ولينا الجنا
06-18-2012 10:17 AM

ولينا الجنا

الفاتح يوسف جبرا

لا شك عزيزي القارئ إنك مثلى تلاحظ تزايد نسبة حالات حوادث الإغتصاب التى يتعرض لها أطفالنا وفلذات أكبادنا ، وضعف العقوبة التى تطال (المجرم) الذى يقوم بهذا الفعل الشائن المنكر والتى لا تتعدى بالكتير (سنة سجن) وكم (سوط) كده ! بعدها يخرج لممارسة هوايته فى قتل ووأد مستقبل هذه القلوب البريئة … شخصياً كنت أتوقع أن يهتز (ساكن) المسئولين وأولى الأمر لهذه (الظاهرة) التى أطلت فجأة كالوحش المرعب على مجتمعنا الذى كان إلى عهد قريب لا يعرف مثل هذه الظواهر ، لكن المسئولون معذورون فهم مشغولون (بهندسة الحاضر) وتخطيط (المستقبل) ووضع (الإستراتيجيات الشاملة) والعمل على زيادة (معدل النمو) يعنى هم فاضين عشان يلتفتو للحاجات الفارغة دى؟ شنو يعنى لما (طفل) عمرو (عشرة سنين) يغتصب ويخرج الجانى بعد ما ياخد ليهو كم يوم سجن وكم (شحطت سوط) ؟ وشنو يعنى طفلة عمرها (4 سنوات) ترجع من الروضة وقد صارت إمرأة فى هذه السن (الموش مبكرة آوى) والبركة فى (عمو صلاح سواق بص الروضة) ! والذى سوف بأخد ليهو كم يوم سجن وكم (شحطة سوط) ويرفد من (تلك الروضة) ليذهب لروضة أخرى يمارس فيها هوايته فى الفتك بهذه الأجساد الطاهرة!

متى سوف تتحرك الدوائر الرسمية لوضع حد لهذه الظاهرة المقلقة؟ ربما حين يلمس (رأس السوط) أحد (كبار المسئولين) ويقع أحد أطفاله فريسة لأحد هؤلاء (الذئاب) تمشيا مع حكاية جحا والتى تقول أنه قد قيل له أن النار قد إشتعلت فى المدينة فقال لهم لا يهم ما دام إنها لم تصل إلى الحى الذى أقطنه فقالوا بل إنها وصلت إلى الحى الذى تقطنه فقال لهم لا يهم ما دام أنها لم تصل إلى دارى فقالوا له بل وصلت إلى دارك فقال لهم لا يهم ما دام إنها لم تصل إلى غرفتى فقالوا له بل وصلت إلى غرفتك فقال لهم لا يهم ما دام أنا غير موجود داخلها !

فعلى قول (عمنا جحا) فإن الأمر لا يهمه ما دام يحدث (للآخرين) وما جاهو فى (تولتو) !
نعم لو كنت مسئولاً لقمت – الآن وليس غداً- بتكوين (فريق عمل) – بلاش من قصت لجنة دى – يتكون من عدد من كبار المختصين فى مجالات الإجتماع والقانون وعلم النفس والأمن لمعرفة أسباب هذه الظاهرة المزعجة وكيفية علاجها والحد منها وسن القوانين والتشريعات والعقوبات التى تتناسب وهذا الجرم الشنيع (بدلا من كم سوط وكم شهر دى !) ولقمت على الفور بإنشاء وحدات علاجية متخخصة لعلاج الآثار النفسية والعضوية لضحايا هذه (الحوادث) ويمكن لهذا (الفريق) أيضاً (عشان ما نعمل فريق تانى) أن يقوم بدراسة ظاهرة أخرى لا تقل خطورة تفاقمت مؤخراً لحد لا يمكن السكوت عليه وهى ظاهرة (الأطفال غير الشرعيين) إذ أن الأعداد التى تسجلها مضابط (الشرطة) والحالات التى تستقبلها (دار المايقوما) قد (زادت أصفارها) وحان وقت إخراج (الرؤوس من الرمال) ومواجهه (الحقيقة) والتعامل مع الأمر بواقعية بعيداً عن أى (ثوابت أو مشاريع) !

ما دعانى حقيقة لكتابه هذا المقال هو الحكم بتعديل عقوبة الإعدام لذئب في شكل (معلم) قام بإغتصاب (تلميذته) القاصر التي تدرس في مرحلة الأساس وذلك بإحدى الولايات مما جعلها تحمل منه (سفاحاً) وهي الآن كما يقول الخبر في شهرها (الرابع) ، هل تعلم عزيزي القارئ إلى أي حد قامت محكمة الإستئناف بتخفيض العقوبة أقول ليك .. بس ما تندهش … تم تخفيضها إلى سنة سجن و40 (جلدة) !!
عقوبة للأسف الشديد ممكن (ياخدا) نشال سرق ليهو (موبايل) أو ختف (شنطة) إحدي السيدات !!
وبما أن فلبسفة (العقاب) تكمن في زجر الآخرين حتي يرتدعوا من فعل ذات الجرم إلا أننا في هذه الحالة الماثلة أمامنا نشك في ذلك كثيراً فمثل هذه العقوبات (الميتانه) تغري ضعاف النفوس من ممارسه هذه الأفعال الفاحشة ذات التأثير المدر للمجتمع (وأهو لو قبضوك يعني شنو ؟ سنة سجن و40 سوط) !
كان من الممكن أن يكون أمر هذه العقوبة (مبلوعاً) لو لم يكن هذا الوحش الآدمي هو (معلم) يستأمنه أولياء الأمور على فلذات أكبادهم ويتوفر له عامل الترغيب والترهيب وكل عوامل (الإنفراد) المساعدة ولكن يبدو أنو مسألة (حاميها حراميها) قد طالت على ما يبدو حتي (الأعراض) !

كسرة :
يبدو أن مقولة اولياء الأمور قديماً التي تقول (ليكم اللحم ولينا العضم) حينما يسلمون أبنائهم للمدرسة لأول مرة سوف تصبح في هذا الزمان الأغبر : (ليكم اللحم ولينا الجنا )!!

كسرة ثابتة :
أخبار تحقيقات النائب العام في خط هيثرو شنو(ووو ووو) !

تعليقات 38 | إهداء 1 | زيارات 10727

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#397745 [ود يوسف]
0.00/5 (0 صوت)

06-20-2012 06:49 AM
(( السعودية تنفذ اليوم حكمًا بالإعدام على مصري وشقيقته أُدينا بخطف واغتصاب طفلة ))
الراكوبة - 20/6/2012م .

هذا هو الردع الصحيح لمثل هؤلاء المفسدين في الأرض ‘ ودولة المشروع الحضاري تتفنن في قتل الأبرياء .


#397385 [إبن السودان البار ==--]
5.00/5 (1 صوت)

06-19-2012 04:22 PM
يا بت امدرمان المحترمة سبتي التعليق وأستنكار الجريمة الغذرة وبقيتي علي أخطاء الطباعة ؟؟؟ ارجو ان تهتمي بالموضوع وسيبك من القشور وشكرا عل التصحيح !


ردود على إبن السودان البار ==--
United States [بت أمدرمان] 06-19-2012 04:48 PM
القذرة و ليس الغذرة و لك العتبى حتى ترضى


#397384 [janjaweed]
0.00/5 (0 صوت)

06-19-2012 04:21 PM
في زمن الانقلز كل شي مسموح بة فساد قصور عمارات في ماليزيا زيادة مواصلات زيادة اسعار وزراء يغبثون بمال الشعب والما عاجبو الحس كوعو


#397169 [إسماعيل العباسي]
0.00/5 (0 صوت)

06-19-2012 12:41 PM
قديما وفي ظل قانون عقوبات السودان المعدل لسنة 1974م المسماة بالعلمانية كانت عقوبة المغتصب قد تصل سجناً لأربعة عشر عاماً
وفي الإسلام الرجم إن كان الزاني محصناً
ولخطورة هذا الجرم وهذه العقوبة يبدو أن قضاة الاستئناف قد وجدوا الجاني الزاني غير محصن، ففي هذه الحالة يجوز للقاضي تعزير الزاني لفظاعة جرمه بما يردعه ويزجره وغيره وليعتبر غيره بعقوبة تعزيرية قاسية جدا جدا ولا سبيل لتخفيفها من قبل قضاة الاستئناف
ولكن في ظل انعدام كامل الحيثيات وفي ظل ما نسمعه ونعلمه عن قضاة اليوم فكل شيء جائز ولو كان غير جائز حقا وعدلاً
فقط نقول الله المستعان وحسبي الله ونعم الوكيل - قضاء السودان الذي كان يضرب به المثل في العدل والنزاهة وكل ما هو جميل


#397166 [تبر]
0.00/5 (0 صوت)

06-19-2012 12:37 PM
والله يا جبرا وكتر الله من امثالك من الاحرار ، اصبحنا نتدنى في كل شئ وفقدنا بريق التميز في اننا شعب له ما له من إرث أخلاقي واصبحنا فريسة لكل قبيح وارد من الخارج ... اما ولاة الامر وما يسنونه من قوانين ميتانة ومخجلة ، فلا بد وان يأتي يوم يكتوون فيه بنار قوانينهم وذلك لأن العاصفة لا تستثني أحدا (وسيرى الذين ظلموا اي منقلب سينقلبون)
الله أسأله صلاح الحال و أن يزيل من صدورنا هذه الصخرة التي طال بقاؤها .


#396868 [عبدالله]
1.00/5 (1 صوت)

06-19-2012 09:20 AM
والمعروف ان عقوبة الاعدام فى احسن حالاتها تخفض للمؤبد مع الاعمال الشاقة (الملاحات بورتسودان)


#396851 [عبدالله]
0.00/5 (0 صوت)

06-19-2012 09:12 AM
والله صراحة يا جبرا الذى نعرفه ان عقوبة الاعدام فى احسن حالاتها تخفض للمؤبد مع الاعمال الشاقة وليس لسنة واحدة خاصة وان الامر حدا من حدود الله وليس تعزيرا حتى يتدخل فيه السلطان


#396810 [yass]
0.00/5 (0 صوت)

06-19-2012 08:44 AM
استاذ جبره,,,
تشكر علي المقال بس قصة جحا دي انا سمعتها كده...ما تلخبطنا ياااااااااخ.


#396717 [سامر المدنى]
0.00/5 (0 صوت)

06-19-2012 07:22 AM
السجن سبعة أعوام لطيار بسبب تقبيله لطفلة
07-28-2011 02:35 PM
أدانت محكمة الأسرة والطفل بولاية الخرطوم طيار معاش بالسجن لمدة سبعة أعوام لتقبيله طفله وتعود تفاصيل هذه الحادثة إلى قرب منزل الطفلة البالغة من العمر حوالي الأحد عشر عام من المكان الذي يخص الطيار حيث تربطه صله معرفه مع آسره الطفلة وفى يوم الحادث عادت الطفلة إلى آسرتها ويظهر على فمها الاحمرار وبتساؤلها عما حدث أفادت بان الطيار قد قبلها بشده لتقوم الاسره بتدوين بلاغ فى مواجهته وبعد اكتمال التحريات حول البلاغ إلى ألمحكمه التي استمعت إلى كافة الإفادات لتتم إدانته بالسجن لمدة سبعة أعوام .

دى قوانين شنو يا ناس ؟؟ قبلة بى سبعة سنوات سجن ,, واغتصاب وححمل بى سنة سجن وكم جلدة ؟؟

والله يا استاذ جبره حيرونا وعزبونا وجننونا ولى هيثرووو طيرونا ,, ياهو ده البشير آآآأى


#396641 [radona-d]
0.00/5 (0 صوت)

06-19-2012 01:00 AM
شوف يااستاذ جبرة قالوا تلاتة لا يجوز المساس بها الشرظة القضاء والجيش
ولكن موضوعنا القضاء وهشاشة الاحكام لردع مغتصبي الاطفال ( الجرائم ضد الطفل)
ياقضاتنا الافاضل .. مثل هذا المجرم يحكم عليه بالمؤبد ان لم يكن الاعدام.. ولكن تماشيا مع
القانون الدولي نقول المؤبد ..
ارى ان الشكوى ازدادت ضد القضاء السوداني للبطء المميت وتضارب الاحكام ولا نقول شئ غير ذلك مما يستوجب اعادة هيكلة القضاء كله من اساسه وكل مدعي جرائم دافور ( اربعه) مدعين استقالوا لاسباب شخصية .. الحكاية شنو .. لو الموضوع حصانات كما ذكر وزير العدل سابقا يكون هنالك اناس فوق القانون وهذا يعد عيبا لاتستقيم معه العدالة لامع مغتصب اطفال ولا مختلس مال عام ولالص دجاج ومن حيث العدالة ان تاخير العدالة فيه ظلم واننا اذ نناشد قضاتنا الافاضل وبماانهم صوت الحق والحق هو الله سبحانه وتعالى .. اعيدوا هيكلة نظامنا القضائي والمواطن السوداني لا يريد الا ان يسمع عن عدالتكم وكلنا ثقة في الله ثم فيكمولا تخشوا شيئا فانتم ضمير الوطن وبدونكم لن يستقيم شئ


#396635 [بتــاع درداقـــــــة]
4.00/5 (1 صوت)

06-19-2012 12:31 AM
كـدى شــوف لينا الصـلاة فى مســجد حــــــــــــــاج نــور ماشــة طالما فتحت الامــور التحــت التحــت دى


#396610 [مضوي بدوي المدني]
0.00/5 (0 صوت)

06-18-2012 11:34 PM
الأخ الفاتح لك الود والاحترام , عمودك اليوم تناول قضية خطيرة مؤرقة إذ أن انتشارها يحتاج لوقفة منّا جميعاً - أمّا بخصوص ذلك الذئب والذي حُكم عليه بالإعدام ثم تم تخفيض العقوبة فقد نسبته لنا قبيلة المعلمين ونحن بريئين منه برآئت الذئب من دم ابن يعقوب - والتاريخ يشهد لناوقبل لكل شيء نحن أصل التربية فلا يُعقل أن نوصف بـ(حاميها حراميها)- وغن مقولة أولياء الأمور ووصيتهم لنا نوفي بها على الوجه الحقيقي.
لكن يا أخي ذلك الذئب ليس له علاقة بالتعليم ولا يمكن أن يوصف وينعت بلفظة (معلم)وليس له صلة بالتعليم وإنّما هو مستثمر في هذا المجال وتتحمل المسئولية الوزارة التي صادقت له على إنشاء هذه المدرسة الخاصة .
عاش المعلم الذي أتخذ الحقيقة في حياته مرامى وسعى لها وبنا لها وأقام . ولا يسعني إلا أن أترحم على الأستاذ والشيخ الوقور عبد الله الشيخ البشير :
هذى الصروح الشامخات تشامخت ممّا يعانيه وكنّا حطامى
.............................................
لوكان لي ألفا لسانٍ شاعرٍ أوفيتكم مدحا وكان لزاما
أو كنت رساما رسمت جهادكم عجبا فما لي لم أكن رساما
ياقوم ردّوا للمعلم حقه فرضا لكم في عنقكم وزماما
والله لا يهب النجاح لموطنٍ تلقى المعلم في حماه مضاما
فأرجو منك الأخ جبرة ومن جميع القراء التحقق من ذلك الذئب صاحب المدرسة الخاصة
كسرة : استثمار وكدا
معلم بالمرحلة الثانوية حلفاج


#396606 [المرق خلاها ليهم]
5.00/5 (1 صوت)

06-18-2012 11:18 PM
والله يا جبرا غايتو الجماعة قالوا شغالين ليك فى ط هيثرو كدى بسراع بسراع شوف لين خط الاقطان بلدو وين


#396583 [سيد اللبن]
0.00/5 (0 صوت)

06-18-2012 10:35 PM
والله يااستاذ جبره ينفطر الفؤاد لمثل هذه الظواهر التى تنبأ بمستقبل كارثى فى اخلاق هذه الامه اذا لم يكن هنالك رادع قانونى . ولكن الاهم من ذلك هو كيفيه الوصول الى اصحاب القرار و(المشرعاتيه )وإنعاش الوازع الدينى لديهم ، ولن يكون ذلك إلا من خلال عمل دؤوب يقوم به امثالك من الشرفاء ممن يحملون هم اخلاق هذه الامه( البقت ماسكه العصايه من النص نص فى اوربا والنص التانى ماعارف ليهو جهه) كسرة: نحن اليومين دى محسوبين على مجتع السواقين ياااا(فرده) بطل المقصات دى وخلينا نحفظ الباقى من مويه وشنا . وجزاك الله خير يااستاذنا العزيز وربنا يقوى قلمك .


#396573 [توفيق الصديق عمر]
5.00/5 (1 صوت)

06-18-2012 10:17 PM
تعرف يا استاذ جبرة
اولا مبروك عليك ايصال الناس ديل لغاية التحقيق الجنائ في موضوع
خط هيثرو
نمرة اثين تعرف يا ابو جبرة في الدنمارك التي تشتهر عندنا وعند غيرنا من اولاد القبائل
بانها بلد فجور وفسق ةقلة ادب وكدا في هذا المملكة الصغيرة العجيبة الذي يعمل عمله
وسخة وي دي بعد ما يرزعوهو بي سبعة ثمانية سننين سجن ويعرف المساجين عن فعلته هذه مع
الاطفال القصر يصحي من النوم بي علقة وينوم بي علقة من قبل من؟ المساجين .
ومش كدا وبس اذا اتعرف انه في واحد ( عيالاتي) هؤلاء الذين ينتهكون عرض الاطفال القصر
كان اولاد كان بنات يحرم من العمل في اي مجال من مجالات العمل التي لها علاقة مباشرة بالاطفال
وتربيتهم ويراقب مراقبة دقيقة جدا في تحركاتو في اي مكان يفترب منه او يتواجد فيهو اطفال.
اها شن قولك في الكلام دا


#396535 [الصابري]
0.00/5 (0 صوت)

06-18-2012 09:02 PM
يا جبرا خليك مواكب المقام مقام ثورة وتغيير جذري ابتدأ خلي واواتك وكسراتك تطلع الشارع


#396532 [ودعويضة]
5.00/5 (1 صوت)

06-18-2012 08:55 PM
يا ود جبرا ما كل من تم توظيفه في مدرسة معلم وبعدين دا جزء من المشروع الحضاري - انت ما سمعت ان مشايخ الجماعة ما بخافوا من شئ الا من الايدز ولهذا جابوا الواقي الذكري - اما زيادة اطفال المايقوما هو من ثمار التمكين وكان ممكن يكون اكثر من كدا لولا جهاز الشفط الموزع على اخوات نسيبة


#396496 [شمس العلا]
0.00/5 (0 صوت)

06-18-2012 07:55 PM
حكومتنا في ثبات عميق تجاه هذه الظواهر ...ما عارف ليه..لو في حد عارف يقول لينا بالله
لكن ابق راجل واحلم انك في مظاهره وتنادي بسقوط النظام..شوف لو ما صحوك وودوك موقف شندي عشان توقف الموقف العظيم


ردود على شمس العلا
United States [بت أمدرمان] 06-19-2012 04:52 PM
يا أخوى يا ود أمدرمان خلى صدرك واسع ولا ضرر من المزاح لكسر حاجز الهموم التى نعيشها و لن تزايد على فى الإهتمام بالشأن الوطنى ، فكلنا ذاك الرجل و لك الشكر

United States [ود امدرمان] 06-19-2012 07:19 AM
يعني بقت علي ثبات ولاسبات ؟؟؟
موش الفكرة او المعلومه وصلت؟؟
الناس تخلي الموضوع المهم وتتلفت للحاجات الثغيره
(الثغيره) دي انا كتبتها كدا كيتا" علي الدنيا
والماعاجبو يشيل طبشيرتو ويمش يشخبت في سبوره تاني





تضامن جبره:
اخبار خط هيثرو شنو؟

United States [بت أمدرمان] 06-18-2012 11:52 PM
كلامك صاح يا شمس العلا ، لكن سبات عميق ما ثبات عميق، أما إذا كانت غلطة مطبعية فأنا آسفة


#396438 [Sudani]
0.00/5 (0 صوت)

06-18-2012 06:22 PM
لاحول ولا قوةالا بالله اذا كان كلامك دا صحيح وكيف يكون صحيح مادام اثبتت عليه التهمة والنت حامل . دا اكان طلع من السجن ان شا الله يلقي الكلام دا اطبق عليهو يعني في بيتو عشان يعرف قيمة هتك اعراض الناس . حفظنا الله وحفظ ولايلنا ان الحافظ وهو السميع العليم


#396418 [زول]
0.00/5 (0 صوت)

06-18-2012 06:01 PM
في القوانين القديمه الاعدام لانه استاذ الطالبه ...
الشي التاني ليه مايشغلوا النسوان في مدارس البنات والرجال في الاولاد لزوموا شنو الخلط ده ؟؟؟


#396353 [انور]
4.00/5 (3 صوت)

06-18-2012 04:54 PM
هذا المقال لم يكتبه الفاتح جبرا


#396350 [الرئيس القادم]
5.00/5 (1 صوت)

06-18-2012 04:51 PM
مره كنت في الجامعة و جابو لينا استاذة جديدة بتاعت لاب , شكلها خريجة جديدة من لبسها المظهر كل مفاتنة , عندي زميلي من النوع البحب الدعابة قال لي دي 6 شهور ما خساره فيها , قلت ليه 6 شهور دي قال لي دي عقوبة الاغتصاب


#396295 [إبن السودان البار ==--]
5.00/5 (3 صوت)

06-18-2012 03:57 PM
واخبار البيقتصبوا الرجال في بيوت الأشباح شنوووو ؟؟؟ وقضية نافع مع دكتور فاروق محمد ابراهيم شنووو ؟؟؟؟ افتحوا قوقل وأكتبوا فاروق محمد ابراهيم تعرفوا الحاصل ؟؟؟؟


ردود على إبن السودان البار ==--
United States [بت أمدرمان] 06-18-2012 11:54 PM
بغتصبوا ما بقتصبوا يا ود السودان البار. الليلة أنا شغالة ليكم مدرسة عربى


#396200 [ربش]
0.00/5 (0 صوت)

06-18-2012 02:31 PM
كل ما حل بهذا الوطن من كوارث و مصائب و أزمات بسبب هولاء الأبالسه الملاعين عليهم من الله مايستحقون . و حولوا كل ماهو إيجابي إلي سلبي .لكن بإذن الله قريباً جداً تشرق شمس الحرية و ينعدل الميل .


#396139 [mathew]
0.00/5 (0 صوت)

06-18-2012 01:42 PM
يا سيد جبرا أمال الحاصل على الشعب السودانى دا جاء من فراغ' شنو العملتوا اﻷمم السابقة ناس قوم لوط و عاد و ثمود واليوم فى المجتمع السودانى ما بتعمل بل ما يحدث اﻵن أسوأ بكثير من أفعال اﻷمم الماضية. عشان كدا ربنا سلط علينا من ﻻ يخافه ولا يرحمنا. و ولاة أمورنا والمشرع العمل القوانين عاجبهم البحصل دا. بس لو لقوا بنت لابسة بنطلون و محتشمة أخلاقيا لابد من جلدها و سجنها وكم من بنت و إمرأة كريمة اغتصبت فى هذا العهد الذى يتدثر بالدين.


#396131 [وحيد]
5.00/5 (4 صوت)

06-18-2012 01:32 PM
احدى ركائز " المشروع الحضاري" هو اعادة صياغة الانسان السوداني... تمت اعادة صياغة الانسان السوداني بفعل جهابذة نظام الانقاذ ... النتيجة هي ما تراه الآن: انحلال اخلاقي - فساد - ظلم - لا مبالاة - انعدام الوطنية - الفقر - انعدام المسئولية، و لما كان افقار المواطن هدف اساسي للانقاذ عملا بسياسة جوع كلبك يتبعك، فان نواتج الفقر تتمثل في انعدام الحياء و اراقة ماء الوجه من ال لقمة خبز، و ان تبيع الطالبة عرضها من اجل سندوتش، و لما تتفشى الظواهر تصبح امرا عاديا في المجتمع لا تحرك فيه ساكنا و لا تهز ضميره، و اصبح المواطن الذي كان في زمن غير زمن الانقاذ الاغبر كان السوداني هو " عشا البايتات" و "مقنع الكاشفات" اصبح هذا السوداني يرمرم كالخنزير ليشبع بطنه و غريزته دون وازع من دين او ضمير او اخلاق.... اذا كان رب البيت " راقصا" و مستشاره السياسي " سفيها صعلوكا سوقيا" و اعوانه فاسدين مفسدين قساة غلاظ ، فما تريد من اهل البيت؟!


#396084 [عبدالرحمن الامين]
0.00/5 (0 صوت)

06-18-2012 12:51 PM
حتى تتكون هذه الاليه التى تدعوا لها فاعلنها داوية سوف اشترى كلاش واقتص بنفسى من امثال هؤلاء يعنى حا يعملوا لى شنو كم يوم وكم شحطة سوط


#396073 [samiaabdalla]
0.00/5 (0 صوت)

06-18-2012 12:36 PM
الاستاذ جبرا لك التحية والاعزاز وانت تضرب فى الوتر الحساس فعلا هذا ما يؤرق الاباء والامهات ونحن خائفين من الشارع كمان جابت ليها مدارس نحنا تطير عيشتنا نحنا نلاقها من وين ولا وين ويلا خليناك بعافية عشان نتابع اخبار ...........................


#396070 [zahi]
5.00/5 (2 صوت)

06-18-2012 12:34 PM
البرلمان : علوية : (( اعلنت وزارة النقل عن اكتمال التحقيقات في بيع خط هيثرو، وتحويل الضالعين الي القضاء ،وقال وزير الدولة بوزارة النقل فيصل حماد في اجتماع مع لجنة النقل بالبرلمان ، ان قضية بيع خط هيثرو ستحول الي قضية جنائية للنائب العام بعد ان تم تحديد الضالعين في بيع الخط .
وابلغت مصادر «الصحافة « ان لجنة التحقيق الخاصة بالخط اكتشفت ان هناك سماسرة متورطين في بيع الخط . ))


#396046 [النوبي]
5.00/5 (2 صوت)

06-18-2012 12:08 PM
الف مبروووك استاذنا بدأ التحقيقات في الخط ونحن على يقين بأن هذه التحقيقات لن تسفر على شيئ بس وجاهات ساكت .. خليك وراهم.


#396035 [ubedallawd]
0.00/5 (0 صوت)

06-18-2012 11:57 AM
لاحولة ولاقوة الا باللة العلي العظيم
حتي المعلم خايب رجا ؟ مااظن سوف يكون مستقبل الاجيال القادمة ح اكون كيف من تصرفات والافعال الشينة والقبيحة التي لاتشبهنا ولا معلمينا ولاحتي ريفنا الحبيب


#396028 [abusabeeb]
5.00/5 (1 صوت)

06-18-2012 11:52 AM
خليك مع الزمن ياجبرا وشوف الاولاد امبارح عملو شنو في المظاهرات والحصل ليهم شنو


ردود على abusabeeb
United States [أبو الكل] 06-19-2012 10:47 PM
دا من صميم بلاوى هذا الزمان يا Abusabeeb


#396014 [nasereddin]
5.00/5 (2 صوت)

06-18-2012 11:41 AM
والذين يغتصبون وهم في حماية تامة من أجهزة السلطة ...من الذين يمتلكون العاربات الفارهة والمأوي الفاره في ظاهرة وباطنه مليء برائحة الجنابة؟؟من الذي يمتلك المال الذي يغوي به ذوات الحاجة وسد الرمق؟ أولاد الحلال كثيرين !!!!!!أولاد المايقوما من وين جايين؟؟با أخي من الذي اغتصب الوطن كله؟؟؟؟؟


ردود على nasereddin
United States [BRAVE] 06-18-2012 02:52 PM
ياله من سؤال!!!! دعونا ان لا نفقد الأمل فى استرجاع حقوق الوطن كله.


#396008 [abuali]
5.00/5 (2 صوت)

06-18-2012 11:33 AM
بس داير زول قارى قانون فى البلد دى يفهمنى موضوع عقوبات الاغتصاب ده. انا قريت طب ودرسنا فى الطب الشرعى انو القانون بيقول ممارسة الجنس مع قاصر يعنى اقل من سن 18 يعتبر اغتصاب و يحاكم المتهم بالاعدام. اما اللواط فالحكم فيه بالاعدام طوالى. بعد ده يجى واحد و يغتصب شافعة و يدوهو كم سنة سجن و ما بيعدموهو الا لو كتلها بعد الاغتصاب!!!!و الكلام ده برضو بيحصل لمن واحد يغتصب ذكر مع انو دى جريمتين فى واحد يعنى لواط و اغتصاب و برضو كم سنة سجن و كم شحطة سوط!!!!! فهمونا يا اخوانا القوانين غيروها و لا شنو لأنى استخدمت كل مقاسات الفهامات و كل انواعها و برضو ما فهمت حاجة.


#395986 [مشكلة]
5.00/5 (1 صوت)

06-18-2012 11:10 AM
يعني نرجع زي زمان ونمنع بناتان من التعليم ونخليهن لي عواسة الكسرة



كسرة : المدرسة دي ما فيها معلمات


ردود على مشكلة
United States [ابره] 06-18-2012 02:04 PM
يا مشكلة امان ما كسرتك قويه


#395975 [كامل عبدالرحمن محمد]
5.00/5 (5 صوت)

06-18-2012 11:03 AM
استاذنا الجليل جبرا على بالطلاق نحن من شدة الجوع قرينا عبارتك الشهيرة فى نهاية المقال (كسرة )كسرة الوجبة الاساسية فى نظام النفاق


#395969 [اوطان]
5.00/5 (4 صوت)

06-18-2012 10:56 AM
استاذ جبره تحياتى ونرجو ان تعرج بنا هذه الايام الى الشارع حيث لغة الشعب يريد اسقاط النظام والبمبان لان هذا التغير سوف يغير كل ماهو سى فى بلادى من


#395934 [المشتهي الكمونية]
3.00/5 (2 صوت)

06-18-2012 10:32 AM
ما تقولها بالواضح يا استاذ
أسباب الانهيار الأخلاقي في المجتمع هو نظام الكيزان المجرم والشاهد الرئيسي مركز أطفال المايقوما ، تفرغوا للسرقة والنهب وأجاعوا الشعب وأذلوه وأهدروا كرامته فسقطت الأخلاق والقيم المجتمعية السمحة وعم الفساد الأخلاقي


ردود على المشتهي الكمونية
United States [عمرابي] 06-18-2012 11:23 AM
اصلا هم عاوزين تلتين شعب السودان يكون من المايقوما من اللقطاء و المتشردين

ويقومو هم بتجنيدهم فى النجدة و العمليات و فى جهاذ امنهم

لضرب و قتل التلت الصالح من المجتمع ... الطلبة و المتعلمين و المثقفين


الفاتح يوسف جبرا
الفاتح يوسف جبرا

مساحة اعلانية
تقييم
9.97/10 (9 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة