05-23-2012 02:41 PM

إليكم

الطاهر ساتي
[email protected]

(القرفة بتمنع الحمل) ... نموذج حرية..!!


** فلندع القضية الإنصرافية (إسرائيل قصفت)، ونكتب عن قضية جادة،أوكما يشتهي رقيب الدولة.. نكتب عن القرفة مثلاً..للقرفة - بكسر القاف وليس بفتحها - فوائد مستباحة، بحيث لم تحظر نشرها أية جهة رسمية ، وكذلك نشر لايذهب بالناشر الي حيث كان حبيبنا فيصل محمد صالح، قبل أسبوع ونيف..ولذلك، نؤكد - بقلب قوي - بأن القرفة تحتوي على قيمة غذائية عالية، وبها قدر وفير من البروتين ومادتي الثيامين والريبوفلافين..لاحقاً - إن شاء الله - قد نكتب عن (الثيامين والريبوفلافين)، فالمنعطف التاريخ الخطير الذي تمر به البلاد حالياً يحول دون الكتابة عن تلكما المادتين..وعليه، للحفاظ على الأمن القومي، ودعما لغزة وأريحا، وحماية للسوناتا والبرادو، ليس هناك من داع لإثارة فوائد الثيامين والريبوفلافين في الوقت الراهن..المهم نركز في القرفة ( طبعاً بكسر الباء )، بعيداً عن التفاصيل التي قد تكون مخلة بالأمن القومي والإقتصاد الوطني، وربما بالذوق العام..!!
** وقد لاتعلمون، أيها الأفاضل، بأن القرفة - قلنا بكسر القاف - تعالج نزلات البرد في حال غليها في الماء الساخن.. أكرر، وفلنقل نحذر بحسم : يجب غلي القرفة - يازول ماتنسى كسر القاف - في الماء الساخن..ربما غليها في الماء البارد يهدد سلامة إجراءات قضية شركة الأقطان أو مكتسبات الأمة (الما معروفة هي شنو زاتها)، أو في تشغيل مصنع سكر النيل الأبيض..وبالمناسبة، القرفة بتمنع الإسهال..لكن ما أي إسهال، تمنع الإسهال المائي فقط، فالإسهال غير المائي يمنعه النعناع ( وده موضوع تاني، احتمال يكون موضوع بكرة )، لوسمحت السلطات المختصة..قلنا بتمنع الإسهال؟..ممتاز..وكذلك تساعد في إفراز لبن الثدي، بحيث تطيل المدة التي يتغذى فيها الطفل على لبن أمه..يعني لو عايز الولية تكون دارة لبن طول السنة جيب ليها شوال قرفة و(خلاص)..وهناك فائدة مهمة، ونأمل ألا يؤثر ذكرها في مسار قضية ( نحتفظ بحق الرد) ..علماً بأنها لن تؤثر في مسار قضايا المحلية التي من شكالة التقاوى الفاسدة وأموال الأوقاف وخط هيثرو و..و..غيرها من عمليات النهب التى ملفاتها لم - ولن - تفصح عن نتائجها و (أنذالها)..!!
** تلك الفائدة العظمى هي : تستخدم القرفة - أهم شئ كسر القاف - كوسيلة من وسائل تنظيم الأسرة.. نعم لها تأثير عجيب في إفراز البويضة..وتناول حبيبات من القرفة ليلاً لمدة شهر تؤجل الدورة الشهرية - للمرأة طبعاً - وبالتالي تؤجل الحمل .. يعني لو عايز الولية تقطع سففها القرفة بعد صلاة العشاء..هذه الفائدة العظمى على ذمة علماء الطب البديل، يعنى أنا ما مسؤول منها.. بمعنى : لو تضررت أية جهة رسمية من نشر هذه الفائدة أو رأت بأن نشرها يخل بالأمن العام ويرفع سعر الدولار(أكتر من كده)، ويغطس حجر مشروع الجزيرة (أكتر من كده) ، فلتستدع علماء الطب البديل أوتصادر كتبهم أو تعتقلهم..ونحن طبعاً سوف نشجب ونستنكر وندين ونلعن ونسب ونكورك - ونعمل كل الحاجات البتعملها الحكومة لمن اسرائيل تردم العربات - لو إكتشفنا عدم جدوى القرفة في حياة الناس، أو لو تبين لنا بأن تلك الفوائد محض شائعات اسرائلية..نعم، اسرائيل لاتكتفي بقصف العربات، بل أحيانا تنتج وتصدر (تقاوى مضروبة ومبيدات الفاسدة وأليات فالصو وكوادر حرامية)، لتستوردها الدول الرسالية، بدلا عن استيراد القرفة..!!
** ما تنسى تكسر القاف هناك، وفى كل قرفة سابقة أو لاحقة ، بحيث لاينطقها اللسان (قرفة)، بمعنى ( زهجة).. نحن - والحمد لله على كل حال- في أمن وأمان .. بفوقنا أمن، وبتحتنا أمن، ومن خلفنا أمن، ومن أمامنا أمن، بل نحن - والحمد لله الذي لا يحمد على مكروه سواه - نتنفس أوكسجيناً مخلوطاً بالأمن النقي الذي (يحتفظ بحق الرد)..فلماذا نزهج و نقرف؟..كما ترون، لنا مطلق الحرية في الكتابة عن القرفة - إ كسر القاف- وفوائدها.. وكذلك لنا مطلق الحرية في نشر تفاصيل كل القضايا الجادة ذات الصلة بالجرجير والبصل والشطة، وكمان البطيخ..حفظك الله أستاذنا علي شمو وأنت تكافح في سبيل حماية (حق المرء في التعبير عن فوائد الكمون والجنزبيل)..ورعاك الله عزيزنا العبيد المروح الناطق الرسمى باسم وزارة الخارجية والامين العام لمجلس الصحافة وانت تدافع - من الخندقين، وبالراتبين- عن حرية نشر فوائد المحاصيل و الحبوب، بما فيها الزيتية..بمناسبة الحبوب الزيتية، ياخ زيتنا طلع، ربما يحل محل بترول الجنوب ويوفر الدولار، والفضل في ذلك يرجع لمجلس صحافتكم..وكم أنت رائع - دكتورنا تيتاوي - وصمتك يهبنا هذا المناخ الذي يرغمنا على توثيق (فوائد القرفة)، بدلا عن فضح (تفاصيل القصف)..!!

تعليقات 34 | إهداء 0 | زيارات 7015

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#373942 [محميد]
0.00/5 (0 صوت)

05-24-2012 12:06 PM
استاذنا فهمنا حتي لو تركت الورقة فاضية .... قرفنا ... قرفنا بكسر القاف ! ؟


#373940 [ممغوسة و بس]
0.00/5 (0 صوت)

05-24-2012 12:05 PM
أيوة كدة يا أستاذ الطاهر،هى دى المقالات الهادفة جدا و فيها الفايدة، ح نفضل لمتين فى باعو، سرقو ، أكلوه، قصفوه، سعر الدولار، كيلو الطماطم و الزيت بقى بكمز....... كدة ننسى همومنا شوية، و نلتفت لصحتناأكتر، بدل ما نمرض و نموت مغسة، بعد ما عدمونا الورانا و قدامنا إلى ما بعد جنى الجنى، و لا حول و لا قوة إلا بالله.
لو سمحت يا أستاذ الطاهر، المرة الجاية تجيب لينا موضوع كارب عن الجنزبيل، لأنى بحبه شديد، و ركز على "الفريش" عسى و لعل ما يكون عندو تأثير على على سعر الجنيه بعد تعويمه و شكرا.


#373695 [انا ماقرفان]
0.00/5 (0 صوت)

05-24-2012 09:31 AM
والله ياأستاذ كلامك ده معناهو انت قرفاااان(بكسرالقاف ياجماعة) عدييييييييل كده


#373482 [aza]
0.00/5 (0 صوت)

05-24-2012 04:20 AM
هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه لكن يالطاهر ساتى زمااان ما كنت خوااااف كده مالك يامان


#373390 [بارود]
5.00/5 (1 صوت)

05-23-2012 11:34 PM
بالغت عديل كدا ........ عليك دينك السجم القاعد تشربو دا من وين؟
اقضد القرفة من ياتو بلد؟


#373296 [السودانى الاصلى]
0.00/5 (0 صوت)

05-23-2012 08:54 PM
تحدث عن فوايد الشطه واضرارواليفتح الشهيه ويملى الجيوب


#373214 [لَتُسْأََلُنْ]
0.00/5 (0 صوت)

05-23-2012 06:12 PM
(وكذلك تساعد في إفراز {لبن الثدي}، بحيث تطيل المدة التي يتغذى فيها الطفل على لبن أمه..يعني {لو عايز الولية تكون دارة لبن} طول السنة جيب ليها شوال قرفة و(خلاص).)
* ماذا تدر الولية غير اللبن !!!!!!!!
*{لبن الثدي} يعني ليس لبن العصفور أو لبن جوز الهند أو لبن العشر!!! من أين يأتي (لبن الأم الطبيعي) أصلا غير الثدي!!!!!!
*** ما هذي (الأنيميا) اللغوية، يا أستاذ ساتي!


ردود على لَتُسْأََلُنْ
United States [ضراع الخضره] 05-23-2012 10:52 PM
هسع انت الكلام دا كلو ما فهمت فيهو غير اللبن والثدي
بكل صراحه انت واحد من الكتيبه الالكترونيه يعني بالواضح كده كوز عديييييييييييييييييل


#373202 [المر الحجازي]
0.00/5 (0 صوت)

05-23-2012 06:02 PM
من أجل هذا ما جعل الله جوفين بل جوف واحد أما مع الناس الذين يطالبون الحرية والعدالة والمساواة وحكم القانون أو مع المؤتمر الوثني بكل ما يفيض به المؤتمر من كبت للحريات وفساد وإفساد وإهدار لسيادة الوطن وكذب وتضليل .

بالمناسبة قبل ما ننسى إسمو مين الخاين داك الما سلم عليهو الراجل داك .
يمكن يسلم عليهو الأسبوع القادم عند بدء المفاوضات في أديس أبابا .

ولا نامت أعين المُجَهَجهين


#373198 [بت الخرطوم]
5.00/5 (1 صوت)

05-23-2012 05:56 PM
رائع يا ود ساتى لكن عايزة اقول ليك بالعديل بالتروية بالكسرة ولا بالفتحة كلو ما نافع لانو لا حياة لمن تنادى ما تعب نفسك ساى خلاص صبرنا نفد كدى شوف لينا د.مريم بت حاج نظرية ما اذنت للرجالة الخروج للشارع باقى قبل فترة قالت لسع لم يحن وقت الخروج ومن تصريحها العجيب دا ما قالت حاجة تكون مشغولة بشراب القرفة بالكسرة ولا شنو ياربى


#373191 [يايا كور]
0.00/5 (0 صوت)

05-23-2012 05:48 PM
بس نسيت المر الحجازى، وده من فوائده يمنح الحق لمن يريد حجز الصحيفة قبل التوزيع وبرضو ممكن يحجز ليك فى احمد شرفى ...اسمه المر الحجازى


#373177 [جحا]
4.00/5 (2 صوت)

05-23-2012 05:35 PM
ولو رشيت بودرة القرفة على اى عملة حتى لو شلن صومالى بتقوم على حيلها


#373153 [خربشوف]
0.00/5 (0 صوت)

05-23-2012 05:10 PM
والله ياالطاهر مابراك راح الدرب فى المويه والشئ الحاصل اكبر من مقدراتنا العقليه والوضع فى البلد
احبس الانفاس والحال صعب شديد صعب بالحيل وكلما شاهدنا واحدة من القنوات نشاهد عمم مزركه وجلاليب
ناصعة البياض وعرضى مع دحلوها وصقيرها حام .. استر يارب وصبر ود ساتى .. واليومين دى فى حاجه اسمها
تخريج رياض الاطفال زجال فى عمر التسعين اقدموا فى الهدايا لاطفال دون الرابعه


#373149 [البعاتي]
0.00/5 (0 صوت)

05-23-2012 05:09 PM
هههههههههههههههاي رائع
شكيت محنك على الله
يا زول القرفة قد تؤدي لعرقلة عملية السلام


#373140 [عبد الله حسن سليما ن الربراب]
0.00/5 (0 صوت)

05-23-2012 04:55 PM
بعض الناس للاسف رمثل صاحبنا ( wedhamid ) هذا يرى ان الكاتب الصحفى يا معارض 200% للنظام يا مؤيد 200% يعنى ما فى موضوعية يا تشتم يا تتطبل وليس هنالك منطق فى الشغلة عجيب


#373139 [حمد]
0.00/5 (0 صوت)

05-23-2012 04:55 PM
يعني بس قصة ...ما منعونا وكدة ..
حسبي الله


#373071 [زنجي سوداني]
3.00/5 (3 صوت)

05-23-2012 03:44 PM
مع انو انا لا احب كتابات المطبلاتي الطاهر ساتي الا انو بتفق معاك في انو واقع الصحافة والحريات الصحفية في السودان اصبح مقرف والحل والوحيد يكمن في ازالة سلطة المستعمرين العرب من حكم السودان


#373059 [azhari]
5.00/5 (1 صوت)

05-23-2012 03:31 PM
زدنا اكثر فى فضل هذه (التوابل ) استاذنا ... بس ارجوو أن لا نسمع انك قمت بزيارة ودية لوادى
(قرف) ... طبعا اكيد ما نسيت ان اكسر القاف وشووووف النتيجة شنو هههههههههههههههههههههههههه


حفظك الله استاذنا الطاهر.. كدى اقرا وادى قرف دى تانى... ما قرفنا وكدة...


#373045 [طوق الياسمين]
5.00/5 (2 صوت)

05-23-2012 03:24 PM
سمح الصبر...... ما بتمشي مالك ناس نجلاء مشو (عش رجبا ترى عجبا)


#373044 [بشير الطيب ابو ياسر]
5.00/5 (2 صوت)

05-23-2012 03:23 PM
شنو يا ابو ساتى الناس ظاهر عليها كلها قرفانة والغلاء فقد الناس الاحساس وحقيقة المات ريح روحوا لانو ما فى زول جايب ليه خبر والانضربوا قبل كدا راحوا شمار فى مرقة(كتيلم ) ما معروف نسأل الله لنا ولكم حسن الختاموالحقيقة ينبغى ان تظهر بشفافية للشعب عشان نعرف عدونا من صليحنا ولا شنو ؟؟؟؟؟


#373043 [ابو حازم]
4.88/5 (6 صوت)

05-23-2012 03:22 PM
والله ابدعت يا ود ساتي ، انا كان محل بتاع الامن كان اخليك تنشر المقال الاول لأن دا احر وقعا اذا بفهموا طبعاً والعبارة الاكثر ابداعاهي:
(نحن - والحمد لله على كل حال- في أمن وأمان .. بفوقنا أمن، وبتحتنا أمن، ومن خلفنا أمن، ومن أمامنا أمن، بل نحن - والحمد لله الذي لا يحمد على مكروه سواه - نتنفس أوكسجيناً مخلوطاً بالأمن النقي الذي (يحتفظ بحق الرد)..فلماذا نزهج و نقرف؟..
وبعدين ناس الامن ديل حارسين شنو في الخرطوم ؟ ما يمشو يلملموا الكتايب الجهادية ويتوجهوا صوب اسرائيل .... بس ( حقارتي بي ود مرتي )


ردود على ابو حازم
United States [kakkry] 05-23-2012 11:12 PM
انت ما سمعت انو احمد ابراهيم الطاهر قال انو الجماعه البطالبوا بالرد علي اسرائيل ديل خونه وعملا ومن لف لفهم


#373035 [واحد]
5.00/5 (2 صوت)

05-23-2012 03:12 PM
يقال والعهده علي الراوي ان العميل المقصود لم يكن داخل العربه ,شفت كيف - في المره الاولي غلطوا كتلو زولهم والان ما معروف الحاصل شنو غايتو يا نافع جننت الناس جن


#373034 [الشايقى]
5.00/5 (1 صوت)

05-23-2012 03:11 PM
والله ياود ساتى البلد دى فيها خرمه (مافى تشكيل ) وفيها كميه من العوار (برضو مافى تشكيل ) وقرفتك
دى بكسر القاف طبعا لاتسمن ولاتغنى من جوع وننتظر الشعب تصيبو القرفه ويطلع يعطس كلو يمكن يخرج جراثيمو من جسدو.


#373033 [راجل المرا]
5.00/5 (2 صوت)

05-23-2012 03:09 PM
بس يا الطاهر لحد الان ما سمعنا راى وزير دفاعنا الهمام... اكيد بكون لقى معلومة من الدهابة الموجودين فى الشرق..... او يكون سمع حاجة طايرة كدى من احد الرعاة يمكن يكون شاف اللهبة باليل


#373029 [صالح عام]
5.00/5 (2 صوت)

05-23-2012 03:05 PM
دائما رائع يا الطاهر ساتى طلعتنا من القرفه ودى سندوتشات محشوه بالقرفه ومعا كده الله يستر


#373028 [wedhamid]
3.00/5 (4 صوت)

05-23-2012 03:01 PM
يا الطاهر ...كدى أطلع من دورك ...يا إنت فاكر البيقرو ليك ديل ..عورا و عندهم قنابير؟؟؟ شوف المقاله دى ما بتاعتك ...أدتا ليك جهه ما و قالو ليك أكتبها ...لو بقت بتاعتك جد يبقى مقالات هجليج ديك السميتنا فيها لا وطنيين ما كتابتك لأن الأسلوبين بيختلفوا شكلا و مضمونا و روحا .....نقول عنك حسع شنو؟؟؟ ذو وجهين ...و الا عندك شيزوفرينيا و العياذ بالله


ردود على wedhamid
United States [عادل ابراهيم] 05-23-2012 05:57 PM
نعم ذو وجهين وأمكن عندو مرتبين او مرتين

United States [الشايقى] 05-23-2012 05:26 PM
wedhamid يا اخوى روق حبه الراجل مقالو سمح بالحيل


الطاهر ساتي
 الطاهر ساتي

مساحة اعلانية
تقييم
10.00/10 (12 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة