04-11-2012 12:29 PM

ساخر سبيل

هنود وكده !

الفاتح جبرا

ما ان تظهر على السطح قضية فساد (صدفة أو إفتتاح) وتصبح قضية رأى عام يتابع فصولها المواطنون جاذبة إنتباههم وهم يتطلعون لمعرفة (الحاصل بالضبط) حتى يصدر قرار وتوجيه إلي رؤساء تحرير الصحف والتلفزيونات والإذاعات (الخاصة طبعن) يخبرهم بأنه تقرر حظر النشر في القضية الخاصة (بالحاجة الفلانية) وبعدها تسكت الألسن عن الكلام وتكف الأعين عن القراءة ويصبح الجو ملائماً لإنتشار الشائعات وتداول (الشمارات) في ظل عدم وجود المعلومات .
السؤال الذى (يطرح نفسو) هو ما هي الاسباب التي تدفع بالجهات المسئولة الي حظر النشر في قضايا (فساد عادية) لا تتعلق بالأمن العام- أو سيادة الدولة أو ما شابه- يعنى (تقاوى فاسدة) مثلاً يحظرو النشر فيها ليه؟ أصلوا (تقاوى نوويةًً)؟ أو (مستشار) في وزارة العدل بيشترى للوزارة حاجاتا من (السوبرماركت بتاعو) أها زى دي يحظروا فيها النشر ليه؟
العبدلله يفهم أن يتم حظر النشرفي قضية ما إذا كان هنالك تحقيق جنائي (شغال) وذلك مراعاة لظهور الحقيقة كما هي دون تأثير على مجريات الأمور أو حرصاً على مقتضيات الأمن القومي أو حفاظاً على الآداب العامة أما في مثل حالات الفساد الإداري التى نشهدها مؤخراً فالعبدلله يعتقد أن تناول (الصحافة) والإعلام لها قد يفيد في كشف ملابساتها لما للصحافة والإعلام من أذرع وخبرة في تقصي الخبر (لكن كيف مع الحظر ده؟) !
لقد بدا لي ان مثل هذا القرار لا يتفق مع المفاهيم التي كفلها القانون والتي تقضي بحرية تداول المعلومات؟ مما جعلنى أسأل نفسي سؤالاً بايخاً (هل الخواجات عندهم قرار زى ده؟) .. وحتي أجد إجابة لهذا السؤال قمت بإستخدام السيد قوقل وكانت النتيجة التى جعلتني أعود مجيباً نفسي (هو لو عندهم جنس الغتغيت ده كان حالهم؟) .. مما يعني ان هذا القانون قد تم تفصيله وخياطته على يد (ترزيتنا) الأماجد !
ولعل ما يدهش تماماً هو قول البعض بأن (حظر النشر) يقع في مصلحة العدالة وعدم التأثير على مجريات التحقيق بينما لا تظهر للتحقيق اى نتائج (ويموت الموضوع) ويصبح (حمدو في بطنو) وكسرة ثابتة أزين بها مقالي !
في رأيي المتواضع إنو طالما النتيجة معروفة وهى (حظر النشر) في أي قضية تفوح رائحتها فـ مافيش داعي (كلما تظهر حاجة) تقوم الجهات المسئولة بتعميم توجيهاتها بعدم النشر (خلونا موضوعيين وواقعين) مفروض المسئولين يشتروا دماغهم ونحنا نشتري (دماغنا برضو) ويصدر قرار لكل الصحف والوسائل الإعلامية بعدم النشر او الخوض مستقبلاً في أي قضية فساد ويخلونا ساكتين سااااكت وخاتين (الخمسة في الإتنين) !
كسرة :
بعد إمتلاء مقبرة لجان التقصي برفات القضايا أقترح الإتجاه للحرق بدلاً عن الدفن (عشان نحنا بقينا هنود وكده) !
كسرة ثابتة :
أخبار خط هيثرو شنووووووووو؟


تعليقات 33 | إهداء 0 | زيارات 6144

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#332106 [الصدى]
0.00/5 (0 صوت)

04-13-2012 07:46 AM
يا جبرا بمناسبة (الشمارات) دي: قالوا اوباما سال ناس الس اي ايه عنهاقالوا ليهو: دا سوفت وير خاص بالسودانيين انسى بس ما فاضي للنت زاتو الخبر في جز من الثانية يكون انتشرّ! قام اوباما انتكر و جا السودان اول دكان وقف عندو سال سيدو: اها الشمار شنو؟! قال ليهو: و الله ما عارف لكن قالو اوباما اليومين ديل حايم بي جاي!!!!
جبرا و نستبرا


#331984 [مهاب الفاتح]
0.00/5 (0 صوت)

04-12-2012 07:28 PM
سلامات استاذى هو نحنا من الاخوة الاكارم ديل جوا نحن فاهمين حاجة مرة تعتيم اعلامى مرة حساسية الموقف برغم انوا الشعب الفضل بقى يتوقع النهايات طبعا هنودوكده بس ياربى الشفرة بتعات المصنع تكون ياهاذاته بتاعت عمك دافنشى مابعيد


#331933 [Heron]
0.00/5 (0 صوت)

04-12-2012 06:24 PM
لا اسمع لا اري لا اتكلم ولا اكتب . هذا مايريده النظام الحاكم. بعدين اصلا"فسادهم نتانة رائحته فاحت وملات الجو نتانة.


#331820 [ام الحسن]
0.00/5 (0 صوت)

04-12-2012 04:46 PM
يا استاذ خط هيثرو شنو الانت بتسأل عنو لسة...كسرتك دى غيرها بخط هجليج اخبارو شنووو(خط البترول)...الجماعة ديل خلاص وصلو مرحلة الcut down ومعليش المرحلة دى ما بعرفوهاالا الدكاترة ولو ماكنت لاحقة حلتى الفوق النار ماتحرق كان شرحت ليكم معناهاشنو ...واوع واحد من المعلقاتية يشب لى فى حنكى ويقول لى عايزة تورينا انك دكتورة يعنى


#331635 [هيثم علي جمال]
0.00/5 (0 صوت)

04-12-2012 02:27 PM
الاستاذ العزيز و الاخ الكريم جبرا وعليك السلام ورحمة الله وبركاتة شكرالك علي هذا المقلال و النقل الجزل وبيض الله وجهك ولك مني كل الاحترام و تقدير


#331300 [محمد خليل]
0.00/5 (0 صوت)

04-12-2012 11:36 AM
الهدف من حظر النشر في قضايا الفساد هو حماية المفسدين و تطمينهم مما يشجعهم على مزيد من النهب، و من غير ناس المؤتمر الوطنى يمارس الفساد؟ هم كلهم مفسدون و لذلك تسارع أجهزتهم الأمنية لحمايتهم و حماية فسادهم بحظر النشر.


#331275 [Heron]
0.00/5 (0 صوت)

04-12-2012 11:26 AM
السودان بلد غير قابل للعيش في بسبب حكومة الانقاذ والتي ما جاءت الا لتنقذ الشعب السوداني. بالله دا ما شي يحيير.بعدين سياسة الغطغطة والتغفيل والتغييب ما عادت تجدي نفعا"
كسرة.نشكر البشير وجماعتو لانهم رجعولينا الحرب تاني وساحات الفدءكمان.
الاستاذ جبر: ماااا تشوف لينا موضوع الحرب الرجعت تاني دي شني


#331251 [عاشق الحرية]
1.00/5 (1 صوت)

04-12-2012 11:15 AM
ذكرتني يا جبرا بحكاية هنود دي المنافسة التي كانت بين الزعيم إسماعيل الازهري وعمنا أحمد داؤود في الذهاب لبيوت العزاء ، وفي يوم من الأيام ذهب الزعيم للمقابر وطبعاً من غير لاندكروزر وحرس وكده ولم يجد عمنا أحمد داؤود الذي كان يتمير بالطول الإضافي مثل سيجارة الروثمان في ذلك الوقت ، وفي المساء حينما إلتقي الزعيم الأزهري عمنا أحمد داؤود كان منشرحاً بأنه قد فاز عليه وسأله أين أنت لم أرك في دافنة ناس فلان فرد عليه عمنا أحمد داؤود بروحه المرحه جيت وشلت الفاتحة سريع ومشيت لأنو كان عندنا حرق هندي من تجار سوق أم درمان، وهنا أسقط في يد الزعيم.تقول لي اللاندكروزر بي كم


#331136 [واحد]
0.00/5 (0 صوت)

04-12-2012 10:16 AM
أنا أقترح يا جبرا إنو الصحفى يلتزم بما تمليه عليه الحكومة و لكنكم أعملوا لينا عمود ثابت فى كل الصحف لتذكير الحكومة بمواضيع الفساد عشان ما ينسوا و كدا .


#331082 [بت أمدرمان]
0.00/5 (0 صوت)

04-12-2012 02:01 AM
يا عمو جبرة أنا حأساعدك فى عد الواوات. الليلة 9 واوات


#331055 [شكلى ناسى حاجة]
0.00/5 (0 صوت)

04-12-2012 01:04 AM
صديق انت مافى معلوم كلام فقه سترة كوز نفرعلى بابا كبيربطن مافى


#331047 [إبن السودان البار --]
5.00/5 (1 صوت)

04-12-2012 12:51 AM
الموضوع ياأستاذ جبرة انو ما عازينك تنشر الغسيل الوسخ ؟؟؟ وهذا يعني حاجة من اتنين يا إما انك ما بتعرف تغسل او هدومك دي شربانة لليفة ومستحيل غسلها ودا يعني حاجة من اتنين اذا ما بتعرف تغسل هدومك شوف ليك حبشية شديدة تغسلهم ليك وأذا هدومك شربانة شديد وما بتتغسل أرميها وأمشي ام فكو ؟؟؟ كسرة : أخبار حلم الأمام شنو ؟؟؟


#330914 [عبد الواحد المستغرب اشد الاستغراب!!]
0.00/5 (0 صوت)

04-11-2012 09:07 PM
يا جبرا معقول انت ما عارف ليه جماعتك00جماعتنا00جماعتهم00المهم الجماعه00 (بيقتقتوا) الاخبار ليه؟ انا أقول ليك اولا:الشعب السودانى غير معنى لا من قريب او بعيد بهذه (القتقتات)00 ثانيا: المعنيون هم الشربوا المقلب من أصجاب العقالات والطرح!! ثالثا: خوفهم من تسرب الاخبار عبر الصحف التى قد تذهب اليهم (صحبة راكب) او احد أطفالهم وهو يبحث بين القنوات عن (إسبيس تون) فيقع نظر ابوه المستثمر ويطلب منه تثبيت القناة ويعرف إنو شرب المقلب كما نشرب نحن (الحلو مر)فى عز رمضان صيفه غائظ !!ويا جبرا كما قال الشاعر (لا تهتم للايام) فبدورى أقول لك على النثق نفسه وتغنا معنافضلا (لاتهتم بالاخبار) وخلوكم فى (شماركم المغطس حجركم)0









ك


#330854 [hamid]
0.00/5 (0 صوت)

04-11-2012 07:55 PM
يونيو 2512 غنت خط هيثرو ده شنو الكلو مرة بيسال منو الزول الإسمو الفاتح ده


#330830 [ود عويضة]
0.00/5 (0 صوت)

04-11-2012 07:32 PM
في تقرير الشفافية الدولية عن الفساد 2010 احتل السودان المركز الرابع قبل الأخير(رقم 176) من (180) دولة ، وهذا افضل انجاز تفتخر به الحكومة – والنشر عن قضاياالفساد قد يؤثر – حسب فقهاء السلطة والمستفيدين - في سياسة التمكين ويتعارض مع فقه السترة والنهب المنظم للثروة لاستمرار الثورة
كسرة
ابليس خرج من السودان وهو يقول المحيرني الناس ديل يعملوا السبعة وذمتهابسم الدين


ردود على ود عويضة
United States [zaol] 05-04-2012 02:01 AM
شوف الجانب الايجابي من الموضوع على الاقل بقى اسم السودان من الاربعة الاوائل في شي


#330812 [حسن]
5.00/5 (1 صوت)

04-11-2012 07:13 PM
الاستاذ الفاتح جبرا

احسن نسمع كلام امنا الحكومة .. مافي نشر يعني ما في نشر
شوفو ليكم حاجة تانية عشان تنشروها
يا أخي انشرو الغسيل... اهو تساعدو نسوانكم .. بدل قاعدين لا شغل ولا مشغلة

بس قول لينا اخبار خط هيثرو ( القطع نياط قلبنا) شـــــنووووووووووووو؟؟؟؟


#330779 [دلدوم]
5.00/5 (1 صوت)

04-11-2012 06:21 PM
يا شيخ جبرا اخبار استقالة عميدكم البروف شمو شنو ما قال ما حا اسكت على مصادرة الصحف وحظر النشر ولا طلع كلام جرايد ولا دخل دائرة التمكين


#330750 [عبد العظيم مصطفي]
0.00/5 (0 صوت)

04-11-2012 05:51 PM
والله يا جبرا شكلو الصنف حقك غيرتوا وبقيت تخرمج شويه ... المشكلة ليس في قانون منع النشر المشكلة فيكم انتوا يا العاملين صحفين ، الصحافة مهنة لا يتقنها الجبناء واصحاب المصالح .. بالله عليك لو الواحد فيكم لمن يلقي خبر فساد ويقوم يفكوا في النت دا في جهاز امن ولا غيروا يقدر يسيطر عليهوا لكن انتو دايرين تكسبوا من اخبار الفساد ببيع صحفكم لذلك صرتم انتن من المفسدين انفسهم ولو اغتسلتوا بي موية البحر كلها ما تنضفوا . ونحن بقينا نفقد فيكم الثقة .


#330740 [اوطان]
5.00/5 (1 صوت)

04-11-2012 05:47 PM
ياجبرا الكيزان ديل عملو لينا ليالى امدرمان وليالى بحرى وحفلات واحتفالات عشان ينسونا حال البلد وقامو بثوا لينا الدورى الممتاز فى فضائية السودان ومباريات ابطال افريقيا والكونفدراليه على الشروق ده كلو ماكفى ولقونا لسه بنتكلم عن الفساد هسى جايبين لينا مطربه محترفه اسمها شيرين تبع ناس أه ونص قالو نظام غسيل مخ وتغير شويه بعد ماعرفوا فى سودانى باكى ومكسر فى منه شلبى


#330633 [زول محبط شديد]
5.00/5 (1 صوت)

04-11-2012 03:32 PM
انت طلعت (اهند) واحد فينا ياجبرا.شكلك اليوم نسيت الفهامة ولا هي ذاتا خربت من كتر الاستعمال؟! ما الجماعة ديل عرفونا ناس نفسنا قصير, و(طبعن)طيبيين وبننسي بسرعة,وعويرين بنسامح كمان في ايتهاحاجة.عشان كدا بيعاملونا بأساليب اللولوه دي... كسرة...يحرقوهاليه؟؟؟؟ احسن يبلوها ويسقونا مويتها,يفكوها لينا مع موية المواسير ,مااصلهادايما عكرانة وبالتالي حتفوت علينا طوالي زي ما فاتت علينا حاجات كتيرة ...ياخي انت اعرف منناوفاهم اي حاجةفي البلد دي ما تجرجرنا في الكلام....


#330624 [راجل المرا]
5.00/5 (2 صوت)

04-11-2012 03:25 PM
لكن انت خرقت الحظر واتكلمت عن المحظور.
الليلة كان الباب دق باليل ما تفتحه


#330566 [على الطيب]
5.00/5 (1 صوت)

04-11-2012 02:44 PM
حسبنا الله ونعم الوكيل


#330549 [المحسى]
5.00/5 (2 صوت)

04-11-2012 02:35 PM
ليـــــــــــه المعرضة ماعندهم قناة فضائية ينشروا الفساد وليه ماعندهم


#330529 [فقه السترة]
5.00/5 (2 صوت)

04-11-2012 02:21 PM
التهمة ثابتة..وحجب النشر لعدم كشف بقية السمك(الكبار)فى اى قضية فساد.. حتى ينتهى الحكم الى ذهاب المتهم الرئيسى فى استراحة محارب ومن ثم عودته مترقيا كمكافاءة لعدم كشف المستور ..


#330506 [أبو أيمن]
5.00/5 (1 صوت)

04-11-2012 01:57 PM
والله ماقلتا إلا الحق ياالفاتح . قبل يومين وفى موضوع سكر النيل الأبيض إقترحت عمل خارطة طريق للفساد فى بلادى . او يسنو فى قوانيين المرور مايعطيه الأولوليه للمرور وسط كل الزحام مثله مثل أية إسعاف أوعربات النجده ....... ماهو عيان بيان .....


#330493 [مخير]
5.00/5 (3 صوت)

04-11-2012 01:46 PM
جبرة العجيب ........عارف انا لي يومين عندي وجع ( بطون ) من الضحك ... أصلي قريت لي اعلان كدة بقول بشرى سارة للسودانيين بالمملكة العربية السعودية ..... والله العظيم قبل ما اكمل الاعلان سرحت بعيييييييييييد قلت يا ربي دا سكن جاهز للمغتربين .. لا .. يمكن اعفاء جمركي بالنسبة للعربات القديمة وكدة .. لا لا يمكن الاعفاء من أي رسوم .. المهم سرحت ولقيت الشريط بتاع الاعلان فااااااااات المهم انتظرتو والله عيني ما رمشت عشان ما يفوتني تاني .. هههههههههها يا خيبة أملي ... لقيتو بيقول ( اشترك في جوال اخبار السودان )....
هي الاخبار عليك الله فيها حاجة تسر .. نحن اصلا قاطعناها من زمااااااان عشان حبوب الضغط والسكري بقت غالية


#330466 [ابشلاليف موبايل الشيطان]
5.00/5 (1 صوت)

04-11-2012 01:32 PM
خليكم من الفساد والكلام الفارغ ده، العريس اخبارو شنو؟

هو عّرس وللا لسة؟


ردود على ابشلاليف موبايل الشيطان
Saudi Arabia [mohy] 04-11-2012 07:57 PM
العرس الفي الشبارقة ولا غيروا دا خبروا مالي السعودية وقايم بيها


#330462 [مؤمن]
5.00/5 (1 صوت)

04-11-2012 01:27 PM
الهنود مش دقسوك في مصنع السكر ههههههههههههههههههه


#330445 [asabangi]
4.75/5 (3 صوت)

04-11-2012 01:17 PM
حظر النشر دا يا أستاذ لو ما عملوه ، صفحات الجرايد حتتملى بالأخبار العجيبة من 89 وإنت ماشى ،..وعلى كدا الناس حتقضى يومها كلو تقرأ فى الجرايد ، وحيترتب على ذلك فوضى عارمة جدا...
الموظفين مش حيشوفوا شغلهم والواحد عنده 5 أو 6 جرايد..وتتعطل أعمال الناس
الراجل فى البيت ما حيشتغل بى زوجته ..الراكب فى الحافلة حيفوت محطته
الطلبة حيرموا المراجع بتاعتهم.. بيوت البكاء حتبقى بيوت جرايد وشمارات
وقت الناس حيضيع فى الطوابير قدام المكتبات..ميزانية البيت حتخرب لأنو 25% منها حيروح جرايد
أسعار الورق وحبر الطباعة حتزيد لأنو الطلب أكبر من العرض..البصات السفرية تذاكرها حتدخل السوق الأسود لأنها حتنقل جرايد بورتسودان وكوستى ودنقلا .. الناس حتبطل الزراعة عشان طابور الجرايد
بصراحة البلد بتجوط ..وأخير ليكم تكون مستورة بدل ما تبقى ماسورة


#330444 [جن]
5.00/5 (1 صوت)

04-11-2012 01:16 PM
استاذنا الفاتح جبرة
بالمناسبه عنوانك مااااا بريء وأقول ليك حاجه الفلم الهندي دا حضرناهو امبارح و كان سخيف والإخراج **** جدآ فبالله أردم لينا المخرج الهبنقه دا دغري ياااخ و قعدو لينا في علبو .


#330432 [الحال بطال]
5.00/5 (1 صوت)

04-11-2012 01:10 PM
والحل شنو طيب


الفاتح جبرا
الفاتح جبرا

مساحة اعلانية
تقييم
8.44/10 (9 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة