يوم الكسوف العظيم ..!!
04-08-2012 12:54 PM

حديث المدينة

يوم الكسوف العظيم ..!!

عثمان ميرغني

أعلم أن كثيراً من القراء ربما يحبطهم ويغضبهم تأجيل نشر ما وعدناهم به أمس.. ليوم غد بإذن الله.. لكني -والله العظيم- ما قررنا التأجيل إلا لقناعتنا أنها ستضيف للمعلومات التي سننشرها وتمنح (الحقيقة) مزيداً من الإضاءة.. وعلى كل حال غداً لناظره قريب..!! ينتهي اليوم الميقات المضروب للجنوبيين في دولة السودان.. وابتداءً من غد يصبح وجودهم غير شرعيّ.. واحتفلت بذلك جهات (وصحيفة بعينها) رغم علم الجميع أن الجنوبيين الذين لا زالوا في الشمال لا هم غرباء ولا أجانب.. وأن مطالبتهم بتوفيق أوضاعهم ضرب من المستحيل في ظل الوضع الحالي لدولة جنوب السودان التي لم تتوفر لها بعد مقومات الاستقرار المدني والخدمة المدنية وبطاقات هوية لمواطنيها.. وهو وضع طبيعي لدولة ناشئة لا تزال تبني في مؤسساتها. في بلادنا الآن مئات الآلاف من المقيمين بصفة غير شرعية.. خاصة من جارتينا الشرقيتين.. فما من بيت في المدن السودانية إلا وفيه عمالة منزلية من جيراننا.. وما من أحد في الدولة أو المجتمع لا يعلم أنهم يخترقون الحدود بوسائل غير شرعية .. ويدخلون المدن ويعملون فيها وفي مختلف المهن والأماكن.. دون الحصول على التأشيرة أو التراخيص الرسمية .. ومع ذلك يتركز الاهتمام الرسمي وبعجلة على إنهاء إقامة الجنوبيين في الشمال. التصريحات التي صدرت من كبار المسوؤلين. وآخرها ما قاله الوزير أحمد كرمنو (الجنوبيين ديل كان مشينا ليهم ولا ما مشينا ليهم.. يا هم في طينهم دا ما بتغيروا).. وهو تصريح أمام الإعلام وفي لقاء عام مفتوح.. تكشف إلى أي مدى النظرة لقضية العلاقة مع (شعب) دولة جنوب السودان محشوة ببارود العلاقة المتفجرة مع الحركة الشعبية منذ كانت ثاني اثنين في حكم السودان خلال الفترة الانتقالية وقبل إعلان انفصال جنوب السودان. النظرة الحصيفة للمستقبل لا يجب أن تغفل أن دولة جنوب السودان لايمكن جرها بحبل بعيداً عنا لنعيش بمعزل عن أية ارتباطات بها.. هي الدولة الأهم بالنسبة للسودان من كل الزوايا.. تاريخياً كانت جزءاً من السودان منذ أبد الدهر حتى لحظة الانفصال المشوؤم.. واجتماعياً هم بنو جلدتنا وإخوتنا رغم أنف منبر السلام العادل.. وجغرافياً هم الجار ذي القربى.. بأطول حدود بين دولتين في القارة الأفريقية. من الضرر أن يقيم الإخوة الجنوبيون في وطنهم السودان لحين ميسرة من أمرهم.. ما وجه العجلة في صافرات الإنذار وأبواق التحذير المحتفية بطردهم.. والمتوعدة بعودة (الكشات).. ليبتهج البعض برؤية الدفارات في الشوارع وعليها إخوتنا الجنوبيون منكسي الرؤوس وهم يطردون طرداً من أرض كانوا جزءاً منها وفيها مدى التاريخ. رحم الله شاعرنا إسماعيل حسن الذي قال في رائعته الشهيرة: (بلادي أمان بلادي حنان وناسا حُنان.. يكفكفوا دمعة المفجوع.. يحبوا الدار..يموتو عشان حقوق الجار).. وأي جار.. الجار ذو القربى..!!


التيار

تعليقات 20 | إهداء 0 | زيارات 4286

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#327607 [Zawzaw]
5.00/5 (1 صوت)

04-08-2012 11:19 PM
يا عثمان يا كوز يا منافق ... انت منافق لتحقق علامتين من علامات المنافق واحد انت تكتب فيما تكتب و انت تعلم انك تكذب فيما تكتب و ثانيا انت توعد و تخلف فيما وعدت فما الفرق بينك و بين من وعدوا هذا الشعب المسكين بأن هنالك مصنع ستدور ماكيناته في يوم كذا و اخلفوا ميعادهم مرارا و تكرارا. لن ينتظر احدا منا ما تلفظه من ترهات لاننا بكل بساطة لدينا عقول و لا نقبل ان تهان عقولنا لا منك و لا من امثالك.


فيما يتعلق بقصة مصنع السكر التي تريد ان توهم بها بسطاء هذا الشعب ممن يعتقدون ظنا انك سوف تكشف لهم ما حجب عنهم، فعليك ان تعلم ان هذا القصة الحزينة قد شهدها عشرات العاملين في المشروع ان لم يكن المئات و اغلبهم يعلم تماما من هم المسؤولون عن هذا الفشل في تشغيل المصنع بعد عشرة سنوات كاملة من تاريخ بداية العمل فيه و هم على حسب ترتيب مسؤوليتهم الجماعية : محمد المرضي (مدير شركة سكر كنانة) ثم يأتي من بعده حسن ساتى (مدير شركة سكر النيل الابيض) من بعدهم جلال الدقير (وزير الصناعة الاسبق) ثم اخيرا عوض الجاز (وزير الصناعة السابق).


اي قصة او حبكة او حتي شفرة سوف تأتي بها لا تحمل هؤلاء المسؤولية الجماعية عما حدث ..... اوريك تعمل بيها شنو؟؟؟


#327558 [واحد]
0.00/5 (0 صوت)

04-08-2012 09:55 PM
عثمان !!!!!!11!!!!!
الدار دار ابونا والغرب يطردونا ,’ علي جميع المتعوربين لملمة حاجاتهم والخروج من السودان


#327539 [ABUWAGAAR]
0.00/5 (0 صوت)

04-08-2012 09:11 PM
نلف يمين :تلف شمال دايما ننصح فيك ماتكتفى برمى الخبر ساى ورينا المفروض شنو اها قول ماركبوهم الدفارات يقعدوا سااااااااااااى سمبلا ياخى البلد امكاناتها ضعيفة وخدمات مزدحمة وما مكفيه اهلها واسماعيل حسن كان بيغنى كدا لما كنا بخييييييييييير.عموما فى سياسة انت ماعارفها ممكن الحكومة بتشاغل فى حكومة الجنوب عشان تكسب رصيد فى المفاوضات اسى داير تقول لى قلبك مع الجنوبيين؟بكرة ادينا ما وعدتنا بة


#327519 [بت الخرطوم]
5.00/5 (1 صوت)

04-08-2012 08:46 PM
راجع نفسك كل الردود ضدك اصبحت مكشوف لو كنت مكانك لاعتزلت الكتابة وامتهنت هندسة وصيانة الحاسوب وانسحب بكرامتى من كتابة المقالات التى لاتجد قبول عند القراء37


#327513 [الرشيد]
5.00/5 (1 صوت)

04-08-2012 08:38 PM
يجب ان لاننسي الجانب الناصع من تاريخ ابناء جنوب السودان حيث عملوا مع اخوتهم من الشمال قبل وبعد ظهور الحركة الشعبية في كل نواحى الحياة وخاصة فى القوات المسلحة الباسلة وحيث كانو فى قمة الوفاء ولم يخونوا قسم القوات المسلحةو قاتلو جنباالى جنب عندما كانت الحرب فى عنفوانها وفاءا لوحدة السودان الوطن الواحد وعليه يجب علينا ان نعاملهم وفاءا بوفاء وان لانتعامل معهم بانفعال بل بكل اخوة وان نعكس لهم سماحة الاسلام لا كجريدة البوق والحقد الدفين التى كانت السبب المباشر لتقسيم السودان جريدة الانتباهة العنصرية والتى ترويج حتى تاريح اليوم 14/4/2012 للعنصرية البغيضة وكما تعلمون ان الاسلام يدعوا للمحبة والسلام والطريقة التى اتبعها المسلمون الاوائل هى التى ادت لاعتناق اغلب قبائل السودان الاسلام والطريقة التى تتبعها الانتباهة الان سوف تؤدى الي اثارة كل قبائل السودان شمالا شمالا وشرقا وغرباوغرباوجنوبا وغربا للثورة الشاملة ضد العنصرية والمحسوبية التى تتبناه الانتباهة بامتياز وهي تمارس الان علي كل المستويات وعليه يجب ان يغير الاتجاه العنصري البغيض والا الطوفان


#327438 [fai]
0.00/5 (0 صوت)

04-08-2012 06:05 PM
مكتوب علي السودان ان يظل هكذا ابد الدهر


#327412 [ابوطاركى]
5.00/5 (1 صوت)

04-08-2012 05:21 PM
كضاااااااب عايز تضمن البيع الليله وبكره, وكل يوم تأجل فى القصه عشان توزع جريدتك البايره , والله لو ما فرضت نفسك علينا فى الراكوبه ما كان قرينا مقالك .


#327402 [محمد]
5.00/5 (1 صوت)

04-08-2012 05:05 PM
اسكت


#327382 [محمدعبدالوهاب]
1.00/5 (1 صوت)

04-08-2012 04:39 PM
يا ايها الرجل السخيف..بطل الحنان بتاع النسوان دة ..نحن لا نظلمهم..كل انسان لازم يتحمل نتائج قراراتو..وبعد دة مامطلوب منهم غير تسجيل بياناتهم والبقاء بادبهم..داير اتكتر من كدة شنو


ردود على محمدعبدالوهاب
Saudi Arabia [واحد] 04-08-2012 09:59 PM
شكلك كده =عربي = يا اخ ما تمشي بلدك جزيرة العرب = ولا اقعد ب أدبك البلد دي اسمها السود اااان مش العربان


#327351 [الحالم]
0.00/5 (0 صوت)

04-08-2012 03:58 PM
ندعي لاسلام و العروبة والقران ليس نصوص قرانية تقراء ويكون مكانها المساجد والمنابر ولكن الدين المعاملة كما في قوله تعالى (طه ما انزلنا القران لتشقي) اما العروبة مروءة وكرم واخلاق وما جاء الاسلام الالكي يتمم مكارم الاخلاق واالذين يحرضون على الفتنة والكراهية ستردت عليهم اجالا اما اجلا


#327347 [ود البلد]
5.00/5 (1 صوت)

04-08-2012 03:53 PM
يا سيد عثمان ميرغنى من قال لك انه سوف يطردوا او ينقلوا بالدفارات لماذا تشيع هذا الفهم الخاطئ و انت رئيس تحرير ، الحكومة ذكرت انه يتعين عليهم توفيق اوضاعهم يعنى بالعربى لازم يكونوا مسجلين و لديهم اوراق ثبوتية و لن يطردوا بأى حال من الاحوال حتى لا يحدث ما يسمى بفئة البدون فى السودان و لكنهم اخوتنا اولا و اخيرا فكل اجنبى يعمل فى دولة يجب ان يكون معروفا و لديه مايثبت هويته و لا ارى مقارنة بمن يعملن فى البيوت و انت تعلم انهن يدخلن عن طريق التهريب و فى بعض الاحيان تقوم الحكومة باعادتهم الى بلدهم .


#327336 [ابو عاليه]
0.00/5 (0 صوت)

04-08-2012 03:38 PM
يا جماعة الجنوبيين ديل اختاروا الانفصال بنسبة 98% أي بمحض ارادتهم وتحقق حلمهم في إنشاء دولة ديمقراطية فلماذا لا يذهبون إليها .
كفاية عاطفة فارغة
سكان الجنوب ليس هم من أولويات حكومة الحركة الشعبية


#327331 [الزول الكان سَمِحْ]
5.00/5 (1 صوت)

04-08-2012 03:33 PM
يا عثمان ميرغنى.... أكرر

لييه سحبت الموضوع بتاع (التيار ليكس تكشف تفاصيل فضيحة سكر النيل الأبيض )
http://www.altayarnews.net/shownewstxt.aspx?cno=37625


#327326 [ابن النيل]
5.00/5 (1 صوت)

04-08-2012 03:29 PM
ياعثمان ... عذبتنا !!!
عينك في الفيل وتطعن في ضلو؟؟ياخوي خليك واضح وبلاش رمادية وكلام مغطغط !!! علي الاقل الطيب مصطفي _ رغم أختلافنا معاهو_ عندو موقف وبدافع عنو بالباطل وللا بالحق !!! لكن بصراحة انت المجهجه وماواضح وماسك العصاية من النص !!! لكن معذور والله المعايش جباااارة وأكل العيش صعب في البلد المأزوم ده!!!
مع تحياتي !!!


#327322 [عمر جابر]
5.00/5 (1 صوت)

04-08-2012 03:23 PM
إنت يا عثمان ميرغني قايل على رؤوسنا قنابير؟ ما ناس الأمن قالوا ليك جيب المستندات والورق عندك نفحصوا وبعدين نديك إذن تنشره! ألعب غيرها.
يا ريتك تلتقط القفاز وتنشر ما نشرته الراكوبة نقلاً عن حريات – خلي بالك كويس ديل جرايد إلكترونية- عن فضيحة هاي كوم والكحيمي والتقلاوي وهي موثقة حسب الوثائق الواردة في تلك الصحف الإلكترونية. مش البشير قال جيبوا الوثائق؟ يلا ورينا رجالتك وشطارتك.


#327313 [Ahmed Gamal El-Din]
0.00/5 (0 صوت)

04-08-2012 03:12 PM
أولاً :الوضع الحالي لدولة الجنوب كما ذكرت هو من صنع الجنوبيون بأيديهم بأختيارهم التصويت للأنفصال بهذه النسبة فلماذا نتحمل نحن شعب الشمال ماصنعوه وأختاروه بمحض أرادتهم. ثانياً : جنوب السودان يبادر بالأذية على جميع الأصعدة (اقتصادية - عسكرية - أمنية) وتحدثنا عن حق الجنوبيون في العيش في الشمال . ثالثا: لكل دولة سيادتها وقوانينها وليس هناك ألزم علي حكومة شمال السودان باعطاء الجنوبيون المتواجدين في الشمال جنسيات أو وضع خاص بعد الانفصال (هناك آلاف من الأجيال السودانية ولدت وترعرعت في دول الخليج مثلا هل أهلهم ذلك لاكتساب جنسية أو حتى وضع خاص؟) لا نطلب أكثر من أن يتركونا في حالنا ويدبروا هم حالهم.


#327293 [ابوشنب]
0.00/5 (0 صوت)

04-08-2012 02:45 PM
انها العنصرية ولا شي غيرها


#327283 [ahmed]
0.00/5 (0 صوت)

04-08-2012 02:36 PM
الخوة الجنوبيون لنا منهم اصدقاء و لا يعجبنا ان نراهم في وضع غير جميل ولكن هم من اختارالانفصال بنسبة عالية جدا نحن نرحب بهم ولكن بعد اتخاذ الاجراءات الصحيحة كاجانب


#327277 [ابراهيم الكدرو]
0.00/5 (0 صوت)

04-08-2012 02:30 PM
حاجة تغيظ.. ياعثمان ميرغني الجنوبيين ديل مابراهم ابونا وقالوا ماعايزننا .. طيب مايمشوا لموطن الدرجة الاولي.. قاعدين ليه.. بعدين موضوع انهم سودانيين وعندهم حق في البلد دي .. دا كلام ماموضوعي.. انتهي الامر وكل زول علي بلده.


#327241 [ابوياسين]
0.00/5 (0 صوت)

04-08-2012 01:50 PM
ياعثمات ميرغني ان الكلمة مسئوليةوعندما تخرج فهي كالرصاصة حتي ان لم تصب هدفاًلايمكن ارجاعهافعليك مخافة الله فى تقول وتكتب 0000 عافاك الله وهداك 0000


#327239 [جن]
5.00/5 (3 صوت)

04-08-2012 01:49 PM
صحافة الاكشن و الإثارة طمعآ في زيادة التوزيع على حساب المصداقية اسلوب رخيص و مبتذل جدآ.




ــــــــــــــــــــــــــــــــــــ



حملة معآ لجمع 1 جنيه يوميآ لصالح الاستاذ عثمان ميرغني كي يتوقف عن الكتابه


#327226 [الزول الكان سَمِحْ]
5.00/5 (1 صوت)

04-08-2012 01:37 PM
يا عثمان ميرغنى

لييه سحبت الموضوع بتاع (التيار ليكس تكشف تفاصيل فضيحة سكر النيل الأبيض )


#327223 [صابر]
5.00/5 (1 صوت)

04-08-2012 01:34 PM
يا باش مهندس حركة دى ما جميلة وطريقة رخيصة للتسويق الجريدة,اما موضوع الجنوب ورعاياة ف باللة اطلع منو وكفاية اصطياد فى الماء العكر.ناس قالوا ما دايرننا ,ودايرين يعيشوا مواطنين درجة اولى فى بلدهم داير تقعدون لى شنو؟!!اخبار الظافر شنو؟؟؟؟؟؟؟؟؟؟


#327214 [مؤمن]
5.00/5 (1 صوت)

04-08-2012 01:29 PM
ياأستاذ عثمان الشئ المحير هو ترك الفيل والطعن في الظل ؟؟؟ كل هذا وغيره سببه الاساسي نيفاشا وعرابها الذين تنطبق عليهم المقولة إتفاق من لا يملك لمن لا يستحق !!!


#327189 [عادل نقد]
0.00/5 (0 صوت)

04-08-2012 01:13 PM
والله لو لا اختلافكم مع الخال الرئاسي لكتبتم كلام غير هذا............
القبائل في الحدود لها وجود هنا وهنالك لماذا لا يعتبروا قبائل حدوديه ولهم حرية الاختيار ......
ماذا لو اثبتوا انهم سودانيون بالميلاد ورفعوا القضاية داخليا وخارجيا .......


عثمان ميرغني
عثمان ميرغني

مساحة اعلانية
تقييم
1.00/10 (1 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة