الرندوق الإنقاذي
04-03-2012 11:23 PM

سلام وتحية لكل قرآء الراكوبة ,

الرندوق الانقاذي

أسماء الجنيد
ــــــــــــــــ

طبعاالإنقاذ في أي شيء مشاترة ، وإتجلت وفاتت الكبار والقدرها ،خاصة في الملافظ السوقية المحتكرة خصيصا لهم .
غايتو وبصراحة تستحق بجدارة جوائز اللفظ العاجز ،وتستاهل نديها الكأس في كلام الرندوق في المصطلحات السوقية المنحدرة من القاع والبتشبه الإنقاذ وناسها بس ، حقتهم براااهم يحمدوا سيدهم ,,, طبعا عبارات كتيــــرة ومشتتة في السهلة لو بديت اعددها ليكم هنا،الراكوبةالمااااهلة دي بتضيق بيها , والغريبة حتى لغة الشارع الحالية في البلد بقت على شاكلة ما يأتيهم من كبار رجالة الدولة طويلي اللسان وقليلي الإحسان , يعني لو طولت من البلد وجيت إجازة وبديت تسمع في لغة البلد ومصطلحاتها في البيت والمدرسة والشارع والجامعة للأسف والمكاتب الحكومية وبيوتات الأعراس والبكيات كلووووو بقى رندوق منحدر من ناس الإنقاذ وشبهم !! تصدقوا لو جمعناها تعمل مجلد كبير عريض , منها على سبيل المثال لآ الحصر الآتي :
الزراعنا غير الله يجي يقلعنا ، الحس كوعك ، الجغمسة ، يعفصها تحت مركوبو ، وكترتوا المحلبية ، وفي خطاب رسمي لي رئيسهم قال (الحشرة )الشعبية !! للحركة الشعبية!!
وامس ختمها ليهم والي جنوب كردفان المطلوب دولياللعدالة وللأسف بقولوا عليهو مولانا !!!!
معقولة بس مولانا بقت هاملة ساااااااي؟ يوزعوها لي كل من هب ودب ؟
ياتو مولانا البقول جنس كلامو الرصاهو امس في خطاب برضو وبي عنصرية عجيبة وملافظ ما تسمعها من شماشي ما شاف المدرسة في حياتو .
عباراته الرددها ولقطتها قناة الجزيرة وفضحته بيها، وشالتها كل الأسافير صورة وصوت ،حرقتو طبعا وقام ينكر فيها من دغش اليوم برا خجلة، فاكر روحو الناس عبط وهبل فعلا وممكن يقدر ينكرها زي ما قالها ببساطة !
ومفرداته العجيبة هي : أمسح ، اكسح ، ادرش ، قشوا ، اكلوا ني وما تجيبوا حي،ما عندنا مكان ليهم !!!! ده والي في حكومة البلد وبنادوه مولانا !!!! حكمتو باااالغة!!!
أكلوا ني دي يا جماعةمعناهايعضعضو عديــــل ويقرش عضاموا , عالم سعرانة مافي إتنين تلاتة!
باقي لي غايتو إن شعبنا لسه فضل منبطح كدي ومنبرش والموت والقتل والتهديد والوعيد مصبحوا وممسيهو , تاني بقبلوا علينا كلنا من طرف، وتبقى خطاباتهم فيما بينهم ، وطبعا بقصدونا نحن الزهجناهم وبقينا ليهم زي الشرا في الجلد نقرص فيهم وقدرما نفضونا ما مشينا منهم .
بالجد أتوقع يقولوا لي ناسهم " يلا ابدوا من طرف ، لموا الكرور ودوه الخور , اجمع ، ابطح اطلع ، أعفص ، ابدأ بالفقرة والعنقرة وافجخ جوة وبرة ، أكفت الجضوم وابعج البطون .وفقعوا العيون ،تفوا اللحم الحي ,شلوت في الضهر ، وأم دلدوم في القدوم ،لامن قيامتهم تقوم !!!

عليكم الله يا جماعة ديل بشر يتحكروا في سدة الحكم وفي بلد زي السودان لمدة 22 سنة ؟؟؟
الشعب اتحملهم كيف دي المحيرة العالم كلو!!!والمصيبة كلـــــهم صنف واحد وطبعهم غالب التطبع .
الشكية لى الله والرسول الناس ديل من يومهم ما فيهم زولا نصيح ، ولا كلاموا مرتب كلام ناس يفترض إنهم يحترموا الشعب القاعدين يتكلموا بي إسمه في كل المحافل !!! اتهرينا من الدراب الرامننا بيهو الجماعة البقولوا عليهم قيادات البلد كل يوم وساعة ، (والنصيبة) كمان قالوا شايلين شهادات جامعية !!!
ياربى الشهادات دى حقت شنو؟ فى ابداعات فن العوارة !!! والا الهرطقة السوقية !!! والا البجاحة الفى الفاضى !!!
والا ياربى علية قومنا ديل فاكرين انه الانسان السودانى ما بفهم الا اللغة البلدية دى!!!
وكان دي ولا دي .. ولا التانية تبقى الطامة الكبرى،الاولى عرفناها لكن التانية بتندرع ليهم فى رقبتهم ، لانهم هم الحولوا معظم الشعب السودانى خاصة الجيل العاش وترعرع في زمنهم ،حولوه لى انسان جاهل أُمى ساذج سطحي ما بفهم اللغة العربية ، وإن كتبها يكتبها بأخطاء إملائية فادحة ومخجلة لا يكتبها طفل في المدارس الأولية أيام ابواتنا الله يرحمهم (الإبتدائي حالياً) ، يعنى زى ما دخل الجامعة خرج منها .. وكمان زى ما بقولوا إخوانا المصريين في مناسبات لا داعي لذكرها .. (يدوك الواد جحش ... طلعوا حمار)
وإلا امكن ياربى الناس ديل تكوينهم النفسي المليء بالحقد والعقد الاتراكمت سنين طويلة وهم يعافروا دايرين يصلوا لى كرسى الحكم دا وما قادرين لحدى ما اتشبعوا كراهيه ضد الشعب المسكين لأنو حرمهم من الوصول للكرسى عبر الانتخابات الحرة النزيهة لعقود طويلة ، ولما وصلوه بالقوة والتزوير والخج بقوا دايرين يتفشوا فيهو... بادروا أولا باذلالو ، وحرمانو من التعليم ، وإهانة كرامتو وإستباحة حرمة بيتو وشرف عائلتو ، وإنتهاءاً بتشنيف آذانو بلغة سوقية ضحلة لأنو عارفين أن مفردات اللغة العربية مافيها تعابير تفش الغبينة وتوصل احساسهم باحتقار الغير زى الالفاظ الشماشية ،، وعشان الشعب دا يفهم اللغة دى لازم (يجوهلوهو) إن صح التعبير بمعنى يعجنوهو مرة تانية ويطلعوهو جاهل وغبيان وعلى عمى عينو عشان يقدر يفهم لغة التخاطب السمجة البطلقوا فيها شمال يمين .
طيب ... لو كان الناس ديل قاصدين الشعب السودانى دا عديييل كدا .. الناس البتابعو الفضائيات السودانية من كل دول العالم واجناسها ذنبهم شنو !!! ولو جات إهانة بتجي للشعب بي سببهم هم، الشعب ذنبوا شنو ؟ .. تعرفوا ... جيرانا العرب الحوالينا أكيد داخلهم شك انو ناس السودان بدلوا لغتهم العربية بي لغة تانية مبهمة وغير مفهومة ، بدليل ان قياداتهم بقوا يخطبوا فى المنابر بى نفس اللغة الما مفهومة ليهم ، لاهى عربية ولا غير عربية . يعنى حيرتوهم ،، يصنفونا في ياتو خانة !!!
ارحمونا ياعالم ، كفانا فضائح على الملأ ، بقينا نمشى ورأسنا فى الواطا ، ما قادرين نتحمل عبارات السخرية من كل صوب، والنظرات التهكمية الكلها استخفاف بى سودانيتنا الكانت تساوى دهب على مدى سنين ولسان حالهم يقول (إذا كان رب الدار للدُف ضاربا ... فشيمةُ اهل البيت كلهم الرقص)

متاوقة
ــــــــــــ
نطالب بمترجم فورى يرافق مسئولينا في خطاباتهم الإرتجالية،،،
كما نرجو من الإخوة والأخوات قرآء الراكوبة إضافة ما لديهم من ما سمعوافي ارض الواقع أو عبر الفضائيات من لغة رندوق الإنقاذ المرتجلة لكي نوثقها لهم .. والرهيفة التنقد
ودعتكم الله

تعليقات 12 | إهداء 2 | زيارات 2434

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#323708 [القاص الفيلسوف]
0.00/5 (0 صوت)

04-04-2012 02:45 PM
الحمد لله على كل حال .
وأستغفر الله العظيم اللهم صلى وسلم على الحبيب المصطفى الذي لم يضرب يوما إمرأة ولا عبدا ولا طفلا إلا أن يجاهد في سبيل الله . اللهم إرضى عن صحابته الكرام الذين عندما يتكلمون يخرجون الدرر والحكم ويضربون المثل العليا بأنفسهم فيقول عمر بن الخطاب : ( من أين لي ثمن الحلوى فأشتريها ؟. ) ويأتي سلمان الفارسي وهو يتقدم حمار يحمل عليه أمتعته لأهل المدينة التي أمر عليها .
السياسيون السودانيون حتى الأن أنا لم أستفد منهم شيئا لم أقراء لهم كتابا شيقا ولا كلاما مفيدا .


#323544 [hanankokoabas]
0.00/5 (0 صوت)

04-04-2012 12:37 PM
البشرية الله يضرها ديل اوباش ياكلوك زندية ويغلطوك فى اسمك بس الحمد لله


#323386 [معجم الانقاذ المخربش]
0.00/5 (0 صوت)

04-04-2012 10:10 AM
صدقتي ا بت الجنيد كلامهم كتر ( بضم الكاف) وشعاراتهم سقطت كلها واثبتت فشلها من زمن الامريكان ليكم تسلحنا اي امريكا بتشرب فيهم ( عصير جزر ) وخبطة تحت الحزام( بالعصا) عصرتهم عصر صاح خلت البشير يهضرب في اي محفل ( الحصار الاوروبي والامريكي ) انت وكت ما بتقدر امسك عليك لسانك امريكا بعيييييييييييييييده مالك بتهبش فيها سالتك فتحت ليك باب وصعب عليك سـدّه ..

الابتلالآت وحركات وبركات وفضاءات .... كل كلامهم وخطبهم بنتهي بي ( ات) في مكلنها وغير مكانها ا عارف العاجبهم شنو فيها ومعاها رفع الاصبع بقت شعار واضح عندهم وسمة .

وكان كدي نجيب لي ورقة وقلم اشارك معاكم في معجم الانقاذ

مع السلامات


#323352 [Welli]
5.00/5 (1 صوت)

04-04-2012 09:36 AM
اولا : الراجل ده (بغض النظر عن الكلام القالوا) بتكلم مع عساكر و ليس أساتذة جامعات ! و من الاحسن ليك ما تعرفي لغة العساكر , لأنو الكلام البقول فيهو الراجل ده قمة الأدب بالنسبة لحاجات ممكن تسمعيها في العسكرية ! يعني كدي في رأيك مفروض يقول شنو ؟؟ فانني من هذا المنطلق , أطالبكم بالتقدم و الثبات , و أن تأتوا لي بالعدو صريعا لا أسيرا ....الخ !! انتي جادة يا الأخت ؟؟
تانيا : مفروض تعايني لمستوي لغتك إنتي في الأول !! مستوي ونسة نسوان في الحلة , أو أقل كمان !!


#323345 [ود الجد]
3.50/5 (4 صوت)

04-04-2012 09:27 AM
مرةالسيد الرئيس في خطاب ليهو بالبطانة قال (نحن والله كديس مابنسلمو ليهم عشان ياجماعة الكديس دا ممكن نذبحو ونستفيد من جلدو نعملو مركوب )... زميل لبناني لي بالعمل سألني ايش يعني كدبس ومركوب .. وطبعا استعنت بجميع المعاجم التي أعرفها والتي لا أعرفها في ترجمة الموضوع ...
وقد نسي سيادته ان الله ادخل امرأة النار في هرة عذبتها فما بالكم بالذين ينادون بذبحها عشان اعمل بيها مركوب.... جن اركبك انشاءالله


#323295 [نزار]
0.00/5 (0 صوت)

04-04-2012 08:38 AM
الأخت اسماء الانحطاط اللغوي يفسر ما وصلنا اليه من درك في كل مناحي حياتنا فحرامي القلوب تلب واضربي بي مسدسا لم تأت من فراغ.هذا زمن نافع وهارون والبشير ولا حول ولا قوة الا بالإله.


#323247 [شيخ شريف شيخ احمد]
0.00/5 (0 صوت)

04-04-2012 07:43 AM
يا ناسنا وأهلنا الطيبين انا من القاعدين برا السودان عجبت واندهشت من المفردات اللي شفتها وما عرفت معناها اللي قالتها بت الجنيد نقلآ لما يدور في الساحة السودانية وداخل الحياة الأجتماعية للأسف وكامل الأسف شئ يسئ لنا كـ سودانيين ومن قبل كـ مسلمين نعتفد بل نجزم أننا أقرب من تحدث ونطق العربية ألي هؤلاء الذين يصدرون شرهم إنتبهوا!!! لا ترتكبوا جرائم للأجيال القادمة تحسب لكم ولا تغتفر


#323202 [مستغرب]
0.00/5 (0 صوت)

04-04-2012 05:34 AM
يا اخت اسماء قيل تحدث لااعرفك وهاهم تحدثوا


#323187 [ود الجنيد]
0.00/5 (0 صوت)

04-04-2012 03:40 AM
اموت و اعرف جبتى الرندوق والكرباوى دا منين ؟؟ ام تراك يوميا فى المنطقة الصناعية مع الهكرة بتاعتك.. عموما بخصوص اهلنا المكنكشين فكل ينفق مما عنده وكل اناء بما فيه ينضح ..
فلا يغرن بطيب العيش انسان لكل شئ اذا ما تم نقصان
( تلك الايام نداولها بين الناس)
وليتهم لو يعلمون ان لو دامت لغيرك ما آلت اليك


#323184 [Che Guevara]
0.00/5 (0 صوت)

04-04-2012 02:58 AM
وإلا امكن ياربى الناس ديل تكوينهم النفسي المليء بالحقد والعقد الاتراكمت سنين طويلة
YOU GOT IT


#323175 [nono]
0.00/5 (0 صوت)

04-04-2012 02:07 AM
انتى نسيتى البشير لما قال (شكارتا دلاكتا )


#323139 [عاشق النامير]
4.50/5 (2 صوت)

04-04-2012 12:18 AM
انا طبعا محتار فى كلمة وااااااااااااااحده هى كلمة اكسح
1- الكسح يا مولانا خشم بيوت انت قاصد ياتو؟
2- فى كسح فى المدن وده فيهو عربات و بتقيف امام شقات(جمع شقق)
3- و آخر قروى خالص ده كدارى
4- وثالث ده زى خط هيثرو و كان مغالطين اسالوا ساخر سبيل
5- ورابع بتاع (كلاب السره) و الما عارف كلب السره نرجو ان يتصل
6- و خامس و ده ما بقولوووووووووووووووووووووووووا


#323111 [عبد الله]
4.00/5 (1 صوت)

04-03-2012 11:37 PM
يا ناس الراكوبة مسؤولين من الخير وين أختناشريفه شرف الدين طالت غيبة قلمها طمنونا عليها لعل المانع خير؟


أسماء الجنيد
أسماء الجنيد

مساحة اعلانية
تقييم
10.00/10 (3 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة