(السفير) و (البواب)..!!!
05-03-2012 05:56 PM

بالمنطق


(السفير) و (البواب)..!!!

صلاح الدين عووضه
[email protected]

* زميل لنا كان يحلم بأن يتم تعيينه سفيراً - (حتة واحدة) - بما يجيد من (كِسيِّر للثلج!!)..
* وفي يوم وعد زميلنا هذا كاتب هذه السطور - بحكم الجيرة المهنية - باستيعابه في منصب ما إذا ما قُدِّر له أن يضحى سفيراً..
* استيعابه في منصب بالسفارة التي ستكون من نصيبه..
* فقال له صاحب هذه الزاوية - مجاراة له في "الحلم" - إنه يريد أن يكون نائباً للسفير..
* فأجابه السفير (المنتظر) دونما تردد وهو يبدي قدراً من الجدية المضحكة: (لا، دي صعبة شوية، خليك واقعي وشوف غيرها)..
* فـ (شاف) كاتب هذه السطور غيرها وقال له: (طيب رأيك شنو في وظيفة ملحق إعلامي؟!)..
* فذم (سعادة السفير) شفتيه بإسلوب مسرحي وقال بعد برهة من التفكير : (برضو كثيرة، "الجماعة" ديل ما ح يقبلوا بيك، شوف حاجة كدا مدغمسة!!)..
* و "دغمسها" كاتب هذه السطور المرة تلو الأخرى - و"سعادتو" يتردد - حتى لم يبق أمامه سوى منصب (موظف الاستقبال)..
* وحتى هذه - للغرابة الشديدة - (تلكك) فيها السفير الذي كان يُذكِّرنا - آنذاك - بصاحب (زجاجة السمن) في القصة الشهيرة..
* وأخيراً حسم صاحب هذه الزاوية الجدل (الهزلي) ذاك مقترحاً تعيينه (بواباً) للسفارة..
* ووافق (السفير) من فوره وهو يتمتم باسماً: (بس على الله "الجماعة" يوافقوا)..
* ووافق "الجماعة" بالفعل ؛ ولكن لا على تعيين صاحب هذه الزاوية (بواباً)، وإنما على تعيين زميلنا هذا (ملحقاً إعلامياً)..
* ومنذ لحظة استلامه قرار التعيين - زميلنا ذاك - نسي تماماً (شريكه في الحلم) الذي هو صاحب هذه الزاوية..
* وما دعاني الآن الى تذكر تلكم (الملهاة) - ذات القدر من (التحقق) - فاصلٌ جديد من (ملهاتنا) نحن مع مجلس العبيد المروح..
* فقد رأت إدارة الصحيفة هذه أن تتواضع بـ (أحلام) كاتب هذه السطور من منصب (رئيس التحرير) الى منصب (مستشار التحرير)..
* رأت ذلك - إدارتنا - رغم رجاءات صاحب هذه الزاوية لها بأن لا (تتعب نفسها)..
* وتم إرسال خطاب بهذا الصدد لمجلس (السادة!!)؛ الأمين، السفير، الكاتب ، الناطق الرسمي باسم الخارجية...
* وجاء الرد سريعاً بالرفض تماماً كما هو متوقع..
* فقد (استكثر) صاحب تلكم (المناصب!!) الرفيعة كلها على صاحب هذه الزاوية محض منصب اسمه (مستشار التحرير)..
* واستلهاماً من قصتنا تلك مع الزميل الذي كان (يحلم) بأن يكون سفيراً فأضحى ملحقاً إعلامياً نقترح على إدارة صحيفتنا أن تبعث بخطاب آخر لمجلس "السادة " المروح..
* خطاب يكون فيه قدر من (التواضع) - تجاه كاتب هذه السطور - تلتمس فيه الإدارة الموافقة على تعيينه (بتاع استقبال) في الصحيفة..
* فإذا رفض (سعادة) السفير، (سيادة) الأمين العام، (حضرة) الناطق الرسمي، (جناب!!) الـ (إيه ما عارف داك!!)....
* إذا رفض (السادة!!) المروح حتى المنصب هذا بحجة (عدم استيفاء الشروط) فما من مشكلة..
* فهنالك وظيفة شروطها متوافرة تماماً في كاتب هذه السطور..
* إنها وظيفة (بواب) التي يعتز صاحب هذه الزاوية بها، وبالذين يشغلونها..
* ولا أظن أن (أصحاب السيادة والسعادة والجناب) - العبيد المروح - سوف (يرفضون!!)..
* سوف (يختشون على دمهم شوية) هذه المرة.

الجريدة

تعليقات 24 | إهداء 0 | زيارات 5642

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#355063 [سامر المدنى]
5.00/5 (1 صوت)

05-05-2012 10:51 AM
بواب حتة واحدة ياعم عوووضة؟


#355015 [Abdullah]
5.00/5 (1 صوت)

05-05-2012 10:17 AM
خلونا من العبيد مروح ... دا عارفنو اصلو هنايآ قديم. الكلام داك العايز يبقي سفير وسووهو ملحق اعلامي ...ياربي يكون منو؟ اظنو م م خ شايفو اليومين ديل طالع في الكفر.


#354541 [عبد الواحد المستغرب اشد الاستغراب!!]
5.00/5 (1 صوت)

05-04-2012 06:37 PM
يا ود عووضه الحل بسيط للغايه عليك ان تعيد القرايه من المرحله الابتدائيه كحل وسط وفضا للالتباس !! بشرط أبلاغ المسئولين فى الصحافه والمطبوعات بنتائج كل مرحله على حده تجتاذها مشفوعه بشهادة شهود من رجال عدول او رجل وإمرأتين لزوم سد الزرائع!! كده لو سمحة جرب الوصفه دى وإنشاء الله وسوف لن تندم وحتظبت معاك!! ومرد ثقتى فى نجاح الوصفه ان الموضوع سوف يستغرق مده أقلها 12سنه وحلك بعد السنين دى (يا الحمار يكون نفق او الحمار بفتح الحاء والميم يكون مات!!) ملحوظه هامه: لست فى حاجه الى الاشاره الى من هو الحمار بضم الحاء ومن الحمار بفتح الحاء والميم فهو متروك لفطنة وذكاء القارىء الكريم!!0


#354498 [ابره]
5.00/5 (1 صوت)

05-04-2012 05:13 PM
يا جماعه والله ما فاهم اي حاجه كدا براح فهمونا الحاصل لان شكله كده الموضوع كبير


#354388 [ولعة]
5.00/5 (1 صوت)

05-04-2012 02:18 PM
ما تفهموها ياخى .. فالود المروح دا لا ناقة له ولاجمل سوى تنفيذ التعليمات بالريموت كنترول كما حدث فى دراما رئاسة التحرير.. والمسكين وجدوا فيه افضل (م.ن) مغفل نافع لتنفيذ كل هذه الوظائف مجتمعة فى شخص واحد.. اذ لن يجدوا آخر يرضى بهذه المسخرة سواه.. ولا نعيدو تانى ؟؟؟؟ ولا اقولك على قول عادل امام .. سيبك منهم واشتغل رقاصة يا جدع (بس من خلف الكواليس )..


#354285 [محمد مصطفى]
5.00/5 (1 صوت)

05-04-2012 11:34 AM
فى امريكا واوروبا الناس تجاوزت المساواة السياسية والحرية السياسية والحريه الاقتصادية منذ قرن والآن العلماء يجتهدون فى كيفية تحويل الرأى العام إلى القرار العام ونحن لسع بنسلب الناس حقوقها السياسية الاولية . . . . . . .


يا ألله أنقذنا من هذا الكائن الغريب


#354160 [شحاته]
5.00/5 (1 صوت)

05-04-2012 08:38 AM
انت ياود عوضه بتحلم انا عارفك ما حتتعين فى اى وظيفه لانك ما جيت عبر لجنه الاختيار ولا اديت الخدمه الالزاميه ولا من المجاهدين وطبعا داير نفر نفرين يقوموا بتزكيتك كدى استوفى الحاجات دى بعدين فكر فى التعيين


#354045 [محمد العوض]
5.00/5 (1 صوت)

05-03-2012 11:52 PM
كمل تعليمك .. وبعدين انت كترت المحلبية شوية.. وما كل من كتب فى زاوية يكون ملحقا ثقافيا


#354011 [شكلى ناسى حاجة]
5.00/5 (2 صوت)

05-03-2012 10:40 PM
ولايهمك يا جارى العزيزفوالد الرئيس كان بواب مزرعة ابقار الخواجة كافورى ووالد النائب الاول كان بواب فى جنينة الحيوانات وسبحان الله الاثنين كان بيحرسوا حيوانات علشان كدة احفر لينا وراء مروح شكلو والده كان البواب بتاع حديقة الدندرومهنة البواب شريفة ولكن اذا كان البواب ذمته ممحوقة سوف تكون النتيجة ابناء مثل الحيوانات التى كان يشرف عليها الاباء ومثال على ذلك الرئيس والنائب


ردود على شكلى ناسى حاجة
United States [عنكبة] 05-04-2012 04:21 PM
تاسيهم بالحيوانات واضح فكبيرهم ينعت الانسان الذى كرمه الله على خلقه مرة بالثور الضخم ومرة بالحشرة ونائبه بامر باطلاق النار على هذه الحيوانات shoot to kill

United States [الثعلب] 05-04-2012 12:09 PM
عفوا لا نظلم الآباء فى ذمتهم عليهم رحمة الله .. ولكن اوافقك الراى فى اكتساب فطرى للابناء من السلوك الحيوانى مما يبدو جليا فى العدوانية والاستفراد بالسيطرة على القطيع وركوب الراس فى انخاذ القرارات المصيرية


#353983 [Shah]
5.00/5 (1 صوت)

05-03-2012 09:49 PM
يا أستاذ عووضة حتى لو تعينت بوابا فى السفارة فأنت ستكون أفضل من السفير بمقدار مليون سنة ضوئية. كمان شن لما القمرى مع السمبر؟


#353961 [هجو نصر]
5.00/5 (1 صوت)

05-03-2012 09:07 PM
دا صاحبك القال ليك عايز ليه كدة داك ! مسكين اراد مرة ان يغربل منصور خالد فنخله نخلا !وقال فيه عبدالله الطيب انه مسلاخ شيطان علي هيئة انسان وانشد هاجيا اياه
قد خانني من خلتني رييته
واباحني من كنت عمه اذودُ
ثم اردف رافعا يديه للسماء ورب السماء داعيا : اللهم ارسل عليه صاعقة !


#353934 [ما مرتاح وما مرتاح]
3.00/5 (2 صوت)

05-03-2012 08:17 PM
هذه الشخصية عاصرتها بالجامعة وتتسم بالانتهازية المفرطة مع استغلال السوانح والشواردتلبية لرغباته ولايتوانى البته في دوس كل من يعترض طريقه .... شخصية مريضة لابعد الحدود ويفتقر الى ملكة المجابهة المباشرة وغالبا ما يستقوى بالاخرين في سبيل الوصول الى مبتغاه.... ويا ودعوضة قريبا وباذن الله سوف نسحقهم وحينها ........!!!!!!!!


#353931 [garfan khalis]
5.00/5 (1 صوت)

05-03-2012 08:08 PM
مستشار تحرير في هذا الزمن الاغبر الا بموافقة هذا المروح السفير اللواء امن الخ...والتي من عجائب هذا الزمان ان يكون مسئول ياُمر وينهي في بلاط الصحافه التي تحفظ لها الحكومات المحترمه مكاسلامات اخونا عووضه اولا اخي نحنا مابنرضاها ليك تكون رئيس ولا نتها وتقدر خدماتها الجليله في توجيه المجتمعات والحكومات نحو الطريق الامثل لنهضة الاوطان والقيام بدورها المفروض ان يكون طبيعي وهو الرقابه والتبصير بمواقع الخلل وهي عين المواطن في رصد التلاعب بحقوقه ومكتسباته . اخي في مثل هذا العهد القمئ لا مكان لامثالك من اصحاب االقلام النظيفه والناطقه بالحق فكل الامكنه مملوءه بامثال الدعي ضياء بلال وهم كثر الضاربون علي الدفوف وحارقو بخور السلطه والاكلون فتات موائدها هؤلاء من ترضي عنهم السلطه وتتنعم عليهم بمثل تلك المناصب اما امثالك فتقديرهم واحترامهم عند تلك الجماهير الصابره علي الاذي والتي اليتم علي انفسكم الوقوف بجانبها وهي تحفظ لكم ما تقومون به وانت تعلم اخي ان دولة الظلم ساعه ودولة الحق الي قيام الساعه.


#353917 [سند]
4.00/5 (1 صوت)

05-03-2012 07:53 PM
" * سوف (يختشون على دمهم شوية) هذه المرة.". دة اذا كان عندهم دم اولاد ال....


#353908 [سودانى منفرج الأسارير]
5.00/5 (1 صوت)

05-03-2012 07:42 PM
برضو حيرفض ليك وظيفة البواب .. ان كنت تؤمل فى الحصول عليها يبقى املك فيها امل ابليس فى الجنه
يا اخى انت مالك دائما تحب تعكنن مزاج "بن المروح" .. ماينطق باسم الخارجيه صاح ولاّ شنو يعنى؟ كل مره ناقح طارو .. الصبر يكون معاك.. قرّب "يروّح" عن نفسو ويبقى سفير .. ويرتاح من الولد دا.


#353894 [ابو السيد]
5.00/5 (1 صوت)

05-03-2012 07:12 PM
هو العبيد (المروح وين مش عارفوا دا) السودان دا حقوا والا حق ابوهو ؟ الناس دي ما بتختشي دايرين يسدوا علينا الهواء ويمنعونا من النفس ؟ معليش يا عووضة أقبل بي وظيفة بواب دي حسع وربنا كريم ...


#353891 [حسن]
5.00/5 (1 صوت)

05-03-2012 07:09 PM
هذا زمانك يا مهازل فامرحي .. مع التحية للأستاذ عووضة أما هذا المدعو مروح سـيروح قريبا ومعه جميع الشرذمة الفاسـدة الكاسـدة بإذن الله .


#353884 [TIGERSHARK]
5.00/5 (2 صوت)

05-03-2012 06:52 PM
اصبر اخونا صلاح,....لو الله طول عمرك, حاتشوف يوم في الجماعه ديل, انت وانا وغيرنا عارفين انو الجماعه ديل وهمه كبيره ونفخه في الفاضي ساكت...بس خليهم في غفلتهم دي لمن يلقوهو جوه....

Dear, all you (us) need is just a little patience, then you will see by your own eyes their miserable downfall...this is the law of mother nature.

Best wishes for the best Journalist


#353883 [المتجهجه بسبب الانفصال]
5.00/5 (1 صوت)

05-03-2012 06:52 PM
أستاذ صلاح تستاهل أكثر من سفير،،،،، والكثيرون دفعوا ثمن الوطنية ابعادا واقصاءً بينما الاخرين جنوا كسير التلج وعودا وتمني ومناصب على هيكل السودان المصلوب ،،، وهل أتاك نبأ عمود اليوم لضياء الدين البلال والله بعد أن كتبت تعليقي سحبته استنكافا من الولوغ في حديث دم البعوضة والدم الطاهر مسفوك بالقتل ،،،، أما العبيد المروح والله لولا أدب الاسلام لكتبت لك عن حلمه غير الشرعي الذي حققه عبر التوجه الحضاري ،،،، وهو حلم ما كان له ان يتحقق ابان قانون الاحوال الشخصية ناهيك عن ابان قوانين الشريعة الاسلامية ،،، قال شريعة ولا نموت هههههه،،،، دم بخير ياأصيل فقد حققت مصداقية ذاتك ،،،، وحقيقة منصب نائب السفير بدعة تمكينية ،،،،، وتخيل بكون بدرجة وزير دولة بالخارجية ،،،،


#353872 [بت الخرطوم]
5.00/5 (1 صوت)

05-03-2012 06:27 PM
ياود عووضة انت الزول الاسمو العبيد المروح مستثنى من قانون الخدمة المدنية باى قانون تم تعينه فى ثلاثة ولااربعة وظائف دا اول هام تانى هام المؤهلات العلمية الحاصل عليها لم يحصل عليها زول تانى فى هذا البلد تالت هام حوة السودانية عقرت وكتفت بعبقرى زمانو امين عام مجلس الصحافة والمطبوعات السفير والناطق الرسمى للخارجية ياكافى البلا الخارجية والصحافة مافيها رجال غيرو رابع هام ودا المهم ولازما لازماتجيب عليه المرة الجاية بينك ما بينو شنو خاتى نقرو فى نقرك ليه شعب الراكوبة عايز يعرف السبب عشان يزيل العجب


صلاح الدين عووضه
صلاح الدين عووضه

مساحة اعلانية
تقييم
7.47/10 (10 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة