في



المقالات
السياسة
ارشيف مقالات سياسية
الرقم الوطني وما ادراك ما الرقم الوطني!
الرقم الوطني وما ادراك ما الرقم الوطني!
05-15-2012 07:54 PM

الرقم الوطني وما ادراك ما الرقم الوطني!

د. عبداللطيف محمد سعيد
[email protected]

كنا نظن ان الرقم الوطني جاءوا به لخدمة المواطن المسكين الذي يصدق كل ما يقال له منذ رفع شعار ناكل مما نزرع ونلبس مما نصنع! ولكن ادركت ان الرقم الوطني حكاية يطول شرحها ولنبدأ باستخراج الرقم الوطني.
اللجنة الشعبية بالحارة التي اسكنها احضرت فريق عمل الرقم الوطني... ذهبت المرة الاولى ظناً مني، وبعض الظن اثم، انني ساقدم للرقم الوطني وانتهي من الاجراءات بسهولة واستلمه في نفس الوقت ولكن فوجئت بان ارانيك التقديم قد انتهت وان التقديم يتم لعدد معين في اليوم الواحد ومن لم يستلم الاورنيك عليه الحضور غداً... قلت لعضو اللجنة الشعبية اذن يمكن الحضور بعد ايام وقتها يكون الازدحام قد خف! قال لي انهم قد يتوقفون في أي يوم! سألته لماذا؟ اجابني بان الاستمرار يتوقف على المقدرة المالية للجنة الشعبية فهي تقوم يومياً بترحيل كل افراد الفريق العامل وتقدم لهم الضيافة اللازمة وهذه تكلفة عالية قد تجبرهم على التوقف في أي وقت.
عند ذلك انتهزت فرصة يوم السبت العطلة وارسلت ابني الى مدرسة صواهل حيث مكاتب اسخراج الرقم الوطني ولن اقول لكم ان يوم السبت قد ضاع كله في التقديم للرقم الوطني وانني كنت طيباً وساذجاً حين ظننت ان الامر سهل.
بعد ذلك قالوا لي ان الاستلام يتم في مكتب اللجنة الشعبية... وبعفوية ذهبت مساء اليوم التالي الى مكتب اللجنة الشعبية... وساحكي لكم قصة (عادل امام) يوم قال ان رجلا سقط خاتمه في البحر وبعد اسبوع جلس في مطعم وطلب سمكاً وعند فتح السمكة لم يجد خاتمه بداخلها! فبعد اسبوع لم اجد اسمي... وتكررت الحكاية... وبعد ما يقارب الشهر، يا لسعادتي، وصل رقمي الوطني.
كنت اعرف ان ابي حين سماني عبد اللطيف يدرك ان اللطيف من اسماء الجلالة وكان ابي، رحمه الله، مسلماً... ولكن ناس الرقم الوطني اسموني (عبدالطيف) عجباً هل (الطيف) يعبد؟ وتكرر الخطأ في بعض اسماء اسرتي.
بماذا يوصف هذا الخطأ؟ ولماذا التأخير اذا كانت المراجعة غائبة؟ ومن يسلم هذا الرقم؟ ومن يستلم؟ وكيف يجهل البعض ان هناك فرق بين ان اعبد الله (اللطيف) وبين ان أعبد (الطيف)؟ ان هذا الخطأ يندرج تحت مسمى الاخطاء السخيفة.
المهم... هل سأتعامل مع الاسم الجديد؟ ام ارجع الى ناس السجل ليعدلوا لي الاسم؟ واهم من يعتقد او يفكر انني سارجع الى ناس السجل لتبدأ رحلة العذاب واضيع يوما بل اياما مع تعديل الاسم.
انها حكايات يطول سردها ولكن ساقص عليكم منها قصة دكتور اسماعيل الذي بعد استخراج الرقم الوطني ذهب الى استخراج البطاقة وكان ذلك في الاسبوع الاخير من شهر مارس وحتى الاسبوع الاول من شهر مايو لم يستلم بطاقته وكل ما ذهب قالوا له انها في المصنع!
والله من وراء القصد





تعليقات 8 | إهداء 0 | زيارات 5699

خدمات المحتوى


التعليقات
#366267 [sennary]
0.00/5 (0 صوت)

05-17-2012 02:47 PM
الغريبة انهم بقولوا ان الشغل ده كلو بقى "كومبيوترايز " .. يعنى آلى .. لكن والله لما كان يدوى كان افضل واسرع وادق بمراحل .. وكان بتخلص كل اجراءاتك وتستلم بطاقتك فى زمن وجيز جدا وبدون اى تعقيدات
طبعا يادكتور ماتفتكر انك انتهيت باستلام الرقم الوطنى حتى ولو ولو كان صحيحا لأنك ستبدأ نفس مموال المعاناة من جديد فى استخراج البطاقة وستكرر نفس الاجراءات ... تصوير .. بصمات .. ارشفة .. تحرى ...الخ ...
رغم انها نفس البيانات الاولى الكانت محفوظة فى الرقم الوطنى وكان ممكن يحولوها يسهولة للبطاقة ولكن تقول شنو؟ تعذيب للشعب وخلاص !
وبعد كدة يبعتوا البيانات لمصنع البطاقات ويقولوا ليك تعال بعد اسبوع.. وتقعد تساسق لحدى ماتجى البطاقة الموعودة وبعد كدة برضو ممكن يكون فيها غلط .. انا مثلا بعد اكثر من اسبوعين من المساسقة قالوا لى ان البصمات بتاعتك ماواضحة .. وبديت نفس الفلم الهندى داك من الاول .. بكل مراحله من جديد مش بيعيدوا البصمة فقط ... شفت الشلهتةوالعذاب ده لى وين ؟؟؟


#365933 [بت بورسودان]
0.00/5 (0 صوت)

05-17-2012 09:50 AM
اناجايه هسه من السجل المدنى ضغطى ارتفع سجلتا لى شهر كل مره امشى يقولو الشبكه طاشه هسه قالو لى الا تعيدى الاجراءت وتجيبو اوراقك من الاول. انا مستغربه موش بياناتى خشت البرنامج واتحفظت كيف يعنى ادخال من الاول .انا شغاله مبرمجه وراى شغل. سالته العقيد وكلهم يقولو لى الا تعيدى الاجراء من الاول.ده مسلسل ده .زهجته وخليتو بلا رقم وطنى بلا وطنيه


#365296 [ودالزرق]
0.00/5 (0 صوت)

05-16-2012 02:28 PM
مثلا - انا عندي بطاقة شخصية امشي اطلع رقم وطني الرقم الوطني سيغنيني عن حمل بطاقة مثلا؟ ولا الحاصل شنو يا شباب فهموني


#365292 [ودالزرق]
0.00/5 (0 صوت)

05-16-2012 02:26 PM
افيدونا يا جماعة .. الرقم الوطني ده رقم بس ولا بطاقة ؟


#365194 [cresbo]
0.00/5 (0 صوت)

05-16-2012 01:16 PM
اقول ليك حاجة انا غادرت السودان منذ خمسة سنوات ومقيم في بلد خليجي بجدد بطاقتي كل سنتين في نص ساعة فقط وبطبعوها وبيدونا ليها بابتسامة مع انو اجانب نحنا
قال في المصنع قال ؟ طيب صافات بصنعوها في كم وكت البطاقة بطبعوها في شهور

الله لا غزا فيكم بركة يا حكومة الكبكم والصهينة والضحك على عقول الناس وليكم يوم يا دهاقنة السلطة


#364659 [فاضل الفاضل]
0.00/5 (0 صوت)

05-15-2012 10:37 PM
والشى الذى لم اسنطع فهمه ان البطاقه الجديده والتى تستخرج بالرقم الوطنى غير معتمده كمستند رسمى مثل البطاقه الشخصيه ولا بد من استخراج البطاقه الشخصيه اذا ما الفائده من هذه البطاقه؟؟ هل تحصيل رسوم فقط؟؟؟
كما ان اللذين استخرجوا جوازات ممقنطه تحمل الرقم الوطنى هذا الرقم غير معتمد وعلى اصحاب هذه الجوازات استخراج رقم وطنى اخر!!!!!!!!! والله يا دكتور عبد اللطيف اصبحنا فى بلدنا السودان لا نفهم اى شى وندفع فقط


#364651 [الشايل المنقة]
5.00/5 (2 صوت)

05-15-2012 10:22 PM
...يا د. عبد الطيف...نحن لغاية هسع لينا 23 سنة ومنتظرين ..وانت يوم سبت واحد وفاعد تنقنق فوقو..!!..انت ماسودانى ولاّ شنو..؟..الظاهر عليك ما منّنا...قبيلتك شنو...!!!!؟؟؟


#364609 [اعبد الرحمن محمد ابراهيم]
5.00/5 (2 صوت)

05-15-2012 09:33 PM
بلد فاسدة من القمة للقاعدة ولا يوجد امل في اصلاحها علشان كده اخذت عيالي وهاجرت حتي استريح من هذا الغثاء المسمي دولة المشروع الحضاري وقمت بمنع اطفالي من النظر حتي للقناة الفضائية السودانية .. عذرا اقصد القناة الفضائية للمؤتمرجية,,, صرنا نشعر بالغربة بوطننا وننتزع لقمتنا من احداق الردي وتم تضييق الخناق علينا وهذا كله بفضل هذا الرئيس الجبان وزمرته الفاسدة الذين استباحوا البلد كانها ورثة ابائهم فظلموا العباد واكثروا الفساد دمركم الله ايها الظلمة عديمي الشرف والرجولة,,, (ضابط م مغبون)


د. عبداللطيف محمد سعيد
مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة