في



أوسع من الصين؟
06-04-2012 09:59 AM

أوسع من الصين؟

الفاتح جبرا
[email protected]

إنتشرت في الآونة الأخيرة ألقاب لا يدرك العبدلله كنهها ولا يعلم متطلبات (نيلها) .. يستضيف أحد البرامج السياسية أحدهم فيقوم مقدم البرنامج بتعريفه للمشاهدين بأنه الأستاذ فلان الفلاني (الباحث في شئون الثورات العربية) او يستضيف أحد أستوديوهات التحليل الكروية أحدهم مقدماً أياه .. الكابتن علان العلاني الخبير في (دائرة السنتر) !
ولأن المسالة جايطة وكده فالعبدلله ينصب نفسه اليوم خبيراً وباحثاً (كمان) في (العمالة الوافدة) والتي اصبحت أعدادها (موبااالغة) ، والآن إلى بعض المقتطفات من الحلقة التى أجرتها معي إحدى القنوات الفضائية بصفتي باحث وخبير وكده .
س- الباحث والخبير الفاتح جبرا : هل دخلت كل هذه العمالة الوافدة التي نراها إلى البلاد بصورة رسمية وشرعية ؟
ج- للأسف الشديد فإن أكثر من 90% منهم دخلوا عن طريق التسلل عبر الحدود وعشان ما يجي زول يغالطني في النسبة دى نقول إنو هذه العمالة دي غير محصورة لذلك لا يمكن وضع نسبة بينها وبين العمالة التي دخلت بصورة شرعية .. يعني النسبة دي مأخوذه من المعايشة اليومية والحاجة القاعدين نشوفا وكده !
س- إذن ماذا يعني دخول هذه الأعداد الكبيرة ؟ هل يوجد خلل أمني سعادة الخبير؟
ج- بالطبع نعم ودي ما عاوزة ليها إتنين تلاته فتسلل هذا الأعداد ودخولها حتي الي (عاصمة البلاد) ناهيك عن المدن الأخري يوضح بأن (المسألة سايبة) وليس عليها أي (كنترول) !
س- لكن يا أستاذ نحنا حدودنا واسعة وكده !
ج- يعني أوسع من الصين؟
س - أستاذ جبرا الباحث في شئون العمالة الوافدة والخبير في الشنو ما بعرفو داك : ما هي المخاطر من هذا الوجود غير القانوني ؟
ج- هي داب مخاطر؟ تصورى (لازم تكون مذيعة) أن يكون داخل البلاد ملايين الأشخاص الذين لا تعرف عنهم السلطات أي شئ ؟ أليست هذه قنابل موقوته؟ في كل بلاد العالم يتم إعادة المتسللين بصورة غير شرعية إلى بلادهم ويتم تسجيل الذين يأتون عبر المنافذ الرسمية المعدة لذلك ويتم أخذ بياناتهم ولا يمكن أن يقوموا بالسكن في الفنادق ما لم يبرزوا المستندات التى توضح دخولهم الشرعي ولا يتم تأجير منازل لهم ما لم يبلغ صاحب المنزل السلطات المسئولة !
س- أليس هو ما يحدث عندنا الآن ؟
ج- يحدث شنو؟ نحنا هسه عندنا أحياء كااااملة وافدين وبس؟ أمبارح دي ركبتا ليا ركشة سواقا وافد وكمان (مدردم ليهو سفة) ومشغل في المسجل (حواء الطقطاقة) !
س- هل هنالك اي مخاطر صحية من وجود هؤلاء؟
ج - بالطبع توجد الكثير من المخاطر الصحية فهؤلاء الوافدون لما يتم فحصهم طبياً للتأكد من خلوهم من الأمراض ومعظمهم لهم تعامل مباشر مع المواطنين كتحضير الطعام أو الشاي وخلافه والله في واحدين من شكلهم عيانين شديد ولو شغلو فيهم (إنتى فايروس) يطلع ليهم 3548 مرض في (الريجيستري) بس !
س- وهل هنالك مخاطر أمنية؟
ج- بالطبع (خاصة) انهم ما معروفين والسلطات ما عندها ليهم حصر أو سجلات والمتتبع للصحف الإجتماعية يري بوضوح تزايد أعداد الجرائم التي يرتكبها هؤلاء الوافدين.
س- وهل هنالك مخاطر إقتصادية من هذا الوجود؟
ج- مما لا شك فيه أن تحويلات هذه العمالة الوافدة بصورة غير شرعية تؤثر في اقتصاديات الدولة بشكل ملحوظ وتساوي نسبة مقدرة من الناتج المحلي الإجمالي .. يعني بس لو كل واحد منهم رسل ليهو 50 دولار شهرياً لي أهلو الجملة ح تكون كم؟ والله إحتمال كبير يكون الدولار الطاير السماء ده واحدة من أسباب طيرانو الناس ديل والزول بتاع (الحج والعمرة) !
س- سعادة الباحث والخبير نحن نتساءل هل هنالك دراسات وإخصائيات تمت في هذا الخصوص؟
ج- والله أنا المجنني عديل كده إنو كل يوم تفتح ليك جريده تلاقي ليك الف وخمسمية تهنئة بنيل الماجستير والدكتوراة والشنو ما بعرف لكن ولا واااحده من الأطروحات دي بتبحث في مشكلة يعاني منها الوطن والمواطن ... هسه جنس الشئ الحاصل في موضوع العمالة الوافدة الغير شرعية ده مش عاوز ليهو بحوث علمية ؟ وللا أنا غلطان ؟
س- إنتا ما غلطان سعادة الخبير لكن نستشف من إجاباتك بعض التحامل على هؤلاء الوافدين هل أنت ضد وجودهم بيننا ؟
ج – أنا لست ضد وجودهم بيننا فنحن كسودانيين (ذااااتنا) نشكل عمالة وافدة لكثير من الدول لذلك نحترم بحث الآخرين عن فرص للحياة الكريمة والعمل الشريف في كل بلاد الله الواسعة ولكني ضد أن تكون (القصة سايبة كده) !
س- بما إنك خبير في شئون العمالة الوافدة ممكن تورينا بعد ما (الفاس وقع في الراس) وملايين الوافدين غير الشرعيين (دخلوا البلد) ، كيف يمكننا أن نتعامل مع هؤلاء الوافدين ؟
ج- من المفترض أن تبدأ اليوم قبل الغد حملة من أجل إعطاء الصبغة القانونية لوجود هؤلاء الوافدين بمعني أن تتجاوز الدولة مسألة دخولهم غير الشرعي (لأسباب إنسانية) ولكن تقوم بحصرهم وإجراء فحوصات طبية لهم لإعادة المرضي بأمراض معدية منهم لأوطانهم أما البقية فيتم تسجيلهم وأخذ صورهم وبياناتهم وأماكن سكنهم ! على أن تتم معاقبة كل مواطن سوداني يقوم بتشغيل أو إيواء اى شخص أجنبي غير مسجل لدى الجهات المختصة !
س- والدولة تجيب ليهم قروش من وين للحاجة دي مع رفع الدعم و(الفلس) الحاصل ده؟
ج- بسيطة .. يمكن الإتصال بالمسئولين في دولهم من أجل دعم الإنفاق على (هذا المشروع) لأنه بالطبع يقع في مصلحة هذه الدول ومواطنيها ديل
س- نشكرك أستاذ جبرا الخبير في شئون العمالة الوافدة والباحث في المركز الإستراتيجي للهجرة غير الشرعية في أعالي الجبال والبحار والدول المجاورة !
كسرة :
قولوا المشروع ده تم و(حصرناهم) وسجلناهم .. ح نقدر على مراقبة الحدود كيف مع الباصات البتجي (طافية النور) دى ؟

كسرة ثابتة :
أخبار خط هيثرو شنو(ووو ووو)؟ - عملناها ليهم تلاته بي جاي وتلاتة بي جاي !!





تعليقات 32 | إهداء 1 | زيارات 10156

خدمات المحتوى


التعليقات
#385268 [ود البلد]
0.00/5 (0 صوت)

06-06-2012 10:59 AM
موضوع فى غايه الاهميه استاذنا الخبير جبرا متعك الله بالصحه

نعمل حمله اعلاميه عبر قراء الكاتب والخبير الاستراتيجى جبرا لوقف كثير من المهازل البتحصل فى البلد اسمها الحمله


انا ليهم بقول سلام دخلوها وصقيره نام.



كسره: تبقى كارثه لو الريس سمع الشعار ده لانوا حيجى يهز ويعرض.


#384940 [رادونا]
0.00/5 (0 صوت)

06-05-2012 10:58 PM
والله يااستاذ جبرة كتب الكتاب وفتروا
لا ادري لماذا كلل هذا الصمت الحكومي تجاه هذا التواجد الاجنبي الكثيف
ولكن ارى تنوير هؤلاء الاجانب بان البترول قد ضاع مننا
يعني الحالة كربة وهذا الغلاء الفاحش جدا
ولكني اعتقد ان الهجرة العكسية او المرور لاروبا افضل لهم


#384903 [عبدالله]
4.00/5 (1 صوت)

06-05-2012 09:38 PM
90 بالمائة من الوافدين حبوش واريتريين - واصلا وزير الداخلية اريترى ووضع هنا خصيصا للتلاعب بالحدود؟؟؟؟؟ لانه لا يمكن لمهندس عادى ان يكون وزيرا للداخلية ولم نسمع بذلك فى كل بلاد الدنيا الا عندنا هنا فى بلاد العجائب ولذلك سيغض الطرف عن ابناء جلدته من الاريتريين وابناء عمومته من الاحباش - فهمتو ياسادة ؟؟؟؟؟؟؟؟


#384581 [ابونصر]
0.00/5 (0 صوت)

06-05-2012 03:02 PM
مبروك جبرة الواو السادس باقي ليك ثلاثة ووات وعشرة يوم عشان ............؟


#384386 [مكتول هواك]
0.00/5 (0 صوت)

06-05-2012 12:21 PM
والله لو عملتهم مليون واو مايردو عليك ديل ماشين بسياسة الكلب ينبح والجمل ماشى


#384342 [بت الحصاحيصا]
0.00/5 (0 صوت)

06-05-2012 11:52 AM
استاذي العزيز جبرا اننا ندين ونشجب ونستنكر
ندين كل من سمحت له نفسه في الفساد في هذه الارض
ونشجب علي تردي امننا الحامينا والقلو يزيدو ليهم المرتب تلاتة اضعاف لشنو ماعارفة لو جابو ليهم نظارات من اليابان ماكان احسن
ونستنكر الضيم الذي حل بنا وسكوت ابنا شعبي الابي لماذا لانقولها بصوت مرتفع ارحل يابشير انت واعوانك اليوم قبل غدا فانت السبب في كل هذا
والله المستعان


#384265 [كمال المهدي]
0.00/5 (0 صوت)

06-05-2012 11:12 AM
ياخي عليك الله خليهم هو نحنا ناس العمرة السوادنيين المتخلفين في السعودية شوية . . . انت عارف انو في سودانيين لقوهم في المانيا متخلفين من عمرة خليهم يشاركونا الأسي و الأسية بس قول إن شاء الله ما يجيهم المرض العندنا و يطلعوا ليهم مؤتمر وطني في بلادم اتخيلوا خطورة العدوة الممكن تصيب دول هي زاتة تعبانة لو بقي فيها جماعة زي العندنا ديل .


#383962 [اود الحارث]
0.00/5 (0 صوت)

06-05-2012 08:01 AM
لك اللة يا وطن كان يوماللشرفا ملجاء واليوم يباع بيع الخراف من تجار الدين ومدعيين التدين وغدا لناظرة لقريب انشاء اللة


#383960 [زازووق]
0.00/5 (0 صوت)

06-05-2012 08:01 AM
حذارى من الفلبينيات وبولهن فى الطعام


ردود على زازووق
United States [karama] 06-05-2012 10:35 AM
يا زازووق يعني المرين بقى بردو في منه فلبيني؟!!!!!!! للذين لا يعرفون المرين،،،المرين هو مستخلص غذاء الذبيحة ، يتعمل مع الشطة ليؤكل به اللحم المشوي عند اهلنا في الريف الجميل.


#383751 [المهجوم]
5.00/5 (1 صوت)

06-04-2012 09:00 PM
والله يا أستاذ كلامك في الصميم الوافدين ديل بدون كشف طبي ح يكونو قنابل موقوتة .. خليكم من الأيدز والله إلتهاب الكبد الوبائي ده من أفتك الأمراض وإنتقالو سريع شديد فحقو الناس تسمع كلامك ده وأي زول يسوق الشغالين معاهو وعلى الفحص وربنا يجيب العواقب سليمة وبس
كسرة :
قلتا ليا الأنوار مطفية !! خلاس ح يكون عندنا دفاع بالنظر للسماء ودفاع بالنظر للأرض هههههه تسلم يا أستاذ يا رائع


#383673 [sahi]
5.00/5 (2 صوت)

06-04-2012 06:13 PM
الحدود فاتحة شارع والبصات تصل الخرطوم وكسلا والقضارف يوميا دا غير اللواري والشاحنات دي بقت تجارة عديل التهريب للشخص بي كم كدا ماعارف كل هذا تحت سمع وبصر السلطات يعني ضاربين طناش بالاضافة الى ان وزير الداخلية ذااتو ينتمي لأحدى دول الجوار اعمامو كلهم هناك يعني ما ممكن يزعل اهلو عشانا.
اذا ركبت حافلة او هايس تجد سوداني واحد بين كل ثلاثة ركاب واذا سألت في كل الاحياء تجد ان اعدادا كبيرة من المنازل تم استئجارها من قبل اجانب وبمبالغ خرافية ومغرية لكل صاحب منزل دون علم مجالس الاحياء ولا علي كيفها . يتم استئجار المنزل من قبل شخص واحد ويقوم هو بايجاره من الباطن لحوالي الثلاثين شخص غير استخدامه كفندق يعني اليوم بي كده وطبعا في النهاية يكون هو ساكن مجان ومطلع مصاريفو في امانة الله .
الامراض العندهم ما في زول عارفها لأنهم اصلا ما دخلوا بي كشف طبي . ولا في زول فاضي عشان يكشف عليهم واذا دخلت عدوى عن طريقهم مافي مشكلة .
هؤلاء الاجانب عبء اقتصادي يشاركون المواطن العمل ووالسكن والعلاج واسأل كمال عبيد هل الحقنة يستحقها الجنوبي ام الحبشي ؟
تشاجر حبشي مع احد ابناء الدينكا وقال ليهو انتووو لسه قاعدين ؟


#383665 [fatmon]
0.00/5 (0 صوت)

06-04-2012 06:06 PM
واجده من آثار دخول الوافدين بطرق غير شرعيه الكبد الوبائي عند فحص الوافدين في دول أخرى حالة الإشتباه فقط تتسبب في إرسال الوافد لبلاده فورا ويتم الفحص على حساب الشخص الذي يقوم بإستخدامه
دواء الكبد الوبائي في الدول المتقدمة الحبة الواحده سعرها 20 دولار لمدة سته شهور على أقل تقدير
وطبعا الكبد الوبائي معدي جدا وسريع وعلاحه في دول كالسودان وبمبالغ زي دي طبعا تكاد تكون مستحيله لكم أن تتصورا إذا عاملة واحده بتاعت شاي وكل من يشرب عندها تسبب في عدوة أهل منزله فقط ناهيك لو كانت عدوى من واحد فقط وفي مناسبة عرس أو مأتم
لنفرض كل شخص في السودان تعمل عنده واحده من هؤلاء الوافدات فكر مجرد تفكير في الكبد الوبائي وحجم خطره عليه وعلى أسرته لتراجع عدد الزين يستخدمون هؤلاء (الزين لم يتم فحصهم)لأقل المستويات فالحكومة لاهيه وطبعا كله يمكن يكون ملحوق إلا الصحة قولوا يا لطيف


#383619 [لجنة التنسيق]
5.00/5 (3 صوت)

06-04-2012 05:10 PM
تدعو لجنة التنسيق جماهير الشعب السوداني للخروج في مليونية الحسم..
انطلقت اعمال التنسيق الميداني في جميع ارجاء السودان
الله اكبر ولا نامت اعين الجبناء


#383519 [عطشاااااان]
5.00/5 (1 صوت)

06-04-2012 03:15 PM
الحدود رسمة المستعمر وفات نعم اعداد الوافدين او متسللين او داخلين وطافبن نور مامشكله فى المسمة الاهم من كده الاعداد المهوله التى تملا الاحياه والشركات والبقالات والكفتربات و اشارات المرور ...الخ وهى عبارة عن عمالة اجنبية حتى اشارات المرور عماله اجنبية نعم متسولين اجانب (شحاتة معلبة )ومنظمة دخلت من كل حد وصوب من تشاد وارتريا والصومال ونيجيريا وافريقيا الوسطة ومن مصر مخلفة بعض الشى هى عماله لاكن مصرح لها حسب الاتفاقيات الاربعة سؤال لكل غيور على هدا الوطن لمادا تم القبض على اكثر من 500 سودانى منقب على الدهب فى الحدود المصرية السودانية بتهمة التسلل وتم محاكمت بعض منهم 3 سنوات سجن لمادا نقيف نحن السودانيون امام السفارة المصرية بالخرطوم من الساعة السابعة صباحا لكى نحصل على تاشيرة دخول الى مصر هل الاتفاقيات الاربعة تم توقيعها من الجانب المصرى وحده ؟ جايز محمد على بك رجع يحكم واحنا ماعرفين. اخبار مطار الخرطوووم الجديد شنو ياجبرا


#383476 [محمد حمد]
5.00/5 (2 صوت)

06-04-2012 02:27 PM
الله يدك العافيه ي استاذ جبرا وانتو والله حيرتونا الطايرات تجي طافيه نور والبصات تجي طافيه نور ياجبرا بالله الموضوع الجاي اكون عن النور الطافي وكده


#383473 [الصادق علي موسي]
0.00/5 (0 صوت)

06-04-2012 02:25 PM
والله برضو مابشتقلو بيك


#383471 [موجوع]
5.00/5 (3 صوت)

06-04-2012 02:22 PM
قولوا المشروع ده تم و(حصرناهم) وسجلناهم .. ح نقدر على مراقبة الحدود كيف مع الباصات البتجي (طافية النور) دى ؟

في دي ياجبرة نشوف وزير الدفاع وأكيد حيمنع تحرك أي بص بعد الغيبة ... الحركة نهار فقط ....


#383432 [اسد الهندكوش]
1.00/5 (1 صوت)

06-04-2012 01:47 PM
اخونا الفاتح جخرة يحليلك كمان قبلة على الصين ده امريكا العاجباك ده ما قدرة عليها عفارم عليك يا اوخي كبر عمتك شوية إمكن تفتح ليك بوتيك في شيكاغو


#383398 [بو خالد]
5.00/5 (1 صوت)

06-04-2012 01:17 PM
يا جبره :نحن السودانيين ديل ناس طيبين ومضيافين وحتى حكومتنا كذلك والبجينا عيب نطرده كمان يقوم يزعل مننا ... وخاصة زوار الليل ابان نورا طافي .


#383383 [wedhamid]
5.00/5 (1 صوت)

06-04-2012 01:06 PM
الأخ جبرا .....أجمل شئ و بوساعة الصين .....وأحلى شئ .....السؤال بتاع الكسره (( ح نقدر على مراقبة الحدود كيف مع الباصات البتجي (طافية النور) دى ؟))

يحال هذا السؤال للسيد وزير الد... أبو رياله.....سلمت يا رجل !!!!


ردود على wedhamid
United States [الزول الكان سَمِحْ] 06-04-2012 05:43 PM
ود حامد...سلام

هو نحنا مش عندنا جنب كوستى حتة إسمها الوساع؟؟

طيب..ود جبرا ده ليييه خلاها ومشى لى وساع الصين ؟؟

والبصات الطافية أنوارها دى ..ياربي ليها جنحات؟؟


#383362 [ياسين]
5.00/5 (3 صوت)

06-04-2012 12:44 PM
قدمنت المذيعة الناجحة (س) شدة ما ناجحة عندها 500 توب ومن مؤهلاتها ايضا انها استهلكت شحنة باخرة من المواد المبيضة للوجه والمطولة لشعر الراس الفاضى خالس خالس - قدمت في برنامجها الجماهيري - فقعة مرارة - الاستاذ جبرا الخبيروالباحث في شئون العمالة الوافدة وحاجات تانية حاميانى .
ونحن الطبقة الاقتصادية الطفيلية التى تهيمن علي شرايين الاقتصاد في البلد ده نشجب وندين ونستنكر ما جاء على لسان الخبير وذلك للاسباب التالية :-
أولن : يادوبك الواحد فينا مأجر واحدة فلبينية عشان المدام لما يجوها صاحباتها تتكلم معاها بالانجليزي
وتقول ليها بالانجليزي طبعن* ( بت يا لوييييز برنق تي وجك الوووتر ) وواحدة حبشية تسوي الشاي والقهوة واتنين في المطبخ واحدة سيرالانكية وواحدة هندية واحدة تشيل الولد وواحدة تمشى مع المدام كان لى بيت بكا كان لى فرح وبس - وذلك اسوتن* يى دول النفط وكده.
سانيان : اذا قامت الدولة بي حصرهم وتسجيل بياناتهم وعناوينهم حتقوم تفرض عليهم ضرائب وجبايات وتطبع ليهم اورنيك 15 من النوع الما بخش خزينة المالية بسموه - ناس الدولة - (اورنيك 15 خارج الرحم ) وده ما موضوعنا - اها تقوم الحكاية دى - الضرائب والجبايات دي تغلي سعر العمالة الوافدة ويتحملها الطفيلى المسكين .

علي فكرة الغلطات المطبعية دى مقصودة لانو لو كتبتها صح في جماعة كتار من الخريجين الجدد ما بفهموها
اولن : اولا طبعن : طبعا وهكذا


ردود على ياسين
United States [karama] 06-05-2012 10:40 AM
عيب يا ياسين انت اكتبه صح وخليهم يشوفوها في القوقل!!!!!!!


#383347 [حسام]
5.00/5 (2 صوت)

06-04-2012 12:32 PM
ما تورينا الطفا النور منو يا جبرا!!!


#383329 [زهجااااااااااااااااااااااااااااان]
5.00/5 (1 صوت)

06-04-2012 12:21 PM
تحت تحت سمعنا انو الوافدين بقو يجندوهم في قوات خاصه


ردود على زهجااااااااااااااااااااااااااااان
United States [karama] 06-05-2012 10:42 AM
تحت تحت شنوا يا زهجان؟؟؟ ما ياهو داك وزير الداخلية!!!! اعوا تقول لي قلت شنو؟


#383320 [noor]
5.00/5 (1 صوت)

06-04-2012 12:17 PM
نسيت اقول ليك مبرو النون السادسة وعقبال مئة والله تاعب روحك ساي بس ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


#383318 [noor]
5.00/5 (2 صوت)

06-04-2012 12:16 PM
يا خبير جبرا نسيت تقول في بداية اللقاء( بسم الله الرحمن الرحيم والحمد لله رب العالمين والصلاة والسلام علي اشرف المرسلين سيدنا محمد القوي الامين الذي به نستعين لشفاعة رب العالمين ) ودي طبعا زي ما قال اخونا ( الطاهر ساتي ) بيبدوا بيها كل الخبراء في هذا الوطن الحاميين حدود واموال الشعب ؟؟؟؟؟
وبعدين هل ظهرت في اللقاء بدقن ولا حالقها عشان نعرف انت اي نوع من الخبراء مهمين ولا اي كلام كمان كنت لابس شنو عمة جديدة نظيفة ومعاها خاتم كبير كده وملفحة والعصاية كمان المهم لو عندك فيديو للحلقة رسله لينا ؟؟؟؟؟؟؟ وخلي موضوع الحلقة الجاية يكون في كيف يمكن للزول ان يتزوج 3 و4 وكيف بيسفسفوا ويبنوا العمارات وكيفية الخروج من زنقة المراجع العام اللي ما عارف حاجة ده اها والمذيعة ضاربة وشها الوان وبتبتسم ليك كل مرة وهي ما شايفاك من كترة المكياج في عيونها
ونرجع لموضوع الحلقة 75% من العمالة الوافدة عندها ايدز وسل وامراض جلدية ودوسنتاريا وامراض اخري لاندري ما هي الا هم من ده كله النسوان في البيوت بيهمهم عندهم شغالة حبشية او ماليزية او اندونيسية لكن احوالها شنو ما مهم وهن يمرقوا ويخلوا البيوت والاطفال معاهم لا حول ولا قوة الا بالله العلي العظيم


#383289 [نوبي]
5.00/5 (1 صوت)

06-04-2012 11:44 AM
وبصفتي خبير في شئون التسلل( بكل انواعو) حتي في الكورة ,,,اشاركك الرأي والمشورة ...وانبجس ..وانبعج ..بالاندياح ..( عشان تقتنع انو انا خبير ) ..مع هذه الامور ...واخبار كل الخطوط شنو ...مش خط هيثرو براهو ...


#383281 [azhari]
5.00/5 (1 صوت)

06-04-2012 11:28 AM
ههههههههههههههههههههههههههه... ربنا يطول عمرك استاذنا جبرة والله العظيم انا اول مرة اضحك من فترة طووويلة ... ربنا يخايك ولجميع رواد الراكوبة المحترمين...لكن سؤال... ليه عملت (تلاتة بى جاى وتلاتة بى جاى).. ارجووك ابن.. اوضح.ز افصح,, دايرين فهامات وكدة...!!!!!!!!


#383258 [mohamed elhadi]
5.00/5 (1 صوت)

06-04-2012 10:51 AM
اسأل سيرباك دفاع السودان


#383240 [سوداني وبس !!!!]
5.00/5 (1 صوت)

06-04-2012 10:42 AM
لاأسكت الله لك حسا
صراحة هم يبكي وهم يضحك !!!!!


#383230 [الزول الكان سَمِحْ]
5.00/5 (1 صوت)

06-04-2012 10:32 AM
يا أستاذ

العمالة الوافدة من دول الجوار..أى صحيح متسللة..بس التسلل ده بيشوفوه الحكام وبيطنشوا لأنو بايعين المباريات وقلبضين حقهم..

هل تعلم؟؟ بأن التسلل عبر الحدود بقى تجارة مربحة؟؟ أو تدرى من هم التجار؟؟

إنهم حماة حدود ( الجَبُونْ) أقصد السودان جهاز الأمن..وحرس الحدود..ومكافحة التهريب وبأتمان متفاوتة..تبدأ من 2 مليون إلى 5 للفرد الواحد..

إنه الإتجار بالبشر..وإن كنت ما مصدقنى ...أعمل إستبيان مع شريحة واحدة من الوافدين الساكنين جنبك وحا تسمع العجب..

دخلوها وغفيرها صااااااااااحى..وقااااااابض


#383220 [المغربي]
5.00/5 (4 صوت)

06-04-2012 10:27 AM
الحل الوحيد نديهم الجنسيه السودانيه . وتقوم الحكومه تعمل ليهم ضرائب وتعصرهم ذي ماعصرتنا لمن يجيبو الزيت تاني براهم بغادرو .


#383209 [شوكة حوت]
5.00/5 (2 صوت)

06-04-2012 10:19 AM
يعني بس لو كل واحد منهم رسل ليهو 50 دولار شهرياً لي أهلو الجملة ح تكون كم؟ والله إحتمال كبير يكون الدولار الطاير السماء ده واحدة من أسباب طيرانو الناس ديل والزول بتاع (الحج والعمرة) !
أبدعت في الحتة بتاعت (الزول بتاع الحج والعمرة)


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة