حميد حزن بلدين
04-02-2012 04:15 PM



محمد علم الهدي
[email protected]


حميد حزن بلدين!!

تبكيك في الدار ليها ست

غادرت لي سوح البلاد

قبال تشوف شبالا حت

رجفت يمين قبرك جفون

جلل وشيها الانكسار

والسره قالت وا ودار

طيفين مع المساء غازلوك

بلدينا في الدغش الامس

شقت جيوبا علي رحيل

ياضو شبابيك البيوت

كيفن تفوت ؟

وات قدموك يادوب عريس

ماضقته فال ام

العروس

راشد معذب بي وراك

والسرة بت عوض الكريم

مكلومه البال و الفؤاد

قطعت عهود مرقاته تب

حدت علي الفجر الرحل

قبال يواعد الامسيات

والشول مكتحه دابا جات

تحلف تقول غنايي مات

شمس المشاعر غائبه تب

يازول متكن في الفؤاد

غطوك شريانين لذاذ

ياروعه رائعه والتذاذ

ماات اخدته من الالم

اثقالو بي قرشين ادب

والامهات في عيدا

تبكيك مرتين

حميد مفارق كم صديق؟

حميد مشيتا بدون اذن

تبكيك عازه واب دماك

فاقداك رمالنا وطين ابوك

فقدك عصيفير العصر

كان لي قريييييب بلهج معاك

تفديه كنته بدم غناك

قمريه تحكي مع النجوم

تهديها لي زهرة صباك

توريها عشقك لي سما

الحريه

مطروحة الجبين

ارويت لبنوتنا العطاش

ونظرنا للسموات طشاش

ورجع بصرنا

براك حسير

وشعرك يرف بي وراك

كسير

ماقنعنا بالنذر اليسير

حميد:سؤال!!

كملت مشروعك خلاص؟

وزعتا ادبك للصغار

سددتا لي دين الوطن!

وصيت كبارنا علي الصغار!

وصيت وطاتنا علي

الخريف

وصيت نخيلنا علي العزيف

وصيت رياحنا علي

علي الفروخ

وصيت رمالنا علي خطاك

مايشيلا زيف؟

ومشيت موادعنا الله

ياتربة وفا

فارقتا صافيت للصفا!

ودعتا شتلات ليك جداد

ودعتا نوري وتنقسي

ودعتا توتيل والطيور

ودعتا اطفال الطريق

ودعتا عمال السكك؟

ودعتا زملان الشقا؟

ودع خلاص المتعبين؟

ودعتا احزان السنين؟

ودعتا لي حضن الوطن؟

خليتو ساكن فيو انين

خليتو يغزل دممعتين

منسوجه من المو

وبكاه

ودعتو هل خاب فيك رجاه؟

ادب انتباه

شعر استعد

ارضا محنه وخلف نور

ننضم مع الفي اخر الفريق

ينعالنا ركازتو ويئن

يقلد رفاقتك والصديق

رافعين اياديهم شراع

رافعين لي شارات الوداع

يا درقه فقدت سيف

صقيل

ياحلبه فاقده حصان اصيل

في السكه مايغشاهو ضر

ياحاجه امنه اتصبري

الموت نقد راجلك خلاص

يتم ولادنا ورملك

ودع لي نيلك وهملك

حميد اقيف اسمع

وصيه والتماس

صدق قصائدك للجميع

وقع مع الوطن

اتفاق طرفيهو ادبك و

العيال

شاهد عليهو النيل

براه

ترجع بلادنا بلا شروط

مصيونه زي صحن ازهري

لاشق تعانيه ولا طق

لافيها عودا داخلو سوس

مسقوفا بي ريش النعام

مسقيه بعرق الجروف

شاقيها نيلنا بلا وسيط

ونخيلنا غازل للجنوب

والقسمه مقطوعة الطرا

نديها رصاصتين طلاق

ونقص نقيصتك نجمعو

ونضرب سنين الهم طشاش

ونعود لالفتنا وحنين

نودع احزان السنين

ماسكين كتابنا ومسطرين

نبيهو سودانا الامين

لاوسطا لاتجار حروب

لاشرزمات تفتق رتق

لا قعقعات لا قبعات لاكر و فر

لادانه لامدفع يهز

لاطائره تقصف طفلتين

لاوالده ثكلي ولا كروب

تعليقات 1 | إهداء 0 | زيارات 752

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#322480 [بشير الحاج البشير]
0.00/5 (0 صوت)

04-03-2012 10:31 AM
يديك ألف عافيه كفيت ووفيت وفعلا حمَيد حزن بلدين.


محمد علم الهدي
مساحة اعلانية
تقييم
0.00/10 (0 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة