09-22-2010 11:59 AM

من حقي ان يكون لي عنوانا واضحا

سيف الاقرع
[email protected]


سألني صديقي السوري ابو باسل ( رجل اعمال يقيم في دبي قرابة الخمسة وثلاثون عاما .. التقيته في الصين .. رجل ذو خلق ودين ) عن عنواني في الخرطوم حتى يرسل لي بعض الاوراق المهمة .. اصابني الارتباك من هذا السؤال المباغت والحرج وصرت اتصبب عرقا في عز الشتاء وقلت له متلعثما .. ( انا في هذا الوقت لن اكون في السودان ارجو شاكرا ان ترسلها الى عنواني بدولة اخرى ) ..

ليس هذا هو الامر المهم .. ولكني شعرت بالمرارة والحنقة وكثيرا من الحرج والاستياء .. وتذكرت تلك الايام الخوالي التي كان ساعي البريد يأتي الينا في المنزل راكبا دراجتة الحمراء المميزة والتي يعرفها الجميع انها ( عجلة ساعي البريد ..) وتذكرت اغنية الفنان العظيم كمال ترباس عندما لم تصل رسالته .. اتهم ساعي البريد بالسطو عليها .( انا عندي ظن ساعي البريد شم العبير عجبو الكلام نايم عمل ) ..( ارجو ان تكون رسالتك قد وصلت الاخ ترباس ..) تصور كانت الرسائل تصل الى ديارنا سالمة امنه تحمل اخبار احبابنا المغتربين في اي دولة كانوا .. او حتى من داخل السودان الحبيب المترامي الاطرف .. تأتي من نيالا والفاشر والجنينة .. تأتي من جوبا وواو وملكال .. تأتي من حلفا وعطبرة وخشم القربة ( واحيانا من القربة نفسها ..) هل تصدق يا اخي كان في السودان شباب من هواة جمع الطوابع البريدية .. عجبا .. وهل تصدق ان التلغراف كان يصل في يوم او يومين الي اي مكان في السودان .. والرسالة المحلية تصل في اربعة وعشرين ساعة ( اي والله جربت ذلك بنفسي) ..

فكرت في سؤاله قبل ان ارد عليه عن عنواني في السودان .. ماذا اقول له ..وكيف اوصف له عنواننا في السودان وتخيلت انه حضر الى السودان واتصل بي هاتفيا ويريد ان يعرف عنواني ليحضر الي ( في زيارة ودية بمنزلي ) .. كيف اوصف له منزلي العامر.. ( بالباعوضة والذباب ياوزير الصحة ..) حتما سأقول له اذهب يمينا وخامس شارع على يدك اليمنى ( ستجد لستك سيارة ) مدفون في الارض مطلي بلون ازرق واحيانا ( احمر اذا كان صاحبه مريخابي ..) اتركة ثم انحرف شمالا ستجد ثلاثة لساتك مدفونات في الارض بالقرب من مكوجي ينشر الملابس في الشارع (غير مكترثا بالغبار والعجاج ودافوري الاولاد ) بالقرب من عمود كهرباء ( لمبتو محروقة ) اكل عليه الدهر وشرب .. نحن سادس بيت على شمالك بالقرب من شجرة نيمة .. تلقى واحد لابس ليه جلابية ( جناح ام جكو ) .. اذا سألته مني فسوف تصل ان شاء الله ..

اي حرج هذا ياوزير المواصلات او يا وزير الاتصالات او يا وزير المواصفات او حتى ياوزير الزراعة والداخلية .. اقصد في النهاية الوزير الذي تقع هذه المشكلة تحت مسؤلياتة فقد كثرت اسماء الوزارات كما تداخلت المهام .. وزير دولة كان اتحادي ..او مركزي او اقليمي ..و كثيرا من المثقفين او اللذين يظنون نفسهم كذلك ..واحينا نحن ايضا نظن (.. ان بعد الظن اثم ..) مولعين بالاستوزار( او حتى وزير عريس ) ..

اذا جاء حرامي الى منزلي مثلا او اذا كانت هناك جريمة واردت ان اتصل بالبوليس( النجدة اذا كانت هناك نجدة ) كيف اوصف لهم عنوان الجريمة او الزقاق الذي وقعت فية الحادثة او اذا اردت ان اتصل بالاسعاف (طبعا افتراضا اذا كان هناك سيارة اسعاف ..( كبر عقلك معاي عزيزي القارئ ولا تعترض على كل كلمة اقولها .. انا اقول .. اذا فرضنا .. او اذا تصورنا .. طول بالك ) كيف اوصف لهم المكان حتى يتم اسعاف المريض الذي حياته في خطر .. ( ايضا بالساتك والمكوجي ؟ )

هل صعب ايها المسؤولين ان ترقم البيوت وهي حتما مرقمه .. هل صعب ان نكون مثلنا مثل بقية دول العالم الثالث .. حتى هذه فشلنا فيها .. ان يكون لنا عنوان مثلنا مثل بقية الشعوب في العالم حتى يصلني مكتوب من صديق او معايدة او مستند او شهادة او رسالة من جامعة اود الالتحاق بها في منزلي او في مكان عملي .. هل اذا كانت لي رساله مهمة وانا خارج السودان و اود ان تصل سريعا يجب ان ابحث عن احد مسافر الى السودان وان لم اجده يجب عليً الذهاب الى المطار لعل وعسي ان اجد من اتوسم فيه الخير ان يحمل رسالتي هذه ثم اتصل بأهلي حتى يستقبلوه في المطار .. او يتكبد العناء مشكورا ويوصلها للشخص المطلوب .. ؟ ولماذا اكون مجبورا ان استأجر صندوقا في مؤسسة البريد والبرق حتى يكون لي بريدي الخاص ؟ طبعا اذا كان هذا النظام موجودا.. وهل يجب على كل بيت ان يفتح حساب لدي لبريد .. ؟

.. واسماء الشوارع .. هل هي صعبة ان نسمي كل شارع وزقاق في السودان حتى يكون معروفا لاي انسان .. شارع اسمه كذا بالمنطقة التي اسمها كذا منزل رقم كذا .. هل هذا الامر صعب هل كملت الاسماء .. كما كملت اسماء تسجيل الشركات و اسماء العمل .. في السودان .. وسؤالي هل الاسماء ايضا في السودان دخلت حيز الاحتكار.. وانا اكاد اجزم اذا سمينا اسماء شوارعنا بأسماء الوزراء السابقين والحاليين لوجدنا لكل شارع اسم .. واذا الاسماء كملت هل الارقام كملت .. ؟ من شارع واحد .. مثلا وحتى شارع مليون ..

..( هل تعلم ان في كل الدول الاوروبية والان في دول عربية ايضا جهازا مغذى بخرائط لجميع المنازل والمواقع والشوارع في الدولة يسمي ( (Navigation ( و وتعني مرشد ) تكتب فيه العنوان المنشود فيأخذك الى العنوان المقصود بالتمام والكمال من دون اي غلط في رقم المنزل او اسم الشارع دون عناء والان في الموبايل ايضا .. اين نحن من هذا .. ) لا .. لااقصد ان نكون كذلك في ليلة وضحاها رغم ان نفسي تتوق لمثل هذا .. بالطبع ممكن ..

ايها المسؤل .. هذا الامر ليس صعبا وهو من اسهل الاشياء ومن اهم الاولويات وهو جزء يسير جدا من حضارات الشعوب ان تكون هناك خرائط للبريد حتى للمناطق الجديدة وان يكون لنا عنوان .. ( وفي طرف كل شارع لافتة صغيرة مكتوب عليها شارع فلان او شارع رقم كذا .. او عمارة فلان .. وانا الان و على رؤوس الاشهاد اتبرع بمائة لافتة .. بس يطلع مسؤل واحد يتبى هذا الامر من الجهة المتخصصة ويقع هذا تحت مسؤلياتها .. ) هذا ليس كثيرا على المواطن ولا على الوطن .. ان يكون هناك شارع باسم معروف .. متفرع من شارع اخر معروف .. برقم منزل معروف .. رجاءا ايها المسؤلين اجعلوا لنا عنواناً واضحاً ..


سيف الاقرع .. لندن

تعليقات 7 | إهداء 0 | زيارات 1963

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#220704 [مها]
0.00/5 (0 صوت)

10-05-2011 05:49 AM
الاخ سيف السلام عليك وين بالله مقالاتك – اراها احتجبت انشاء الله الداعي خير اعجبتني قصتك مع صيقك الزائر ولم تجد لديك عنوانا واضحا ليقوم بزيارتك اعجبتني القصة كثيرا رغم الاحراج الذي الما بك ومن هنا سوف اشارك في الحل طبعا وكما ذكرت سلفا انو الزائر عربي الجنسيه يعني بنطق العربيه –اذا ما في مشكله كبيرة تقف حائلا – تمشي تقابله في المطار ولكني برضوا بلتمس في افكارك كثيرا من المطبات امكن تتاخر الطايره وتفشل الزياره لكن ما بعيد صديقك يكون محظوظ والطايره تحضر في مواعيدها-نحن ما نصبغ الحوادث يعني ودا الحل الاول –الثاني هو ان تاخبر الزائر ان ينتبه عند قدومه اليك وياخد الانتباه والتركيز و يجعله وسيله للوصول ---- طيب اها نقول صديقك نزل مطار الخرطوم طبعا سوف يحتار ويصبح مجنون ويتحدث مع نفسه وفي الاخر يسال احد الماره وين ياعمك ميدان ابو جنزير المهم نقول وصل الميدان –يركب تاكسي برضوا ما احل التاكسي جي-بي-اس محصور خلاص الاخ سيف صديقك يقف صامتا في الميدان ويستمع الي الجي-بي-اس( كماسره) ياسيد يهتفون ويصرخون السجانه—اركويت ابو حمامه جي-بي-اس في كل باب راكبه حافله كانت ام بص ولا دفار وهنا الزائر منتبه الي ان يسمع امدرمان يافردة ويصعد وهو يتصبب عرقا من التعب والمعاناة وحينها يحضر جي-بي-اس مختلف ويطالب باالتزكرهويقول الزائر في قرارة نفسه ما مشكله سعر التزكرة المشكله في توفيق الزياره ونجاحها ------ واخيرا صديقك المكافح وصل امدرمان المحطة الاوسطي ووجد مره اخري نفس الموال جي-بي-اس كاالعاده لحما ودما يهتف ابوروف يامعلم و يصل للمحطة المعينة وينزل فيها ويقف في نص الظلط دلوني احبابي السودانين لبيت الاقرع وفجاءة يجدك امامه ويبتسم ويتمتم السفرية كانت مريحة يااقرع ومن هذه النقطة الاخيرة اوصيك ا ان تجلس امام راسه وتقل الحمد لله الحمد لله الحمد لله وبركه الجيت طيب -------- اتمني من كل قلبي ان يتطور السودان ويتحضر وانت اخي سيف اتمني ايضا ان يزوروك كل الاهل والاصدقاء ويجدون علي باب منزلك يافطة عليها احرف من درر ياريت اكون وفقت في حل مقالاك


#26229 [ibrahim]
0.00/5 (0 صوت)

09-23-2010 12:05 PM
هب انك وضعت هذه اللافته في البيت وبعد المطره لقيت اللافته بس تودي الجواب وين ترمي في المويه دي عايزه مشروع حضاري جديد يعني 20 سنه وعليك خير


ردود على ibrahim
United Kingdom [سيف الاقرع] 09-27-2010 09:23 PM
الاخ ابراهيم .. اذا وقعت اللافته نرفعها مرة تانية وثالته ورابعة
هذا امر مهم


#26174 [عثمان موسى الفاضل]
0.00/5 (0 صوت)

09-23-2010 10:04 AM
شكرا علي تذكير الناس بابجديات الدوله!

ياخي لنعترف باننا امه فشلت

هناك خبراء سودانيون في تخطيط المدن ،الشوارع والبريد نفسه
لكن الولاء الاعمى
تسييس الخدمة المدنية
التلاعب بشؤون البلد
ضياع هيبة الدولة
نوم المجلس الوطني
عقلية العسكر في ادارة البلد
ويمكنك ان تضيف ماتشاء

ياخي اتوقع اسوأ مايمكن ان يحدث،، تجده عاديا في بلادنا
الوزراء ديل بياخدو مرتبات على شنو؟


ردود على عثمان موسى الفاضل
United Kingdom [سيف الاقرع] 09-27-2010 09:24 PM
نرجو من الله ان يصلحهم او يأخذهم اخذ عزيز مقتدر


#26096 [Omar Humaida]
0.00/5 (0 صوت)

09-22-2010 11:11 PM
ياخوي كيلو الطماطم ب 20 جنيه...اللحمه الضان 24 , العجالي 20..؟؟؟ تقول لي عناوين و sat nav...


ردود على Omar Humaida
United Kingdom [سيف الاقرع] 09-27-2010 09:26 PM
الاخ عمر حميدة انت في بريطانيا وتعرف تماما اهمية هذا الامر
نرجوا لبلادنا التقدم بعد هذا الحال
لك ودي


#25991 [قاسم علي]
0.00/5 (0 صوت)

09-22-2010 03:16 PM
اشد من اذرك اخي الاقرع...انسب اسلوب لمعالجه المشكله هي الطرق عليها..ورحله المليون تبداء بخطوه..والله عار علينا ان نظل بلا عناويين......انشاء الله تلقي استجابه.. ومني انا برضو 100 يافطه


ردود على قاسم علي
United Kingdom [سيف الاقرع] 09-27-2010 09:27 PM
تسلم على التضامن ياسيد قاسم علي
لم التحايا


#25973 [حامدابوعبدالمجيد]
0.00/5 (0 صوت)

09-22-2010 02:38 PM
ودالاقرع مساك عافيه طيب ومرطب وناس الراكوبه معاك
بالامس كتبت عن الهايد بارك واليوم عن ترقيم المنازل وبدون زعل الموضوعين ديل ترف مابعده ترف ياخى ديل ناس فى غاية التنظيم والاحترام والمسؤولية والوضع ده وصلو ليهو بعد حروب ودماء يعنى عرفو قضيتهم وين عكسنا فى كل شئ عدم احترام للمواعيد وعدم تحمل المسؤولية تعرف اعداد البموتن فى الولادة والتشخيص الخاطئ والبنج والمبنجين المضروبين قبل فترة ويمكن تكون عشرة سنين احتفلت بريطانيا بالصفر فى المائه من الموت فى غرف الولادة وهنا بنطلب منك تجيب لينا من بريطانيا دى الحاجات الطبية القديمة طبعا هم ناس بجددوا معداتهم الطبية وسراير المرضى والملحقات الطبية تكون ماقصرت والله
والله ياسيف اخوى لو جيت قريب السودان وشفت المطره الواحده بتسوى فينا شنو فى الاحياء الشعبيه ماقلت كلامك ده والعجب مع المطره يتاخر شيل النفايات والاصلن متاخر شيلهم يمين الله فى الشارع مابتجيك ريحة فى نخرتك والله تحس بى طعمها فى لسانك بدري شدييييييييييييييد على الترقيم

......تصبحوا على وطن
ملحوظة ياسيف انت اخو منير الاقرع


ردود على حامدابوعبدالمجيد
United Kingdom [سيف الاقرع] 09-27-2010 09:28 PM
الاستاذ حامد عبد المجيد .. نرجوا اصلاح الحال
لك ودي

United Kingdom [سيف الاقرع] 09-22-2010 03:05 PM
تحياتي لك ولابن اخي منير عمر الاقرع ونرجوا من المسؤولين بالبلد الحبيب ان يقوموا بواجبهم فقط


#25920 [عبدالمنعم ]
0.00/5 (0 صوت)

09-22-2010 12:30 PM


الاقرع حياك الله ،، بس انت بتحلم بفكرة حضارية في بلد عقلية المسئول فيهو بلدية ومتخلفة ،، ديل فيهم ناس لي هسع بعتقدوا لبس العراقي هو الرجالة والبنطول لبس المارجال ،، وبحلفوا بالطلاق في الفاضية والمليانة وعقلية العبد والحر ود العرب !!1 المسافة بعيييييييييييييييييييييييييييييييييييييييييييييييييييييييييييييييييييييييييييدة !!!
بعدين ناس العقلية الاستثمارية لو عملوا بالفكرة دي حيغنوا منها لافتات باسم الشوارع وارقام بيوت وشقق والله جاتهم في جرح ،، دة مشروع فيهو هبرة تريح لي جنا الجنا ، عشان كدة بنصحك لله احفظ قريشاتك الاسترلينية وما تغلط وترسل ليك لافتة واحدة .... ودمت ..... ;)


ردود على عبدالمنعم
United Kingdom [سيف الاقرع] 09-27-2010 09:31 PM
الاستاذ عبد المنعم
نرجوا الله ان يغير افكارهم وينيرهم ويجعلهم اكثر عقلا .. شكرا على المداخلة لك الود


سيف الاقرع
مساحة اعلانية
تقييم
9.94/10 (64 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة