الفهم قسمة (شرح مقال)
06-13-2012 12:41 PM

الفهم قسمة (شرح مقال)

الفاتح جبرا
[email protected]

كنت قبل أعوام قد كتبت مقالًاً بعنوان (فتاوى هايفة) وذلك حين أصدرت لجنة الإفتاء التابعة للأمانه العامه لهيئة كبار العلماء السعودية فتوى بعدم جواز تقديم (باقات الورد والزهور) للمرضى عند زيارتهم بحسبان أن ذلك من أفعال الكفار ، وقد جاءت هذه الفتوى في وقت كانت تنطلق فيه طائرات (الكفار ذاااتم) من قواعد في بلدان (إسلامية) لتضرب إخواننا المسلمين في العراق وكنت في ذلك المقال قد اردت أن اقول (إنتو يا علماء يا أفاضل ما أفتيتو لينا في الطيارات البيقوموا بيها الكقار من قدامكم عشان يضربو أخوانكم المسلمين تقوموا تفتوا لينا في الحاجات الهايفة دي؟) !!
والعبدلله يعلم أنه ما من فتوى (هايفة) وأن كل الفتاوى وإن كانت صغيرة من شأنها أن تنير طريق المسلم وترشده إلى سواء السبيل لكن (الهيافة) هنا عزيزي القارئ تأتي من مقارنة (إهداء الزهور) وإنطلاق الطائرات من ديار الإسلام لضرب المسلمين وإبادتهم.
وعلى الرغم من إنو الموضوع وااااضح والهدف منو أكثر وضوحاً إلا إننى ما أن قمت بنشر المقال وعينكم ما تشوف إلا النور فقد ترك بعض القراء الذين يعتقدون (كمال الفهم الديني) قصة القواعد (الأمريكية) و قتل (المسلمين) وعدم إدلاء (العلماء) بفتوى حول هذا الأمر الجلل .. تركوا ذلك (وقبلو على العبدلله) علي الرغم من أن العبدلله قد قال (كلمة حق) علها تيقظ ضمائر العلماء وبصائرهم التى تري (إهداء الزهور للمرضي) ولا تري دماء المسلمين التي يسفكها الأمريكان منطلقين من ديار الإسلام وأراضيه !
وعلى نفس الشاكلة وذات الفهم فقد قامت (ذات الفئة) بترك ما فعله (الشيخ ونيس) والحتة (البايخة) الذي وضع نفسه فيها وذلك في مقالنا عنه والذي جاء موثقاً بالصورة والصوت و(قبلو على العبدلله) يصفونه بأقذع النعوت والشتائم (التى لا يرتضيها الإسلام) وذلك في موقعنا على الفيسبوك .
http://www.facebook.com/alfatihgabra
تساءل البعض : ماذا يريد الكاتب من هذا المقال !
الإجابة في غاية البساطة وهي يجب أن ينال مثل هذا الشيخ أشد العقاب والتنكيل لأنه يسئ إلى الإسلام فهو ليس فرد مسلم عادي بل رمز إسلامي وداعية يعتمد عليه في هداية الشباب إلى طريق الإسلام الحق والبعد عن الرذائل والمنكرات .. فكيف إذا أتى بها هو؟ وكيف يثق الشباب بعد ذلك في دعاتهم ؟ العبد لله يري إن ما فعله هذا (الونيس) يستحق أن يغضب له أى مسلم غيور على دينه حتي يرتدع كل من يحاول أن يخدع الناس بتدثره بعباءة التدين بينما لا يتورع عن القيام بفعل الرذائل والمنكرات !
ليست المسالة هنا مسالة (إثبات) حدوث الواقعة بل وجود هذا الشيخ في موقع الشبهات الشئ الذي لا يليق به كداعية إسلامي ألم تسمع هذه (الفئة) ذلك الحديث عن الإمام علي عليه السلام: ( من وضع نفسه موضع شبهة فلا يلومنَّ الناس على سؤ الظن به) !
وهل تعتقد تلك (الفئة) أنه كان على العبد لله (كمسلم) أن يصفق للشيخ (ونيس) الذي إختار مكاناً نائياً وطريقاً سفرياً سريعاً وليلاً بهيماً ليجلس في عربة موصدة الأبواب ومعه فتاة لتأتي إجاباته للشرطة تارة بان الفتاة خطيبته وتارة أخري بأنها إبنة شقيقته؟
دعوني أتساءل : أوليس من مسئولية الكاتب (المسلم) فضح ممارسات مثل هؤلاء حتى لا تزداد أعدادهم فياتي يوم يصبح فيه غالبية دعاة المسلمين من هذه الشاكلة المتدثرة بثياب الدين وهي ابعد ما تكون عن تعاليمه ؟ وهل من مصلحة الإسلام إستخدام (فقه السترة) في مثل هذه الحالة ؟ أوليس نحن نعاني من مثل هذا النموذج كحال مسئولي بعض المرافق لدينا والذين تظن من فرط مظاهر تدينهم أنهم من أولياء الله (الصالحين) ثم ما تلبث أن تجدهم من عتاة (المختلسين) !!
لقد كنت أعتقد أن يهب كل مسلم غيور على دينه لإدانه هذا السلوك المشين والموقف المخزي من شخص له مكانة دينية كالشيخ ونيس وأن ينبذه ويتبرأ مما قام بفعله قائلاً بان هذا الفعل شاذ ولا يصدر من عالم وداعية من دعاة المسلمين وأن دعاة المسلمين وعلمائهم لا يقترفون مثل هذه الأفعال الشائنة ولا يضعون أنفسهم في مثل هذه المواقف المريبة حتى يساء بهم الظن ولكن هالني أن (البعض) قام بالتعامل مع الحدث وكأن هذا الشيخ (معصوم عن الخطأ) محاولاً أن يصنع منه (ضحية) رغم موقفه المريب المهزوز والذي لا يمكن أن يكون مدبراً له بأي حال من الأحوال بينما صب جام لعناته على (العبدلله) الذى أراد أن يكون هذا الونيس عبرة لكل من أراد أن يقوم بتشويه صورة دعاة المسلمين (علي الأقل بوضع نفسه مكان الشبهات) ... فعلاً الفهم قسمة !!
كسرة :
بعد ده ح نعمل مقال (أبو شرح) للجماعة ديل ومقال أبو (من دون شرح) ليكم !
كسرة ثابتة :
أخبار خط هيثرو شنو(ووو ووو) !



تعليقات 35 | إهداء 0 | زيارات 9372

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#393111 [وداليلد]
0.00/5 (0 صوت)

06-15-2012 07:41 AM
الاستاذ الفاضل جبرا مقالاتك كلها حقائق وواقع يعيشوا جميع الناس انت تتناولوا بطريقه ساخره وباسلوب غايه فى الجمال جديدعلى الناس وماتتعب روحك تشرح العربى مرتين.زمااان فى مقالاتك كنت قد وزعت لينا الفهامات عشان نقدر نستوعب ما تكتب ومايجرى حولنا بس الناس ديل تديهم من الفهامات دى.

لكن بينى وبينك تكون الكميه نفزت لانوا الطلب فى الفتره الاخيره عليها جد كبير .

تحياتى


#393108 [مواعيدك سراب]
0.00/5 (0 صوت)

06-15-2012 07:35 AM
الاخ الفاتح جبرة وبعد السلام عليم ورحمة الله وبعد
جميع مواضيع جميلة وهادفة عن حقائق ولاكن نرجومنك ان تنتقل عبر خطوط الشحدة الي مطار ديوان الزكاه وعن 150 الف دولار بتاعت الفضائية كل ماسألو عنها الفاضلابي نكر الظاهر لحقت (هيثرو) امس عائشه الغبشاوي بتسأل القروش ماتكفي الظاهر -:بند العاملين عليها شغال قرش ونص بقت كلها تجارة غسالات, وتلاجات واثاث ,وهلم وجره انها نكبت روما والمتمه


#392996 [mohamed alsudani Almamkoon]
0.00/5 (0 صوت)

06-14-2012 11:46 PM
Wanis said , he was trying to revive the girl from unconsciousness ( resuscitation ) after they have enjoyed luscious moments . I am surprised how those old people still having this sexual lust while the guys in their 30th don't pay attention to this trivial matters


#392876 [التوم]
0.00/5 (0 صوت)

06-14-2012 07:46 PM
اخبار الواقي الذكري شنو ؟


#392582 [ابوشرح]
0.00/5 (0 صوت)

06-14-2012 12:56 PM
استاذى .. مثل هولاء يحتجون لتركيب الفهامة .. لاتشغل بالك بهم وان كتبت المقال ابوشرح فسيحتاجون لمقال اخر لشرح ابوشرح .. شروووووووووووووووووووووووووووووووووووووووحى


#392577 [طارق يوسف محمد]
5.00/5 (1 صوت)

06-14-2012 12:54 PM
ياجبرا والاخوه القراء انا بالجد والله محتاج لفتوى انشاء الله من هيئة كبار العلماء المهم تكون فتوه ... عندنا في السودان حاجة النظام العام او الانضباط العام ما متأكد من الاسم بالضبط المهم بتلقاهم لافين في الشوارع والحدائق العامة يقوم يحومو وسط الناس ان عينهم وقعت ليها في بت سمحة قاعدة ليها مع ولد يجو يحمو حولها ويمسكوهم ليك ويقول ليهم نحنا مسكناكم في وضع مخل للاداب ويسوقوا الولد يودوهو مكان والبت يودودها مكان تاني الولد ياخد دقتو ويفكوهو والبت يقعدو يساوموها في عرضها نقضي وطرنا او نكلم اهلك ( ماهم ناس انضباط ) عايز فتوى صريحة في مثل هذه الحالة من بلد كثر فيها اهل الافتاء


#392411 [أبو السر]
0.00/5 (0 صوت)

06-14-2012 10:14 AM
الأخ جبرا كيف تتجرأ على مساس وفضح رموز إسلام القرن 21 وإنت من أصلو الموديك بعيد شنو ما تعاين للرموز الدينية في وطننا والتي لاتجد فيها من شعائر الإسلام إلا اسمه فإن ونيس ليس هو الأول وأنت تعلم أن علمائك أتوا بما هو أقبح بما جاء به ونيس وبرضو نحن نطبل لهم وننعتهم بمولاناوشيخنا - نحن في بلدة نائية رموز الفساد فيها هم مولانا وشيخنا - وشعارهم (غير حرامية دايرين تقولو عنا شنو) هذه العبارة أقسم بالله قالها لي أحد هذه الرموز في حوارٍ عادي معه في إحدى المنناسبات الدينية.
وأنت يا جبرا تعلم تمام مايدور في تلك البلدة لأن جذورك منها (فإرجو تخصيص مقال كارب عنه وعنهم).
كسرة أخبار كنز القرية 22 شنو [ووووو] طبعا القارئ وصاحب العمود يعلمون شفرة عدد الواوات


#392175 [fat]
0.00/5 (0 صوت)

06-14-2012 01:37 AM
ما عشان راس السوط لحقهم


#392166 [فوزي]
5.00/5 (1 صوت)

06-14-2012 12:54 AM
يمكن يااخي الروح طاهر والجسد خبيث اوهذا قرينة من الجان غير المسلم اراد تشويه صورة الاتفياء


ردود على فوزي
United States [المنتظر] 06-14-2012 03:35 PM
يا فوزي أخوي إنت جادي في كلامك دة؟؟؟؟؟يعني تفتش عن كل التحليلات غير المنطقية والغريبة لتنفي التهمة عن بشر عادي يخطئ ويصيب...يعني نقتنع بإنو دة قرينو لكن ما نفكر في إنو هو يمكن يعملها؟؟؟؟؟؟؟؟؟؟؟!!!!!!!!!!!!


#392163 [زول]
0.00/5 (0 صوت)

06-14-2012 12:49 AM
لا عليك فهم يفعلون عكس ماقال الامام علي كرم الله وجهه
اعرف الحق تعرف الرجال
لا تعرف الرجال لتعرف الحق
الشخص خاصه السلفيين مقدس عندهم اكثر من النص والدين وهم معصومون عندهم ولا يصدقون فيهم ودوما يقولون انهم ( مقصودين) وهمه وكدا


#392105 [عصمتووف]
0.00/5 (0 صوت)

06-13-2012 10:19 PM
[لَتُسْأََلُنْ] 06-13-2012 03:21 PM
(اخطأ املائية)
علي ذكر (الأخطاء) الإملائية يا شاطر.

انطبق عليك عنوان المقال ساقط ويصحح الاخ كتب بالدارجي وتتساقط بعض من الحروف من لوحات الحاسوب او بفعل الانفعال والسرعة او من مراجعي الراكوبة ولاحظتها انا شخصيا اترك المعلقين وكوارثهم وخليك مع الفلم او اخرج

غلفاء وشايلة موس يا لتسألن

91641 [ماشغال بخط هيثرو]
5.00/5 (3 صوت)

06-13-2012 01:10 PM
ولايهمك .. ديل ماتباريهم بودوك الكوشه ..اصلا فى ناس ذى ديل بيدفعو ليهم للردود فى المواقع الالكترونيه ...وبتلقاهم كلهم عندهم اخطأ املائية ..واصل بدون فواصل يارائع .
كسره / اخبار ريالات الاوقاف شنووو ووو
[ماشغال بخط هيثرو]


#392100 [عبدالله]
0.00/5 (0 صوت)

06-13-2012 10:03 PM
والان ماذا حدث لعتاة المختلسين عندنا المعتدين على اموال المساكين والاوقاف والايتام ؟؟؟؟؟؟ مجرد سؤال ننتظر الاجابة عليه - اعوذ بالله 000000000


#392097 [moro]
0.00/5 (0 صوت)

06-13-2012 09:58 PM
يا جبرة حصل شفت الهلال او المريخ جابو كأس الابطال الأفريقية خليك مع الممتاز ما تهبش بعيد


#392088 [noor]
0.00/5 (0 صوت)

06-13-2012 09:52 PM
YOU HAVE TO TELL YOUR READERS ABOUT THAT MINISTER IN AL GAZEERA CLUB WHO WAS FOUND IN A ROOM IN THE HOTEL WITH TWO GIRLS NOT ONE BUT TWO DO YOU REMEMBER THAT OR NO TRY TO FIND OUT ISLAM IS FAR AWAY FROM ALL THESE FAKED PEOPLE.


#392026 [الزول الكان سَمِحْ]
0.00/5 (0 صوت)

06-13-2012 07:47 PM
يا أستاذ جبرا

أنا اليومين ديل شغال تحويل مقالاتك لجهات الإختصاص لإفادتنا يرؤيتهم الدينية..زى تحويل رصيد وكدا

تساؤلاتك وإندهاشاتنا محولة ل(حبر) الأخوان ال(......)الشيخ محمد يوسف القرضاوى..وإن كان مايزال

يقضى شهر العسل مع المغربية التى هى فى سن أولادو فلا ضير فى أن يأخد راحتو يعنى وبعدين يفتينا


ردود على الزول الكان سَمِحْ
United States [عصمتووف] 06-13-2012 11:08 PM
ماااااااااااالك ( عجيب الجلك) رجعتو شباب *** الصح تقول في عمر حفيدة حفيداتو *** وذكر السيده القامبية قيتانو وكمان عيس حياتو
حليل الباع عنفريبوا وقام بليلو


#392022 [الزول الكان سَمِحْ]
0.00/5 (0 صوت)

06-13-2012 07:47 PM
يا أستاذ جبرا

أنا اليومين ديل شغال تحويل مقالاتك لجهات الإختصاص لإفادتنا يرؤيتهم الدينية..زى تحويل رصيد وكدا

تساؤلاتك وإندهاشاتنا محولة ل(حبر) الأخوان ال(......)الشيخ محمد يوسف القرضاوى..وإن كان مايزال

يقضى شهر العسل مع المغربية التى هى فى سن أولادو فلا ضير فى أن يأخد راحتو يعنى وبعدين يفتينا


#392010 [wafi]
5.00/5 (2 صوت)

06-13-2012 07:17 PM
انت يا جبرا انت ما ملاحظ حاجة انو برنامج المصريين ماشي زي برنامجنا بالكربون [ صورة طبق الاصل ] وهم طبعا ما مقتنعين بي تجربتنا وكيف يتعلموا مننا نحنا ما متخلفين مش زيهم . بس علي ما اعتقد دي نفس حادثة عثمان خالد مضوي زمان . بالمناسبة وين الراجل دة الحين . ولا عمل ليهو 4 نسوان وبطل.


#391997 [ابن السودان حافى]
5.00/5 (1 صوت)

06-13-2012 06:51 PM
انت يا الفاتح الله يخليك لينا ويطول فى عمرك بعد المائه وخمسون سنه زياده على عمرك من اليوم ده وانا بطلب من ربنا انو ما يصيبك الخرف وتكتب لينا بعد المائه وخمسون سنه يا رب آمين لانك بتنور العقول وبتقول الكلام من المعقول يارب آمين آمين آمين يخليك لنا


#391984 [مستاء]
5.00/5 (1 صوت)

06-13-2012 06:30 PM
طيب افتتح مقالاتك بفهامات احسن بس تلاقي اللي إنتقدوك سببهم الخبر . خبر لا يهم اهل السودان وهم في ما هم فيه من هم والم وووووووووو لذا نحن ايضا قمنا بنقد المقال وسألناك ان تلتفت لحالنا في البلد التي فيها نفس القصة وبكثرة وكان نقدنا لك ان كنت تخاف ان تذكر تجاوزات الداخل خوفا من بيوت الاشباح نصحناك ان تقوم بالاشارة للمواضيع وكل الذين يتصفحون مقالاتك يمتلكون من الفهم ما يمكنهم من فهمها وهي طايرة يعني مافي اشكال فهم ولا ايه ؟؟


ردود على مستاء
United States [ودالجبل] 06-13-2012 10:22 PM
والله إنتا فعلاًَ مستاء وشديد كمان ياخى أستاذ جبرا ده ما خلي لشيوخ الداخل صفحة يرقدو عليها خلوهو كمان يشوف لينا شيوخ الخارج أصلها المسألة بايظة جوه وبرة .. الله يصلح الحال


#391983 [Heron]
5.00/5 (1 صوت)

06-13-2012 06:28 PM
لك التحية استاذ جبرا.بس لو خليتنا مع السودان وجماعة المشروع الاسلامي الحضاري وناس قريعتي راحت ديل يكون احسن لانو احنا اصلا"مااااااااااناقصين.


#391970 [abusabeeb]
5.00/5 (1 صوت)

06-13-2012 05:59 PM
تستاهل انت البوديك لشيوخ بره شنو ماتشوف شيوخ البلد وخليك محلي


#391967 [abusabeeb]
5.00/5 (1 صوت)

06-13-2012 05:57 PM
انت تستاهل البوديك لشيوخ بره شنو ماتشوف جماعتك بتاعين ال................


#391962 [radona-d]
0.00/5 (0 صوت)

06-13-2012 05:41 PM
يااستاذ جبرة ما دام اهداء الزهور للمرضى فيهو ان .. اهدي المريض شوكلاته .. ده موضوع
لكن موضوع الطيارات البتقوم من بلاد المسلمين عليها الكفرة لضرب المسلمين ده موضوع فيهو ان
اما صاحبنا الشيخ بتاع الخلوة وبالرجوع الى قانون امن المجتمع السوداني فهذه خلوة حرام ولكن
يجوز التمسك بانها خطيبته ويحضر ماذون ويعقد قرانه عليها وتعمل له سيرة رسمية بالنجدة الى فندق شهر العسل بعد اخبار زوجتيه بهذا الامر الجلل


#391952 [kakan]
0.00/5 (0 صوت)

06-13-2012 05:27 PM
والله ياجبرة الشيخ مظلوم والحكاية من اخراج مخابرات مبارك
الكوز السجمان دي رسلوا له بنت ولعة نانسي عديل وركبت معاهو السيارة
وغازلته فسال لعابه واخذ قبلة واحدة المشكلة وين ياحبرة وكدا ورينا لو كنت مكانه حتعمل ايه


#391909 [Zingar]
3.88/5 (5 صوت)

06-13-2012 04:41 PM
يا أبو جبره هذا الكرور لا تشغل بالك بهم (حكمه الله نحن بنعرفهم وهم بيعرفونا أولاد حاج نور ديل).

كسره...أخبار حجوة أم ضبيبينه بتاعة المطار الجديد شنوووووووووو.


#391887 [الصابري]
5.00/5 (5 صوت)

06-13-2012 04:17 PM
الاسلامويون أفسد خلق ألله وأكثرهم جرأة على الكذب والتدليس وأسرعهم الى ارتكاب الحرام ومصر داخلة على ليل مظلم طويل يخليهم يقولوا عن الديكتاتور مبارك (ألله يرحم أيامك يا مبارك)
الديكتاتوريات العربية القديمة -ألله لا أعادها- ذات حد واحد تضرب وتقمع وتقتل وتعذب من أجل السلطة ولكن ديكتاتورية الاخوان شكل تاني ذات حدين تضرب وتقمع من أجل المال والسلطة وفي نفس الوقت تشوه الدين وتظهره كأنه يؤيد التسلط والارهاب ويبيح الكذب والتزوير والغش


#391881 [إبن السودان البار ==--]
5.00/5 (4 صوت)

06-13-2012 04:10 PM
لتجارة بالدين اسرع وسيلة للثراء والتمتع بكل ملذات الحياة نساء ومال وسلطة وجاه وخاصة بالسودان وسط اهلنا الطيبين ؟؟؟ استقل الدين الميرغنية فكونوا امبراطورية تمتد الي الجارة مصر وكذلك آل المهدي لهم امبراطورية داخل السودان وأملاك في لندن ؟؟؟ والآن يستقل الدين الكيزان عسكر وحرامية البشير وزمرته فأغتنوا غناءً فاحشاً وتزوجوا مثني ورباع ويقولون هل من مزيد ؟؟؟ والأيام دي كثيرين عرفوا اللعبة وركبوا الموجة وعملوا دقون وغرة مدنكلة وأتفتحت ليهم ابواب الجنة قبل مواعيدها؟؟؟وأنشاء الله الأخوان يمسكوا الحكم في مصر عشان يزيطوها وينهبوها ويضعفوها ونكون معاهم في الهوا سوا لأنه مصر قبل ان تقوي احتلت حلايب وخاتة حكومة العوير البشير تحت اباطها فالخوف لو بقت دولة قوية حا تبلعنا ؟؟؟ وأخبار خط هيثرو شنو ؟؟؟


#391857 [Kudu]
5.00/5 (1 صوت)

06-13-2012 03:41 PM
يا زعيم بدأت انزعج من عدد واوات كسرة هيثروووالدلائل تشير بأن خبر الخط مربوط في ضهر الحمام البري لذااقترح ان تضع اربعة احرف واو هكذا... وووو... وتحزمهم بواو افقي لتكون القراءة خمسة على طريقة حساب الاحصاء يعني الواحد بنظرة سريعة ممكن يعرف العدد... الصعوبة تمكن في ايجاد حرف واو أفقي لكن ننتظر رأي اهل IT.


ردود على Kudu
United States [يايا كور] 06-13-2012 05:36 PM
يقوموا ناس المجلس (الوثنى) يقولوا ده واو (ذكرى)


#391853 [زول اغبش]
5.00/5 (3 صوت)

06-13-2012 03:35 PM
انا اقترح انو مع كل مقال تكون معاهو فهامة وكدة!!!!!!
بالمناسبة اخبار الدفاع بالنظر شنو؟؟؟
بس ماتكون محتفظ بحق الرد.


#391839 [كتاوت بتاع الاورنيش]
5.00/5 (1 صوت)

06-13-2012 03:23 PM
وطبعا نحنا ذاتنا شلنا البيعة منهم اقصد جاتنا فكرة الاخوان المتاسلمين من مصر والله لو عندنا قنوات واعلام ذى حقنا بلاوى كتيرة بتظهرللجماعة ديل..........


#391837 [الجلاد]
5.00/5 (1 صوت)

06-13-2012 03:22 PM
معليش لسع ما فهموا الموضوع وننتظرهم لحد الاسبوع الجاى وجيجوا يعتذروا


#391783 [wedhamid]
5.00/5 (1 صوت)

06-13-2012 02:47 PM
يا جبرا ..... و لا يهمك ...الدنيا كلها عارفه طريقة دغمسة هؤلاء الشياطين المنحرفين إنحرافهم و التبريرات العبيطة التى يخرجونها لتبرير أفعالهم القذرة و فواحشهم ....مش كبيرهم الذى علمهم السحر برر لواط أحد رفقائهم و بقابض الناس فى الشوارع للممارسة معه ... بأن تلك الإنحرافات من عمايل ( قرين السوء) و عند ضبط أحدهم مع مومس بعد منتصف الليل عند مدخل كبرى كوبر قالوا دى توصيله ساكت !!! بحكم فقه ( فضل الظهر) .... و تبرير الخال الرئاسى متاجرة إبن أخته اللواء بالقوات المسلحةالطبيب فى الأسواق جهارا نهارا بأنو حلال فى حلال و يرروا الفساد و حللوه على أساس أن هؤلاء طاهرة أياديهم و متوضئه !!!! فى مصر دى ذاتها واحد من السلفيين و داعيه إسمو البلكيمى عضو مجلس شعب أجرى عملية تجميل لأنفه المعكوف برغبته فى مستوصف خاص( و طبعا دا حرام بحكم إنه تعديل لخلق الله) و ليموّه فعلته إدعى إن عصابة إعتدت عليه فى الطريق الصحراوى و سببوا لا الأذى فى أنفه و كمان نهبوا منه 100 ألف جنيه !! و لكن الأطباء الأجروا له العملية فضحوا أمره و كذب إدعائه فقاموا جماعتوا يبرروا كلامه قالوا هو قال إدعائه تلك و هو تحت تأثير البنج!! هذا هو نهج الإسلامويين و تبريراتهم الجاهزه ...فقه الضرورة ...فقه السترة ..فقه فضل الظهر ....


#391770 [عصبنجى]
5.00/5 (3 صوت)

06-13-2012 02:39 PM
الناس ديل زى الضفادع فى الخريف كلهم بكوركوا مع بعض (قيق ..قاق) لأنهم كلهم طينة واحدة..أبوهم إبليس وأمهم طلطميس


#391641 [ماشغال بخط هيثرو]
5.00/5 (3 صوت)

06-13-2012 01:10 PM
ولايهمك .. ديل ماتباريهم بودوك الكوشه ..اصلا فى ناس ذى ديل بيدفعو ليهم للردود فى المواقع الالكترونيه ...وبتلقاهم كلهم عندهم اخطأ املائية ..واصل بدون فواصل يارائع .
كسره / اخبار ريالات الاوقاف شنووو ووو


ردود على ماشغال بخط هيثرو
United States [ودكسلا] 06-13-2012 06:38 PM
الحق اهو جاك واحد من الجماعة القابضين شايل قلم احمر

United States [لَتُسْأََلُنْ] 06-13-2012 03:21 PM
(اخطأ املائية)
علي ذكر (الأخطاء) الإملائية يا شاطر.


#391639 [Rudwan]
5.00/5 (5 صوت)

06-13-2012 01:09 PM
للاسف ناس الدين ديل كلهم طلعوا ما عندهم دين! وبتاعين مصر ديل كمان الاصل بتاعيننا تقليد.غايتو بالشفناه بس نقول يا المصريين جالكم بلا!


الفاتح جبرا
الفاتح جبرا

مساحة اعلانية
تقييم
9.72/10 (15 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة