05-04-2012 10:55 PM

حاج بله (أفراح أفراح)

طارق حامد خليفة
[email protected]

حضر عمران كعادته للقاء حاج بله وتفاجاء بعدم وجوده في مكانه المعهود فاستغرب غيابه وبدأ يحدث نفسه : (ياربي مالوه حاج بله دي ما عادته يكون مريض وله شنو ؟ )
طرق عمران الباب فتحت الباب حاجة السرة.
عمران : السلام عليكم حاجة السرة.
حاجة السرة : وعليكم السلام يا عمران
عمران : اخباركم ان شاء الله حاج بله عافية
حاجة السرة : نصيح وما عنده اي عوجة ، لسانه الطويل ما بسلم منه واحد قاعد مسمر قدام التلفزيون تقول بان جي مون.
عمران : هههههههه تاني رجع للجزيرة الراجل ده ما بتوب ؟
حاجة السرة : المرة الفاتت قربنا نوديه التجاني الماحي وما كل مرة تسلم الجرة صاحبك ده انصحه .
عمران : ههههههههه ما تخافي عليه ده يجنن بلد .
سمع حاج بله صوت حاجة السرة وهي تتكلم مع احدهم
حاج بله : بتطنطني مع منو انتي يا فلانة .
يضحك عمران وحاول فض الاشتباك بين حاج بله و حاجة السرة فرد على حاج بله
عمران : يا زول مالك الليلة حاتل جوه امرق نحن في انتظارك .
حاج بله : اهلا يا عمران هو ده انت ؟
جاييك شيل الكراسي وبلحقك بره . نشوف باك الحكومة ده يجيب لينا القهوة .
حاجة السرة : بصوت منخفض ان شاء بالبكم كان يخلصنا من لسانك الطويل ده .
حاج بله : بطنطني بتقولي في شنو ؟
حاجة السرة : ولا في حاجة !!!
حاج بله : خلاص امشي سوينا لينا القهوة ورسليها لينا برة .
حاج السرة : الحمدلله الجاء عمران وقومك من قدام التلفزيون بقيت زي الملصق بسوبر قلوو قدامه .
حاج بله : قلوو يلصقو بيوه لسانك ده ماليك جايبن مهند ولا شنو ؟
حاجة السرة : لا جايبن منتهى الرمحي !!!!
حاج بله : تراكي ما هينة يا خرابة !!!
حاجة السرة : انت ما دينا معاك فرصة ما كنكش في الريمود زي ولد حنان لما يفتح قنوات الاطفال .
حاج بله : خلاص ما تعملي صحبتي اعمل لينا القهوة ورسليها بره.
حاجة السرة :(بصوت منخفض) ياها دي حالتك مما يمنطقوك تعمل مجنون .
حاج بله : تاني قمت للطنطة زي الجندب .
يخرج حاج بله لخارج المنزل ليجلس مع عمران امام المنزل .

حاج بله : اها الاخبار ؟
عمران : عاد الاخبار ما عندك انت يا فوزي بشري .
حاج بله : هههههه والله ماك هين زي صحبتك الجوه دي اسع قلت ليه داير باليرمود شنو جايبن مهند؟ قالت لي لا جايبن منتهي الرمحي .
عمران : ههههه والله حاجة السرة من عاشر القوم .
حاج بله : يعني قصدك شنو انا العلمتها ؟! يازول دي توديك البحر وتجيبك عطشان .
عمران : اها الاخبار شنو ؟
حاج بله : زمان بتجيب لي الاخبار من الانترنت اسع بقيت نجئ تسالني ؟ سبحان الله يعني لقب رويتر نشيلوه منك.
عمران : يازول رويتر شنو مع ناس (منتهى) ديل !!!
حاج بله : نهايتك انت وباك الحكومة يجيبوها في السي سي ان .
عمران : ههههههههههههه لا لا بقيت خطير وصلت كمان للسي سي ان !!!!
حاج بله : عليك الله شوف المطرطش ده نحن الفوكس نيوز ذاتها عندنا فيها راي .
عمران : لكن لقيتك خطير بقت مثقف . اها قول لينا الاخبار شنو؟
حاج بله : بفوتها ليك بمزاجي دي .
عمران : هههههههه كتر خيرك قول لينا الاخبار شنو ؟
حاج بله : أفراح أفراح !!!!
عمران : ده شنو ده كمان قمته لي جنك تاني وتقول لي داير اعرس ؟!!!
حاج بله : يا حليلك يا محاسن ...
عمران : يعني دي هيجتني الذكرة وله شنو ؟
حاج بله : والله واحشني يا عمران ياخي دي سافرت وقالت عدو لي .
عمران : سافرت وين ؟
حاج بله : سافرت السعودية لاختها .
عمران : ربنا يرجعها بالسلامة طيب أفراح أفراح ده شنو ؟
حاج بله : ده ما ياهو زاتو الدايرو لمحاسن ..
عمران : يا زول انت مالو كلامك بقي ألغاز !!!
حاج بله : ألغاز شنو يا زول انت بس ثقافتك التلفزيونية تعبانة !!
عمران : لا خلاص يا وضاح خنفر ...
حاج بله : عشان تعرف انت غير مواكب ده زمان ركب التونسية .
عمران : ههههههههه عارف يا عمك جابو بدله شيخ ال ثاني .
حاج بله : ايوه كده أتعدل .
عمران : خلاص قول لينا أفراح ده شنو ؟
حاج بله : لا اقول احمد المك ده شنو ؟
عمران : ههههههه ياخي انت ما بتفوت حاجة ؟!!!
حاج بله : اعمل شنو !! اقول ليك افراح افراح تقول أفراح !!!
عمران : طيب اسفين أفراح أفراح ؟
حاج بله : يا مسطح ده برنامج في قناة النيل الازرق بيجيبو كل خميس .
عمران : اها عرفتوه.
حاج بله : الحمدلله اخيراً ، كل يوم خميس يازول يجيب اثنين بنات حلوات كده يعمل لينا عرض ازياء ويجننوا لينا النسوان .
عمران : يعني القصة في جن النسوان ؟!!!
حاج بله : يازول جن النسوان هين وبنقدر .
عمران : طيب مالك مع البرنامج ؟!!!
حاج بله : انت مسطح اظنك ما شفت البرنامج ده !!!
عمران : شفته ياخي لكن ما عارف سببك معاه شنو ؟
حاج بله : انت كان صبرت بوصفك ليك الشفته .
عمران : اها قول يا علي ابراهيم .
حاج بله : يا عمران يا اخوي البرنامج ده اولاً بالتبادي ناس بيوت الموضة عمليني فيه دعاية لبضاعتهم .
عمران : كيف يعني ؟
حاج بله : شفت البنات الحلوات ديل كل حلقة بظهروا ليك بتوب اول مرة تشوفه وناس السرة راسهم يرقص .
عمران : ههههههههههه وبعدين .
حاج بله : التيبان ديل بيجيبوهم ناس بيوت الموضة عشان يعرضوا بضاعتهم .
عمران : عرفتهم كيف امكن حقاتهن ؟
حاج بله : حقاتهن ليه هم بنات معتصم داود ولا بنات ابراهيم مالك !!!!
عمران : ههههههه ياخي انت بتلاحظ للاشياء دي كيف ؟
حاج بله : صاحبك مفتح وما بتفوت عليه الحاجات دي المهم ناس التياب يجوا يعرضه تيابهم وناس عطور العنود ولا شنو كده يقدموا هدايا بقصد الدعاية .
عمران : طيب مالوه ما الحاجة بتحصل في التلفزيونات العالمية والعربية انت ما شفت المره الزنجية ديك ؟
حاج بله : والله انت والخرابة الجو ديك مفروض يودكم فصول محو الامية !!
عمران : هههههه كتر خيرك بس ليه كده ؟!!!
حاج بله : يا مسطح المره الزنجية دي الاعلامية الامريكية الشهيرة أوبرا وينفري ودي من اغني اغنياء العالم ودخلها السنوي ما يعادل 225 مليون دولار وهي ساعدت اوباما ليكون رئيس امريكا .
عمران : ولد ده لا كان كده نشوف لينا محو امية ساي .
حاج بله : ههههههههههه ما تكون احسست ولا حاجة .
عمران : يازول نحن خلاص اتعودنا على لسانك الحلو ده .
حاج بله : ههههههه خلاص ح نخففوا .
عمران : كده كمل لينا الموضوع بديت لينا بحمد مرقتنا في خوجلي !!!
حاج بله : حمد و خوجلي !!! اسع كان قلت حاجة تحسس !!!
عمران : هههههههه انت ما بتقدر تلّم لسانك كدي كمل لينا موضوع أفراح أفراح مشكلتك معاه شنو ؟
حاج بله : يازول الحاجات دي بدات تخلق لينا عادات جديدة تمحا بها عاداتنا و عاداتنا السمحة دي طبعا مبنية على تعاليم ديننا السمح .
عمران : لا لا الليلة ما عرفتك ده شنو يازول انت قلبت وبقيت مؤتمري؟
حاج بله : خلاص قمت لحركاتك وداير تجيب لينا الهوا بعدين ناس فلان ديل ذاتهم سبب البحصل ده ؟
عمران : ههههههه اسع البجيب الهوا كلامي ولا كلامك ؟
حاج بله : خلاص يازول اقلب الصفحة وخلينا في أفراح أفراح احسن .
عمران : ههههههه سمح اها كمل كلامك .
حاج بله : يازول البرنامج بمشي يصور اعراس الناس ويجوك الجماعة مضروبات احمر واصفر قدام الكاميرا ويقول ليك كلام الطير في الباقير !!!
عمران : زي شنو يعني ؟
حاج بله : يا زول نحن ما عندنا اي حضور امام الكاميرا الناس كلها بتطلع ملخومة ومنططة عيونها تقولو زارنهم !!!!
عمران : هههههههههه في دي عندك الف حق لخمة شديدة .
حاج بله : مرة واحدة سمعتها ليك بتقول يغلبها بالعيال و تغلبوه بالمال ههههههه.
عمران : ههههههههه والله دي لخمة درجة اولي .
حاج بله : فكرت فيها كده وبعدين قلت امكن قاصدها !!!!
عمران : كيف يعني قاصدها ؟!!!
حاج بله : مش النسوان بقوا يشتغلوا ؟ ومش في واحد راجل ولد ؟
عمران : ههههههههه والله انت ما نصيح انت بقت تمشي مع هيثم البحر وله شنو ؟
حاج بله : يازول الزمن ده بقت اي حاجة ممكنة !!!
عمران : يارب تحفظنا من المحن و الاستدراج ..
حاج بله : امين .. المهم يا عمران اللخمة دي حتى عند المذايعين و عند المسؤلين حضورنا قدام الكاميرا صفر .
عمران : عشان كده ما عنده لا مسلسلات ولا افلام سودانية .
حاج بله : مشكلتنا التكلف في اي شئ عشان كده ما قادرين نعمل لينا حاجة تشرفنا ودرامتنا متخلفة عن مثيالتها ده موضوع طويل عايز قعدة براها .
عمران صحيح ده داير ليه قعدة براه كدي كمل لينا موضوع احمد المك ده ؟
حاج بله : ههههههههههه انت باين عليك بتحب الفن الاصيل !!!!
عمران : هههههههههه يازول هوي ما تركبنا تهم ساي كمل موضوعك .
حاج بله : نرجع ليه موضوع البرنامج يا امجد .
عمران : هههههههههه ده مش المذيع بتاع البرنامج ؟
حاج بله : ياهووو ذاته ده مباري لي الاعراس لمّا عنس .
عمران : ههههههه اسع القاعد يدخل بحمد ويخرج بخوجلي منو؟!!!
حاج بله : يازول البعملو فيه ناس القناة دي ما صحيح ياخي كل خميس يعرضوا ليه خمس و لا ستة أعراس يجيب فيها اعراض الناس في التلفزيون ده كلام ما صاح !!!!
عمران صحي والله كلامك يا حاج بله فعلا دي حاجة ما مقبولة !!!
حاج بله : المشكلة يا عمران القناة دي فضائية يعني كل الدنيا بتشاهدها ونحن نقعد نعرض في اعراضنا والناس تتفرج !!!
عمران : والله يا حاج بله اهنئيك على ملاحظتك القوية و غيرة على ديننك و وطنك .
حاج بله : يازول ده شنو الكلام الكبار ده دي حاجة مفروض يلاحظها اي واحد مننا .
تعرف يا عمران مما ظهرت مظاهر العولمة دي حاجات كثيرة بدات تتغير في اخلاقنا وعاداتنا السمحة نحنا في السودان ده اتربينا على مهنج صوفي اتأصل في كل مظاهر حياتنا والبحصل ده كله سببه العواملة وانفتاحنا على عادات ناس لا بتشبهنا ولا بتليق بينا .
عمران : والله ما قلت الا الحق .
حاج بله : وكمان سمعت ليك الناس في الخليج بقوا يتابعوا ليك في البرنامج ده بصورة مستديمة ؟
عمران : قصدك المغتربين ؟
حاج بله : المغتربين شنو يازول !!! ده بحضروا اخوانا الخليجين نفسهم !!!
عمران : ليه ؟
حاج بله : يازول مستغربين من الحاصل ده الناس ديل يا عمران اعراسهم بتعرفها كيف ؟
عمران : ابداً !!!!
حاج بله : ديل يا عمران عزومة الرجال بعملوها في في خيمة كبيرة في فسحة فاضية بعيدة جدا من البيت تجئ الخيمة دي يجيبوا الصواني الكبار ملانة رز وخراف وفي صواني فيها حوار ، بتعرف الحوار يا عمران ؟
عمران : انا بعرف حوار الشيخ !!!
حاج بله : ده بتعرف عشان انا شيخك وانت حواري ههههه
عمران : ههههههه ما في كلام .
حاج بله : الحوار ده الجمل الصغير اخوانا الخليجين بحبوه شديد المهم يا صديقي الجماعة يضربوا المجبوس وكل واحد فيهم يمشي يشوف شغلته والعروسة بعملوا ليها حفلة في صالة افراح بمشوا فيها نساء فقط و يمشي العريس مع ابو العروسة بعد نهاية الحفلة ياخذ عروسته من الصالة ولما يدخل كل النساء بلبسوا عبائتهم ولا ينكشفوا عليه لغايت ما ياخذ مراته ويذهب .
ونحن ياسيدي نجيب اعراضنا ونعرضهم في القنوات الفضائية وده كلام لا برضي الله ولا برضي رسوله .
عمران : والله يا حاج فعلا ده موضوع خطير .
حاج بله : شفت كيف يا صاحبي ربنا يسترنا ويستر اعراضنا .
عمران : اميييين يا رب فتك بعافية ياحاج .
حاج بله : الله يعافيك يا عمران .





تعليقات 3 | إهداء 0 | زيارات 2247

خدمات المحتوى


التعليقات
#355455 [بت ملوك النيل]
0.00/5 (0 صوت)

05-05-2012 04:00 PM
خليجيين منوا البتفرجوا عليكم؟؟؟؟ضحكتوني والله..يا ابوي ديل قالبين النكتة بتاعت المساطيل وقالوا لما يمشوا الجنة ويدوهم الحور العين نسوانهم حا يدوهم للسودانيين.اطمنكم خالص العرب كلهم بتحاشوا تلفزيوناتكم ويوم يشوفوها بكونوا عايزين يضحكوا ويطلعوا ليهم كم كلمة غلط يجوا يقرفونا بيها


#354801 [واحد]
0.00/5 (0 صوت)

05-05-2012 02:33 AM
يا عريبي انت ما هو العالم كلو فيه اعراس ما لقيت غير الخليج تقارن به , صحيح وارد الخليج


ردود على واحد
United States [طارق حامد خليفة] 05-05-2012 07:10 AM
شكرا يا (متحضر)


طارق حامد خليفة
مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة