يجي يشوف الاسد دة حتى لو شافوه ملح! دة غير تجديد الرخصة السنوية بتاعة الأسد واحتمال يقولو ليك الاسد دة فور ويل ومكنتو تيربو لازم تدفع دبل!


#321727 [بطيخ]
5.00/5 (1 صوت)

04-02-2012 01:40 PM
الحيوانات يا أستاذ اتعشو بيها تماسيح جنينة الحيوانات ونزلو البحر


#321686 [ودامدرمان]
5.00/5 (2 صوت)

04-02-2012 01:03 PM
الاستاذ جبرا
تحية طيبة
والله انت الطيب شديد كمان
حصل سمعتا بي قرش خشا بطن الحكومة ومرق تاني؟؟
اما عن الحيوانات انا عارف (الفيل والمرفعين والثعلب والحمير والقرود)مشوا وين وانت برضو عارف والسادة القراء برضو عارفين الجماعه ديل قاعدين وين صاح؟




تخريمة:
بمناسبة القروش الفي بطن الحكومة
عندي صديق اشترا بيت في السكن الشعبي مشا دفع القروش كاااااااااااش واستلموها منو وقالوا ليهو جيب اقرار مشفوع بليمين قال ما عندو قالوا ليهو لازم تجيبو قاليهم خلاس البيت خليتو ادوني قروشي الموظف قعد يضحك قاليهو انت ما نصيح قروش شنو تاني قروشك دي مابترجع



تضامن جبرا:
اخبار خط هيثرو شنو ؟؟


#321681 [وحيد]
5.00/5 (1 صوت)

04-02-2012 01:02 PM
تعلن حكومة الانقاذ الرسالية عن بيع مواطنين سودانيين " رجال " بحالة جيدة، العدد المطروح للبيع 5 مليون سوداني اعمارهم بين 20 - 40 سنة اللون اسمر و العيون عسلية و الشعر اسود ، الطول 5 اقدام و 6 بوصات، و للاطلاع على بقية المواصفات الرجاء الاطلاع على كراسة المواصفات علما بانه يمكن البيع بالجملة او القطاعي ، لا يوجد مناقصات و لا تاريخ لتسليم العطاءات و غير مقيدين باقل او اعلى عطاء و الافضلية للمتنفذين حسب التراتبية التنظيمية الاعلى ثم الاقل و هكذا - البيع كتامي و لاصحاب الايدي المتوضئة فقط زي كل ما تم بيعه -
مفاجأة الموسم : سيعلن قريبا عن عطاء بيع آنسات سودانيات من ذوات " الخلق" و الجمال للاضافة الى ما ملكت يمينك!


#321658 [جن]
5.00/5 (2 صوت)

04-02-2012 12:48 PM
الله يجازي محنك يا استاذ جبرة اضحكتني حتى أغرورغت عيناي بالدموع.. أو..لربما انني كنت أبكي..حقيقتآ لا ادري..لكن على الأرجج انها كانت محاولة يائسة مني بأن احافظ على الإبتسامة بينما دواخلي تعتصر من شدة الالم


#321646 [عبد المغيث ابو شيخة]
5.00/5 (1 صوت)

04-02-2012 12:38 PM
الاستاذ الفاتح جبرا - يقال تقدم احد شيوخ الطرق الصوفية بطلب من شيوخ انصار السنة تمويل مسيد الشيخ الفلاني - انصار السنة طبعا لا يعجبهم بناء القباب على الأضرحة لذا طلبوا من شيخ المسيد تهديم القباب والأضرحة وبعد داك هم مستعدين لتمويل مسيد تحفيظ القرآن بالكامل - الشيخ طبعا تفتيحة اقترح لمريديه والذين قلا لا يوافقوا على هدم القباب اقنعهم بحجة تمويل يعيد بناء القباب بطريق’ اجمل وحديثة - المريدين وافقوا وقامو بهدم القباب وجاء التمويل للحفظة والدارسين فقط ايه رايك في ديييييييي ؟؟؟؟


#321637 [عمر الامين]
5.00/5 (1 صوت)

04-02-2012 12:32 PM
انت ما سمعت بالنمر الاتسلخ واقف علي طولو و الفيل المات بفقدان السوائل اما البقية فكان مصيرها مصير خطك السائل عليهو مع مراعات الاسبقية الزمنية


#321633 [زووول]
5.00/5 (1 صوت)

04-02-2012 12:26 PM
أهاهاههههههااااا والله انت ياجبرة لقيتك لكن ياخى انت ثعلب ولا أبوه زاتو ياخى أهاهاهاههههههااا تناكت تناكت لمن ينكتوك من لحم الدنيا سير سير يا ال..........................


#321631 [ام ككو]
0.00/5 (0 صوت)

04-02-2012 12:23 PM
يحيا العدل .. و ليت المحسنين ممن يمتلكون حسابات دولارية بماليزيا يساهموا معنا فى استيراد قرود وفيلة وتماسيح من هناك اذ اسعارها رخيصة..وبالمرة يساعدوا فى بناء المستشفى الجديد بشارع 61 ..
و كدة نكون ضربنا 3 عصافير حجر ..


#321601 [عبد الرحمن]
0.00/5 (0 صوت)

04-02-2012 11:57 AM
يا أستاذ، الأمثلة كثيرة
خذ الخطوط البحرية باعوا 15 باخرة من 17 ، و الاتنين الباقيات في الطريق، وكل مرة يبيعوا واحدة يقولوا قديمة و حنشتري واحدة جديدة إلى أن بيعت 15 و لن نشاهد أي عملية إحلال، و غيرها كثير و كثير. ديل ناس ما عندهم حرمة لأي شيء. أماسؤالك عن الحيوانات، أكيد اتباعت، مش هم بيقولوا لينا إنه الله حلل البيع و حرّم الربا، يبقى "رباية الحيوانات لزومها شنو. و صحي أخبار "بيع" خط هيثرو شنو؟


#321589 [ود الحاجة]
0.00/5 (0 صوت)

04-02-2012 11:49 AM
"أموت واعرف حيوانات (جنينة الحيوانات) مشت وين؟ شفتو ليكم إعلانات في الصحف عن بيع (أفيال واسود)؟"

الجواب: المسؤولون عندنا مشاعرهم "رقيقة" جدا فارجعوا كل الحيوانات التي كانت في الحديقة الى أوطانها الطبيعية في الغابات و المحميات رفقا بها!!!! ومن هنا و رايح كل قرد يطلع شجرته......... طبعا لا أقصد شجرة المؤتمر

بعض البشر يتمنون لو كانوا ....في الحديقة!


ردود على ود الحاجة
Sudan [ابوخطاب الابنوسى] 04-02-2012 01:25 PM
جبرا وودالحاجة اللى بتسألوا من الحيوانات راحت فين ؟ اقول ليكم الحيوانات لا اتباعت ولا حاجة! الحيوانات دى قاعدة وكل يوم بتشوفوا فيهم..
وكل قرد يطلع شجرة ( القالها ودالحاجة )


#321588 [سها]
0.00/5 (0 صوت)

04-02-2012 11:47 AM
بتعجبني عبقريتك دي بتجيب الكلام دة من وين؟؟؟؟؟؟؟؟؟؟؟ عرفت...... من الوجع الموجوعينو كلنا


ردود على سها
Saudi Arabia [mohd] 04-03-2012 07:51 AM
أموت واعرف حيوانات (جنينة الحيوانات) مشت وين؟ شفتو ليكم إعلانات في الصحف عن بيع (أفيال واسود)



اكيد ذبحوها واكلوها يكونوا دايرين يجربوا لحوم الضواري عشان يخوفوا الناس


الفاتح جبرا
الفاتح جبرا

مساحة اعلانية
تقييم
10.00/10 (10 صوت)





الرئيسة |المقالات |الأخبار |الصور |الفيديو |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة